སྐྱོ་བྲག་དགའ་དབང་།
དེང་སྐབས་བོད་དུ་ཕ་སྐད་ཟེར་བ་འདི་ཚོར་ཤུགས་ཆེ་བའི་ཐ་སྙད་ཅིག་ཡིན། ང་ཚོས་ཀྱང་འཛམ་གླིང་སྤྱི་སྲོལ་བཞིན་མ་སྐད་ཅེས་བརྗོད་ནའང་མ་ཆོག་པ་མེད། དངོས་པོ་གང་ལ་ཡང་མའི་འཇུག་པ་མང་ཞིང་། ཕ་ནི་གར་ཡོད་དང་སུ་ཡིན་ཤེས་པར་དཀའ་ལ། མ་ནི་ཕལ་ཆེར་ངེས་པའི་ཕྱིར་ན། འཛམ་གླིང་གི་སྐད་རིགས་ཆ་ཚང་གིས་མ་ཡུལ་ཟེར་གྱི་ཡོད་སྐད། མ་ཚིག་འདིས་བརྩེ་ཞེན་ཡོད་པ་ཡང་མཚོན། ཕ་ཡུལ་ཟེར་མཁན་ནི་བོད་པ་ཙམ་རེད། སྐད་རིགས་ཕལ་ཆེ་བས་ས་གཞིར་མོ་སྒྲ་སྦྱོར་བ་ལས་ཕོ་སྒྲ་སྦྱར་བ་ཧ་ལམ་མེད། མི་བུ་ཕལ་མོ་ཆེའི་སྐད་ཀྱི་སློབ་དཔོན་དང་པོ་ཡང་ཨ་མ་ཡིན་པ་སོགས་གང་ནས་བསམས་ཀྱང་མ་སྐད་ཅེས་བོས་ན་འབྲེལ་ཆེ་བ་འདུག །འོན་ཏེ་ཕ་སྐད་ཟེར་བ་ལ་རྒྱུ་མཚན་མེད་པ་ནི་མིན། ཡུལ་མཁར་ཁྱིམ་གཞིས་ཀྱི་བདག་པོ་ཕལ་ཆེ་བ་ཕ་ཡིན་ཅིང་། སྨན་གཞུང་ལས་ཕའི་རུས་རྒྱུད་ཆད་མེད་དུ་འགྲོ་བར་བཤད་པ་སོགས་ལ་བརྟེན་པར་སྣང་། ཕ་སྐད་ཟེར་བའི་ཚོར་ཤུགས་འདི་བོད་ནས་བཙན་བྱོལ་བའི་སྤྱི་ཚོགས་ལ་ཡར་ཁྱབ་པ་ལས། བཙན་བྱོལ་ནས་མར་ཁྱབ་པ་ཞིག་མིན། ཐོག་མར་རྒྱ་ཡུལ་དུ་བསྐྱོད་པའི་སློབ་ཕྲུག་ཚོས་གླེང་བ་ཞིག་ཡིན་པའི་ཉམས་འདུག །རང་གི་སྡོད་ས་དང་སྐད་དེ་རང་ཡུལ་དང་རང་སྐད་ཡིན་ནའང། ཕ་ཡུལ་དང་ཕ་སྐད་ཡིན་པའི་ངེས་པ་མེད་མོད། བོད་པ་ནང་ཕན་ཚུན་རང་ཡུལ་དང་རང་སྐད་ཅེས་བརྗོད་ན་ཅི་བས་བདེའོ། །
འདི་ནི་དོན་མེད་གྱི་རྩོད་པ་རེད།
དགའ་དབང་གི་བསམ་ཚུལ་ཡག་པོ་འདུག
ཕ་གཞིས་དེ་ན་བཤད་པའི་སྐད་ཆ་ལས་ཕ་ཡིས་བཤད་པའི་སྐད་ཆ་ལ་རྩིས་མཐོང་དང་མ་ཡིས་བཤད་པའི་སྐད་ཆ་ཆགས་འཇོག་མེད་པ་དེ་འདྲ་མ་ཡིན་ནོ། ཕ་དང་ཕོ་ཡིས་དབའ་བསྒྱུར་བའི་ཡུལ་ལུང་ས་ཕྱོགས་དེ་ལ་རྒྱུག་ཆེ་པའི་སྐད་ལ་ཕ་སྐད་ཟེར་བ་ལས་སྐད་ཆའི་ཡོངས་ཁུངས་མ་ལ་གཏུག་དགོས་བ་དེ་འདྲ་མ་ཡིན་ནོ། ལུང་པ་གཞན་པས་མ་སྐད་ཟེར་བ་དེ་ཡང་རང་གི་ངག་ལ་འབྱོར་བའི་སྐད་ཡིག་མང་པོའི་ནང་ནས་རང་ལ་བྱང་ཆ་ཡོད་པ་དེ་ལ་མ་སྐད་ཟེར་བ་ལས་རང་གི་མ་ཡིས་བཤད་པའི་སྐད་ལ་བྱང་བ་དང་གོམ་པ་མེད་ན་མའི་སྐད་ཡིན་པ་ཙམ་གྱིས་མ་སྐད་མི་ཟེར་རོ། སྐད་ཡིག་གི་མ་གདན་དང་མ་ཁུངས་མ་རྩ་སོགས་ལ་གོ་དགོས་སོ།
