ཧི་མ་ལ་ཡའི་འཕྲུལ་སྨྱུག
༼མངོན་མཛོད་ནས་གསུངས་པའི་༽ཚུལ་འདི་ནི་ནུབ་ཕྱོགས་ས་ལྟེ་སྨྲ་བ་ལས་ཀྱང་རིམ་པ་གཅིག་རྗེས་སུ་ལུས་ཡོད་སྟབས། ལུགས་འདིའི་བག་ཆགས་ཟབ་པའི་རང་རེའི་དགེ་བཤེས་ས་གྲགས་གནམ་གྲགས་རྣམ་པས་དུས་ད་ལྟ་ཡང༌། རི་བོ་མཆོག་རབ་དེ་ང་ཚོས་མཐོང་མི་ཐུབ་པ་མ་གཏོགས་ག་ཤེད་ཅིག་ཏུ་ཡོད་ངེས་རེད་ཅེས་ཨུ་ཚུགས་ཁོ་ན་གནང་བ་དང༌། ས་གཞི་ལེབ་ལེབ་མིན་པར་ཟླུམ་པོ་ཡིན་ན། ཆུ་བོ་གྱེན་དུ་འབབ་པར་ཁས་ལེན་དགོས་ཞེས་དང༌། ས་ལྒང་ནུབ་ནས་ཤར་དུ་འཁོར་འགྲོ་བཞིན་ཡོད་ན། ནུབ་སྐྱོད་གནམ་གྲུ་ནུབ་ཏུ་འཕུར་མི་དགོས་པར། ལྡིང་༡སྐོར་རྒྱག་སྟེ་བསྡད་ན་ཡང་ནུབ་ཕྱོགས་སུ་སླེབ་འགྲོ་བར་ཐལ་བ་དང༌། ༼ཞེས་པ་ལའང་དཔྱད་དུ་ཡོད་དེ། ནུབ་སྐྱོད་གནམ་གྲུ་དེ་ཉིད་ནུབ་ཏུ་འཕུར་མི་དགོས་པར། བར་སྣང་དེར་གར་ལྡིང་སྐོར་རྒྱབ་སྟེ་བསྡད་པ་ཡིན་ན། རང་རེའི་ས་ཡི་གོ་ལའི་འཁོར་འགྲོས་དེར་སླེབ་སྐབས་བབ་མཆོག་ན་ཡང༌། ཕར་སོང་བ་དང༌། དེར་ལྡིང་སྐོར་རྒྱབ་པ་གཉིས་ཀྱི་དུས་ཚོད་མགྱོགས་བུལ་ལ་ཡང་ལྟ་དགོས་ཏེ། དཔེར་ན། བུང་བུའི་ཁལ་མ་ལྟ་བུ་ཞིག་ཚུར་ཡོང་བཞིན་པ་ལ་སྒུག་བསྡད་པ་བས། རླང་འཁོར་གྱི་དེ་ཕྱོགས་སུ་ལེན་དུ་སོང་ན་འཁོར་ཁ་མྱུར་བ་ཇི་ལྟ་བ་བཞིན་ཡིན་ལ།༽ ཤར་སྐྱོད་གནམ་གྲུ་ཤར་ཕྱོགས་སུ་ཇི་ཙམ་འཕུར་ཡང༌། ཤར་ཁའི་འབབ་ཚུགས་སུ་བསླེབ་རྒྱུ་མེད་པར་༼གཅུང་ཁད་འགྱང་བ་ཙམ་ལས། གཏན་ནས་སླེབ་རྒྱུ་མེད་པར་༽ཁས་ལེན་དགོས་ཞེས་༼པ་༽སོགས་༼ཀྱིས་༽རིགས་སྐམ་ལྟར་སྣང་རེས་ཁ་ཕྲལ་འཇལ་ནས། དངོས་ཡོད་ལ་བསྙོན་འདིང་བཞིན་བཞུགས་དགོས་བྱུང་བ་༼ལྟ་བུ་ཡང་མ་༽རེད། ༼གང་ལགས་ཟེར་ན། སྔོན་ལ་འགྲོ་མཁན་དེ་ཉིད་ཇི་ཙམ་དུ་སོང་བ་ཡིན་ན། རྗེས་ནས་ཡོང་མཁན་དེ་ལ་གཅུང་རིང་ཙམ་དུ་འགྲོ་རྒྱུ་ཡིན་པ་ནི་སྨོས་མེད་རེད།
དེར་བརྟེན་ཁོ་བོས་རྨོངས་ཚོད་ཀྱིས་དཔག་ན། སའི་གོ་ལ་འདི་གཡས་སྐོར་དུ་འཁོར་གྱི་ཡོད་པའི་དབང་དུ་བཏང་ཚེ། འགྲུལ་བཞུད་ཀྱི་གྲུ་གཟིངས་དང་གནམ་གྲུ་སོགས་གཡོན་སྐོར་དུ་བསྐྱོད་པ་ཡིན་ན། ཡོང་མཁན་དང་འགྲོ་མཁན་གཉིས་ཐུག་ཕྲད་མྱུར་བ་ནི་མཐོང་ཆོས་སུ་གྲུབ་པའོ།།༽ འཇིག་རྟེན་རིལ་རིལ་ཡིན་པ་དང༌། ས་ལྒང་འཁོར་བཞིན་ཡོད་ཅེས་པ་འདི་རྩོད་ར་གོར་གོར་ཞིག་ཏུ་དཀྱིལ་ཀྲུང་གྲུ་བཞི་བཅས་ཏེ་བཞུགས་མཁན་གྱི་དམ་བཅའ་པ་ཞིག་དང༌། དེའི་དྲུང་དུ་ཐལ་མོ་དྲག་ཏུ་བརྡེབ་བཞིན་ཡར་རྒྱུག་མར་རྒྱུག་གནང་མཁན་གྱི་རྟགས་གསལ་པ་ཞིག་དང་བཅས་མི་གཉིས་ཁ་ཤགས་བཀྱེས་པའི་གྲུབ་དོན་ཙམ་ཞིག་མིན།
