གཡུ་དྲུག་དཀར།
ང་ནི་ས་ཆུང་ཆུང་ཞིག་དང་མི་ཉུང་ཉུང་ཞིག་མ་གཏོགས་མེད་པའི་ར་སྐོར་ཆུང་ཆུང་ཞིག་ཏུ་སྡོད་པ་དང་། ཉིན་བཞིན་ཕར་ཚུར་ལ་འགྲོ་སའི་ལམ་ཕྲན་གཅིག་ལས་མེད་ལ། ལམ་འདིའི་སྟེང་དུའང་ང་ཉིན་གཅིག་ལ་ཕར་སོང་ནས་ཚུར་ལོག་པ་ཙམ་ཡིན་མོད། ཉིན་བཞིན་ཕར་ཚུར་ལ་འགྲོ་ཞོར་དུ་ང་ལ་ཁ་བརྡ་བྱེད་ཆོག་ཆོག་དང་ཀུ་རེ་རྩེ་ཆོག་ཆོག་ཅིག་ཡོད་པ་ནི་བྱིས་པ་སྣབས་ལུག་ཁ་ཤས་ཡིན། ཁོང་ཚོའི་ཁམས་དང་མོས་པའི་དབང་གིས་ང་ལ་ཁོང་ཚོར་སྐད་ཆ་བཤད་སྟངས་དང་རྩེད་མོ་རྩེ་སྟངས་ཅི་རིགས་ཤིག་ཡོད་པ་མ་ཟད། ཁོང་ཚོའི་ཁྲོད་དུ་ང་ལ་མཉམ་འཇོག་ས་དམིགས་བསལ་ཞིག་ཡོད་ནི་ཕ་མ་འཕུར་ཤུལ་ན་ལུས་པའི་བུ་ཕྲུག་རྣམས་ཡིན།
གང་ཡིན་ཟེར་ན་ད་ལྟའི་དུས་སུ་བོད་ནང་དུ་རྒྱ་ནག་གིས་ཕ་མ་བསད་པའམ་བཙོན་དུ་གདགས་པའི་ཤུལ་ན་ལུས་པའི་དྭ་ཕྲུག་ཉིན་རེ་བཞིན་ཇེ་མང་དུ་འགྲོ་བ་དང་བཙན་བྱོལ་ཁྲོད་དུ་ཕ་མ་ནུབ་ལ་འཕུར་ཤུལ་ན་ལུས་པའི་དྭ་ཕྲུག་འདི་ཚོ་ལྟ་བུ་ཇེ་མང་དུ་འགྲོ་བཞིན་ཡོད་པས། སྤྱིར་བོད་པ་དྭ་ཕྲུག་གི་གྲངས་འབོར་ཇེ་མང་དུ་འགྲོ་བཞིན་འདུག་ལ། བོད་ཀྱི་ལོ་རྒྱུས་སྟེང་གི་དྭ་ཕྲུག་མང་ཤོས་ཀྱི་དུས་སྐབས་རེད་ཅེས་ཀྱང་སྨྲ་སྤོབས། དེ་བས་བུ་ཕྲུག་འདི་དག་གི་ཁྲོད་ནས་ཕ་མ་འཕུར་ཤུལ་གྱི་དྭ་ཕྲུག་ཚོ་མཐོང་དུས་གློ་བུར་དུ་སེམས་པ་སྐྱོ་སྣང་གིས་ཁེངས་འགྲོ།
སྤྱིར་ཕྲུ་གུ་འདི་ཚོའི་སླད་མེད་པའི་དྭངས་གཙང་གི་སེམས་ཁམས་ཇི་འདྲ་སྐྱིད་ཆོག་ཨང་། ཕ་མ་འཕུར་ཤུལ་གྱི་དྭ་ཕྲུག་ཚོ་ནམ་རྒྱུན་དུ་དེ་འདྲའི་བདེ་མོ་ཞིག་འེ་ཡིན་སྙམ། ཁོང་ཚོའི་གདོང་ན་ཕལ་ཆེར་དུས་རྒྱུན་དུ་སྣབས་དང་མིག་སྐྱག