ཧི་མ་ལ་ཡའི་འཕྲུལ་སྨྱུག
ཨི་ཊ་ལི་ནས་ཡིན་པའི་བོད་རིག་པའི་མཁས་དབང་ཏུའུ་ཆིས། བོད་ཀྱི་མཁས་པ་ཚོས་ས་གཞི་བྱ་སྒོང་ལྟར་ཁས་མི་ལེན་པར་སྡེར་མ་ཁ་སྦུབས་པ་ལྟར་ལོག་ཅིག་འཆད་བཞིན་འདུག་པ་དེ་བདེན་ཤས་ཆེ། ༼ཞེས་པའི་སྡེར་མའི་མཚན་གཞི་ཇི་ལྟ་བུ་ཞིག་ལ་བཀོད་མིན་ཡང་དཔྱད་གཞིར་རློམ་ལ།༽ ང་ཚོས་ལྟ་བ་འདི་མུ་མཐུད་བསྒྱུར་དགོས་པར་འདུག མཐར་ཐུག་བོད་བརྒྱུད་ནང་བསྟན་ནས་བཤད་པ་དེ་ཁོ་ན་དོན་ལ་གནས་པའི་དུས་ཤིག་འོང༌། ཞེས་གསུངས་ཡོད་ཅེས་ས་ལྡིང་༢གནམ་ལྡིང་༣བྱེད་ཀྱིན་འདུག་མོད། མཐོང་བ་མངོན་སུམ་གྱི་དོན་ལ་ཏུའུ་ཆིས་མ་འོངས་ལུང་བསྟན་རྒྱག་ག་ལ་དགོས། ༼ཞེས་པ་དེ་ཁོང་གིས་བརྩམས་དེབ་གང་ཡང་རུང་ནང་དུ་བྲིས་ཡོད་ཚེ། མཁས་དབང་ཞིག་གིས་རྣམ་དཔྱོད་ངེས་བརྟན་དཀྲུག་པའི་སྨྱུག་རྗེས་ཤིག་ཡིན་པས། ང་མཚོའི་ཀྱང་གདེང་འཇོག་བྱས་ཀྱང་འགལ་བ་མེད་དེ།༽ ད་ལྟའི་༼ཚན་རིག་པས་འཇིག་རྟེན་འདི་རིལ་རིལ་དུ་སྣང་གི་ཡོད་པའི་༽མིག་ཡོད་ཚད་འཁྲུལ་སོང་ན༼ས་བྱུང་བ་ཡང་ཡིན་མི་དགོས་ལ།༽ མ་འོངས་པར་མ་འཁྲུལ་བའི་མིག་ཞིག་༼ས་ཕྱོགས་༽གང་༼ཞིག་ནས་གསར་དུ་༽རྙེད་༼ཀྱང་མི་དགོས་ཏེ། དེ་དང་དེའི་དུས་ཀྱི་དཔྱད་འབྲས་ལ་དཔག་སྟེ་འཇོག་དགོས་པ་ནི། དཔེར་ན། ཚན་རིག་པ་སྔོན་མ་སྔོན་མའི་གཏན་ལ་ཕབ་ཚད་ཀྱི་རྗེས་སུ། ཕྱི་མ་ཕྱི་མ་རྣམས་ཤར་སྐྱོད་མི་བྱེད་པ་བཞིན་ཡིན་ལ། སྐབས་དེ་དང་དེར་༽རྙེད་༼པ་ཐམས་ཅད་༽ཀྱང་༼དེ་དང་༽དེ་ལ་སྐྱེ་བོ་སུ་ཞིག་གིས་༼ཀྱང་༽ཡིད་ཆེས་༼མི་འཕེར་བར་༽བྱེད་ཐུབ་༼པ་༽དེས་ན། མཁས་དབང་ཏུའུ་ཆིའི་བཀའ་མོལ་དེ་ནི་ང་ཚོ་ལ་རེ་ཞིག་གུ་ཡངས་བཏང་བ་ཙམ་ལས་གཞན་ཅི་ཡང་མིན་༼པ་ཡང་མི་སྲིད་དེ། གལ་སྲིད་དེ་ལྟར་དུ་ཡིན་ན། ཁོང་ནི་ཆོས་ལུགས་སམ་ལངས་ཕྱོགས་མི་མཐུན་པ་རེ་རེའི་སར་བཀའ་མོལ་རེ་རེ་གསུང་མཁན་ཞིག་ཏུ་ཐལ་སོང་བས། ཁ་གཅིག་ལྕེ་མང་གི་མཁས་དབང་ཐེབས་ཆག་ཅིག་ཡིན་པར་ཐལ་བའི་གཏན་ཚིག་དེ་དབུ་ཐོག་ཏུ་ལྷུང་བར་ངེས་སོ།།༽
ཁོ་ཚོ་ནུབ་ཕྱོགས་པ་དག་གི་ལུགས་ལ་ལག་ལེན་ནི། གནས་སྟངས་གཞན་ཞིག་རེད་མ་གཏོགས། བསམ་བློ་དང་སྨྲ་བརྗོད་ཀྱི་སྐབས་སུ་བདེན་རྫུན་གང་ཡིན་ལ་མ་ལྟོས་པར་ལྟ་བ་དང༌། གྲུབ་མཐའ་གང་འདྲ་ཞིག་ཡིན་རུང་མཉམ་གནས་བྱེད་ཆོག་ཅིང༌། ལྟ་ཚུལ་སྣ་ཚོགས་ཕན་ཚུན་གཙུབ་ཅིང་བརྡར་བ་ལས། ད་གཟོད་བསམ་བློ་གསར་པའི་ཚ་རླབས་འཕྲོ་ཐུབ་པའི་ཕྱིར་ན། ལྟ་གྲུབ་གང་འདྲ་ཞིག་ཡིན་རུང་ཡོད་ཆོག་པ་ཞིག་ཡིན་པར་མ་ཟད། ཡོད་དགོས་པ་ཞིག་ཀྱང་ཡིན་པར་འདོད་པ་ལས། ༼ཞེས་པ་འདིར་ཡང་ཚིག་སྔ་ཕྱིའི་ཧང་ཟོམ་ཇོ་མོ་གླང་མའི་རྒྱ་ཁྱོན་ཙམ་ཞིག་ཤོར་བར་མངོན་ཏེ། (ལག་ལེན་ནི་གནས་སྟངས་གཞན་ཞིག་དང༌། བསམ་བློ་དང་སྨྲ་བརྗོད་ཀྱི་སྐབས་སུ་བདེན་རྫུན་གང་ཡིན་ལ་མ་ལྟོས་པར་ལྟ་བ་དང༌། གྲུབ་མཐའ་གང་འདྲ་ཞིག་ཡིན་རུང་མཉམ་གནས་བྱེད་ཆོག་)པའི་ལྟ་ཚུལ་དེ་ལ་ནི། ཧང་སང་རྒྱུ་གང་ཡང་མེད་དེ། བཞེད་འདོད་དང་ལག་ལེན་ཕྱིན་ཅི་ལོག་ཏུ་གྱུར་པ་ཞིག་བྱེད་བཞིན་ཡོད་པ་ནི། སྐུ་ཉིད་ཀྱིས་བྲིས་པ་དེས་གསལ་བའི་ཕྱིར་རོ།།༽