བོད་མི་ཡིན་ཚད་ཀྱི་སྐད་ཡིག་སྐད་གདངས་ག་འདྲ་ཞིག་ཡིན་ན་ཡང་དེ་ནི་བོད་སྐད་ཡིན་པ་རེད། ཕ་སྐད་ལས་བོད་སྐད་ལོགས་སུ་ཕྱེ་མི་ཐུབ་པ་དང་། བོད་སྐད་ལ་ཕ་སྐད་འདྲ་མིན་གོ་རྒྱུ་ཡོད་པ་ཞིག་རེད་དོ།
ཕ་སྐད་ཞེས་པ་ནི་ཕ་ཡུལ་གྱི་སྐད་ཞེས་པའི་ ཞེས་པ་བསྡུས་པའི་ཚིགས་ཡིན་པ་ལས། ཡོང་ཁུངས་ཕ་དང་མ་གང་ཡིན་གྱི་ཁྱད་པར་མིན། རང་རང་སོ་སོའི་ཡུལ་ལ་ཕ་ཡུལ་ཞེས་བརྗོད་པ་ལས་མ་ཡུལ་ཞེས་མི་བརྗོད་པ་ནི། བུ་བུ་མོ་གཉིས་ལས་བུ་མོ་གཞན་དུ་བག་མར་བཏང་བ་ལས་བུ་མག་པར་གཏོང་བ་དཀོན་ཞིང་ལུགས་སོ་ཆེར་མེད་པས་ཕ་ནི་ཡུལ་དེ་ཉིད་ཀྱི་མི་ཡིན་པ་དང་མ་ནི་ཡུལ་གཞན་ཞིག་ནས་ཚུར་འོང་བའི་འདུ་ཤེས་ཡོད་པའི་དབང་གྱི་ཐ་སྙད་དེ་ལྟར་ཐོགས་པ་རེད། ཡུལ་ལུང་གཞན་དུ་མ་ཡུལ་ཞེས་པའི་ཐ་སྙད་བེད་སྤྱོད་བྱེད་ཀྱི་ཡོད་པ་ནི། ཡུལ་ལམ་རྒྱལ་ཁབ་དེ་མ་དང་འདྲ་བའི་སྐུ་དྲིན་ཆེ་བའི་ཆ་ནས་ཡིན་གྱི་ཕོ་མོ་ཁྱད་པར་གྱིས་མིན། དེ་བཞིན་རང་སྐད་ཞེས་པ་ཡང་རང་ཡུལ་གྱི་སྐད་ཞེས་པ་ཡིན་གྱི་རང་གྱིས་གང་བེད་སྤྱོད་བྱེད་པའི་སྐད་ཙམ་ལ་ཟེར་བ་མིན། མདོ་སྡེ་སྐལ་བཟང་དུ་སངས་རྒྱས་སྟོང་ལུང་བསྟན་པའི་སྐབས་སུ་ཡུལ་དང་རིགས་དང་རུས་དང་འཁོར་སོགས་ལུང་བསྟན་པ་བཞིན་རང་རེ་ལ་ཡང་ཡུལ་དང་རིགས་རུས་སོགས་ཡོད་པ་དེ་རྣམས་དྲི་བའི་དང་པོ་སོ་སོ་ནས་དྲི་བ་བྱེད་ཀྱི་ཡོད་ཀྱང་ཕྱིས་སུ་རིགས་རུས་ཡུལ་གསུམ་ཁྱད་མེད་པར་གཅིག་ཏུ་དྲི་བའི་ཚིགས་ཁྱེད་ཕ་ཡུལ་གང་ནས་ཡིན་ཞེས་པ་འདི་བྱུང་བ་རེད།
ངའི་ཕ་ཡུལ་བོད་རེད།
ངའི་མ་སྐད་བོད་སྐད་རེད།
དོགས་པ་མེད་སའི་དོགས་པར་ཆོད་ཀྱི་མེད་པའི་ཆོད་ཆོད་དེ་མ་མཛད་རོགས་་་་་་་་་