ངས་ཕ་ཡུལ་ལ་ཁ་པར་པཏང་ནས་གནས་ཚུལ་ཤེས་པ་ལྟར་ན། ཕ་ཡུལ་དུ་ཨོ་ལིམ་ཕིག་གི་མཛད་སྒོར་མི་བཞི་བཅར་གྱི་འདུག ད་རེས་འདས་པའི་དུས་དང་ཅུང་མ་འདྲ་བ་ཞིག་ནི། འཐུས་མི་འདི་ཚོ་ཚང་མ་སྤྱི་ཚོགས་ནང་མིང་ཡག་པོ་ཡོད་པའི་མི་རྐྱང་རྐྱང་ཡིན་པ་ལས་སྔོན་ཐོན་པ་དེ་འདྲ་སུ་གང་ཡང་མི་འདུག
དེའི་ནང་འབྲོག་མི་རྣམས་དགའ་བོ་ཡོད་པའི་བོད་སྨན་པ་གསུམ། གཞན་འབྲོག་མི་སེམས་བཟང་རྟག་པར་དབུལ་ཕོངས་རྣམས་ལ་དངུལ་སྒོར་དང་སྒོ་ཕྱུགས་སོགས་ཀྱིས་རོགས་རམ་བྱེད་མཁན་གཅིག་བཅས་རེད།
འདི་དག་ལས་ངས་ཁྱེད་ཚོར་ཨ་ཁུ་འབྲོག་པ་འདིའི་སྐོར་ངོ་སྤྲོད་ཅུང་ཟད་བྱེད་གི་ཡིན། ཁོང་ངའི་ངོ་ཤེས་ཡིན་པ་མ་ཟད་ངའི་སྟོད་ཉི་མ་ལྷ་ས་མཇལ་བའི་དབུས་རོགས་ཀྱང་ཡིན། ང་ཕ་ཡུལ་ཕྱིན་སྐབས་ཁོ་ལ་ངོ་ཐུག་བྱུང་བ་མ་ཟད། རྗེས་ནས་ཁོང་གི་སྐོར་ལ་སྒྲུང་ཡང་མང་པོ་ཞིག་གོ་བྱུང་། ཐེངས་གཅིག་ཁོང་ཟི་ལིང་གི་སྨན་ཁང་ཞིག་ལ་ཕྱིན་སྐབས། རྒྱ་མིའི་མི་ཚང་སྐྱོ་བོ་ཞིག་གི་ནང་མི་རྣམས་གཅིག་གིས་གཅིག་ལ་འཐམ་སྟེ་ངུ་འབོད་བྱེད་བཞིན་པའི་གནས་ཚུལ་མཐོང་བ་དང་། ཁོང་གིས་སྐད་ཀྱི་དཀའ་ངལ་ལ་མ་བལྟས་པར་གནས་ཚུལ་ཅི་ཡིན་གྱི་སྐོར་སྐད་ཆ་དྲིས་ཤིང་རྒྱུས་ལོན་ཡང་ཡང་བྱས་ཏེ་ཤེས་པ་ལྟར་ན། རྒྱ་མིའི་མི་ཚང་དེའི་ནང་མི་ཞིག་ན་སྟེ་གཤགས་བཅོས་མ་བྱས་ན་ཤི་རྒྱུར་ངེས་འདུག་པ་དང་། གཤགས་བཅོས་བྱེད་པ་ལ་སྒོར་མོ་མ་འདང་བར་སྨན་ཁང་ནས་ཕྱིར་འབུད་རྩིས་བྱས་འདུག ཁོས་སྒོར་མོ་ག་ཚོད་དགོས་རེད་ཅེས་རྒྱ་མི་དེ་ཚོར་དྲིས་པར། རྒྱ་མི་དེ་ཚོས་སྒོར་མོ་ལྔ་སྟོང་ལྷག་དགོས་ཀྱི་འདུག་ཅེས་ཡིད་ཆད་ཀྱི་རྣམ་པ་དང་བཅས་བརྗོད། ཁོང་ནས་ལམ་སང་སྐེད་ལ་བཅིངས་པའི་སྒོར་ཁུག་བླངས་ཏེ་སྒོར་མོ་ཅི་དགོས་དེ་མ་ཐག་སྤྲད་འདུག གཞན་འབྲོག་པ་དབུལ་ཕོངས་དེ་འདྲ་ལ་ཡང་ལུག་འགའ་ཤས་དེད་ཕྱིན་ནས་སྤྲད་པ། འབྲི་གཡག་སྤྲད་པ་དེ་འདྲ་མང་པོ་བཤད་རྒྱུ་འདུག
རྒྱ་གཞུང་གིས་ཀྱང་གོ་སྐབས་དེ་བཟུང་ནས་སྥྱི་ཚོགས་ཐ་ཞན་ནས་ཐ་ཞན་དུ་འགྲོ་བཞིན་པ་དེ་འགོག་པའི་སླད་ཁོང་ལ་གཟེངས་རྟགས་སྤྲད་པ་དང་དྲིལ་བསྒྲགས་ཤུགས་ཆེར་བྱས་ཏེ་དཔེ་བཟང་མི་སྣ་ཞིག་ཏུ་བསྒྱུར། ད་ལྟ་དཔལ་འབྱོར་འགྲན་རྩོད་ཁྲོད་མི་གཤིས་ཐ་ཞན་དུ་གྱུར་པའི་ཁོར་ཡུག་འདི་འདྲར་ཡང་མི་བཟང་བོ་ཁོང་ལྟ་བུ་རེ་བཞུགས་པས་ནི་སེམས་ལ་སྐྱིད་པའི་སྣང་བ་རེ་སྟེར།