ཟས་ལྷག་སོགས་ཀྱིས་མཚོན་པའི་འབག་བཙོག་འདྲེས་མའི་ཁྲོད་སྐྱོ་སྡུག་གི་ཉམས་སྣང་ཞིག་འབུར་ཏུ་ཐོན་ཡོད་ལ། སྡུག་འདིས་ཁོང་ཚོའི་སེམས་ཁམས་ཀྱི་མེ་ཏོག་ཆུང་ཆུང་དེར་ཡང་ནག་ནོག་གི་སླད་ཅིག་ངང་གིས་བྱུགས་ཡོད་པ་གདོན་མི་ཟ། ལོས་ཡིན། ཕ་མ་གཉིས་ཀ་འཕུར་ཤུལ་ན་སྐྱ་ཅག་གེར་ལུས་པའི་དྭ་ཕྲུག་ཅིག་ལ་མཚོན་ན། དེ་ལ་སྤོ་བོ་དང་རྨོ་བོ། ཨ་ཞང་། ཨ་ནེ་སོགས་སྤུན་མཆེད་སུ་འདྲ་ཞིག་ཡོད་ཀྱང་། དེས་རང་གི་ཕ་མའི་བརྩེ་སེམས་ལྟ་བུ་ཞིག་སུ་ལས་ཚོར་བཏུབ་བམ། ཕ་མའི་བརྩེ་སེམས་ནི་ང་ཚོའི་ཁྲག་ཚ་བོ་དང་སྙིང་གསོན་པོ། རུས་པའི་རྐང་དང་སེམས་ཀྱི་བདེ་སྐྱིད་བཅས་ཀྱི་རྒྱུན་ཐག་ཡིན་པས། གཞན་གྱི་ཤ་རློན་པ་ལས་རྙེད་མི་ཐུབ་ཅིང་། ལྷག་པར་དུ་དྭ་ཕྲུག་འདི་ཚོར་གང་དྲན་དྲན་གྱི་བྱ་སྤྱོད་སྤེལ་ཆོག་པའི་ཕ་ཁྱིམ་ཞིག་དང་ཅི་འདོད་འདོད་བཤད་ཆོག་པའི་ཕ་མ་མེད་པས། ཁོང་ཚོའི་མིག་འབྲས་ཆུང་ཆུང་གཉིས་ཀྱིས་ལྟ་སའི་ཁོར་ཡུག་ཆུང་དྲགས་ནས་ཕྲུ་གུའི་རང་འདོད་ཀྱི་རང་བཞིན་ལ་བཀག་རྒྱ་ཆེན་པོ་ཐེབས་ཤིང་། ཁོང་ཚོའི་གདོང་ན་སྡུག་ཅིག་ཡོད་པའང་གུ་དོགས་པའི་འཇིག་རྟེན་ཞིག་གི་སྡུག་ཡུས་ལས་ཅི། གཞན་ཕ་མ་གཉིས་ཀྱི་གང་རུང་ཞིག་འཕུར་ཤུལ་གྱི་བུ་ཕྲུག་ཅིག་མཐོང་ཐེངས་རེར་དགོད་བྲོ་ལ་ངུ་སྐྱེན་པའི་ལྟད་མོ་ཅི་རིགས་མཐོང་ཐུབ། རྒྱུ་མཚན་ནི་མཚམས་རེར་ཁོང་ཚོ་དགའ་ནས་སྐྱིད་ནས་གདོང་ན་མེ་ཏོག་བཞད་ཅིང་། སེམས་ཀྱི་རྟ་ཕོ་རི་གསུམ་རྩེ་ན་འཕུར་གྱིན་གདའ་ཡང་། ལན་རེར་ཁོ་ཚོ་སྡུག་ནས་སྐྱོ་ནས་གདོང་ན་མིག་ཟུང་ལས་འཐོར་བའི་མཆི་མའི་ཆར་འབབ་ཅིང་། བྲང་གཞུང་ན་སྐྱོམ་པའང་དགུན་གྱི་གྲང་ངར་ལྟ་བུའི་སྐྱོ་སྡུག་རྣམ་ཤེས་ཡིན། འདི་ནི་ལག་པ་གཅིག་གིས་གནམ་མི་ཁེབས་ཟེར་ལྟར་ཁོ་ཚོའི་བདག་པོ་གཅིག་པུ་རྒྱས་སྤྲོས་ཀྱི་འཁོར་བའི་ལས་བྲེལ་ལམ། རྣམ་གཡེང་དང་ལེ་ལོ། སྒྱུད་ལུག་བཅས་ཀྱི་ཚོར་འདུའི་བསླུ་བྲིད་འཐེབས་ཏེ། ཕྲུ་གུ་ལ་དུས་ལྟར་ལྟ་སྐྱོང་བྱེད་པའི་བསྐལ་བ་ཞིག་མ་ལྡན་པས་བྱུང་ཞིང་། དེ་བས་ཀྱང་དངོས་ཡོད་གནས་ཚུལ་ཅིག་ནི་ཁོ་ཚོའི་བདག་པོ་གཅིག་པུ་ཆང་རག་དང་ཤོ་ལ་རྒྱས་མཁན་ཞིག་ཡིན་ཚེ། སྐབས་རེར་ལན་ཆགས་འདི་ཞེས་གདོང་ལ་མཛུབ་མོ་ཀེར་བ་དང་། ལན་རེར་བདག་མེད་དུ་ལུས་འགྲོ་བ་སོགས་ཀྱི་རྒྱུན་ལྡན་གྱི་ལྟད་མོ་འདི་རེད། བཀྲ་མི་ཤིས་པའི་རྐྱེན་དབང་འདི་དག་གི་དབང་གིས་དྭ་ཕྲུག་ཚོའི་སེམས་ན་བརྟན་བརླིང་གི་ངལ་གསོ་ས་ཞིག་མེད་པས་མི་ཚད། ཐ་ན་ཉིན་གཅིག་གི་ལྟོ་རག་མིན་ལའང་ཐེ་ཚོམ་དང་དངངས་སྐྲག་ཆེན་པོ་སྐྱེ་བཞིན་གདོང་གི་སྐྱི་མོ་མིག་ཆུས་བརླན་པ་རེད་ལ། ཁོང་ཚོའི་ལུས་སེམས་ཀྱི་འཚར་ལོང་ལས་ཀྱང་ང་ཚོར་དྭ་ཕྲུག་གི་ཉམས་སྣང་འགོག་མེད་དུ་འཆར་ངེས།
ད་དུང་ཉིན་རྒྱུན་ཕ་མ་འཕུར་ཤུལ་གྱི་དྭ་ཕྲུག་འདི་ཚོ་མཐོང་དུས་སེམས་ལ་སྐྲག་གཞན་ཞིག་སྐྱེ་འོང་པ་ནི་བོད་མི་རིགས་ཀྱི་སྙིང་གི་འདར་ཟུག་ཡིན་ཆོག་སྟེ། ང་རང་སྡོད་ས་ཆུང་ཆུང་དང་མི་ཉུང་ཉུང་ཞིག་ལས་མེད་ས་འདིར་བཟའ་ཟླ་གཉིས་འཛོམས་ཀྱི་ཁྱིམ་ཚང་དེ་བས་ཀྱང་ཉུང་ཉུང་ཞིག་ལས་མེད་མོད། ཕ་མ་གཉིས་འཕུར་ཤུལ་གྱི་དྭ་ཕྲུག་ཉུང་ཉུང་མིན་པས། དངངས་སྐྲག་སྐྱེས་དགོས་པ་ཞིག་ཅེས་ཀྱང་རེད། ང་ཚོ་རྒྱ་དམར་པོའི་བཙན་གནོན་འོག་སྡོད་ཐབས་མ་བྱུང་པར་རང་གི་ཕ་ས་ཕ་ཡུལ་བཞག་ནས་མི་ཡུལ་འདིར་གྱར་དགོས་བྱུང་ཞིང་། ས་འདི་ནས་༸གོང་ས་མཆོག་གི་ཐུགས་རྗེའི་འོད་ཟེར་འོག་ཁ་སྐྱིད་ཅིང་རྒྱབ་དྲོ་བཞིན་དུ་ད་དུང་རང་གི་ཤ་ཁྲག་ལས་མཆེད་པའི་བུ་ཕྲུག་དྭ་ཕྲུག་ཏུ་བཞག་ནས་དཀར་སིང་སིང་གི་རང་གི་རུས་པ་ཡན་ཆད་བཙོང་ནས་ནུབ་ཕྱོགས་ལ་འཕུར་དོན་ཅི་རེད། ང་ཚོའི་རེ་སྙེག་གསོན་པོ་རུ་གྱུར་བའི་མི་རིགས་དང་རྒྱལ་ཁབ། རིག་གཞུང་ལ་རྒྱ། རང་དབང་དང་ཐོབ་ཐང་སོགས་ཨ་རི་དང་བྷེལ་ཇཱམ། ཨིན་ལན་དང་ཧྥ་རིན་སི་སོགས་བོད་པ་མང་པོ་འཕུར་སོང་བ་དང་འགྲོ་ས་དེ་དག་ཏུ་ཡོད་པ་འེ་རེད། སྐབས་འདི་འདྲར་དྲན་འོང་པ་ནི་སུང་ཀྲན་ཧྲན་གྱིས་ ཀྲུང་གོའི་མི་སེར་རྣམས་དབུལ་དྲགས་པས་རྒྱུ་འབྱོར་བ་རྒྱས་པར་རེ་ལྟོས་ཆེན་པོ་འཆའ་བ་ལས་དམངས་གཙོ་དང་རང་དབང་ལ་རེ་ལྟོས་ཆེར་མི་བྱེད། དེའི་སྟབས་ཀྱིས་སྐྱེ་བོ་ཤེས་ལྡན་ཁ་ཤས་ཀྱིས་དམངས་གཙོ་དང་རང་དབང་འཐོབ་ཕྱིར་གཅེས་སྲོག་འབེན་ལ་བཞག་ཀྱང་། མི་སེར་རྣམས་ཀྱིས་སྣང་དོགས་ཙམ་ཡང་མི་བྱེད། དམངས་གཙོ་དང་རང་དབང་མ་ཐོབ་རུང་སྡུག་རྒྱུའང་མེད་དོ། ཅེས་བརྗོད་པའི་སྐད་ཆ་དུམ་བུ་འདིའི་ནང་གི་རྒྱ་ནག་གི་གནས་སྟངས་འདི་རེད།
ངོ་མ་ང་ཚོའང་སྐྱོ་ཐག་ཆོད་ནས་ད་ལྟ་སེམས་ནང་ལ་རང་དབང་དང་མང་གཙོ་ཟེར་རྒྱུ་ཞིག་འཁོར་ཐུབ་ཀྱིན་མེད་ཚོད་དུ་གདའ་ལ། དེ་ཡང་ལོ་རྒྱུས་ཀྱི་རྒྱབ་ལྗོངས་བཙན་པོ་ཞིག་གི་ངན་རྟགས་ལས་དེ་རིང་གློ་བུར་དུ་འགྱུར་སོང་བ་ཞིག་ག་ལ་ཡིན། ང་ཚོའི་ལོ་རྒྱུས་ཀྱི་འགོ་ཡར་ཀླུང་ནས་མདོ་དེ་རིང་གི་སྐྱབས་བཅོལ་གྱི་གནས་སྟངས་འདི་བར་དུ་བོད་མི་རིགས་དར་འདུག་ཟེར་རྒྱུ་ཞིག་ཡོད་པ་ནི་མི་རྗེ་སྲོང་བཙན་སྒམ་པོའི་སྐབས་རེད་ལ། དེའང་ཕལ་ཆེར་མི་ཐོག་གཅིག་ཙམ་རེད། དེའི་གཞུག་ནས་བློ་མིག་ལྡན་པ་རེ་ཟུང་གིས་ད་ལྟའི་གནས་སྟངས་འདི་འདྲ་ཞིག་འབྱུང་རྒྱུ་ཡིན་པ་མཁྱེན་ནས་སྐབས་དང་དུས་སྨན་པའི་མེ་བཙའ་བཞག་མྱོང་ཡང་། ང་ཚོའི་འཁོར་ཡུག་འདིའི་མུན་པའི་རྔམ་ཁ་འཐུག་དྲགས་པས་ནམ་ལངས་མ་ཐུབ་པར་མུན་པའི་ཇེ་ནག་ཏུ་སོང་ནས་གཡང་ངོས་གཟར་བོ་འདིར་ལྷུང་སོང་ནི་རེད་ལ། དེ་རིང་ད་དུང་ང་ཚོས་མི་རིགས་དང་རྒྱལ་ཁབ། རིག་གཞུང་དང་ལ་རྒྱ། རང་དབང་དང་མང་གཙོ་སོགས་དྲན་པའི་ྐློང་ནས་བོར་ཏེ་དོ་སྣང་མི་བྱེད་པར་མ་ཟད། རྒྱུ་འབྱོར་བའི་དོན་དུ་གཞན་ལ་ཁྲེལ་དང་ངོ་ཚ་མེད་ཅིང་། ཐ་ན་རང་གིས་རང་ཡང་བཙོང་ནས་མི་ངོ་རེ་རེའི་བླ་སྲོག་དང་འདུ་ཤེས་རིན་ཐང་ཡོད་ཚད་རྒྱུ་ནོམ་པ་ཙམ་ཁོ་ནར་བརྗེ་འེ་ཐུབ་ལ་ལྟ་བ་ནི། ང་ཚོས་ད་དུང་ས་རིམ་པ་དགུ་བསྐོ་བཞིན་ཐུར་དུ་འགྲོ་བ་ལགས་ལ། མི་ཚོགས་འདིའི་རྔམ་ཁ་ལ་ལྟོས་དུས་ནམ་ཞིག་བོད་ཁ་བ་ཅན་ཡང་བུ་ཕྲུག་འདི་དག་བཞིན་དྭ་ཕྲུག་ཏུ་ལུས་འགྲོ་བའི་སྣང་སྟེར་ན། ཕ་མ་འཕུར་ཤུལ་གྱི་དྭ་ཕྲུག་འདི་ཚོ་མཐོང་དུས་སྙིང་ལ་འདར་ཟུག་མི་རྒྱག་ཐབས་མེད་རེད།།