འདས་པའི་ཉིན་འགའ་ཞིག་གི་སྔོན་དུ་བོད་མིའི་སྒྲིག་འཛུགས་ཀྱི་བཀུར་འོས་སྤྱི་འཐུས་རྣམས་ཚོགས་ཆུང་ཁག་བགོས་ཀྱིས་རྒྱ་གར་གྱི་མངའ་སྡེ་མང་པོའི་ནང་རྒྱ་གར་གཞུང་མང་གཉིས་ལ་བོད་དོན་རྒྱབ་སྐྱོར་ཡོང་ཐབས་ཞུ་སྐུལ་འདྲ་མིན་གནང་ཡོད་པ་དང༌། ཕྱོགས་གཞན་ཞིག་ནི་རྒྱ་དམར་གྱིས་བོད་བཙན་བཟུང་བྱས་ནས་བོད་ཙམ་མ་ཡིན་པར་རྒྱ་གར་ལའང་ཉེན་ཁ་ཇི་འདྲ་ཐེབས་བཞིན་ཡོད་མེད་དྲན་སྐུལ་ཡང་གནང་ཡོད་པ་རེད།
དེ་ལྟར་རྒྱ་གར་གྱི་མངའ་སྡེ་འགོ་ཀ་ཤི་མི་རི་ནས་མཇུག་ཀན་ཡ་ཀུ་མ་རི་བར་སྤྱི་འཐུས་རྣམས་ཞལ་ཚ་ཚ་དང་ཞབས་ན་ན་བྱས་ནས་རྒྱུག་པ་དེ་ཡང་གཙོ་བོ་ཞུ་སྐུལ་དང་དྲན་སྐུལ་དེ་གཉིས་ཆེད་དུ་ཡིན་པ་ཕལ་ཆེར་གསལ་པོ་རེད། དེ་རིང་བཀའ་སྤྱི་ཐུན་མོང་གི་གདུང་སེམས་མཉམ་སྐྱེད་ཀྱི་ལས་འགུལ་གཞི་རྒྱ་ཆེན་པོ་དེ་ཡང་རྒྱ་གར་གྱི་རྒྱལ་ས་ལྡི་ལི་རུ་ཚ་ཚ་འུར་འུར་བྱས་ནས་སྤེལ་དང་སྤེལ་མུས་ཡིན་པ་མ་ཟད། བོད་ནི་རྒྱ་གར་གྱི་རིག་གཞུང་མཆེད་སྐྱོང་བྱེད་ས་ཡིན། བོད་མིའི་རིག་གཞུང་སྲུང་སྐྱོབ་ལ་རོགས་འདེགས་བྱེད་དགོས།(Tibet is an extension of Indian culture. Help to save Tibetan culture) ཞེས་དབྱིན་ཡིག་ཐོག་འཁོད་པའི་གོང་གསལ་ཡིག་ཆེན་དམར་ནག་ཟུང་འབྲེལ་ཅན་གྱི་ཕྲེད་དར་ཆེན་པོ་ཞིག་གི་འོག་ནས་སྲིད་སྐྱོང་བློ་སེང་མཆོག་དང་ཚོགས་གཙོ་སྤེན་ཚེ་རྣམ་གཉིས་ཀྱི་སྣེ་འཁྲིད་འོག་བོད་མི་སྟོང་ཚོ་མང་པོས་ཞི་བའི་གོམ་བགྲོད་དང༌། སྨོན་ལམ་མཆོད་འབུལ། ཟས་བཅད་ངོ་རྒོལ་སོགས་བོད་མིའི་གདུང་སེམས་མཉམ་སྐྱེད་ཀྱི་ལས་འགུལ་སྤེལ་བ་འདིའི་ཟུར་ནས་རྒྱ་གར་གཞུང་མང་གཉིས་ལའང་ཆེད་དམིགས་བརྡ་ཞིག་གཏོང་བཞིན་པ་ང་ཚོས་གསལ་པོ་མཐོང་ཐུབ་པ་ཡིན།
