༸ གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཁྲི་ལོར་བརྟན་པར་ཤོག

སྤྲུལ་འཁོར་སྐལ་བཟང་དོན་ལྡན།

རྗེ་བཙུན་འཇམ་དཔལ་ངག་གི་དབང་པོའི་སྐུ།།
སྙིང་རྗེའི་གཏེར་ཆེན་བློ་གྲོས་བཟང་པོའི་གསུང་།།
ཡེ་ཤེས་མཐུ་སྟོབས་གསང་བའི་བདག་པོའི་ཐུགས།།
རྒྱལ་བའི་དབང་པོ་བསྟན་འཛིན་རྒྱ་མཚོའི་སྡེ།།
ཡོངས་རྫོགས་བསྟན་པའི་བདག་པོར་ཞབས་བརྟན་གསོལ། །
ཞེས་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་རྡོ་རྗེར་གྱུར་ཅིང་མཁྱེན་པའི་ཆ་ལས་རྗེ་བཙུན་འཇམ་དཔལ་དབྱངས།   སངས་རྒྱས་ཐམས་ཅད་ཀྱི་གསུང་རྡོ་རྗེར་གྱུར་ཅིང་བརྩེ་བའི་ཆ་ལས་འཕགས་མཆོག་སྤྱན་རས་གཟིགས།  སངས་རྒྱས་ཐམས་་ཅད་ཀྱི་ཐུགས་རྡོ་རྗེར་གྱུར་ཅིང་ནུས་པའི་ཆ་ལས་མཐུ་སྟོབས་ཀྱི་བདག་པོ་དཔལ་ཕྱག་ན་རྡོ་རྗེ། དེ་ལྟ་བུའི་ཕྱོགས་དུས་རྒྱལ་བ་སྲས་དང་བཅས་པ་ཐམས་ཅད་ཀྱི་མཁྱེན་བརྩེ་ནུས་པའི་ཡོན་ཏན་གཅིག་ཏུ་བསྡུས་ཤིང་འཕགས་པ་རིགས་གསུམ་མགོན་པོ་དང་ངོ་བོ་དབྱེར་མ་མཆིས་པའི་མཉམ་མེད་སྤྲུལ་པའི་སྐྱེས་མཆོག་ཆེན་པོ།  ཁམས་གསུམ་ཆོས་ཀྱི་རྒྱལ་པོ་ཆེན་པོ། འཛམ་གླིང་ཞི་བདེའི་དེད་དཔོན་ཆེན་པོ། ཡོངས་རྫོགས་བསྟན་པའི་མངའ་བདག་ཆེན་པོ། བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་ཆེན་པོ། དད་ལྡན་མི་དམངས་ཡོངས་ཀྱི་བསོད་ནམས་ཀྱི་ཞིང་མཆོག་ཆེན་པོ། རིས་མེད་འགྲོ་བ་སེམས་ཅན་ཐམས་ཅད་ཀྱི་ཚེ་རབས་འདི་ཕྱི་གཏན་གྱི་བླ་ན་མེད་པའི་སྐྱབས་གནས་ཆེན་པོ།  སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ།  དགོས་པ་དང་དོན་གྱི་སླད་དུ་མཚན་ནས་སྨོས་ན་༸ རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་སྐུ་ལ་སྙུན་མི་མངའ་ཞིང་སྐུ་ཁམས་བཟང་ལ་སྐུ་ཚེ་རིང་བ་དམར་སེར་མདངས་འཁྱུད་ཀྱི་མཚན་དཔེས་རྫོགས་པའི་སྐུ་འཇམ་དཔལ་གཞོན་ནུར་གྱུར་པ་ལྟར་གཞོན་ཆར་གྱུར་པ།   གསུང་འགག་པ་མེད་ཅིང་དོན་ཆེ་ལ་ཚིག་འབྲུ་བཟང་བའི་ཆོས་དབྱངས་སྙན་ལ་འཚོ་བཞིན་གཞེས་ལ་ཟབ་རྒྱས་གསུང་གི་ཆོས་ཀྱང་སྟོན་པའི་གསུང་དབྱངས་ཡན་ལག་དྲུག་ཅུར་གྱུར་པའི་རྗེ་བཙུན་སྤྱན་རས་གཟིགས་ཀྱི་གསུང་ལྟར་ཚངས་དབྱངས་སུ་གྱུར་པ།  ཐུགས་འཁྲུལ་པ་གཏན་ནས་མེད་ཅིང་ནམ་ཡང་བསླུ་བ་མེད་པའི་འཕགས་པའི་ཐུགས་འཁྲུལ་པ་མེད་པ་ནུས་པའི་སྟོབས་ཡོངས་སུ་རྫོགས་པའི་ཐུགས་གསང་བདག་ཕྱག་ན་རྡོ་རྗེ་ལྟར་ཐམས་ཅད་ཡོངས་སུ་མཁྱེན་པར་གྱུར་པ། མདོར་ན་འཕགས་མཆོག་རིགས་གསུམ་མགོན་པོའི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་གཅིག་ཏུ་སྡུད་པའི་༸ སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་༸ གོང་ས་རྒྱལ་བ་རིན་པོ་ཆེ་མཆོག་ནམ་ཡང་སྐུ་ཚེ་ཁྲི་ལོར་བརྟན་པར་ཤོག །ཅེས་གོང་གསལ་ཚིགས་བཅད་ཤོ་ལོ་ཀ་འདི་ནི་སྔ་འགྱུར་རྙིང་མའི་སྐྱེས་ཆེན་དམ་པ་རྫ་རོང་འཁྲུལ་ཞིག་རིན་པོ་ཆེ་མཆོག་གིས་བརྩམས་གནང་མཛད་པའི་བརྟན་ཞུགས་ཀྱི་གསོལ་འདེབས་བྱིན་རླབས་ཀྱི་ཚན་ཁ་ཆེ་བའི་གསུང་རྩ་ཆེན་ཞིག་ཡིན་སྟབས་སྤྲུལ་འཁོར་སྐལ་བཟང་དོན་ལྡན་གྱིས་སྨོན་ཚིག་འགྲེལ་པ་མདོར་བསྡུས་ཙམ་སུག་བྲིས་བགྱིས།

༸ གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཁྲི་ལོར་བརྟན་པར་ཤོག  བོད་རྒྱལ་ལོ།།   སྤྱི་ལོ་ ༢༠༡༣། ཟླ་ ༡། ཚེས་ ༦ ཉིན།།  །།