གནས་ཚུལ་མཁོ་འདོན་པཿ བཀྲ་དོན།
རྒྱ་ནག་དམར་པོས་བོད་མིའི་ཐོག་དྲག་གནོན་དང་། བསད་རྡུང་འཇུ་གསུམ་སོགས་མི་སྤྱོད་ལས་འདས་པའི་དམ་དྲག་དང་མནར་གཅོད་ཇི་ལྟར་བྱས་ཀྱང་། གཞིས་བཞུགས་སྤུན་ཟླ་ཚོས་འཇིགས་ཞུམ་སྤུ་ཙམ་མེད་པར་སྔར་ལས་ལྷག་པའི་མཐུན་སྒྲིལ་དང་། ལར་ཞེན་ཆེན་པོས་བོད་རྒྱལ་ཁབ་དང་མི་རིགས་ཀྱི་ཆེད་དུ་གཅིག་རྗེས་གཉིས་མཐུད་ཀྱིས་ལུས་སྲོག་མཆོད་མེར་ཕུལ་ནས་དགྲ་བོ་རྒྱ་ནག་གཞུང་གི་སྲིད་ཇུས་ལ་ངོ་རྒོལ་བྱེད་མུས་སུ་ཡོད་པའི་གནས་ཚུལ་རིམ་བསྟུད་ཐོན་གྱི་ཡོད།
སྤྱི་ལོ་༢༠༡༣ལོའི་ཟླ་བ་༢ཚེས་༢༤ཉིན་བོད་ནང་གི་ཆུ་ཚོད་༨ཡས་མས་ལ།་མཚོ་སྔོན་མངའ་ཁུལ་བྱ་ཁྱུང་དགོན་པའི་ནང་དུ། བོད་མི་རང་ལོ་༢༡་ཡིན་པ་ཕག་མོ་དོན་འགྲུབ་ཀྱིས་རྒྱ་གཞུང་གི་དྲག་གནོན་སྲིད་ཇུས་ལ་ངོ་རྒོལ་གྱིས་རང་ལུས་མེར་བསྲེགས་གནང་ཡོད་པ་དང་། ཟླ་ ༢ ཚེས་༢༥ཉིན་བོད་ནང་ཚོུད༡།༣༠ཙམ་ལ།་མདོ་སྨད་ཀན་ལྷོ་ཁུལ་ཀླུ་ཆུ་ཤིས་ཚང་ཚོ་བ་བཅུ་གཉིས་ཀྱི་ཁོངས་གཏོགས་ཆོས་འཁོར་སྡེ་བའི་ཚེ་གཟུངས་སྐྱབས་ལགས་ཀྱིས་རང་ལུས་མེར་བསྲེགས་ཀྱིས་རྒྱ་ནག་གཞུང་ལ་ངོ་རྒོལ་གནང་བ། གཞན་ཡང་ཟླ་ ༢ པའི་ཚེས་༢༥ཉིན་བོད་ནང་སྔ་དྲོའི་ཆུ་ཚོད་༡༠ཙམ་ལ་བོད་མདོ་སྨད་རྔ་པ་རྫོང་སྤྲོ་ཚིགས་ཡུལ་ཚོའི་རྡོ་བ་སྡེ་བའི་དར་ཁོ་ཚང་གི་དྷཱི་ཕུ་དགོན་པའི་གྲྭ་གསང་བདག་ལགས་ཀྱིས་རང་ལུས་མེར་བསྲེགས་གནང་སྟེ་རྒྱ་ནག་གཞུང་ལ་ངོ་རྒོལ་གནང་ཡོད་པ་བཅས་ཀྱིས་གཙོས་ད་བར་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེད་ཆེད་ནོར་གླིང་ས་གནས་བོད་རིགས་སྤྱི་མཐུན་ཚོགས་པས་གོ་སྒྲིག་འོག་ནོར་གླིང་དང་། སྒྲོལ་མ་གླིང་། འཆི་མེད་དགའ་ཚལ་གླིང་བཅས་ཀྱི་སེར་སྐྱ་མི་མང་བཞི་བརྒྱ་ལྷག་མཉམ་འཛོམས་ཐོག ཟླ་ ༢་ཚེས་ ༢༦ཉིན་ཕྱི་དྲོའི་ཚོུད་༥།༤༠ཐོག་འཆི་མེད་དགའ་ཚུལ་གླིང་དུ་ མཆོད་འབུལ་སྨོན་ལམ་རྒྱ་ཆེ་ཞིག་ཚོགས་ཡོད་པའི་གསར་གནས་སུ།