ང་ཚོའི་༼ནང་བསྟན་རིང་ལུགས་པའི་གུ་ཡང་གི་༽བསམ་པ་ལྟར་༼ན། མི་ལ་སྐྱོན་དང༌། གསེར་ལ་གཡའ་ཞེས་པ་བཞིན། འཆིང་བ་ཀུན་ལྡན་གྱི་༽མི་སེམས་ཡོད་ཚད་ལ་སྐྱོན་གྱིས་མ་གོས་པའི་༼གང་ཟག་སོ་སྐྱེས་ཤིག་ཁས་མི་ལེན་པར་རྟེན། དེས་འཛིན་སྐྱོང་བྱེད་བཞིན་པའི་༽ལྟ་གྲུབ་གཅིག་ཁོ་ནས་ཁྱབ་ཐུབ་དགོས་པ་དང༌། རང་གི་༼རྩ་བརྒྱུད་ཀྱི་བླ་མའི་༽དགོངས་པ་དང་མི་མཐུན་པའི་༼ཕྱོགས་ཐམས་ཅད་༽ལྟ་ལོག་༼ཡིན་པར་སྨོས་ནས་༽ཡོད་ཚད་ཚར་བཅད་དེ་བསྣུབ་དགོས་པའི་བསམ་བློ་དེ་འདྲ་རྩ་བ་ནས་མེད་༼དེ། འགྲོ་མགོན་འཕགས་པ་དང༌། རྒྱལ་དབང་ལྔ་པའི་རྣམ་ཐར་ནང་ཆོས་ལུགས་ཆག་སྒྲིལ་ལ་ཞལ་བཞེད་གནང་མེད་པ་མ་ཟད། དེང་གི་དུས་འདིར་ཡང་རྒྱལ་དབང་མཆོག་གི་ ༽ དེའི་དབང་གིས་མཁས་དབང་ཏུའུ་ཆིས། སངས་རྒྱས་པའི་ལྟ་གྲུབ་ལ་ཡུལ་དུས་ལ་དཔགས་པའི་རྩི་འཇོག་དང་གུས་བཀུར་གནང་བ་ཡིན་ཚོད་རེད། དེ་མ་གཏོགས་ཏུའུ་ཆི་ཁོང་༼ཡང་གོང་དུ་བཀོད་པའི་༽ལོ་རྒྱུས་ཁས་མི་ལེན་ཞིང༌། མངོན་སུམ་ལ་བསྙོན་འདིང་བའི་དམུན་པོ་མུ་ཐོ་ལུམ་དེ་འདྲ་ཡིན་རྒྱུ་མ་རེད་སྙམ།
དཔེར་ན་ཨ་མེ་རི་ཀའི་དངོས་ཁམས་བར་འབྱམས་པ་ཧྥེ་མེན་ཟེར་བས། དོན་དངོས་ཐོག་ཏུ་ཚན་རིག་གིས་ལྷ་མེད་པར་སྒྲུབ་མི་ནུས། ཚན་རིག་གིས་ལྷ་མེད་པར་མི་འགྲུབ་པ་དེ་ངེད་ཀྱི་བློ་ལ་ངེས་པར་དུ་འབབ་པ་ཡིན། ཞེས་བཤད་ཡོད་པ་དེ་ལའང་གོ་བ་ཁྱད་པར་ཞིག་ཡོད་པ་ལས། ཉིན་དྲུག་གི་རིང་ལ་འཇིག་རྟེན་ཡོངས་རྫོགས་རྫ་མཁན་གྱི་རྫ་མ་ལྟར་གསར་དུ་བཟོས་ནས། ཉིན་བདུན་པར་ངལ་གསོ་རྒྱག་མཁན་གྱི་ལྷ་དེ་འདྲ་ཚན་རིག་གིས་མེད་པར་མི་འགྲུབ་ཟེར་བ་མིན་པ་ལྟར་རེད། གལ་ཏེ་ཡིན་ན་ས་ཁམས་ཆགས་རིམ་དང༌། སྐྱེ་དངོས་འཕེལ་འགྱུར་སོགས་ཚན་རིག་གི་གྲུབ་དོན་ཆེས་མང་པོ་ཞིག་རབ་འབྱམས་པ་ཧྥེ་མན་གྱི་བློ་ལ་མི་འབབ་པར་ཁས་ལེན་དགོས་སོ།།