ད་ལན་བོད་གཞུང་མང་གཉིས་ནས་རྟ་ཁ་མཉམ་སྒྲིག་དང་གྲི་ཁ་མཉམ་འཕྱར་བྱས་ནས་བོད་ཀྱི་དེ་འབྱུང་རིག་པའི་ནང་བྱུང་མྱོང་མེད་པའི་ལས་འགུལ་འདི་ལྟ་བུ་གཞི་རྒྱ་ཆེན་པོ་ཞིག་སྤེལ་ཡོད་ཀྱང་ང་ཚོས་རེ་བ་བྱས་པ་ལྟར་རྒྱལ་སྤྱིའི་གསར་འགྱུར་བརྒྱུད་ལམ་ཆེ་ཁག་ནང་གནས་ཚུལ་ཆེན་པོ་ཞིག་ཏུ་བསྒྱུར་ཐུབ་མེད་པ་ནི་དེའི་རྒྱུ་རྐྱེན་གང་ལ་ཐུག་ཡོད་མེད་བཤད་ཚོད་མ་ཐིག་ཀྱང་བོད་མིའི་ཁྲག་རྒྱུན་ཡོད་མཁན་ཞིག་ཡིན་ཕྱིན་ཅུང་ཟད་བློ་ཕམ་མི་བྱེད་ཀ་མེད་ཞིག་ཏུ་གྱུར་ཡོད། འོན་ཀྱང༌། ད་ལན་ང་ཚོས་རྒྱ་གར་གཞུང་མང་གཉིས་ལ་ཛ་དྲག་རང་བཞིན་ཅན་གྱི་བརྡ་མང་པོ་ཞིག་བཏང་ཐུབ་ཡོད་ལ། བརྡ་དེའི་འཕྲོས་ནས་ང་ཚོར་སྔར་མེད་པའི་རྒྱབ་སྐྱོར་དང་གདུང་སེམས་མཉམ་སྐྱེད་བྱེད་མཁན་རྒྱ་གར་གྱི་མི་སྣ་གལ་ཆེན་མང་པོ་ཞིག་རང་རེའི་འདས་གསོན་གྱི་དཔའ་བོ་དཔའ་མོ་ཚོའི་མདུན་དུ་ཐོན་བཅུག་ཡོད་པ་ནི་ལས་འགུལ་འདིའི་རྒྱལ་ཁ་གཙོ་གནད་ཅིག་ཏུ་བརྩི་ཆོག་པ་ཡིན། འགྲེལ་བཤད་ཇི་ལྟར་བྱས་ཀྱང་མདོར་བསྡུས་ནས་བཤད་ན་བཀའ་སྤྱི་གཉིས་ཀྱིས་རྒྱ་གར་གཞུང་མང་གཉིས་ལ་དྲན་སྐུལ་གཏོང་བཞིན་པའི་བརྡ་དེ་དག་གི་སྙིང་དོན་ངོ་མ་ནི་བོད་ཀྱི་ཉེན་ཁ་ནི་རྒྱ་གར་གྱི་ཉེན་ཁ་ཡིན་ཟེར་གྱི་ཡོད་པ་རེད། བོད་ཀྱི་ཉེན་ཁ་ནི་རྒྱ་གར་གྱི་ཉེན་ཁ་ཡིན་པའི་གནས་ལུགས་ག་ཚོད་ཡོད་པ་རྣམས་འུ་ཚོ་བོད་མི་རེ་ངོ་རེས་ཀྱང་ངེས་པར་ཤེས་ཐབས་གནང་དགོས་པ་མ་ཟད། རྒྱ་གར་མི་མང་ལའང་ངེས་པར་ཤེས་ཐབས་གནང་རྒྱུའི་འགན་འཁྲི་དེའང་རང་རང་སོ་སོའི་ཕྲག་ཏུ་བབས་ཡོད་པ་ཡིན།
