རྒྱ་ནག་གི་གད་སྙིགས་ཁྲོད་ཀྱི་བོད། ནམ་མཁའ།

སྔོན་མོའི་འཕྲོས།༽
གསུམ་པ། མཚོ་བྱང་ནས་མཐོང་ཆུང་གིས་བསླངས་པའི་ཁོང་ཁྲོ།

དེའི་ཁུལ་དང་རྫོང་སྲིད་གཞུང་འབྲོག་པའི་རྩྭ་ཐང་ཞིག་ལ་གཞི་ཆགས་འདུག དེ་ཡང་གནའ་བོའི་བོད་ཀྱི་ཟི་ལིང་གྲོང་ཁྱེར་བཞིན་སྔོན་མ་ཞིག་ནས་གྲོང་ཁྱེར་ཆགས་པ་མ་ཡིན་པར། གུང་ཁྲན་ཏང་གིས་དབང་བསྒྱུར་བྱས་རྗེས་སུ་གཞི་གསར་བ་ཆགས་པ་ཤེས་ཐུབ། ཡིན་ཡང་ཁུལ་ཐོག་ཏུ་ཡོད་པའི་མི་རྣམས་མི་རིགས་འདྲ་མིན་ཡིན་པ་མ་ཟད། གཞུང་ལམ་འགྲམ་གྱི་ཚོང་ཁང་དང་ཟ་ཁང་སོགས་མི་ཚོགས་འཛོམས་སའི་ས་གནས་ཡག་ཤོས་ཚང་མ་བོད་རིགས་མ་ཡིན་པའི་རྒྱ་རིགས་དང་ཁ་ཆེ་སོགས་ཀྱིས་བཟུང་འདུག ངའི་སྣེ་ཤེན་བུ་མོས་མོ་རང་གི་སློབ་གྲོགས་འགས་དེ་གར་ལས་ཀ་བྱེད་ཀྱི་ཡོད་ཟེར། དེ་ནས་མོས་ཁོང་ཚོར་ཁ་པར་བཏང་སྟེ་འབྲེལ་བ་བྱས་སོང་།
ཡིན་ཡང་གུས་མོས་ངའི་སྣེ་ཤེན་བུ་མོ་ལ་ཁོང་ཚོ་སླེབས་རག་བར་དུ་ང་ཚོང་ཁང་འགའ་ལ་ལྟད་མོ་ཞིག་བལྟ་འདོད་ཡོད་ལབ་པ་ཡིན། མོས་ཀྱང་ངའི་བསམ་ཚུལ་ལ་མོས་མཐུན་བྱས་ཏེ་ངེད་གཉིས་ཚོང་ཁང་ས་གནས་དང་བསྡུར་ན་ཅུང་ཟད་ཆེན་པོ་ཡོད་པའི་ཚོང་ཁང་ཞིག་ནང་དུ་ཕྱིན་པ་ཡིན། ཚོང་ཁང་དེའི་ནང་ཅ་ལག་སྣེ་འཛོམས་པོ་ཞིག་རེད། དེ་གར་འབྲོག་པ་འགས་ཅ་ལག་འགའ་ལ་བལྟ་ཞོར་ཚོང་ཁང་གི་ཚོང་པ་ཚོར་སྐད་ཆ་འདྲི་བཞིན་འདུག འབྲོག་པ་དེ་ཚོས་རྒྱ་སྐད་ངག་ནས་འཁྲོལ་ལ་མ་འཁྲོལ་གྱིས་ཉོ་གི་ཡིན་ཉོ་གི་ཡིན་ཞེས་ཉམ་ཆུང་གིས་ལབ་ཀྱི་འདུག་པ་ཐོས་སོང་། དེའི་ནང་གི་ཚོང་པ་གཞོན་སྐྱེས་ཕོ་མོ་རྒྱ་རིགས་རྐྱང་རེད། ཕལ་ཆེར་ཁོང་ཚོའི་སྐད་ཆའི་གདངས་ལ་ཉན་ཚེ་ཊེ་ཅང་ནས་ལོས་ཡིན་བསམ་སོང་། གང་ལྟར་རྒྱ་རིགས་བུ་མོ་ཞིག་གིས་འབྲོག་པ་དེ་ཚོར་ཁྱེད་ཚོས་ཉོ་གི་མིན་ན་ལག་པ་མ་འཆང་ཞེས་སྐད་གདངས་མཐོན་པོས་བཤད་ཀྱི་འདུག་པས་ང་རང་ཁོང་ཁྲོ་གཏིང་ནས་སྐྱེས་སོང་། མ་གཞི་ནས་མཚོ་སྔོན་པོའི་འགྲམ་ནས་རྒྱ་རིགས་འགས་བྱེད་སྟངས་དེས་ངའི་སེམས་ནང་མ་སྐྱིད་པ་ཞིག་བཟོས་བའི་ཐོག ད་ཐེངས་འདི་གར་ཡང་གུས་མོའི་མིག་མདུན་ནས་བཟོད་མི་ནུས་བའི་མཐོང་ཆུང་བྱས་པ་མཐོང་དུས། ང་རང་ཁོང་ཁྲོའི་ཐོག་ལ་ཁོང་ཁྲོ་སྣོན་མ་ཞིག་རྒྱབ་སྟབས་ང་རང་འདར་སིག་འདྲ་རྒྱག་གི་འདུག ཡིན་ཡང་གུས་མོས་ངའི་ཁོང་ཁྲོ་དེ་ཅུང་ཟད་མར་མནོན་ཐབས་བྱས་ཏེ་སྐད་ཆ་གནས་ལུགས་ལྡན་པའི་འགྲེལ་བཤད་ཞིག་ཚོང་པ་རྒྱ་རིགས་བུ་མོ་དེར་བརྒྱབ་ན་བསམ་བྱུང་།

དེ་ནས་གུས་མོས་རྒྱ་རིགས་བུ་མོ་དེར་ཅ་ལག་ཉོ་མཁན་ཚོས་མིག་གིས་ལྟས་པ་ཙམ་གྱིས་འདོད་པ་ཡོད་མེད་ཤེས་དཀའ་བས།ངེས་བར་དུ་ལག་ཏུ་བཟུང་ནས་བལྟ་དགོས་པ་དེང་སང་གི་འགྲོ་ལུགས་རེད་ཞེས་ལབ་པ་ཡིན་མོད། འོན་ཀྱང་རྒྱ་རིགས་བུ་མོ་ཚོང་པ་དེས་ད་རུང་ང་རྒྱལ་གྱིས་ཁོང་ཚོས་ཉོ་གི་ནི་མ་རེད་ལག་པས་ཅ་ལག་ལ་ཚི་དྲེག་བཟོ་གི་འདུག་ཟེར། ངའི་ཁོང་ཁྲོ་མནོན་ཐབས་བྱས་པ་དེ་རྩ་ཡལ་ཕྱིན་ཏེ། ངས་གང་ཞིག་བཤད་དགོས་པ་ཡང་མ་ཤེས་བར་ཁོང་ཁྲོའི་ཚིག་འགའ་ཤོར་སོང་ཟེར། དེ་ནི་ངས་རྒྱ་རིགས་ཚོང་པ་བུ་མོ་དེར་བོད་པ་ཚོས་ཁྱེད་ཀྱི་ཅ་ལག་གང་ལ་ལག་པ་འཆང་ནས་མ་ཉོས་བར་ཚི་དྲེག་བཟོས་སོང་། དེ་ང་རང་ལ་བསྟན་དང་ངས་གཙང་མ་བཟོ་ཆོག་ལབ་པ་ཡིན། མ་ཟད་ད་རུང་ངས་ཚོང་པ་བུ་མོ་དེར་ས་ཁུལ་འདི་བོད་ཀྱི་འབྲོག་པའི་ས་ཁུལ་ཡིན་པ་ཁྱེད་ཀྱིས་ཤེས་དགོས་ལ། ཁྱེད་དང་ཁྱེད་ཀྱི་སྦྱིན་བདག་ཚོང་དཔོན་སོགས་བོད་རིགས་འབྲོག་པ་ཚོས་འདིར་མགྲོན་འབོད་བྱས་མེད་པ་ཤེས་དགོས་ཞེས་ང་རང་གིས་ཁ་འཛིངས་བྱེད་པའི་སྐབས་སུ། ཁོང་ཚོའི་སྦྱིན་བདག་ཡིན་མིན་གསལ་བོ་མ་ཤེས་མོད། འོན་ཀྱང་ལོ་ལྔ་བཅུ་ཡས་མས་ཙམ་གྱི་སྐྱེས་པ་ཞིག་སླེབས་ནས་གུས་མོ་ལ་ངས་ད་ལྟ་རང་སྤྱི་བདེ་མི་སྣ་སྐད་གཏོང་གི་ཡིན་ཟེར། ང་རང་དཔའ་ཞུམ་པ་ལས་ལྷག་ཏུ་སྙིང་སྟོབས་འདྲ་ཞིག་སྐྱེས་ནས་ད་ལྟ་རང་སྐད་ཐོངས་ཁོང་ཚོ་ཡོང་རག་བར་དུ་ང་ཕྱི་ལོགས་སུ་འགྲོ་གི་མིན་ལབ་པ་ཡིན།
མཚམས་འདིར་ཅ་ལག་ཉོ་མཁན་གྱི་འབྲོག་པ་དེ་ངའི་མདུན་ལ་སླེབས་ཏེ། གུས་བརྩི་ལྡན་པའི་སྒོ་ནས་སྐད་ཆ་ཞིག་ལབ་ཀྱི་འདུག་མོད། འོན་ཀྱང་གུས་མོའི་བོད་སྐད་མི་ཤེས་པས་ངའི་སྣེ་ཤེན་པ་བོད་ཀྱི་བུ་མོ་དེས་སྐད་བསྒྱུར་གནང་སོང་། ཉམ་ཆུང་འབྲོག་པ་དེས་གུས་མོར་འདི་ལྟར་བཤད་འདུག དྲིན་ཆེན་མ་ཐུགས་རྗེ་ཆེ། ང་ཚོ་ནམ་རྒྱུན་ཁོང་ཚོས་མཐོང་ཆུང་གིས་གཤེ་གཤེ་བཏང་ནས་གོམས་འདུག་ཞེས་བཤད་ཀྱི་འདུག་པས། གུས་མོའི་སེམས་ནང་དངོས་གནས་བོད་རིགས་ཚོས་རང་གི་ས་ཐོག་ནས་རང་གི་དངུལ་བྱིན་ནས་ཅ་ལག་ཞིག་ཉོས་ཚེ་ཡང་ལག་པ་འཆང་སྟེ་ལྟ་དབང་མེད་པར་གྱུར་འདུག་བསམ་ནས་སེམས་ཤིན་ཏུ་སྐྱོ་སོང་ཟེར།

