ཁྱེད་ལ་ཨོལ་སྒོའི་རྨེན་བུའི་ནད་བྱུང་པའི་་ནད་རྟགས་བཅུ།

ཚོད་དཔགས་བྱེད་ན་དེང་འཛམ་གླིང་ནང་སྐྱེ་བོ་ས་ཡ་མང་པོར་ཨོལ་སྒོའི་རྨེན་ནད་ཡོད་པ་ཡིན། ཡིན་ཡང་མང་པོས་ནད་གཞི་དེ་དག་ཇི་ལྟར་ཡིན་མིན་ད་དུང་ཤེས་ཀྱི་མེད་པ་རེད། ཨོལ་སྒོ་ནི་མཇིང་པའི་ནང་ངོས་ཕྱེ་མ་ལེབ་ཀྱི་གཟུགས་དང་འདྲ་བའི་རྨེན་བུ་ཞིག་ཡིན་པ་དང། དེས་ལུས་པོའི་ནང་ཟས་ཀྱི་བཅུད་རྫས་རྣམས་བསྡུ་ལེན་གྱིས་གཟུགས་པོར་མཁོ་སྤྲོད་བྱ་མཁན་གྱི་མ་ལག་གཙོ་བོ་ཞིག་ཡིན། ཅི་སྟེ་ཁྱེད་ཀྱིས་ཨོལ་སྒོའི་བྱེད་ལས་ཚུལ་བཞིན་མ་གནས་ན་ལུས་ཀྱི་བདེ་ཐང་ཐོག་ཤུགས་རྐྱེན་འཐེབས་ངེས་ཡིན། དམིགས་ཀར་དུ་ལྗིད་ཚད་དང། སེམས་ཁམས་མི་བདེ་ཞིང་ཡིད་ཞུམ་པ། ལུས་ཟུངས་ཉམས་པ་བཅས་བྱུང་།

ཨོལ་སྒོའི་རྨེན་ནད་བརྟག་བཅོས་མ་བྱེད་པ་དེས་ལུས་འཚོ་ཆེས་པར་རྒྱགས་པ་ཆགས་མགྱོགས་པ་དང། སྙིང་ནད་འབྱུང་བ། ཡིད་ཞུམ་པ། བྲེད་དངངས། སྐྲ་བྱིད་པ། རོ་ཙྭ་ཉམས་པ། སྐྱེ་འཕེལ་གྱི་ཉུས་པ་ཉམས་པ་ལ་སོགས་མི་འཕྲོད་པའི་ནད་རྟགས་དུ་མ་བྱུང་བས་ངེས་པར་དུ་ཁྱེད་ནས་བརྟག་དཔྱད་ལ་ལྷོད་གཡེང་གནང་མི་རུང། ཁྱེད་ལ་ཨོལ་སྒོའི་རྨེན་ནད་ཡོད་པར་ནད་རྟགས་ཐམས་ཅད་ཚང་དགོས་པའི་ཁྱབ་པ་མེད། ཡིན་ཡང་འདིར་སྤྱི་རྟགས་འགའ་བཀོད་ཡོད་པས་ཁྱེད་ལ་ཨོལ་སྒོའི་ནད་ཡོད་མེད་ཤེས་ཐུབ།
༡༠། ཤ་གནད་དང་ཚིགས་མཚམས་ན་ཟུག་བྱུང་བ། ཆུ་རྒྱུས་ན་ཟུག
ཁྱེད་ཀྱི་ཤ་གནད་དང་ཚིགས་མཚམས་སུ་ཟུགས་གཟེར་མངོན་པ་དང། ལག་པའི་ནུས་ཤུགས་ཉམས་པ། ལག་པའི་མཁྲིག་མ་དང་རྐང་ཉྭར་ཁུངས་སྦུ་ཡོད་སྙམ་དུ་སེམས་པ་བཅས་ནི་ཨོལ་སྒོའི་རྨེན་ནད་ཡོད་པའི་མངོན་རྟགས་ཡིན།

༩། མཇིང་པ་མི་བདེ་བ། ཇི་ཆེར་རྒྱས་པ།

རང་གི་ཚོར་བའི་ནང་མཇིང་པ་སྐྲངས་པའམ། མིད་པ་འགགས་པའམ་སྡམ་པ་ལྟར་ཚོར་བ། སྐད་འཛེར་བའམ་མཇིང་པ་ཇི་ཆེར་རྒྱས་པ་བཅས་ནི་ཨོལ་སྒོའི་རྨེན་ནད་བྱུང་བའི་ནད་རྟགས་ཡིན།