རྩོམ་ཡིག་འདི་ལ་གླེང་གཞི་ཙམ་ལས་ཅི་ཡང་མེད་པས་་་་་འདི་འདྲའི་སྐོར་ལ་དཔྱད་རྩོམ་འབྲི་བར་འདོད་ན་གནའ་དེང་གི་རིག་གཞུང་ལ་ཞིབ་འཇུག་དང་རང་གི་རིགས་པས་དཔྱད་པ་སོགས་བསྡུར་ནས་རྒྱས་ཙམ་བཀོད་ན་རང་གཞན་གཉིས་ཕན་ཡིན་པ་ལས་གླེང་གཞི་ཙམ་ཞིག་སྤེལ་ནས་བཞག་ན་་་་སྐོམ་མི་སོད་གི་ཡ
མངོན་པ་མཛོད་ནས་བཤད་པའི་རིགས་པའི་རྣམ་གཞག་གསལ་རྒྱས་ཤིག་ཡིད་ངོར་འཆར་བ་མེད་ན་དགག་པ་རྒྱག་རྒྱུ་ཅུང་སྔ་ཐལ་བ་ཡིན། མངོན་མཛོད་ཙམ་མིན་པར་དཀར་རྩིས་སོགས་ནས་བཤད་པ་ཡང་དེང་སྐབས་ཚན་རིག་པའི་གོ་རྟོག་དང་མི་མཐུན་མོད། འོན་ཀྱང་ལུགས་དེས་ངོ་མཚར་བའི་གྲུབ་དོན་མང་པོ་ཞིག་ཏག་ཏག་སྟོན་བཞིན་པ་མིན་ནམ། དེས་ནས་ད་དུང་བདེན་རྫུན་གྱི་དབྱེ་བ་འབྱེད་རྒྱུ་ཅུང་སྔ་དྲགས་པ་མིན་ནམ། སངས་རྒྱས་གཉིས་པར་གྲགས་པའི་དབྱིགས་གཉེན་གྱིས་འཇིག་རྟེན་གྱི་རྣམ་གཞག་ཙམ་ཡང་མི་ཤེས་ན་ཤིན་ཏུ་རྟོག་དཀའ་བའི་གནས་ཚུལ་སྟོན་པར་ཇི་ལྟར་ཡིད་ཆེས་བྱེད་ཐུབ་བམ། ཅོལ་ཆུང་མི་བྱེད་རང་ཚུགས་བརྟན་པོའི་སྒོ་ནས་རིགས་པའི་རྣམ་གཞག་ལ་གོམས་འདྲིས་བྱེད་རྒྱུ་ཤིན་ཏུ་གལ་ཆེ་བར་མཐོང་།
དབང་འདུས་ཀྱིས་བཤད་པ་ལྟར་སྐར་རྩིས་ཀྱི་གཞུང་ལུགས་རྣམས་སུ་ཡང་ཉི་ཟླས་རི་རབ་བསྐོར་ཚུལ་དང་། ཉི་ཟླ་གཟའ་འཛིན་སྐབས་དྲང་སྲོང་ཟེར་བའི་སྲོག་ཆགས་ཤིག་གིས་ཉི་ཟླ་གཉིས་བཟའ་བའི་ཚུལ་སོགས་བྱུང་བ་བཞིན། དེ་ལྟ་བུའི་རྣམ་གཞག་གི་སྟེང་ནས་ཉི་ཟླ་གཟའ་འཛིན་གྱི་དུས་ཚོད་གཏན་ལ་འབེབས་པ་དང་། ཟླ་བ་གང་གི་ཉ་ལ་རྒྱུ་སྐར་གང་ཞིག་འཆར་ཚུལ་བསྟན་པ་རྣམས་ཀྱང་ཏག་ཏག་འཁེལ་གྱི་འདུག་ན་དེ་དག་ལ་དགོངས་པ་བཞེས་དགོས་པར་འདུག་གོ། །མངོན་མཛོད་ནས་ས་ལྒང་ལེབ་མོ་ཡིན་ཞེས་གསུངས་པ་ཞིག་ངས་མཇལ་ཡོད་པ་དྲན་གྱི་མི་འདུག་ལ་ངས་དྲན་པ་ལྟར་ན་ས་ལྒང་འདི་ནི་ཟླུམ་པོ་ཡིན་པ་ཞིག་གསུངས་ཡོད་དྲན་གྱི་འདུག།