ངས་མཚམས་འདིར་པེ་ཅིན་བུ་མོའི་ཚ་མོར་ག་ལེར་ཅིག་བལྟས་པ་ཡིན། མོ་རང་གི་ཚ་མོས་པེ་ཅིན་བུ་མོའི་གདོང་ལ་ཧ་ལས་མདོག་གིས་བལྟས་ནས་བསྡད་འདུག ཕར་བལྟས་ཚོད་ཀྱིས་པེ་ཅིན་བུ་མོས་བཤད་པའི་སྐད་ཆ་དེ་ལ་ཡིད་ཆེས་ཨེ་ཡོད་བསམ་པ་ཞིག་དྲན་སོང་། ཡིན་ཡང་འདི་ནི་གུས་པའི་ཡིད་ལ་དྲན་པའི་ཚོར་བ་ཞིག་ཡིན་པ་ལས་པེ་ཅིན་བུ་མོའི་ཚ་མོ་དེའི་ཚོར་བ་དངོས་དེ་ཡིན་མིན་མི་ཤེས། འོན་ཀྱང་ང་རང་པེ་ཅིན་བུ་མོ་དེས་བཤད་པའི་སྐད་ཆ་ལ་ཡིད་ཆེས་གཙང་མ་ཡོད། རྒྱུ་མཚན་ནི། ལོ་ཤས་སྔོན་ཞིག་ལ་ངའི་གྲོགས་པོ་ཞིག་བོད་ལ་ཕྱིན་ཏེ་ཚུར་འོང་ནས་ཕྲན་ལ་འདི་འདྲའི་སྐོར་གྱི་གནས་ཚུལ་བཤད་མྱོང་ཡོད་པས་ཐེ་ཚོམ་བྱེད་དགོས་དོན་མེད། ད་རུང་ངའི་གྲོགས་པོ་དེས་ཚོང་ཁང་ནང་ལ་སོང་སྟེ་ཅ་ལག་ཉོ་དུས་སོ་སོའི་དངུལ་སྤྲད་ནས་ཉོ་གི་ཡོད་པ་ལྟ་བུ་ཞིག་མ་ཡིན་པར། རྒྱ་རིགས་ཚོང་པ་ཚོའི་ལག་ནས་བོད་པ་ཚོས་འཕྲོག་ནས་འགྲོ་གི་ཡོད་པ་བཞིན། ཚུར་ང་ཚོ་ཉོ་མཁན་ལ་གཤེ་གཤེ་བཏང་ནས་ཁོང་ཁྲོ་གཏིང་ནས་བསླངས་ཀྱི་འདུག་ཅེས་ཕྲན་ལ་བཤད་མྱོང་ཡོད། ཁོས་ད་རུང་ཕ་ཡུལ་གྱི་ནང་མི་ཚང་མ་གོམས་ཚར་ཡོད་པ་འདྲ་བས་ཁོང་ཁྲོའི་ཚོར་སྣང་ཞིག་ཡོད་པའི་རྟགས་མི་འདུག་ཟེར་བ་ངས་དེ་རིང་ད་རུང་གསལ་བོ་དྲན་གྱི་འདུག གང་ལྟར་པེ་ཅིན་བུ་མོས་མུ་མཐུད་ནས་འདི་ལྟར་གླེང་མོལ་གྱི་མཇུག་མཐུད་སོང་། ཅ་ལག་ཉོ་མཁན་གྱི་འབྲོག་པ་དང་ངའི་སྣེ་ཤེན་བུ་མོ་གསུམ་གྱིས་གནས་ཚུལ་འདིའི་སྐོར་གླེང་ནས་མ་ཚར་གོང་། དངོས་གནས་སྤྱི་བདེ་མི་སྣ་གསུམ་སླེབས་སོང་། ཕར་བལྟས་ཚོད་ཀྱིས་གཉིས་བོད་རིགས་ཡིན་པ་ཤེས་ཐུབ་ལ་གཞན་དེ་རྒྱ་རིགས་ཞིག་རེད། ཁོང་ཚོའི་ནང་གི་རྒྱ་རིགས་དེས་ལམ་སེང་བོད་པའི་འབྲོག་པ་དེ་ཚོར་གཤེ་གཤེ་གཏོང་འགོ་བརྩམས་ཀྱི་འདུག་པས། གུས་མོས་རྒྱ་རིགས་སྤྱི་བདེ་ལས་བྱེད་དེར་ཁྱེད་ཚོའི་དེ་རིང་གི་གྱོད་ཡ་དེ་ང་རང་ཡིན་པ་ལས་འབྲོག་པ་འདི་ཚོ་མིན་ཅེས་བཤད་པ་ཡིན།

སྤྱི་བདེ་ལས་བྱེད་དེས་ངའི་སྐད་ཀྱི་གདངས་ལ་ལྟས་ནས་ཡིན་ནམ། ཡང་ན་གུས་མོའི་བཟོ་ལྟ་ལ་བལྟས་པ་ཡིན་གང་ཞིག་ཡིན་མིན་གསལ་བོ་མ་ཤེས་མོད། འོན་ཀྱང་ཁོས་གུས་མོར་ཁྱེད་རང་གང་ནས་ཡོང་པ་ཡིན་ཞེས་ང་ལ་དྲི་བ་ཞིག་བཏང་སོང་། གུས་མོས་ཁོས་གང་ཞིག་དྲིས་པ་དང་དེ་རིང་གི་དོན་དག་ཆུང་ཙགས་འདི་ཅི་ལྟར་བྱུང་མིན་སོགས་གསལ་བོར་བཤད་པ་ཡིན། ཡིན་ཡང་ཁོ་རང་ངའི་སྐད་ཆ་ལ་ཡིད་མ་ཆེས་པ་འདྲ། རྒྱ་རིགས་སྤྱི་བདེ་ལས་བྱེད་དེས་ངའི་སྡོད་གནས་ལག་ཁྱེར་དང་ལས་གནས་ལག་ཁྱེར་གཉིས་བསྟན་རོགས་ཟེར། ང་རང་གད་མོ་ཞིག་ཤོར་ཞོར་ཁྱེད་ཀྱིས་ཁྱེད་ཀྱི་ལུས་ཐོག་གི་གྱོན་ཆའི་སྤོབས་པ་བཀོལ་སྤྱོད་གཏོང་གི་ཡོད་པས་ཞེས། ཕར་ཁོ་ལ་དྲི་བ་ཞིག་གཏོང་ཞོར་ངའི་ལག་ཁྱེར་ཆ་ཚང་བསྟན་པ་ཡིན། ད་གཟོད་ཁོ་རང་གི་སྤོབས་པ་དེ་ཅུང་ཟད་ཆུང་རུ་བཏང་སོང་བས། གུས་མོས་ཀྱང་ཁོ་ལ་མི་འདོད་པའི་སྐད་ཆ་ཞིག་ཚོང་ཁང་ནང་གི་རྒྱ་རིགས་དེ་ཚོ་དང་མཉམ་དུ་འདི་ལྟར་བཤད་པ་ཡིན། ཀྲུང་ཧྭ་མི་དམངས་སྤྱི་མཐུན་གྱི་རྩ་ཁྲིམས་ཐོག་ན་ཚོང་ཁང་ནང་གི་ཅ་ལག་ཉོ་དུས་། ཉོ་མཁན་གྱིས་ཅ་ལག་ལ་ལག་པས་འཆང་ཚེ་མི་འདོད་ན་ཡང་ཉོ་དགོས་ཞེས་བྲིས་ཡོད་དམ་ལབ་པ་ཡིན། ཁོ་རང་གི་མཉམ་དུ་ཡོང་བའི་བོད་རིགས་སྤྱི་བདེ་ཉེན་རྟོག་པ་ཞིག་གིས་གདོང་ལ་འཛུམ་ཞིག་ལང་ཞོར་དེ་འདྲའི་ཁྲིམས་ཞིག་རྩ་བ་ནས་ཡོད་མི་སྲིད་ཅེས་རྒྱ་སྐད་ཀྱིས་ལན་བརྒྱབ་སོང་བས། རྒྱ་རིགས་ཉེན་རྟོག་པ་དེའི་གདོང་ན་མ་དགའ་བའི་མདོག་ཞིག་འདུག་མོད། འོན་ཀྱང་བཅོས་མའི་འཛུམ་མདངས་ཞིག་སྟོན་ཞོར་དེ་འདྲ་ཡོད་པ་མ་རེད་ཟེར། གུས་མོས་དེ་ཡིན་ན་ཚོང་ཁང་ནང་གི་རྒྱ་རིགས་བུ་མོར་མཛུབ་མོ་བཙུགས་ཏེ། མོས་འབྲོག་པ་ཉམ་ཆུང་འདི་ཚོ་དོན་མེད་དུ་གཤེ་གཤེ་གཏོང་དོན་ཅི་རེད། ཅ་ལག་ཉོ་འདོད་མེད་ན་ཡང་བཙན་དབང་བྱེད་ཀྱི་འདུག་པས་དེ་རིང་གི་དོན་དག་ཆུང་ཆུང་འདི་བྱུང་བ་རེད་ལབ་པ་ཡིན།

མཚམས་འདིར་ཕྲན་གྱི་ཡིད་ལ་ང་ཚོའི་བོད་རིགས་ཡི་གེ་ཤེས་མཁན་ཚོས་རྒྱ་ནག་གི་ཁྲིམས་ཅུང་ཟད་རེ་ཤེས་ན་བསམ་སོང་མོད། ཡིན་ཡང་གནས་ལུགས་བཤད་ས་མེད་པས་སྲིད་གཞུང་ཞིག་ཡིན་པས་ཁྲིམས་ལུགས་བཤད་ཀྱང་གཉའ་མནོན་དང་མཐོང་ཆུང་བྱེད་རྒྱུ་གཅིག་པ་ཡིན་པར་སྙམ། གང་ལྟར་པེ་ཅིན་བུ་མོས་མུ་མཐུད་ནས་འདི་ལྟར་བཤད་སོང་། གུས་མོས་ཀྱང་རྒྱ་རིགས་ཉེན་རྟོག་པ་དེའི་གདོང་གི་རྣམ་འགྱུར་དང་། ཁོས་ཅི་ཞིག་ཚོང་པ་དེ་ཚོར་བཤད་རྒྱུར་གསལ་བོར་དོན་སྣང་བྱས་པ་ཡིན་པས། རྒྱ་རིགས་ཉེན་རྟོག་པ་དེས་ཚོང་ཁང་ནང་གི་རྒྱ་རིགས་སྐྱེ་པ་དེ་དང་བུ་མོ་དེ་ཚོར་མིག་བཙུམ་འདྲ་ཞིག་རྒྱབ་སྟེ། རྫུན་མའི་གཏམ་ཞིག་འདི་ལྟར་བཤད་སོང་། ཁྱེད་ཚོས་ས་གནས་མི་དམངས་ལ་བརྩི་བཀུར་བྱེད་དགོས་ཞེས་སྐད་ཆ་འདི་གཅིག་པོ་བཤད་སོང་མོད། འོན་ཀྱང་རྒྱ་རིགས་ཚོང་པ་བུ་མོ་དེའི་གདོང་ན་ད་རུང་ཡང་ཁོང་ཁྲོའི་གཉེར་མ་དག་གདོང་ཁུག་ལ་བསྡུས་འདུག་ཟེར།
མཚམས་འདིར་པེ་ཅིན་བུ་མོའི་ཚ་མོ་ནུབ་ཕྱོགས་སུ་བསྡད་ཡོད་པ་དེས། ཁྱེད་ཚོས་ལྟོས་དང་གུང་ཁྲན་ཏང་གི་སྲིད་གཞུང་ནི། དེང་སང་ཇག་པའི་གཞུང་ཞིག་ཏུ་གྱུར་ཡོད་པ་རེད། དེ་ཡང་ཁོང་ཚོའི་ཇག་པའི་ཐག་སྣེ་ས་གནས་སྲིད་གཞུང་ཆུང་ཆུང་ཞང་ནས་བཟུང་མགོ་པེ་ཅིན་བར་དུ་འཐེན་ཚར་ཡོད་པ་རེད། ང་ཚོ་མི་དམངས་ཉམ་ཆུང་ཞིག་གིས་ཅི་ལྟར་ཇག་པའི་ཐག་སྣེ་དེ་གཅོད་ནུས་སམ་ཞེས་སྐད་གསེང་མཐོན་པོས་བཤད་སྟབས་པེ་ཅིན་བུ་མོ་ཡང་གད་མོ་ཤོར་སོང་།
ཕྲན་གྱི་སེམས་སུ་པེ་ཅིན་བུ་མོའི་ཚ་མོ་དེ་ཡང་། ད་ལྟ་རྗེས་ནས་པེ་ཅིན་གྱི་བུ་མོས་བཤད་པའི་ཚོང་ཁང་ནང་གི་གནས་ཚུལ་བརྒྱུད་རིམ་ལ་ཡིད་ཆེས་སླེབས་པ་འདྲ་བསམ་སོང་།