ངས་འདིར་ཉེན་ཁ་རང་བཞིན་ཅན་གྱི་གནས་ཚུལ་ཁག་གཅིག་ལེ་སྒྲིག་བྱེད་རྒྱུའི་འདོད་འབབ་བྱུང༌། ཕྱི་ལོ་ ༡༩༤༩ གོང་སྟེ་རྒྱ་དམར་བོད་དུ་བཙན་འཛུལ་མ་བྱས་གོང་བོད་དེ་རང་དབང་རང་བཙན་གཙང་མ་ཡིན་པའི་རྒྱལ་ཁབ་ཅིག་ཡིན། དེ་དུས་རྒྱ་གར་ལ་རྒྱ་ནག་ཕྱོགས་ནས་ཉེན་ཁ་སྤྲད་པའི་ལོ་རྒྱུས་ཕལ་ཆེར་བཤད་དུ་མེད་པ་མ་ཟད། བོད་ནི་རྒྱ་དཀར་ནག་དབར་བདེ་འཇགས་སྲུང་བའི་ཞི་བདེའི་རྒྱལ་ཁབ་གཅིག་པུ་དེ་ཡིན། འོན་ཀྱང་ད་ལྟའི་དུས་ཚོད་ལ་མཚོན་ན་རྒྱ་དཀར་ནག་དབར་སྔར་མེད་པའི་ས་མཚམས་ཀྱི་རྩོད་རྙོག་སོགས་དཀའ་ཁག་དུ་མ་ཞིག་ལོ་རེ་ནས་ཆར་རྗེས་ཀྱི་ཤ་མོང་བཞིན་ཛ་དྲག་ཇེ་ཆེར་ངང་རྡོལ་ཡོང་བ་ནི་བོད་རྒྱ་འོག་ཏུ་ཤོར་བའི་ཉེར་ལེན་དེ་ཁོ་ནའི་དབང་གིས་བྱུང་བ་བརྗོད་ཅི་དགོས།
དེ་རྗེས་མགོ་ཐར་ལུས་འཛུལ་གྱི་དཔེ་ལྟར་རྒྱ་དམར་གྱིས་བོད་བཙན་བཟུང་བྱས་ཏེ་ཡུན་རིང་མ་སོང་བར་བོད་དེ་ཁོ་པའི་དམག་གི་རྟེན་གཞི་ལྟ་བུར་བཀོལ་སྤྱོད་བཏང་ཡོད་ཅིང༌། དེ་ལ་བརྟེན་ནས་ཕྱི་ལོ་ ༡༩༦༢ ལོར་རྒྱ་དམར་གྱིས་ལས་སླ་པོའི་ངང་རྒྱ་གར་ཐོག་བཙན་རྒོལ་བྱས་ཏེ་རྒྱ་གར་གྱི་དམག་མི་སྟོང་ཕྲག་མང་པོ་གསོད་རྨས་དང་ས་ཆ་སྤྱི་ལེ་མང་པོ་བཙན་འཕྲོག་བྱས་པ་སོགས་རྒྱ་གར་གྱི་ལོ་རྒྱུས་ནང་བྱུང་མྱོང་མེད་པའི་ཕམ་ཁའི་ནག་ཐིག་ཆེན་པོ་དེ་རྒྱ་གར་རང་ངོས་ནས་མི་འདོད་བཞིན་དུ་འཁུར་དགོས་བྱུང་བ་ནི་རྒྱ་དམར་གྱིས་བོད་བཙན་བཟུང་བྱས་པའི་མཇུག་འབྲས་དང་པོ་དེ་ཡིན་པ་རེད། དེའི་སྐབས་གཅེས་སྲོག་ཤོར་བའི་རྒྱ་གར་གྱི་རྒྱལ་གཅེས་དཔའ་བོ་དཔའ་མོ་དེ་ཚོའི་རྣམ་ཤེས་ཀྱིས་ཤི་དུར་ཁ་ནས་ད་དུང་ཡང་རྒྱ་གར་གཞུང་མང་གཉིས་ལ་ཅེར་ནས་བསྡད་ཡོད་པ་བརྗོད་ག་ལ་དགོས།
