གསོ་རིག་གསར་འཕྲིན།  ༢༠༠༩ དབྱར་ཁའི་འདོན་ཐེངས།

Comments (2) on “གསོ་རིག་གསར་འཕྲིན།  ༢༠༠༩ དབྱར་ཁའི་འདོན་ཐེངས།”

1. སྲིད་འདིར་གཅེས་པ་ཀུན་གྱི་མཐར་ཐུག་པ།།
   རིན་ཆེན་སྲོག་ལུས་འཇོམས་པའི་ནད་ཆེན་དགྲ།
   ཉེ་བར་གཞིལ་བ་བདུད་རྩི་སྨན་སྒྲུབ་པའི།།
   སྙིང་སྟོབས་ཟླ་བ་གསར་རྣམས་རྒྱལ་གྱུར་ཅིག།
   ཆེས་ཆེར་སྙིགས་མར་གྱུར་བའི་དུས་རབས་འདིར།།
   ཡོད་ཚད་རྫས་སྦྱོར་འཕྲུལ་ལ་བློ་བཅོལ་པས།།
   ལུས་ནད་གཉེན་པོ་བདག་ཉིད་གཅིག་འབྲེལ་བ།།
   གསོ་བ་རིག་པའི་བསྟན་འདི་ཉག་ཕྲ་ཡང།།
   སྙིགས་མའི་སྙིགས་མར་གྱུར་བ་དེང་གི་དུས།།
   མི་བཟད་འབྱུང་བའི་ཁ་རླངས་གཡོས་པ་ཡིས།།
   ལུས་ཅན་སྒོ་གསུམ་ལ་འཁྱུད་སྡུག་བསྔལ་ཁུར།།
   དབུགས་འབྱིན་འབབ་སྟེགས་གསར་བ་སྦྱིན་འདི་རྨད།།

2. སྲོག་རླུང་ནད་ཀྱི་རྟགས་མདོར་བསྡུས།

   རིག་པ་ཡེ་ཤེས་འུབ་ཆུབ་ནས།།
   ཕྱི་ནང་འབྱུང་བའི་དེ་ཉིད་གསལ།།
   རྣམ་མཁྱེན་དཔྱད་བུ་ཁྲི་ཤེས་ཀྱི།།
   འབུམ་རྒྱུད་དགོངས་པའི་ཆུ་གཏེར་ལས།།
   ཆུ་རྡུལ་ཟེགས་མ་ཙམ་སྤེལ་བར།།
   རྩ་བ་གསུམ་གྱིས་བསྡོང་གྲོགས་མཛོད།།
   ཡེ་ཤེས་མཁའ་འགྲོའི་བརྩེ་བས་སྐྱོངས།།
   མ་རིག་ལས་བྱུང་འདོད་ཆགས་ཀྱིས།།
   བསྐྱེད་པའི་མཚན་ཉིད་དྲུག་ལྡན་གྱི།།
   རླུང་ནད་ཐ་མལ་གནས་པ་ཉིད།།
   སློང་རྐྱེན་མྱ་ངན་སེམས་ལས་དང་།།
   མི་སྙན་ཚིག་མཚོན་ཕོག་པ་དང་།།
   མཚན་གཉིད་མེད་དང་འཇིགས་སྣང་སོགས།།
   ཡིད་ལ་འཁྲུགས་པ་སྟེར་བྱེད་པའི།།
   རྐྱེན་སྣ་ཚོགས་དང་ཁྱད་པར་དུ།།
   འབྱུང་གདོན་སྤྱི་དང་རྒྱལ་པོ་ཡིས།།
   རྒྱབ་བརྟེན་བྱས་ནས་ངོ་མཚར་གྱི།།
   མངོན་ཚུལ་སྣ་ཚོགས་སྟོན་པའི་ནད།།
   ཨ་རིའི་ཡུལ་འདིར་ལྷག་པར་མང་།།
   རྟགས་ནི་རྩ་རྒྱུད་སྟོང་ཞིང་རྐྱལ།།
   སྐད་ཅིག་ཙམ་ཡང་མི་གནས་པར།།
   འགྱུར་ལྡོག་མང་དུ་བྱེད་པ་ཡིན།།
   ཆུ་མདོག་སྔོ་ལ་དམར་མདངས་ལྡན།།
   སྒྲ་བཅས་ལྦུ་བ་སངས་རྐྱེན་ནོ།།
   ཞིབ་མོར་བརྟག་ན་མེ་ཏོག་ནི།།
   སྲན་མ་ཙམ་ཞིག་དབུས་སུ་འབྱུང་།།
   རེག་པ་རྩ་དང་བརྟག་པ་ཆུའི།།
   བརྟག་པའི་ཐབས་འདི་མ་རྟོགས་པར།།
   དང་པོ་ཉིད་ནས་ནད་པ་ལ།།
   སྐད་ཆ་དྲིས་ན་ལན་མི་སྟེར།།
   དེ་བས་ཚེ་རིག་འཛིན་པ་ཚོ།།
   རེག་མཐོང་གཉིས་ལ་ཞིབ་མོར་དཔྱོད།།
   ནད་དང་སྨན་པར་བརྡ་སྦྱོར་ངེས།།
   དེ་རྗེས་དྲི་བ་མི་སྙན་གཏམ།།
   ཟས་རྩུབ་སྨྱུང་དང་འཇིགས་སྐྲག་སོགས།།
   རླུང་གི་རྩ་བའི་སྤྱི་རྟགས་ལས།།
   གང་ཤས་ཆེ་བ་བཏོན་དང་འགྲིག།
   དུས་ཚོད་དབང་གིས་འདི་ཙམ་སྤེལ།།
   ཁོམ་ལོང་མེད་པའི་ཡུལ་འདི་ནས།།
   མི་ཚེའི་ཁ་ཕྱོགས་མི་རྙེད་ཀི།