པེ་ཅིན་གྱི་བུ་མོས་མུ་མཐུད་ནས། སྤྱི་བདེ་ཉེན་རྟོག་པ་རྒྱ་རིགས་དེ་དང་ཚོང་ཁང་ནང་གི་རྒྱ་རིགས་དེ་ཚོའི་བར་འབྲེལ་བ་ག་རེ་ཡོད་པ་གུས་མོས་མ་ཤེས་མོད། འོན་ཀྱང་ཁོས་ཚོང་ཁང་གི་ལས་བྱེད་དེ་ཚོར་བཤད་པའི་གཏམ་དེ་ཁ་ཞེ་གཉིས་མེད་ཞིག་མིན་པ་ངས་གསལ་བོར་རྟོགས་སོང་། གུས་མོས་ཀྱང་རྒྱ་རིགས་ཉེན་རྟོག་པ་དེའི་མིག་གིས་མཐོང་ས་ནས་བསམ་བཞིན་དུ་ཉི་གདུགས་ཆུང་ཆུང་འགའ་ལ་ལག་པས་འཆང་སྟེ་རིན་གོང་སོགས་ཚོང་ཁང་གི་བུ་མོ་དེར་སྐད་ཆ་དྲིས་པ་ཡིན། མ་ཟད་ཁ་མདོག་སྣང་བ་མི་འགྲོ་བས་ཉོ་གི་མིན་ཞེས་བཤད་མོད། གུས་མོ་ལ་ཚིག་གཅིག་ཀྱང་ལབ་མ་སོང་ཟེར། མཚམས་འདིར་ཕྲན་གད་མོ་ཞིག་ཤོར་སོང་བས་པེ་ཅིན་བུ་མོས་ཕྲན་གྱི་གདོང་ལ་ཅིག་བལྟས་ཏེ། ཁྱེད་ཀྱིས་གུས་མོ་སྤྱོད་ངན་ཞིག་རེད་བསམ་གྱི་ཡོད་དམ་ཞེས་ཕྲན་ལ་དྲི་བ་ཞིག་དྲིས་སོང་། ཕྲན་གྱིས་མ་རེད་མ་རེད་དེ་འདྲ་བསམ་མ་སོང་། འོན་ཀྱང་ཁྱེད་ཀྱིས་ཁོང་ཚོར་ཆ་ཚང་ལ་ཡིག་རྩལ་ཆུང་ཆུང་ཞིག་བཏང་འདུག་ཞེས་ལབ་པས་ང་ཚོ་གསུམ་གད་མོད་ཤོར་ནས་དགོད་སྒྲ་དེས། ཇ་ཁང་ནང་གི་མགྲོན་པོ་ཚང་མས་ང་ཚོ་གསུམ་ལ་བལྟས་ནས་ཡོད་པ་ཕྲན་གྱིས་དོ་སྣང་གསལ་བོ་བྱུང་།
ཕྲན་གྱིས་པེ་ཅིན་བུ་མོ་དེར་སྐད་ཆ་ཞིག་དྲིས་པ་ཡིན། ཁྱེད་ཀྱི་སྣེ་ཤེན་པ་བོད་ཀྱི་གཞོན་ནུ་མ་དེས་ཚོང་ཁང་ནང་གི་བུ་མོ་དེར་ཚིག་གཅིག་ཀྱང་བཤད་སོང་མ་སོང་ངམ་ཞེས་དྲིས་པ་ཡིན། པེ་ཅིན་བུ་མོས་ངའི་སྣེ་ཤེན་གཞོན་ནུ་མ་དེས་ཚོང་ཁང་ནང་གི་རྒྱ་རིགས་དེ་ཚོར་སྐད་ཆ་གཅིག་ཀྱང་བཤད་མ་སོང་། གུས་མོའི་བལྟ་སྟངས་ནོར་མེད་ན་ཅ་ལག་ཉོ་མཁན་གྱི་འབྲོག་པ་དེས་བཤད་པ་བཞིན་ཕལ་ཆེར་གོམས་ལོབས་སུ་སོང་ཡོད་པ་འདྲ་ཟེར། ཡིན་ཡང་དོན་དག་ཆུང་ཙགས་དེའི་མཇུག་སྒྲིལ་བ་འདྲ་བོ་བྱས་ཏེ་ང་ཚོ་ཆ་ཚང་ཚོང་ཁང་ཕྱི་ལོགས་སུ་སླེབས། མོ་རང་གི་སློབ་གྲོགས་བུ་མོ་གཉིས་ཀྱིས་སྲང་ལམ་ན་མོ་རང་ལ་སྒུག་ནས་བསྡད་འདུག ངའི་སྣེ་ཤེན་བོད་ཀྱི་གཞོན་ནུ་མ་དེས་ཁོང་གཉིས་ལ་རྒྱ་སྐད་ཀྱིས་གུས་མོ་ངོ་སྤྲོད་ཐུང་ངུ་ཞིག་བྱས་སོང་། དེ་ནས་བུ་མོ་ཞིག་གིས་ངེད་གཉིས་ལ་རྒྱ་སྐད་ཀྱིས་ང་ཚོས་ཁྱེད་གཉིས་ཚོང་ཁང་དེའི་ནང་ན། ཉེན་རྟོག་པ་གསུམ་དང་མཉམ་དུ་སྐད་ཆ་བཤད་བཞིན་ཡོད་པ་མཐོང་སོང་བས་ཚོང་ནང་ལ་ཡོང་མེད་ཟེར། གུས་མོས་འོ་རེད་རེད། དེ་དོན་དག་ཆུང་ཆུང་ཞིག་གི་ཆེད་དུ་ཚོང་ཁང་གི་སྦྱིན་བདག་འདྲ་བོ་དེས་ཁོང་ཚོ་སྐད་བཏང་བ་རེད་ཅེས་ལབ་པ་ཡིན། དེ་མིན་སྐབས་ཐོག་དེར་ཁོ་གཉིས་ལ་སྐད་ཆ་གཞན་བཤད་མེད། ཡིན་ཡང་གུས་མོའི་སེམས་སུ་ཁོང་ཚོ་ཉེན་རྟོག་པ་ཡོད་ཚད་ལ་སྐྲག་གི་ཡོད་དམ། ཡང་ན་དོན་དག་ཆུང་ཙགས་ཞིག་དང་རྐྱེན་བྱས་ཏེ་ཁོ་རང་ཚོའི་ལས་གནས་ལ་གནོད་པ་འབྱུང་བར་དོགས་པའི་དབང་གིས། ཁོ་རང་གཉིས་ཀྱི་གྲོགས་མོ་ལ་འཚམས་འདྲི་ཙམ་བྱེད་པར་ཡང་ཚོང་ཁང་ནང་ཡོང་མ་ཐུབ་པ་ཡིན་ནམ་སྙམ། གང་ལྟར་ཡང་ངའི་སྣེ་ཤེན་པ་བོད་ཀྱི་གཞོན་ནུ་མའི་གྲོགས་མོ་གཉིས་ཀྱིས་ང་ཚོས་ཚོང་ཁང་ནང་སྐད་གསེང་མཐོན་པོས་ཁ་འཛིངས་བྱེད་བཞིན་པ་ཁོ་གཉིས་ཀྱིས་མཐོང་འདུག་ཟེར།

མཚམས་འདིར་པེ་ཅིན་བུ་མོའི་གདོང་ན་ཅུང་མ་འཐད་པའམ་མ་དགའ་བའི་རྣམ་འགྱུར་ཞིག་འདུག་སྙམ་པའི་ཚོར་སྣང་ཞིག་ཕྲན་ལ་བྱུང་། པེ་ཅིན་བུ་མོས་མུ་མཐུད་དེ། ངའི་སྣེ་ཤེན་བུ་མོའི་གྲོགས་མོ་གཉིས་ཀྱིས་ང་ཚོ་ཇ་ཁང་ཞིག་ལ་འགྲོ་ཟེར། ང་རང་ཡང་ཅུང་ངལ་གསོ་ཞིག་རྒྱག་འདོད་བྱུང་བས་ཁོ་མོ་གཉིས་ཀྱི་གྲོས་གཞི་ལ་མོས་མཐུན་བྱས་པ་ཡིན། ང་རང་ནི་ས་ཁུལ་དེའི་ཟ་ཁང་སོགས་ལ་ཆ་མེད་རྒྱུས་མེད་ཞིག་ཡིན་པས་གང་གི་ནང་དུ་འགྲོ་དགོས་པ་དེ་ཁོང་ཚོས་འདེམས་དགོས་ཡོད་པ་རེད། དེས་རྐྱེན་ཁོང་ཚོས་གདམས་ཀ་བྱེད་སྟངས་ལ་ལྟས་ན་ཁོང་ཚོའི་འདོད་པ་གཅིག་མཚུངས་མ་རེད། ཡིན་ཡང་ཇ་ཁང་སོགས་གང་གི་ནང་དུ་ཁྲིད་ཚེ་ཁོང་ཚོའི་རྗེས་སུ་འབྲངས་རྒྱུ་ལས་ང་རང་ལ་ཐབས་གཞན་མེད། ཐ་མར་ཁོང་ཚོའི་གདོང་ལ་འཛུམ་མདངས་ལང་ཞོར་ཟ་ཁང་ཞིག་ཐག་གཅོད་བྱས་འདུག་པས་དེར་ཕྱིན་པ་ཡིན། ཟ་ཁང་དེ་ནི་ཁང་པ་ཐོག་བརྩེགས་ཅན་ཞིག་རེད། ཟ་ཁང་དེའི་སྒོ་བྱང་ངོས་སུ་མགྲོན་ཁང་ག་གེ་མོ་ཞིག་གི་མིང་བྲིས་འདུག་མོད།ཡིན་ཡང་མིང་གསལ་བོ་གུས་མོས་དེ་རིང་འདིར་ཁྱེད་ལ་མི་བཤད་ཟེར། ཕྲན་གྱིས་ཀྱང་དེ་འགྲིག་གི་རེད་ཅེས་པེ་ཅིན་བུ་མོར་ལན་བཏབས་པ་ཡིན། པེ་ཅིན་བུ་མོའི་གདོང་ལ་གད་མོའི་འཛུམ་མདངས་ཞིག་ལང་ཞོར་མོའི་འགྲམ་གྱི་ཚ་མོར་ཅིག་ལྟས་ཏེ་འདི་ལྟར་བཤད་སོང་། ང་ཚོ་འགྲོ་སའི་ཟ་ཁང་དེ་ནི་ཅུང་ཟད་ཆེན་པོ་ཞིག་ཡིན་པ་མ་ཟད། སྤུས་གཙང་ཁམས་དྭངས་མོ་ཞིག་རེད། ནང་དུ་སླེབས་མ་ཐག་སྒོ་འགྲམ་དུ་ཟ་ཁང་གི་སྒྲིག་ཆས་གྱོན་པའི་བུ་མོ་ཞིག་གིས་ཕེབས་བསུ་བྱེད་བཞིན་འདུག་པས། གུས་མོས་བུ་མོ་དེའི་གདོང་ལ་གསལ་བོ་ཅིག་བལྟས་པ་ཡིན། བུ་མོ་དེ་བོད་རིགས་ཡིན་པ་ཡང་ངས་མོའི་གདོང་ནས་གསལ་བོ་ཤེས་ཐུབ་ཅིང་། ལོ་ཚོད་ཡང་༢༠ ཡས་མས་ཞིག་ལ་སོན་ཙམ་རེད་སྙམ་པའི་ཚོར་བ་བྱུང་།