དེ་ལྟར་རྒྱ་དམར་རིམ་གྱིས་བཙན་འཛུལ་བྱས་ཏེ་བོད་ཀྱི་མཐའ་མཚམས་ཡོངས་སུ་དམག་ས་བཟུང་པས་རྒྱ་གར་གཞུང་ནས་མི་འདོད་བཞིན་དུ་རྒྱ་གར་རང་ཉིད་སྲུང་སྐྱོབ་ཆེད་རི་བོ་ཧི་མ་ལ་ཡའི་མཐའ་མཚམས་ཁག་ཏུ་འགྲོ་གྲོན་དུང་ཕྱུར་མང་པོ་བཏང་དགོས་བྱུང་བ་འདིས་རྒྱ་གར་རང་ཉིད་ཀྱི་མི་སེར་དཀྱུས་མ་རྣམས་ལ་སློབ་སྦྱོང་དང༌། སྨན་བཅོས་སོགས་ཐ་ན་གཞི་རྩའི་དགོས་མཁོ་མང་པོ་མཐུན་སྦྱོར་གནང་རྒྱུར་མཛད་དཀའ་འཕྲད་བཞིན་པ་དེ་དག་གང་ལས་བྱུང་བའི་རྒྱུ་རྐྱེན་ཡང་རྒྱ་དམར་གྱིས་བོད་བཙན་བཟུང་བྱས་པ་དེ་ཁོ་ནའི་དབང་གིས་བྱུང་བ་ལོང་བས་བལྟས་ཀྱང་རྒྱལ་ཁམས་ཞེས་པའི་དཔེ་ལྟར་གྱུར་ཡོད།
རྒྱ་དམར་གྱིས་དེང་སྐབས་བོད་ཙམ་མ་ཟད་རྒྱ་གར་རང་ལ་དམིགས་པའི་རྡུལ་ཕྲན་མཚོན་ཆ་ཉར་འཇོག་བྱས་ཡོད་ལ། བོད་ཀྱི་ས་ཁུལ་མང་པོར་རྡུལ་ཕྲན་མཚོན་ཆའི་སྙིགས་རོ་གསོག་འཇོག་བྱས་དང་བྱེད་བཞིན་པ་དེས་བོད་བརྒྱུད་རྒྱ་གར་ནང་རྒྱུགས་བཞིན་པའི་ཆུ་ཀླུང་སེང་གེ་ཁ་བབས་སོགས་རྩ་ཆེའི་རྒྱུགས་ཆུ་མང་པོར་འབག་བཙོག་ཐེབས་ཏེ་རྒྱ་གར་ནང་ཁོར་ཡུག་གི་དཀའ་ངལ་དང་དམིགས་ཀར་འཐུང་ཆུའི་དཀའ་ངལ་ཇེ་སྡུག་ཏུ་འགྲོ་བཞིན་པ་མ་ཟད། རྒྱུགས་ཆུ་མང་པོ་ཁ་བསྒྱུར་བྱེད་འཆར་དང༌། འབྱུང་འགྱུར་རྒྱ་གར་ལ་ཉེན་ཁ་ཇི་ལྟར་འཕྲད་སྲིད་ཀྱང་ཉེ་འཆར་ཡར་ཀླུང་གཙང་པོར་གློག་མཛོད་རྒྱག་རྒྱུའི་ཧམ་གཏམ་སྒྲོག་བཞིན་པ། དེ་བཞིན་རྒྱ་དམར་གྱིས་བོད་ཀྱི་ནགས་ཀློང་ཚད་མེད་གཅོད་འདྲེག་བྱས་པའི་དབང་གིས་ཁོར་ཡུག་ལ་ཤུགས་རྐྱེན་ངན་པ་ཐེབས་ཏེ་གོང་གསལ་བོད་ནས་རྒྱུགས་བཞིན་པའི་ཆུ་བོ་དེ་ཚོས་རྒྱ་གར་དང༌། བལ་ཡུལ། བྷང་ལ་དྷེ་ཤེའི་ནང་ཆུ་ལོག་དང་ས་རུད་ཀྱིས་མི་རྒྱུ་གཉིས་ཀར་གནོད་སྐྱོན་ཆེན་པོ་བཏང་དང་གཏོང་བཞིན་པ་སོགས་རྒྱ་གར་ནི་སྔར་ལས་ཉེན་ཁ་ཇེ་ཆེར་འགྲོ་བཞིན་པ་ཡིན།
