སྒེར་ཚུགས་མེད་པའི་ང་རང་། མི་ཉག་དུང་བརྡ།

དང་ཐོག །

རླུང་དམར་གྱི་འགྲོས་ཕྱོགས་ཤིག་དང་བསྟུན་ནས།

ང་དང་ངའི་རྣམ་ཤེས།

ཁ་དོག་མོད་པོའི་དར་ལྕེ་ཚོ་དང་ལྷན་དུ།

རི་མཐོ་ས་གཙང་གི་རྩེ་མོར་འཕྱར་སོང་།

རྐང་པ་དང་ལག་པ་ཐུང་དྲགས་པ་མ་གཏོགས།

ཕོ་བ་དང་ཁ་ངོ་ཆེ་བའི་འགྲོ་མི་ཚོས།

སྨྲ་ལྕེ་འགུལ་སྟངས་ཤིག་གིས།

གཡོ་སྒྱུའི་ཞགས་པ་འཕངས་ཐེངས་ཤིག་གིས།

ང་རང་ཡོད་པ་ནས་མེད་པ་བཟོས་སོང་ལ།

ཡང་སྐབས་ལ་རེར།

མེད་པ་ནས་ཡོད་པའི་རྣམ་པར་ཡང་བསྒྱུར་མྱོང་།

དེའི་སྟབས་ཀྱིས།

ངས།

ང་ལ་སྒེར་ཚུགས་མི་འདུག་ཟེར་ན་འགྲིག །

དར་ལྕེ་དམར་པོ་དང་སེར་པོ།
དར་ལྕེ་དཀར་པོ་དང་སྔོན་པོ།
འདི་ཐམས་ཅད་ངའི་རྣམ་ཤེས་བཞོན་པར་གྱུར་པའི་དར་ལྕེ་རེད།

དར་ལྕེ་འདི་ཚོ་ལྷབ་ལྷུབ་ཏུ་གཡོ་བར་ཡིན་མདོག་ཏུ་སྣང་ཡང་།
རང་དབང་དང་རང་ཚུགས་མེད་པར།

བཙན་གྱིས་རྒོད་པའི།
ཤུགས་ཀྱིས་སྐུལ་བའི།

དབང་མེད་དུ་ཆས་པའི།

མི་ཡུལ་གྱི་བྲན་གཡོག་ཡིན།

དེའི་སྟབས་ཀྱིས།
ངས།

ང་ལ་སྒེར་ཚུགས་མི་འདུག་ཟེར་ན་འགྲིག །

བསིལ་རླུང་གི་ངོས་པགས་འཇམ་ན་ཡང་།
དྲག་རླུང་གི་ཕྱི་ཚུལ་རྩུབ་ཀྱང་རུང་།
ཁྱེད་ལ་བརྒྱུད་སྐུལ་གྱི་ཀུན་སྤྱོད་ཅིག་ཡོད་པ་ནི།

ང་དང་ང་འདྲ་བའི་ཁ་དོག་མི་གཅིག་པའི།

དར་ལྕེ་དཀར་དམར་སྔོན་གསུམ་ལ།
རྒྱབ་ནས་འབུད་རྒྱག་གཏོང་ཞིང་།
མདུན་ནས་བསླུ་བྲིད་ཀྱི་ལག་པ་གཏོང་སྟེ།
དར་ཤིང་གི་རྩ་བ་དཀྲུག་སོང་།
རྩ་བ་ལྷོད་ལྷོད་དུ་གྱུར་སོང་།

ངས་དར་ཤིང་གི་རྩ་བ་དང་།

དར་ཐག་གི་རྙོག་སྒྲིལ་ལ་ཡིད་བརྟན་བརླག་བའི་ཉིན་མོ་འདི་ནས།

ལྷག་ཏུ།

ངས།

ང་ལ་སྒེར་ཚུགས་མི་འདུག་ཟེར་ན་འགྲིག།།