གང་ལྟར་ང་ཚོ་སྡོད་སའི་ཅོག་ཙེ་ཞིག་ཟ་ཁང་ནང་གི་ལས་བྱེད་བུ་མོ་ཞིག་གིས་བཀོད་སྒྲིགས་བྱས་པ་ལྟར་བསྡད་པ་ཡིན། ཟ་ཁང་དེའི་ནང་མགྲོན་པོ་མི་ཉུང་པ་ཞིག་འདུག་པ་མ་ཟད། ཁོང་ཚོས་གླེང་མོལ་གྱི་དགོད་སྒྲ་ཡང་ཚང་མས་ཐོས་ཐུབ། ཟ་ཁང་དེའི་རྩིག་ངོས་སུ་རྒྱ་ཡི་རི་མོ་དང་རྒྱ་ཡིག་བྲིས་ཡོད་པའི་ཤེལ་སྒོ་ཆེན་པོ་ཞིག་འདུག་པས་དེའི་ངོས་ཕར་བལྟས་ཚེ། ཟ་ཁང་ནང་མགྲོན་པོ་སུ་ཞིག་ཡོང་གི་ཡོད་པ་ཡང་མཐོང་ཐུབ་ཀྱི་འདུག གུས་མོས་ཤེལ་སྒོ་དེའི་ངོས་ནས་མགྲོན་པོ་མང་པོ་ཞིག་སྐས་འཛེགས་སྟེང་ཡར་ཐོག་ཁང་ལ་ཡར་འགྲོ་མར་འགྲོ་བྱེད་བཞིན་ཡོད་པ་མཐོང་སོང་བས། གུས་མོས་ངའི་སྣེ་ཤེན་བུ་མོར་ང་ཚོ་ཐོག་ཁང་སྟེང་སོང་སྟེ་བསྡད་ན་ཁོར་ཡུག་སོགས་ཡག་པོ་མཐོང་ཐུབ་པས་ང་ཚོའི་འདུག་ས་བརྗེ་བོ་བརྒྱབ་ན་ཅེས་སྐད་ཆ་དྲིས་པ་ཡིན། ངའི་སྣེ་ཤེན་བུ་མོ་འཛུམ་མདངས་མི་འདྲ་བ་ཞིག་ལང་ཞོར་ཐོག་ཁང་དེ་མགྲོན་ཁང་རེད་ཟེར། གུས་མོས་ཀྱང་འོ་རེད་རེད་ཅེས་ལན་བཏབ་པ་ལས་གཞན་ཅི་ཡང་བཤད་མེད། ཟ་ཁང་ནང་གི་ལས་བྱེད་རྒྱ་རིགས་བུ་མོ་ཞིག་གིས་ང་ཚོར་ཟ་མའི་རེའུ་མིག་སྤྲད་དེ། ཟ་མ་གང་ཞིག་དགོས་མིན་གྱི་གདམས་གསེས་བྱེད་དུ་བཅུགས་སོང་མོད། ཡིན་ཡང་ངའི་སྣེ་ཤེན་བུ་མོའི་གྲོགས་མོ་ཞིག་གིས་ད་རུང་ཅུང་ཟད་སྒུགས་དང་མི་ཞིག་ཡོང་དགོས་ཀྱི་ཡོད་ཅེས་རྒྱ་སྐད་ཀྱིས་བཤད་སོང་། གུས་མོས་བུ་མོ་དེར་ད་རུང་གྲོགས་མོ་ཞིག་ཡོང་རྒྱུ་ཡོད་པས་ཅེས་སྐད་ཆ་དྲིས་པ་ཡིན། གྲོགས་པོ་བུ་ཞིག་ཡོང་གི་ཡོད་ཅེས་ངའི་སྣེ་ཤེན་བུ་མོ་དེས་ལན་རྒྱབ་སོང་བས་ང་ཚོ་ད་རུང་ཅུང་ཟད་སྒུགས་དགོས་པ་ངས་ཤེས་སོང་། ང་ཚོས་བུ་དེ་ཡོང་རག་བར་དུ་ཚོང་ཁང་ནང་གི་དོན་ཆུང་དེའི་སྐོར་གླེང་མོལ་བྱེད་བཞིན་ཆུ་ཚོད་སྐར་མ་བཅུ་ལྷག་འགོར་བའི་སྐབས་སུ། བོད་པའི་བུ་ཞིག་གིས་གྱོན་ཆས་སྤུས་དག་གྱོན་ཞིང་། ཕར་བལྟས་ཚོད་ཀྱིས་ལས་བྱེད་འགོ་ཁྲིད་ཞིག་ལོས་ཡིན་བསམ་པའི་ཕལ་ཆེར་ལོ་༤༠ མ་ཟིན་ཙམ་གྱི་སྐྱེས་པ་ཞིག་སླེབས་སོང་། སྐྱེས་པ་དེས་ངའི་སྣེ་ཤེན་བོད་ཀྱི་གཞོན་ནུ་མ་དེར་འཚམས་འདྲི་བྱས་ཞོར་གུས་མོར་ལྟ་ཙམ་བྱས་སོང་བ་ངས་དོ་སྣང་ཡག་པོ་ཞིག་བྱུང་། གུས་མོའི་སྣེ་ཤེན་པ་བུ་མོས་ཀྱང་ཁོ་ལ་གུས་མོ་ངོ་སྤྲོད་ཐུང་ངུ་ཞིག་རྒྱ་སྐད་ཀྱིས་བྱས་རྗེས། སྐྱེས་པ་དེས་ཀྱང་གུས་མོར་འཚམས་འདྲི་ཞིག་བྱས་ཞོར་ལག་པ་ཞིག་བཏང་སྟེ་ཁོས་ལག་པས་ངའི་ལག་པ་བཙིར་ཙམ་བྱས་པ་དེ་གུས་མོས་གསལ་བོར་ཚོར། ཡིན་ཡང་གུས་མོའི་སེམས་ནང་ཚོར་བ་དམིགས་བསལ་ཅན་ཞིག་ཅི་ཡང་སླེབས་མ་སོང་ཟེར།

མཚམས་འདིར་ཕྲན་གྱིས་པེ་ཅིན་བུ་མོའི་ཚ་མོར་ག་ལེར་ཅིག་བལྟས་པ་ཡིན། མོ་རང་གི་གདོང་ལ་འཛུམ་མདངས་ཞིག་ལང་ཞོར་པེ་ཅིན་བུ་མོ་དེར་བོད་རིགས་བུ་དེ། ཁྱེད་ལ་སེམས་པ་ཤོར་བ་འདྲ་ཟེར་ཞོར་དགོད་སྒྲ་ཇ་ཁང་ནང་གི་མགྲོན་པོ་ཚོས་ཐོས་པ་བགད་སོང་བས་ང་རང་ཡང་གད་མོ་ཤོར་སོང་། པེ་ཅིན་གྱི་བུ་མོའི་གདོང་ལ་འཛུམ་ཞིག་ལང་ཞོར་འདི་ལྟར་བཤད་སོང་། གུས་མོར་སེམས་པ་ཤོར་བ་དེ་འདྲ་ཞིག་མ་རེད་མོད། ཡིན་ཡང་སྐྱེས་པ་དེ་བུ་མོ་མང་པོ་ལ་འབྲེལ་འདྲིས་མང་པོ་བྱེད་མཁན་ཞིག་རེད་བསམ་སོང་། གང་ལྟར་སྐྱེས་པ་དེས་ང་ཚོ་ཆ་ཚང་ལ་དེ་རིང་ཁྱེད་ཚོས་ཟ་མ་ག་རེ་ཟ་འདོད་ཡོད་ན་མངགས་དང་ངས་སྦྱིན་བདག་བྱེད་ངེས་ཡིན་ཟེར། ངའི་སྣེ་ཤེན་བུ་མོའི་གྲོགས་མོ་ཞིག་གིས་དེ་ཡིན་དང་ཡིན་ཁྱེད་རང་འགོ་ཁྲིད་དཔོན་པོ་རེད། ང་ཚོ་ལས་ཁྱེད་རང་ལ་ཡོང་འབབ་མང་པོ་ཡོད་པ་རེད་ཅེས་ལན་བཏབ་སོང་བས། ངའི་སྣེ་ཤེན་བུ་མོས་ཁོ་རང་ལས་ཁུང་ག་གེ་མོ་ཞིག་གི་འགོ་ཁྲིད་མཐོ་ཤོས་དེ་རེད་ཅེས་ཁོའི་ལས་གནས་གུས་མོར་ངོ་སྤྲོད་ཐུང་ངུ་ཞིག་བྱས་རྗེས། གུས་མོས་ཚོར་སྣང་ནོར་མེད་ན་སྐྱེས་པ་དེས་ཀྱང་ཅུང་ཟད་སྤོབས་པ་མཐོ་བོས་མགོ་བོ་ཡར་དགྱེས་ཙམ་བྱས་སོང་། གུས་མོས་ཀྱང་ཁོ་ལ་ཁྱེད་རང་འགོ་ཁྲིད་ལ་བསྡད་ནས་ལོ་ག་ཚོད་ཞིག་ཕྱིན་སོང་ཅེས་དྲི་བ་ཞིག་དྲིས་པ་ཡིན། ཁོས་ལོ་གཉིས་ལྷག་ཞིག་ཕྱིན་སོང་མོད།ཡིན་ཡང་འགན་ཁུར་ལྕི་མོ་རེད་ཟེར། གུས་མོས་ཀྱང་རེད་རེད་འགན་ཁུར་ཆེན་པོ་ཡོད་ངེས་རེད། ལྷག་པར་དུ་ཡང་མི་དམངས་ཉམ་ཆུང་དེ་ཚོར་རོགས་སྐྱོར་རིས་མེད་ཞིག་བྱས་ཚེ་འགན་ཁུར་ལྕི་མོ་ཡོད་ཀྱང་དོན་དག་ཡག་པོ་ཞིག་བྱུང་བ་རེད་ལབ་པ་ཡིན་མོད། ཡིན་ཡང་གུས་མོས་བཤད་པའི་སྐད་ཆའི་མཇུག་མ་རྫོགས་མཚམས་སུ་ངའི་སྣེ་ཤེན་བུ་མོས་གུས་མོར་མིག་བརྡ་ཞིག་བརྒྱབ་སོང་བས་དོགས་པ་ཅུང་ཟད་བྱུང་། དེ་ནི་གུས་མོའི་བཤད་པའི་སྐད་ཆ་ནོར་བ་མིན་ནམ་སྙམ། འོན་ཀྱང་ནོར་ཡང་ཁ་ནས་བཤད་ཚར་སོང་བ་མ་ཟད། ཁོས་ཀྱང་ལན་ཐུང་ངུ་ཞིག་དཔོན་ཉམས་ཀྱིས་བཤད་སོང་། གང་ལྟར་སྐྱེས་པ་དེས་ང་ཚོར་མགྲོན་བསུའི་ཟ་མ་གྲ་རྒྱས་ཐག་ཆོད་ཞིག་གནང་སོང་བས་གུས་མོས་ང་ཚོ་ཟ་ཁང་ནས་བྲལ་སྐབས་ཐུགས་རྗེ་ཆེ་ཞེས་གུས་བརྩི་ལྡན་པའི་སྒོ་ནས་བཤད་པ་ཡིན།