༨། སྐྲ་དང་པགས་པ་འགྱུར་ལྡོག་ཏུ་སོང་བ།༼ Hair/Skin Changes༽

ཨོལ་སྒོའི་ནད་རིགས་ལ་སྐྲ་དང་ལུས་ཀྱི་པགས་པ་ནི་འགྱུར་སླ་བའི་རང་བཞིན་ཞིག་ཡིན། མ་ཟད་སྐྲ་བྱི་བ་ནི་མངོན་རྟགས་ཆེ་ཤོས་ཞིག་ཡིན། ཨོལ་སྒོའི་རྨེན་གཤེར་ཆེས་ཉུང་བའི་ནད་པར་དུས་རྒྱུན་དུ་སྐྲ་ཆགས་ཉེན་ཅན་བྱུང་བ་དང། སྐྲ་རྩུབ་ཞིང་སྐམ་པ། སྐྲ་རྩེ་གཉིས་བྱུང་ཞིང་བྱི་སླ་བ་བཅས་བྱུང་བ་ཡིན། ལུས་ཀྱི་པགས་པའང་རེག་བྱ་རྩུབ་པ། མཐུག་པོ་ཆགས་པ། སྐམ་ཞིང་ཤུན་ལྐོགས་ཅན་བཅས་བྱུང་བ་ཡིན། ཨོལ་སྒོའི་རྨེན་གཤེརཉུང་བའི་རྐྱེན་བྱུང་ན་རྒྱུན་ལྟར་མ་ཡིན་པར་མིག་སྤུ་དབྱི་བ་སོགས་བྱུང། རྨེན་གཤེར་མང་ན་སྐྲ་དབྱི་བ་དང་པགས་པ་སྐམ་ཞིང་རིད་པ་བཅས་བྱུང་།
༧། ཕོ་བ་མི་བདེ་བ།༼ Bowel Problems ༽
གཤང་བ་རྒྱུན་རིང་ཚབས་ཆེན་དུ་འགགས་པ་ནི་ནད་རྟགས་ཞིག་ཡིན་ལ། ཕོ་བ་འཁྲུ་བ་དང་མི་བདེ་བ་བྱུང་བ་ནི་ཨོལ་རྨེན་ནད་ཀྱི་མངོན་རྟགས་ཡིན།

༦། ཟླ་མཚན་མི་སྙོམས་པ་དང་སྐྱེ་འཕེལ་གྱི་ནུས་པ་ཉམས་པ།༼རོ་ཙཱ་ཉམས་པ།༽
ཟླ་མཚན་ཕོན་ཆེ་བ་དང། མི་སྙོམས་པ། ཟླ་མཚན་སྐབས་ན་ཟུག་དྲགས་པ་བཅས་ནི་ཨོལ་རྨེན་ཟད་པའི་ནད་རྟགས་ཡིན། ཨོལ་རྨེན་འཕེལ་བའི་རྟགས་སུ་ཟླ་མཚན་དུས་ཡུན་ཐུང་བ་དང། འབོར་ཉུང་བ། དུས་ཐོག་མ་བྱུང་བ་བཅས་བ་ཡིན། རོ་ཙཱ་ཉམས་པའམ་སྐྱེ་འཕེལ་ནུས་པ་ཉམས་པ་བཅས་ནི་ཨོལ་སྒོའི་ནད་རྟགས་སོ།

༥། ནང་མིའི་ལོ་རྒྱུས།༼family history༽
གལ་ཏེ་ཁྱེད་ཀྱི་ནང་མིར་ཨོལ་སྒོའི་རྨེན་ནད་ཡོད་པའི་ལོ་རྒྱུས་ཡོད་ན་ཁྱེད་ཉིད་ལའང་བྱུང་བའི་ཉེན་ཚབས་ཆེ་བ་ཡིན་པས་ངེས་པར་དུ་གཟབ་དགོས། དམིགས་ཀར་དུ་ལོ་ན་རྒས་པའི་མིས་དེ་དག་ལྦ་བར་ངོས་འཛིན་བཞིན་ཡོད། སོང་ཙང་དུས་རྟག་ཏུ་རྨེན་བུའམ་ལྦ་བས་རྐྱེན་པས་ལུས་ཀྱི་ལྗིད་ཚད་འཕར་བའི་སྐོར་གླེང་སྐབས་ངེས་པར་དུ་དོ་སྣང་བྱེད་དགོས།

༤། མཁྲིས་ཞག་གམ་མཁྲིས་ཚིལ་ནད་བྱུང་བ།༼ Cholesterol Issues ༽
དུས་རྟག་ཏུ་འཕྲོད་པའི་ཟས་བསྟེན་པ་དང་སྤྱོད་ལམ་ཚུལ་མཐུན་ཟབ་ཀྱང་མཁྲིས་ཞག་རྒྱས་པ་དང་། མཁྲིས་ཞག་གི་སྨན་གཏོང་ཡང་ཕན་སྐྱེད་མི་མངོན་ན་ཨོལ་སྒོའི་རྨེན་ཁུ་ཟད་པའི་རྟགས་ཡིན། རྒྱུན་ལྟར་ན། མཁྲིས་ཞག་ཟད་པ་ནི་ཨོལ་རྨེན་རྒྱས་པའི་ནད་རྟགས་ཡིན།