རྒྱ་དམར་གྱིས་བོད་བཙན་བཟུང་བྱེད་ཐུབ་པ་དེས་ཁོ་པ་བློ་ཁོག་དང་ཧམ་སེམས་ཇེ་ཆེར་ཕྱིན་ཏེ་རྒྱ་གར་ནང་འཇིགས་སྐུལ་རིང་ལུགས་པར་བློ་སྤོབས་སྤེལ་བ་དང༌། བོད་ཀྱི་ས་ཁུལ་བརྒྱུད་ནས་དེ་ཚོར་ལྐོག་ཏུ་ལག་ཆ་སྤྲད་པ་དང༌། མཐུན་རྐྱེན་སྦྱོར་བ། ད་དུང་རྒྱ་དམར་གྱིས་བོད་བཙན་བཟུང་བྱས་ཐུབ་པའི་རྐྱེན་གྱིས་རྒྱ་ནག་དང་པ་ཀི་སི་ཐན་དབར་ས་སྦྲེལ་གྱི་འབྲེལ་བ་གསར་པ་ཆགས་ཏེ་པ་ཀི་སི་ཐན་ལ་རྡུལ་ཕྲན་མཚོན་ཆ་དང༌། མེ་ཤུགས་ཕུར་མདའ་སོགས་རོགས་ངན་ཚད་མཐོ་སྦྱར་ཏེ་པ་ཀི་སི་ཐན་དང་རྒྱ་གར་དབར་དམག་འཁྲུག་ཐེངས་མང་སློངས་པ་དང༌། རྒྱ་གར་ནང་པ་ཀི་སི་ཐན་གྱི་འཇིགས་སྐུལ་རིང་ལུགས་པ་ལྐོག་སྲུང་བྱེད་པ་སོགས་ངན་རྒུ་ཚང་བའི་སྦྱོར་ངན་སྣ་མང་བརྩམས་ཡོད་པ་རྒྱལ་སྤྱིས་ཀྱང་དངོས་ར་འཕྲོད་པ་བྱུང་ཡོད།
དེ་ལྟར་རྒྱ་དམར་གྱིས་ལོ་རབས་ལྔ་བཅུ་ཙམ་ནས་བོད་ནང་མེ་འཁོར་ལྕགས་ལམ་འཛུགས་བསྐྲུན་བྱས་པ་དེས་རྒྱ་གར་གྱི་མཐའ་མཚམས་ཁག་ཏུ་དུས་ཡུན་ཐུང་ངུའི་ནང་གོ་མཚོན་ཆེ་གྲས་དང་དམག་གི་གྲངས་འབོར་ཕོན་ཆེ་དཔུང་གསོག་བྱས་ཏེ་དམིགས་བསལ་རྒྱ་གར་གྱི་བྱང་ཤར་གྱི་མཐའ་མཚམས་ཁག་ལ་ཉེན་ཁ་སྔ་ལས་ཇེ་ཆེར་འགྲོ་མུས་ཡིན་པ་སོགས་རྒྱ་གར་གྱི་འགོ་སྲིད་འཛིན་ནས་མཇུག་གད་པའི་བར་སྐྱེ་བོ་མཆོག་དམན་སུ་འདྲ་ཞིག་ཡིན་རུང་ཡར་ཁོག་ལ་སྙིང་གསོན་པོ་ཡོད་མཁན་ཞིག་ཡིན་ཕྱིན་བོད་པས་ཞུ་སྐུལ་དང་དྲན་སྐུལ་བྱེད་མིན་ལ་མ་ལྟོས་པར་ནམ་ཡང་བློ་ཁ་ནང་དུ་འགུག་དགོས་པའི་དུས་ཚོད་ཛ་དྲག་ཅིག་ཤར་ཡོད་པ་འདྲ།