པེ་ཅིན་བུ་མོས་མུ་མཐུད་ནས་བཤད་རྒྱུར། ང་ཚོས་ཟ་མ་ཟ་བཞིན་པའི་སྐབས། གུས་མོས་ངའི་སྣེ་ཤེན་བུ་མོ་དེར་དེ་རིང་ངེད་གཉིས་ཀྱིས་མགྲོན་ཁང་འདིའི་ནང་ཐོ་འགོད་ཞིག་བྱས་ན་སྟབས་བདེ་བོ་རེད་ལབ་པ་ཡིན། ཡིན་ཡང་མོ་རང་གིས་ངེད་གཉིས་མགྲོན་ཁང་འདི་མ་ཡིན་པའི་གཞན་ཞིག་བཙལ་ན་ཆོག་གི་རེད་ཟེར། མཚམས་དེར་སྐྱེས་པ་འགོ་ཁྲིད་དེས་ཀྱང་ངས་ཁྱེད་གཉིས་ལ་མགྲོན་ཁང་གཞན་ཞིག་བཀོད་སྒྲིག་བྱས་ཆོག་ཟེར། ངའི་སྣེ་ཤེན་བུ་མོའི་གྲོགས་མོ་ཞིག་འཛུམ་མདངས་ལང་ཞོར་གུས་མོའི་སྣེ་ཤེན་བུ་མོར་མཛུབ་མོས་བསྟན་ཏེ་མོ་རང་གིས་བཙལ་གི་རེད་བཤད་སོང་བས། གུས་མོས་ཀྱང་ང་ཚོའི་ཟ་མའི་སྦྱིན་བདག་བུ་དེར་ཐུགས་རྗེ་ཆེ་ངའི་སྣེ་ཤེན་བུ་མོས་བཀོད་སྒྲིག་བྱས་ན་ཆོག་གི་ལབ་པ་ཡིན། ཡིན་ཡང་གུས་མོའི་སེམས་སུ་ང་ཚོའི་ཟ་མ་ཟ་སའི་འདིའི་སྒང་མགྲོན་ཁང་རེད་ཅེས་ངའི་གྲོགས་མོས་བཤད་ཀྱི་འདུག་མོད། འདིའི་ནང་བསྡད་ན་མ་འགྲིག་པར་མགྲོན་ཁང་གཞན་ཞིག་ནས་བཙལ་དགོས་པ་གང་ཡིན་ནམ་སྙམ། ཡིན་ཡང་ཁོང་ཚོར་སྐད་ཆ་གཅིག་ཀྱང་བཤད་མེད་ཟེར།
མཚམས་འདིར་ཕྲན་གྱིས་ཀྱང་མགྲོན་ཁང་དེའི་འོག་ན་ཟ་ཁང་ཡང་འདུག་པས་སྟབས་བདེ་བོ་རེད། ཡིན་ཡང་དེའི་ནང་པེ་ཅིན་བུ་མོའི་སྣེ་ཤེན་པ་བོད་ཀྱི་གཞོན་ནུ་མ་དེ་འདུག་སྡོད་མེད་པའི་རྒྱུ་མཚན་ཅིག་ཡོད་སྲིད་སྙམ་མོད། འོན་ཀྱང་ཤེས་འདོད་ཆེ་བའི་རྒྱུ་མཚན་དེ་མོ་རང་ལ་འདྲི་མ་ནུས་པར་བཞག་སྟེ། པེ་ཅིན་བུ་མོའི་ཚ་མོར་ཅིག་བལྟས་པ་ཡིན། ཚ་མོས་ཀྱང་དེ་ཤེས་འདོད་ཀྱི་དབང་གིས་ཡིན་ནམ་ཡང་ན་ཡུལ་སྐོར་ཟིན་ཐོ་སྙན་མོ་བྱུང་བ་གང་ཡིན་གསལ་བོ་མ་ཤེས་མོད། འོན་ཀྱང་པེ་ཅིན་བུ་མོའི་གདོང་ལ་ཅེར་ནས་བལྟས་ཏེ་སྐད་ཆའི་མཇུག་ལ་སྒུག་འདུག ང་ཚོས་གླེང་མོལ་བྱེད་བཞིན་པའི་མཚམས་འདིར་ཕྲན་གྱི་སྣ་ལམ་དུ་ཟས་དྲི་ཞིམ་པོ་འཐུལ་བས། ཕྲན་གྱིས་ག་ལེར་ཇ་ཁང་ནང་གི་མགྲོན་པོ་གཡས་གཡོན་ལ་ཅིག་བལྟས་པ་ཡིན། མགྲོན་པོ་མང་པོ་ཞིག་གིས་ཉིན་གུང་གི་ཟ་མ་མཆོད་བཞིན་པའི་སྐབས་རེད། མ་ཟད་ཕྲན་གྱི་གླེང་མོལ་བྱེད་རོགས་པེ་ཅིན་བུ་མོས་ཀྱང་མགྲོན་པོ་ཚོས་ཟ་བཞིན་པའི་ཟ་མ་ལ་མིག་ཟུར་ཙམ་འཕངས་པ་ངས་མཐོང་སོང་། ང་ཚོས་གླེང་མོལ་གྱི་དུས་ཡུན་ཅུང་ཟད་འགོར་བ་ཡང་ཕྲན་གྱིས་མ་ཚོར་བར་པེ་ཅིན་བུ་མོས་གླེང་མོལ་གྱི་ནང་ཕྲན་གྱི་སེམས་ཡོངས་སུ་ཐིམས་ཡོད་པ་རྗེས་ནས་ཚོར།

སྐབས་འདིར་ཕྲན་གྱིས་པེ་ཅིན་བུ་མོ་དང་མོའི་ཚ་མོ་གཉིས་ལ་ཀུ་རེ་དང་མཉམ་དུ། དེ་རིང་ཁྱེད་གཉིས་ཀྱིས་ཉིན་གུང་བཞེས་ལ་ག་རེ་མཆོད་ན་ཕྲན་གྱིས་སྦྱིན་བདག་བྱེད་ཆོག་ལབ་པ་ཡིན། པེ་ཅིན་བུ་མོའི་གདོང་ལ་འཛུམ་མདངས་ཞིག་ལང་ཞོར།གུས་མོ་བོད་ལ་ཕྱིན་སྐབས་བོད་པའི་བུ་ཞིག་གིས་ཉིན་གུང་གི་ཟ་མའི་སྦྱིན་བྱས་པ་གོང་དུ་བཤད་པ་བཞིན། དེ་རིང་ཁྱེད་ཀྱིས་ངེད་གཉིས་ལ་མགྲོན་བྱེད་ཀྱི་འདུག་པས་གུས་མོ་མ་འོང་པར་བོད་ལུང་པར་མནའ་མ་སླེབས་ས་རེད་ཅེས་ཀུ་རེ་བཤད་སོང་། ཕྲན་གྱིས་ཀྱང་དེ་ཡོང་སྲིད་པ་ཞིག་རེད། སྔོན་མ་བོད་ཀྱི་རྒྱལ་པོ་སྲོང་བཙན་སྒམ་པོས་ཀྱང་རྒྱ་ནང་ནས་རྒྱ་ཡི་སྲས་མོ་ཞིག་མནའ་མ་བསུས་པ་རེད་ལབ་པས་ང་ཚོ་གསུམ་གད་མོ་ཤོར་སོང་། གང་ལྟར་ཕྲན་གྱིས་ཁོང་གཉིས་ཀྱིས་གང་ཞིག་ཟ་འདོད་པའི་ཟ་མ་མངགས་སྟེ། ང་ཚོས་ཉིན་གུང་གི་ཟ་མ་ཟ་ཞོར་ཕྲན་གྱིས་པེ་ཅིན་བུ་མོར་ཡུལ་སྐོར་ཟིན་ཐོའི་གླེང་མོལ་གྱི་མཇུག་མཐུད་ཕྱིར། དྲི་བ་ཞིག་འདི་ལྟར་དྲིས་པ་ཡིན། ཁྱེད་རང་མཚོ་བྱང་ནས་འབྲོག་པའི་རི་ནང་ལ་ཕྱིན་ནམ་ཞེས་མོར་དྲི་བ་ཞིག་བཏང་པ་ཡིན། པེ་ཅིན་བུ་མོས་སྐད་ཆའི་མཇུག་མུ་མཐུད་ནས་འདི་ལྟར་བཤད་སོང་། པེ་ཅིན་བུ་མོས་དེར་ཕྱིན་པ་ཡིན།ཡིན་ཡང་ད་རུང་ངས་མཚོ་བྱང་ཁུལ་ཐོག་གི་སྐད་ཆའི་མཇུག་རྫོགས་མེད་ཟེར་ཞོར་སྒྲུང་དེའི་གོ་རིམ་ལ་འཇུས་སོང་། པེ་ཅིན་བུ་མོས་ང་ཚོ་ཆ་ཚང་གིས་ཟ་ཁང་དེའི་ནང་ཟ་མ་ཟས་ཚར་རྗེས། ཟ་ཁང་ཕྱི་ལོགས་སུ་སླེབས་ནས་གུས་མོས་ཉིན་གུང་གི་ཟ་མའི་སྦྱིན་བདག་དེར་ཐུགས་རྗེ་ཆེ་ལབ་ཞོར། གུས་མོའི་སྣེ་ཤེན་བུ་མོའི་གྲོགས་མོ་གཉིས་ལ་ཡང་། ཁྱེད་རང་གཉིས་འདིར་ང་ཚོར་ཐུག་འཕྲད་དུ་ཡོང་བ་བཀའ་དྲིན་ཆེ་ཞེས་ལབ་པ་ཡིན།