༣། ཡིད་ཞུམ་པ་དང་བྲེད་དངངས་བྱུང་བ།༼ Depression and Anxiety༽
ཡིད་ཞུམ་པ་དང་བྲེད་དངངས་སམ་སེམས་སྡུག་བྱུང་བ། དེ་ཡང་གློ་བུར་དུ་སེམས་འཚུབ་པ་བཅས་ནི་ཨོལ་སྒོའི་ནད་རྟགས་ཡིན། ཨོལ་རྨེན་ཟད་པའི་རྟགས་སུ་ཡིད་ཞུམ་སེམས་ངལ་བཅས་བྱུང་བ་ཡིན། ཨོལ་རྨེན་འཕེལ་བའི་རྟགས་སུ་བྲེད་དངངས་དང་སེམས་འཚུབ་པ་བཅས་བྱུང་བ་ཡིན། ཡིད་ཞུམ་སེམས་ངལ་སྨན་བཅོས་བྱེད་ཀྱང་དྲག་སྐྱེད་མ་བྱུང་ན་ཨོལ་སྒོའི་རྨེན་ནད་ཡིན།

༢། ལྗིད་ཚད་མི་བརྟན་པ། འགྱུར་ལྡོག་མང་བ།༼Weight Changes༽

ཁྱེད་ཀྱིས་རྒྱུན་ལྟར་ཟས་དང་སྤྱོད་ལམ་གཟབ་ལ་རྩོལ་བཅག་རན་པར་བྱེད་ཀྱང་ལུས་ཀྱི་ལྗིད་ཚད་འཕར་ཆག་མེད་པ་དང། ཁྱེད་ཀྱིས་ཟས་སྤྱོད་ལམ་སྟོན་ཚུལ་མཐུན་དུ་སྤྱད་ཀྱང་ལྗིད་ཚད་གཞན་ལྟར་ཆག་མི་ཐུབ་པ། ལྗིད་ཚད་ཆག་དཀའ་བ། གཞན་ཡང་རྒྱུན་ལྟར་ཟས་མང་ཉུང་འཚམས་པར་རོལ་ཡང་ལྗིད་ཚད་ཆག་པ་དང། རྒྱུན་ལྡན་ལས་ཆེས་མང་པ་བཟས་ཀྱང་ལྗིད་ཚད་འཕར་བ་སོགས་བྱུང་བ་ནི་ནད་རྟགས་ཡིན། གཞན་ཡང་སྐབས་འགར་ལུས་ཚོ་ཆེས་པ་དང་། སྐབས་འགར་ལྗིད་ཚད་ཆག་པར་མངོན་པ་བཅས་ནི་ཨོལ་སྒོའི་རྨེན་གཤེར་འཕེལ་ཟད་དུ་འགྱུར་བའི་རྟགས་ཡིན།

༡། ལུས་ངལ་དུབ་བྱུང་བ། ཐང་ཆད་པ།༼Fatigue༽
ཞོགས་ལྟར་ལངས་དུས་ལུས་ངལ་དུབ་སྒྱིད་ལུགས་སུ་མངོན་པ། མཚན་མོར་ཕྱག་ཚོད་ ༨ ནས་ ༡༠ ལྷག་ཉལ་ཡང་གཉིད་མ་འངས་བའི་ཚོར་བ་བྱུང་ཞིང་། ཉིན་མོར་སྒྱིད་ལུགས་པ་བཅས་ནི་ནད་རྟགས་ཡིན། ཨོལ་རྨེན་འཕེལ་བའི་རྟགས་སུ་གཉིད་ཡེར་བས་ཉིན་གང་ལུས་ཐང་ཆད་པ་སོགས་བྱུང་བ་ཡིན།
འདོར་ན་དེང་རང་རེའི་སྤྱི་ཚོགས་ནང་ཨོལ་རྨེན་རྒྱས་པའི་ནད་གྲངས་ཇི་མང་དུ་འཕེལ་བཞིན་ཡོད་པས་དུས་རྟག་ཏུ་རང་ལུས་རང་གཅེས་ཀྱིས་བརྟག་དཔྱད་སྨན་བཅོས་ཞུ་དགོས་ལ། རྒྱུད་ལས་ནད་སློང་རྐྱེན་གཉིས་དྲན་པས་རྟག་ཏུ་སྤང། ལུས་ངག་ཡིད་ལས་ཉེས་སྤང་ཡང་དག་བསྟེན། ཞེས་གསུངས་པ་བཞིན་དུས་རྟག་ཏུ་རང་ཉིད་ལ་འཕྲོད་པའི་ཟས་སྤྱོད་ཚུལ་བཞིན་སྤྱོད་དགོས་པ་དང། ཟས་མི་འཕྲོད་པ་དང་སྤྱོད་ལམ་མི་མཐུན་པ་གཉིས་པོ་དྲན་པ་དང་ཤེས་བཞིན་གྱིས་ཟིན་པར་བྱས་ནས་རྟག་ཏུ་སྤང་བར་བྱའོ། མིང་གི་རྣམ་གྲངས་གཞན་ཁག་ནི། ལྦ་རྨེན། བད་ཀན་རྨེན་བུ།

____གསོ་རིག་ཉམས་གསོག་སློབ་མ་སྨད་མཆོག་པས།