རྔ་བ་ཀུན་བཟང་།
ཁ་བ ་་་་་་ངའི་རྨི་ལམ་ནང་གི་ཁ་བ
ལྷབ་ལྷུབ་དུ་བབས་པ་་་་་་་ཅི་འདྲ་མཛེས་ཨང་
ཁྱེད་ཀྱི་དྭངས་གཙང་གི་ཁ་མདོག་རེ་རེར
སུས་ཀྱང་ཡིད་དུ་འོང་སྲིད་ལ་
ཁྱོད་རང་ཟིམ་ཟིམ་དུ་འབབ་ཐེངས་ཀྱི་བདེ་སྐྱིད་རེ་རེ
ངས་རྨི་ལམ་གྱི་འཇིག་རྟེན་སྔར་ལས་འོད་མདངས་འགྱུར
ཁ་བ་་་་་་་ངའི་རྨི་ལམ་ནང་གི་ཁ་བ
ཁྱེད་བབས་ཐེངས་རེ་རེ་ལ་
མཐོ་ཞིང་བརྗིད་པའི་རི་ལུང་ཐམས་ཅད་གོས་དཀར་གྱོན་ལ་
སྙན་ཤིང་འཁྲི་བའི་ནགས་ཚལ་ཡོད་ཚད་ལྷིང་འཇགས་ངེར་
ཡིད་དུ་འོང་བའི་ལོ་ཆུང་བྱིས་པས་རྩེད་དགའ་རོལ་བཞིན་
ཁ་བ་དང་བདག་གི་ལོ་རྒྱུས་
དར་རྒུད་ཀྱི་གསོན་ཤུགས་གླེང་གིན་
ཁ་སང་་་་་་་གཏམ་རྒྱུད་རྫོགས་རྒྱུ་མེད་པའི་བྱིས་སྒྲུང་ཞིག་དང་
དེ་རིང་་་་་་་དར་རྒྱུད་ཉམས་རྒྱུ་མེད་པའི་ཨ་མྱེས་གནའ་གཏམ་བཞིན་
སང་ཉིན་ ཁ་བ་ཁྱོད་ཀྱི་མཛེས་སྡུག་རུམ་ཞོར་
ཆེས་ཡངས་བའི་རྩ་ཐང་གི་མེ་ཏོག་རྐང་རེ་རེར་སྒྲིག་ཞོར་
འདི་ལྟར་མི་ཡུལ་ན་གཏམ་རྒྱུད་ཅིག་རིམ་བཞིན་བྲིས་
ཁ་བ་་་་་་་་ ངའི་རྨི་ལམ་ནང་གི་ཁ་བ
ཁྱོད་ནི་་ ་་ནམ་ཡང་འཇིག་རྟེན་ཞིག་གི་རྒྱན་ཆ་དང་
ཁྱོད་ནི་་་་འཇིག་རྟེན་གསར་པ་ཞིག་གི་རང་གཤིས་ཀྱི་མཛེས་སྡུག་ཡིན་པས་
ཁྱོད་ནི་་་་་ཁམས་གསུམ་དེ་མེ་ཏོག་སྟེ་
ཁ་བ་ ངས་རྨི་ལམ་་ནང་གི་ཁ་བ
ཁྱེད་ཡོད་པས
ངའི་རྨི་ལམ་ཀྱི་འཇིག་རྟེན་ན
དྲག་རླུང་འུར་འུར་ཀྱིས་འུར་སྒྲ་ཆེ་ཡང་
གྲང་ཤུར་ཤུར་གྱི་གདུང་བ་ནམ་ཡང་སྐྱེ་མི་སྲིད་པས་
མཛེས་སྡུག་དང་བདེ་སྐྱིད་ཅིག་གི་ཆེད་དུ་
ཁ་བ་དང་གངས་རིའི་ཆེད་དུ་
བརྗོད་དཀའ་བའི་མཚར་གཏམ་མང་བོ་མང་བོ་ཞིག་དང་
འབྲི་མི་ཚར་པའི་སྙན་ངག་རིང་མོ་ཞིག་སྟེ་
མདོར་ན་་་ཁ་བ་ཁྱོད་བདག་གི་མི་ལོ་ཉེར་གསུམ་གྱི་དྲན་ཞིང་དང་
བྱིས་དུས་ཀྱི་དྲོལ་ཁོལ་མ་ཡལ་པས་
ང་ཁྱོད་ལ་དུངས་ཤིང་ཁྱོད་རང་དྲན་པས་
ཁྱོད་བདག་གི་ཚེ་སྲོག་ལ་འཐིམ་པའི་མེ་ཏོག་ཚོམ་བུ་ཞིག
༢༠༡༣ ༢ ༦ ཉིན་བྲིས།