ལས་བྱེད་འགོ་ཁྲིད་བུ་དེས་གུས་མོར་ཁྱེད་རང་གཉིས་ས་ཁུལ་ཡར་མར་ལ་འགྲོ་སྤྱད་ཀྱི་རླུང་འཁོར་འདྲ་དགོས་ན། ངས་ཁྱེད་གཉིས་ལ་བཀོད་སྒྲིག་བྱེད་ཆོག་པས་གུས་མོར་ཁྱེད་ཀྱིས་འཚེར་སྣང་མེད་པར་བཤད་ན་ཆོག་ཟེར། གུས་མོས་ཀྱང་ལེགས་སོ་བཀའ་དྲིན་ཆེ་གལ་སྲིད་དགོས་ཚེ་ངའི་སྣེ་ཤེན་བུ་མོས་ཁྱེད་ལ་འབྲེལ་བ་བྱེད་ཆོག་ཅེས་གུས་མོས་ལན་བཏབ་སྟེ་ང་ཚོ་རང་གནས་སུ་གྱེས། ངའི་སྣེ་ཤེན་བུ་མོས་ངེད་གཉིས་ཀྱིས་དང་པོ་སྡོད་སའི་མགྲོན་ཁང་ཞིག་ཐོ་འགོད་བྱེད་དུ་འགྲོ་ཟེར། གུས་མོས་ཀྱང་དེ་འགྲིག་གི་རེད་ཅེས་ལན་བཏབ་སྟེ། ངེད་གཉིས་ཀྱིས་མགྲོན་ཁང་ཞིག་བཙལ་བ་ཡིན། མགྲོན་ཁང་དེ་ནི་ཁང་པ་ཐོག་ཁང་གསུམ་ཅན་ཞིག་ཡིན་པ་མ་ཟད། ཧ་ཅང་གཙང་ཞིང་གུ་ཡངས་བའི་ཚོར་སྣང་ཞིག་གུས་མོར་སྤྲད་སོང་། ངའི་སྣེ་ཤེན་བུ་མོ་དང་ངེད་གཉིས་ཐོག་ཁང་གཉིས་པ་ནང་བསྡད་པ་ཡིན། ཐོག་ཁང་ནས་འོག་གི་སྲང་ལམ་དང་མི་ཚོགས་གསལ་བོ་མཐོང་བ་མ་ཟད། རྒྱང་རིང་གི་རྩྭ་ཐང་ཡང་མཐོང་ཐུབ་ཀྱི་འདུག་པས་བཙལ་བའི་མགྲོན་ཁང་ནོར་མི་འདུག་སྙམ་སོང་། མགྲོན་ཁང་ནང་ངེད་གཉིས་ཀྱིས་ཆུ་གྲང་མོ་རེ་མངགས་སྟེ་འཐུང་ཞོར། གུས་མོའི་སྣེ་ཤེན་བུ་མོས་གཏམ་རྒྱུད་ཐུང་ངུ་ཞིག་གི་འགོ་བརྩམས་སོང་། དེ་ནི་གཞན་ཞིག་མ་ཡིན་པར་ང་ཚོས་དེའི་ཡར་སྔོན་དག་དག་ལ་ལས་བྱེད་འགོ་ཁྲིད་བུ་དེས་སྦྱིན་བདག་བྱས་ཏེ། ཟ་ཁང་ཞིག་གི་ནང་མོ་རང་གི་གྲོགས་མོ་གཉིས་དང་མཉམ་དུ་ཟ་མ་ཟ་སའི་སྒང་གི་མགྲོན་ཁང་དེའི་གནས་ཚུལ་རེད། ཟ་ཁང་དང་མགྲོན་ཁང་གཉིས་འཛོམས་དེའི་སྦྱིན་བདག་རྒྱ་རིགས་ཞིག་དང་། དེའི་ཉིན་གུང་གི་ཟ་མའི་སྦྱིན་བདག་གམ་ལས་ཁུངས་ག་གེ་མོའི་འགོ་ཁྲིད་བོད་རིགས་ལས་བྱེད་ཁོ་གཉིས་རེད་ཟེར། མགྲོན་ཁང་དེའི་ནང་བཤང་ཁང་རེད་ཟེར་བས་ང་རང་དགོད་ཡང་མ་ཤེས་ལ། ངུ་མི་ཤེས་བར་ཅུང་ཟད་བསམ་བློ་བཏང་ནས་འདུག་དགོས་བྱུང་། ཡིན་ཡང་གུས་མོས་ངའི་སྣེ་ཤེན་བུ་མོར་བཤང་ཁང་ནང་གི་བུ་མོ་ཚོ་རྒྱ་རིགས་རེད་དམ་བོད་རིགས་རེད་ཅེས་དྲིས་པ་ཡིན། ངའི་སྣེ་ཤེན་བུ་མོས་རྒྱ་རིགས་བུ་མོ་ལོ་ཆུང་རྐྱང་རེད་ཅེས་མི་མང་པོས་ལབ་ཀྱི་འདུག་ཟེར། དེས་རྐྱེན་མགྲོན་ཁང་དེའི་ནང་ངེད་གཉིས་ཀྱིས་ཐོ་འགོད་མ་བྱས་བའི་རྒྱུ་མཚན་དེ་ཡིན་ཅེས་མོ་རང་ཡང་ཅུང་འཚེར་སྣང་ཞིག་གིས་བཤད་སོང་།

མཚམས་འདིར་ཕྲན་གྱིས་པེ་ཅིན་བུ་མོའི་ཚ་མོའི་གདོང་ལ་ཅིག་བལྟས་པ་ཡིན། མོ་རང་གི་གདོང་ལ་ངོ་ཚའི་འཛུམ་ཞིག་ལང་འདུག་མོད། ཡིན་ཡང་སྐད་ཆ་གཅིག་ཀྱང་བཤད་མ་སོང་། སྐབས་དེར་ཕྲན་གྱི་སེམས་ནང་དེ་ནི་དངོས་བོའི་གནས་ཚུལ་ཡིན་བསམ་སོང་། རྒྱུ་མཚན་ནི། སྔོན་མ་ཞིག་ལ་ཕྲན་གྱིས་བོད་ནང་གི་གྲོགས་མོ་ཞིག་ལ་ཁ་པར་ནང་གླེང་མོལ་ཐུང་ངུ་བྱས་ཏེ། དེ་འདྲའི་གནས་ཚུལ་གསལ་བོ་ཐོས་མྱོང་པ་མ་ཟད། ཕྲན་གྱིས་ད་རུང་༼གསུམ་བཟང་མནའ་མ༽ཟེར་བའི་རྩོམ་ཐུང་ཞིག་ཀྱང་བྲིས་པ་ཡིན། གང་ལྟར་པེ་ཅིན་བུ་མོས་མུ་མཐུད་ནས་བཤད་རྒྱུར། གུས་མོའི་སེམས་ནང་དངོས་གནས་རྒྱ་ནག་གི་གད་སྙིགས་ཐམས་ཅད་འཛམ་གླིང་གི་མཐོ་སྒང་སྟེང་སླེབས་ཚར་འདུག་བསམ་སོང་། ད་ནི་གད་སྙིགས་འདི་དག་གཙང་ཕྱག་བྱེད་པ་ལ་གུང་ཁྲན་ཏང་གི་སྲིད་གཞུང་མགོ་རྟིང་ལོག་དགོས་མོད། འོན་ཀྱང་མགོ་པེ་ཅིན་ནས་བཟུང་གཞི་རིམ་བར་དུ་ལས་ཁུང་གི་འགོ་ཁྲིད་ཚོས་ལྐོག་ཟ་རུལ་སུང་གི་དྲི་ངན་དང་། སྤྱོད་ངན་ཚང་མ་ས་ཁྱབ་རྡོ་ཁྱབ་ཏུ་སོང་ཡོད་པས་ལམ་སེང་གཙང་ཕྱག་བཟོ་ཐུབ་པར་དཀའ་མོ་རེད་ཟེར་ཞོར་མོའི་གདོང་ལ་དཔྱངས་བའི་སྐྲ་ལོ་ལག་པས་ཡར་འདེད་ཙམ་བྱས་སོང་། མ་ཟད་དེང་སང་གི་རྒྱ་ནག་གི་འགོ་ཁྲིད་ཚོས་རྒྱ་བོད་སོག་གསུམ་གྱི་སྣོད་བཅུད་གཉིས་ཀ་ཙོག་པ་བཟོས་ཚར་ཡོད་ཟེར།
མཚམས་འདིར་པེ་ཅིན་བུ་མོའི་ཚ་མོས་གདོང་ལ་འཛུམ་མདངས་ཞིག་ལང་ཞོར། མཚོ་སྔོན་པོའི་ཉེ་འགྲམ་གྱི་བྱང་ཁང་དེའི་ནང་ན་༼ཅང་ཙེ་མེན༽གྱི་དགའ་རོགས་ཡོད་ཀྱི་མ་རེད་ཟེར་ཅེས་དྲི་བ་དགོད་བྲོ་བ་ཞིག་དྲིས་པས་ང་རང་གད་མོ་ཤུགས་ཆེན་པོ་ཞིག་ཤོར་སོང་བ་མ་ཟད། ཕྲན་གྱིས་པེ་ཅིན་བུ་མོའི་ཚ་མོ་དེར་དངོས་གནས་༼ཅང་ཙེ་མེན༽ལ་དགའ་རོགས་ཞིག་ཡོད་དམ་ཅེས་དྲིས་པ་ཡིན། པེ་ཅིན་བུ་མོས་གད་མོ་དགོད་ཞོར་ཁྱེད་ཀྱིས་དངོས་གནས་ཧ་གོ་གི་མེད་པས་ཟེར།ཕྲན་གྱིས་དངོས་གནས་ཧ་གོ་གི་མེད་ལབ་པ་ཡིན། པེ་ཅིན་བུ་མོས་དངོས་གནས་ཡོད་པ་རེད། ད་རུང་བུ་མོ་དེ་རྒྱ་ནག་གི་གཞས་གཏོང་མཁན་ཞིག་རེད། མོ་རང་གི་མིང་ལ༼宋祖英༽songzuyingཟེར་ཅེས་གསལ་བོ་བཤད་སོང་བས། ཕྲན་གྱིས་ཀྱང་དགོད་གཏམ་འདྲེས་མའི་འདི་ལྟར་བཤད་པ་ཡིན། སྔོན་མ་མའོ་ཙེ་ཏུང་གིས་ཀྱང་ཞབས་བྲོ་འཁྲབ་མཁན་གྱི་བུ་མོ་མཛེས་མ་ཅང་ཆིན་མནའ་མ་བླངས་པ་མ་ཟད། ཁོ་རང་གི་ཉལ་ཁང་སྒོ་འགྲམ་ལ་དགུང་ཚོགས་ཞབས་བྲོ་རྒྱག་ས་ཞིག་བཙུགས་ཏེ། དེ་དུས་ཀྱི་དམག་དཔོན་ཕིན་ཏེ་ཧྭོང་གིས་མའོ་ཡི་བྱ་སྤྱོད་དེར་ཚོགས་ཐོག་ནས་ངོ་རྒོལ་བྱས་པས་ཁོ་རང་ཡང་བཙོན་ཁང་དུ་བཅུགས་པ་རེད། དེང་སང་ཅང་ཙེ་མེན་གྱིས་གཞས་མ་དེ་འདྲ་དགའ་རོགས་བཙལ་གྱི་ཡོད་པ་འདི་རྒྱ་ནག་གི་དབང་འཛིན་པ་ཚོས་དབང་ཤེད་བཀོལ་སྤྱོད་བྱེད་ཀྱི་ཡོད་པའི་རྟགས་རེད་ལབ་པས་ང་ཚོ་གསུམ་དགད་མོ་ཤོར་སོང་།

པེ་ཅིན་བུ་མོས་མོ་རང་གི་བཤད་བཞིན་པའི་སྐད་ཆའི་མཇུག་མཐུད་དེ། གུས་མོའི་སྣེ་ཤེན་བུ་མོས་མུ་མཐུད་ནས་འདི་ལྟར་བཤད་སོང་ཟེར། དེ་རིང་གི་ངའི་སློབ་གྲོགས་དེ་སྔོན་མ་སློབ་ཆེན་ན་ཡོད་དུས་མི་ཡ་རབ་ཞིག་ཏུ་ཆ་ཚང་གིས་བརྩི་བཞིན་ཡོད་པ་རེད། རྗེས་ནས་ཁོ་རང་གཉེན་དང་པོ་དེ་བུ་མོ་མཛེས་མ་ཞིག་དང་སྒྲིགས་པ་རེད། དེ་ནས་བཟུང་ཁོ་རང་གོ་གནས་དང་དཔལ་འབྱོར་གྱི་ཕྱོགས་སུ་འཁོར་ནས་ལས་ཀ་འདྲ་མིན་ལས་ཀྱི་ཡོད་པ་རེད། ས་ཁུལ་འདིར་ཡོད་པའི་བྱང་ཁང་དེ་དང་རྐྱེན་བྱས་ཏེ་བོད་པའི་བཟའ་ཟླ་མང་པོ་ཡང་བཟའ་འཐོར་བྱུང་སོང་། ཁོ་རང་གི་གྲོགས་པོ་ཁ་ཤས་ཀྱིས་ཁོ་ལ་བྱང་ཁང་དེ་མེད་པར་བཟོས་ན་ཡག་པོ་ཡོད་པ་རེད་ཅེས་བསླབ་བྱ་ཡང་རྒྱབ་ཡོད་པ་འདྲ། ཡིན་ཡང་ཁོས་མུ་མཐུད་ནས་ཁོ་རང་གི་ཟུར་གྱི་ཡོང་སྒོ་བློས་གཏོང་མ་ཐུབ་པར་བཞག་ཡོད་པ་དེ་རིང་ངེད་གཉིས་ཀྱིས་མཐོང་བ་དེ་རེད། ངས་དེ་རིང་ཁོ་ལ་འབྲེལ་བ་བྱས་མེད་མོད། ཡིན་ཡང་ངའི་གྲོགས་མོ་གཉིས་ཀྱིས་ཁོ་ལ་འབྲེལ་བ་བྱས་འདུག་པས་ང་རང་ཐབས་ཤེས་མེད་པ་འདྲ་བོ་གྱུར་སོང་། འདི་འདྲའི་གནས་ཚུལ་ནི་ས་ཁུལ་འདི་གཅིག་པོ་མ་ཡིན་པར་བོད་ཀྱི་ས་ཁུལ་ཆ་ཚང་ན་འདི་འདྲ་ཡོད་པ་རེད། ད་རུང་འདི་འདྲའི་རྐྱེན་བྱས་ཏེ་བོད་ཀྱི་བུད་མེད་མང་པོས་ཀྱང་ཁྱོ་གས་དགའ་རོགས་བཙལ་ན་མོ་རང་གིས་ཀྱང་བཙལ། བར་མཚམས་སུ་བུ་ཕྲུག་ཁ་ཤས་དང་ཕ་མ་རྒན་རྒོན་ཚོས་དཀའ་ངལ་མི་ཉུང་བ་ཞིག་མྱངས་བཞིན་ཡོད་པ་རེད་ཟེར། གུས་མོའི་འདི་ཐོས་དུས་སེམས་ནས་བཟོད་ཐུབ་པ་ཞིག་མ་བྱུང་བས། སྔོན་མ་ཞིག་ལ་ཐོས་མྱོང་བའི་གནས་ཚུལ་ཞིག་གུས་མོའི་སེམས་སུ་དྲན་སོང་། དེ་ནི་རྒྱ་གཞུང་གིས་བོད་ཁུལ་དུ་༼མ་ཅང༽དར་སྤེལ་བྱས་ཏེ་གཞུང་གི་གསང་བའི་མི་སྣ་བཏང་ནས། བོད་པ་ཚོའི་མཉམ་དུ་རྩེད་རུ་བཅུགས་པ་ཞིག་ཐོས་མྱོང་ཡོད་པ་དེ་དྲན་སོང་། མ་ཅང་ལ་གོམས་ཚར་དུས་ཐ་མ་ནག་པོ་འཐེན་པ་དང་གཅིག་མཚུངས་སུ་ལས་སླ་བོས་ཐོག་མཚམས་ཆོད་ཀྱི་མེད་པ་བོད་རིགས་མ་ཡིན་པའི་རྒྱ་རིགས་ཚོའི་ནང་ན་ཡང་བཤད་ཀྱི་ཡོད་པས། མ་ཅང་དང་བཤང་ཁང་གཉིས་ཀྱིས་བོད་མི་རིགས་ཀྱི་གཞོན་སྐྱེས་ཤེས་ལྡན་མི་སྣ་མང་པོའི་ལུས་སེམས་གཉིས་ཀ་སྦྲིད་དུ་བཅུག་འདུག་བསམ་སོང་། འདི་ནི་གནས་ཚུལ་དང་རྐྱེན་བྱས་ཏེ་ཡིད་ལ་དྲན་པ་ཞིག་ལས་དངོས་བོའི་གནས་ཚུལ་དེ་འདྲ་གྱུར་ཡོད་མེད་ངས་མི་ཤེས་ཟེར།

མཚམས་འདིར་ཕྲན་གྱི་ཡིད་ལ་ཡང་མ་ཅང་སྐོར་གྱི་གནས་ཚུལ་ཞིག་དྲན་སོང་། དེ་ནི་ངའི་གྲོགས་པོ་ཞིག་༢༠༠༥ ཡས་མས་ཞིག་ལ་ཕ་ཡུལ་དུ་ཕྱིན་ཏེ་ཁོས་མཐོང་ཐོས་འགའ་ཕྲན་ལ་འདི་ལྟར་བཤད་མྱོང་། དེང་སང་ཕ་ཡུལ་ན་མ་ཅང་དར་སྤེལ་ཤིན་ཏུ་བྱུང་ནས་ཁ་ཤས་ཀྱིས་སོ་སོའི་ལས་གནས་ཤོར་བ་དང་། མགོ་ཐོག་གི་ཁང་པ་ཤོར་བ་དེ་ལས་ཀྱང་ཐབས་སྡུག་བྱུང་བ་སོ་སོའི་ཆུང་མ་ཡང་གན་རྒྱ་བཞག་སྟེ་མ་ཅང་བརྒྱབ་ནས་དེང་སང་ཁོ་རང་གི་ཆུང་མས་ཁྱིམ་ཚང་དེར་གཡོག་ལས་བྱེད་བཞིན་ཡོད་པ་རེད་ཟེར་བའི་སྐད་ཆ་དེ་ངས་དེ་རིང་གསལ་བོ་དྲན་གྱི་འདུག ཡིན་ཡང་ཕྲན་གྱིས་ངའི་གྲོགས་པོས་བཤད་པའི་སྐད་ཆ་དག་པེ་ཅིན་བུ་མོར་བཤད་ཐུབ་མ་སོང་། པེ་ཅིན་བུ་མོས་མུ་མཐུད་དེ་བཤད་རྒྱུར། གང་ལྟར་གུས་མོའི་སྣེ་ཤེན་བུ་མོས་བཤད་པའི་གཏམ་རྒྱུད་ཐུང་ངུ་དེ་དང་། ངེད་གཉིས་ཟ་ཁང་དེའི་ཐོག་ཁང་ནས་ཁང་པ་མ་གླས་བར་མགྲོན་ཁང་གཞན་ཞིག་བཙལ་བ་གཉིས་ར་སྤྲོད་པ་ལྟ་བུ་ཞིག་བྱུང་སོང་ལ། སྔོན་མ་གུས་མོས་ཐོས་བའི་སྐད་ཆ་དག་ཀྱང་གསལ་རུ་འགྲོ་གི་འདུག་པས་བློ་ཕམ་ཤིན་ཏུ་བྱུང་ཟེར། ད་རུང་གུས་མོའི་སྣེ་ཤེན་བུ་མོས་གུས་མོར་འདི་ལྟར་གསལ་འདེབས་ཞིག་བྱས། དེ་ནི་མོས་དེ་རིང་ཚོང་ཁང་ནང་ནས་རྒྱ་རིགས་བུ་མོར་ཚོང་པ་དེར་ཁྱེད་ཀྱིས་ཁ་འཛིངས་བྱེད་པའི་སྐབས། ཁྱེད་ཀྱིས་རྒྱ་རིགས་བུ་མོར་དེར་འདི་ནི་འབྲོག་པའི་ས་ཆ་ཡིན་པ་ཁྱེད་ཀྱིས་ཤེས་དགོས་ལ། ཁྱེད་དང་སྦྱིན་བདག་ཚོང་པ་ཚོར་འདིར་མགྲོན་འབོད་བྱས་མེད་པ་ཡང་ཤེས་དགོས་ཞེས་བཤད་པའི་སྐད་ཆ་འདི། རྒྱ་རིགས་བུ་མོ་ཞིག་གིས་རྒྱ་རིགས་ཞིག་ལ་བཤད་སྟབས་ཆབ་སྲིད་ཀྱི་ནག་ཉེས་སུ་མ་བརྩིས་རེད་མ་གཏོགས། ངས་དེ་རིང་སྐད་ཆ་འདི་བཤད་ཡོད་ཚེ་ཆབ་སྲིད་ཀྱི་སྐད་ཆ་ཞིག་ཏུ་རྩིས་ཏེ་ངའི་མགོ་ཐོག་ལ་ཁ་བྲལ་རིང་ལུགས་པའི་ནག་ཉེས་འགེལ་བ་ཐེ་ཚོམ་ཡོད་པ་མ་རེད་ཅེས་ངའི་སྣེ་ཤེན་བུ་མོས་བཤད་པས་གུས་མོ་ཧ་ལས་སོང་། གུས་མོས་བཤད་པའི་སྐད་ཆ་ནི་དངོས་བོའི་གནས་ཚུལ་ཡིན་ལ། ཁོང་ཚོ་བོད་མི་གཅིག་གིས་ཀྱང་འབྲོག་ཕྱོགས་དེར་ཡོང་དགོས་བའི་འབོད་སྐུལ་བྱས་མེད་པ་ཐག་གིས་ཆོད། རྒྱ་རིགས་ཚོང་པ་དེ་ཚོ་ཁོ་རང་ཚོའི་ལྟོ་གོས་ཆེད་མཚོ་སྔོན་མཐོ་སྒང་ལ་ཡོང་པ་རེད། ཡིན་ཡང་ས་དེའི་བདག་པོའི་མི་རིགས་ལ་ཁོང་ཚོས་མཐོང་ཆུང་དང་གཉའ་མནོན་བྱེད་ཀྱི་ཡོད་པས་གུས་མོས་དྲང་བདེན་གྱི་སྐད་ཆ་བཤད་པ་ཡིན། མ་འོངས་པར་གུས་མོས་གང་ཞིག་བོད་ལུང་པ་ནས་མཐོང་བ་ཆ་ཚང་གང་གཟབ་ཀྱིས་ཟིན་བྲིས་སུ་བཀོད་དེ་གོ་སྐབས་བྱུང་བའི་ཉིན་མོ་དེབ་ཞིག་པར་སྐྲུན་བྱེད་འདོད་བྱུང་སོང་ཟེར། ཕྲན་གྱིས་པེ་ཅིན་བུ་མོར་དེ་བསམ་ཚུལ་ཡག་པོ་རེད་ཅེས་ལབ་པ་ཡིན། མོ་རང་གི་ཚ་མོས་ཀྱང་མགོ་བོ་ནང་དུ་གུག་གུག་བྱས་ཏེ་བདེན་ཁ་སྦྱིན་སོང་།

གང་ལྟར་པེ་ཅིན་བུ་མོའི་གདོང་ན་ཁོང་ཁྲོའི་གཉེར་མ་འགའ་ཡང་བསྐྱར་བསྡུས་འདུག་པ་ཕྲན་གྱི་མིག་ལམ་དུ་མངོན་སོང་། དེས་རྐྱེན་ཕྲན་གྱིས་པེ་ཅིན་བུ་མོར་ཁྱེད་རང་བོད་ལུང་པར་བལྟ་སྐོར་དུ་སོང་སྟེ། ཁྱེད་ཀྱི་སེམས་མ་སྐྱིད་པ་ཕྱོགས་མང་པོ་ཞིག་ནས་བྱུང་འདུག་མོད། ཡིན་ཡང་དངོས་བོའི་གནས་ཚུལ་མངོན་སུམ་དུ་མཐོང་བ་གལ་ཆེན་པོ་རེད་ཅེས་ལབ་པ་ཡིན། པེ་ཅིན་བུ་མོས་ཕྲན་ལ་འདི་ལྟར་ལན་འདེབས་གནང་སོང་། ཁ་སང་དེ་རིང་གི་རྒྱ་ནག་དམར་ཕྱོགས་ཚོགས་པས་ཕྱི་ནང་གཉིས་ལ་། བོད་མི་དམངས་ལ་རང་དབང་དང་ཆོས་ལུགས་དད་མོས་རང་དབང་ཡོད་ཚུལ་ཁྱབ་བསྒྲགས་ཤུགས་ཆེན་བྱེད་བཞིན་ཡོད། ཕར་བོད་ལུང་པ་ལ་དངོས་སུ་སོང་ནས་ལྟས་ཚེ་ཕྱི་ཤུན་སྙིང་རྗེ་བོ་ཞིག་གཡོགས་ཡོད་པ་ལས་དོན་དངོས་སུ་རང་དབང་སྤུ་ཙམ་ཡང་མེད་པ་གསལ་བོ་རྟོགས་ཐུབ། དེ་ཡང་རྒྱ་ནག་དབང་འཛིན་པ་ཚོས་བཤད་པའི་གཏམ་ལ་རྒྱང་རིང་ནས་ལྟད་མོ་བལྟ་མཁན་ཞིག་མིན་ན། ས་གནས་སྲིད་གཞུང་དབང་འཛིན་པ་ཚོས་དབང་ཤུགས་ཀྱིས་གཉའ་མནོན་བྱེད་ཀྱི་ཡོད་པ་དང་དེ་མིན་རྒྱ་རིགས་དཀྱུས་མ་ཚོས་ཀྱང་མཐོང་ཆུང་བྱེད་ཀྱི་ཡོད་པ་མཐོང་ཐུབ་ཀྱི་མ་རེད་ཟེར། ཕྲན་གྱི་སེམས་སུ་ཡང་དངོས་གནས་གལ་སྲིད་རྒྱ་ནག་དམར་ཕྱོགས་ཚོགས་པ་ལ་དགའ་མཁན་ཞིག་དང་། རྒྱ་ནག་མི་རིགས་རིང་ལུགས་པ་ཞིག་ཡིན་ཚེ་བོད་ཀྱི་དཀའ་ངལ་མཐོང་ཐུབ་ཀྱི་མ་རེད་སྙམ།
གང་ལྟར་པེ་ཅིན་བུ་མོས་མཚོ་བྱང་གི་མཐོང་ཐོས་རྣམས་མཇུག་བསྡུ་ཞོར་འདི་ལྟར་བཤད་སོང་། གུས་མོའི་སྣེ་ཤེན་བུ་མོས་བཀོད་སྒྲིག་བྱས་ཏེ་ང་ཚོ་བུ་མོ་འགའ་དང་མཉམ་དུ་མཚོ་བྱང་གི་འབྲོག་པའི་རི་ནང་ལ་ཕྱིན་པ་ཡིན། དེ་ནི་དངོས་གནས་ཁོར་ཡུག་གིས་གུས་མོའི་སེམས་སུ་སྨྲ་མི་ཤེས་བའི་ཚོར་སྣང་སྐྱིད་པོ་ཞིག་བྱུང་། གུས་མོའི་སྣེ་ཤེན་བུ་མོའི་གྲོགས་མོ་འགའ་སྐད་བཏང་འདུག་པས་ང་ཚོས་ཟ་འཐུང་སྐོར་འདྲ་མིན་སྣ་ཚོགས་ཞིག་ཉོས་ཏེ་སྤང་ཐང་ཆེན་པོ་ཞིག་ལ་ཕྱིན་པ་ཡིན། རང་བྱུང་ལྷན་སྐྱེས་ཀྱི་སྤང་ཐང་དང་དེའི་ཐོག་བཞད་ཡོད་པའི་མེ་ཏོག་སྣ་བརྒྱའི་གསེབ་ཏུ་རྐང་པ་སྤོས་པ་སེར་སྣ་འདྲ་ཞིག་སྐྱེས་ཏེ་གུས་མོ་རྐང་པ་སྤོ་ནུས་མ་སོང་བས། གུས་མོའི་སྣེ་ཤེན་བུ་མོའི་གྲོགས་མོ་ཚོ་གད་མོ་ཤོར་སོང་། གུས་མོས་ཁོང་ཚོར་འདི་ལྟར་བཤད་པ་ཡིན། བཟོས་བའི་སྤང་དང་བཏབ་པའི་མེ་ཏོག་རང་བྱུང་ལྷན་སྐྱེས་ཀྱི་སྤང་དང་མེ་ཏོག་བར་ན་ཁྱད་པར་མི་འདྲ་བ་འདུག་པས་མིའི་སེམས་སུ་སྦྱིན་པའི་ཚོར་བ་གཅིག་པ་མ་རེད། རང་བྱུང་ཁོར་ཡུག་འདིས་གུས་མོའི་སེམས་སུ་སྤྲོ་སྣང་བཤད་མི་ཤེས་པ་ཞིག་བྱུང་སོང་ལབ་པ་ཡིན། བོད་ཀྱི་བུ་མོ་དེ་ཚོས་ཀྱང་སྤྱིར་བོད་ལུང་པ་ལ་དབྱར་གྱི་དུས་ཡུན་ཐུང་ཐུང་རེད། ཡིན་ཡང་ཁ་སང་དེ་རིང་དུས་ཚོད་འདི་ཆེས་ཤིན་ཏུ་སྐྱིད་ཤོས་དེ་རེད་ལ། ལྷག་པར་དུ་ཡང་འབྲོག་པ་ཞིག་ལ་མཚོན་ན་ཞོ་འོ་མ་མང་པོ་འཛོམས་པའི་དུས་རེད་ཟེར། གང་ལྟར་ང་ཚོས་རྩྭ་ཐང་ནས་དགོད་གཏམ་འདྲ་མིན་གླེང་བའི་སྐབས་ཞིག་ལ།གུས་མོའི་རྣ་ལམ་དུ་ཁྱི་ཆེན་པོ་ཞིག་གི་ཟུག་སྐད་ཐོས་ཀྱི་འདུག

དེ་ནི་འབྲོག་ཁྱི་ཞིག་ཡིན་པ་གུས་མོས་ཤེས་སོང་། རྒྱུ་མཚན་ནི་པེ་ཅིན་གྱི་གུས་མོའི་ཁང་པའི་ཁྱིམ་མཚེས་ཕྱུག་པོ་ཞིག་ཡོད། ཁོ་ཚང་ལ་འབྲོག་ཁྱི་ཆེན་པོ་དེ་འདྲ་ཞིག་ཡོད་པས་སྐབས་རེ་ཁྱི་དེའི་ཟུག་སྐད་ཐེངས་མང་པོ་ཐོས་མྱོང་ཡོད། གུས་མོས་སྣེ་ཤེན་བུ་མོ་ལ་འབྲོག་ཁྱི་ཡོད་ས་དེར་ང་རང་འགྲོ་འདོད་ཡོད་པས་ཁྱེད་ཚོས་གུས་མོ་དེར་ཁྲིད་རོགས་ལབ་པ་ཡིན། ཁོང་ཚོས་ཀྱང་དེ་འགྲིག་གི་རེད། ཁོང་ཚོའི་ནང་གི་བུ་མོ་གཅིག་གིས་འབྲོག་ཁྱིམ་དེ་ངོ་ཤེས་ཀྱི་ཡོད་ཟེར། མ་ཟད་ང་ཚོའི་མཉམ་དུ་ཡོད་པའི་བུ་མོ་འབྲོག་ཁྱིམ་ངོ་ཤེས་མཁན་དེས་ཐག་ཉེ་བོ་རེད། རི་ཆུང་ཆུང་ཞིག་ཡོད་ས་དེའི་རྒྱབ་ལོགས་སུ་ཁོང་ཚང་གི་སྦྲ་ཡོད་པ་རེད་ཟེར་བས་ང་ཚོར་དེར་ཕྱིན་པ་ཡིན། ང་ཚོ་འབྲོག་ཁྱིམ་གྱི་རི་འདབས་སུ་སླེབས་དུས་འབྲོག་ཁྱི་ཆེན་པོ་དེ་མཐོང་སོང་། དངོས་གནས་འབྲོག་ཁྱི་ཆེན་པོ་དེ་རྩྭ་ཐང་འདིའི་ཐོག་གི་སྒོ་ཟོག་ཐུན་མོང་མ་ཡིན་པ་ཞིག་རེད་སྙམ་པའི་ཚོར་སྣང་གུས་མོར་སྤྲད་སོང་། འབྲོག་ཁྱི་ཆེན་པོ་དེས་ང་ཚོའི་ཐོག་ཟུག་ཞོར་དང་འདོག་བྱེད་ཀྱི་ལྕགས་ཐག་འཐེན་ཞོར་བྱེད་ཀྱི་འདུག་པས། གུས་མོ་ལྟ་བུ་མི་གཅིག་མ་གཏོགས་མེད་ན་ཕར་འགྲམ་ལ་འགྲོ་ཕོད་ས་མ་རེད། མཚམས་འདིར་ཕྲན་གྱིས་ག་ལེར་པེ་ཅིན་བུ་མོའི་ཚ་མོར་ཅིག་བལྟས་པ་ཡིན། མོ་རང་དངོས་སྒྲུང་དེ་སྙན་མོ་བྱུང་ཡོད་པ་འདྲ། མོའི་གདོང་ལ་དགའ་སྤྲོའི་འཛུམ་མདངས་ཀྱིས་ཁེངས་ཏེ་རྣ་བ་གཏད་ནས་ཉན་འདུག་པས་། ཕྲན་གྱིས་ལྟ་སྟངས་ནོར་མེད་ན་ཚ་མོ་དེ་ཡང་བོད་ཀྱི་འབྲོག་པའི་རྩྭ་ཐང་ལ་འགྲོ་འདོད་ཤུགས་ཆེན་ཞིག་ལོས་ཡོད་སྙམ།

གང་ལྟར་པེ་ཅིན་བུ་མོས་འབྲོག་ཁྱིམ་དེའི་གནས་ཚུལ་འདི་ལྟར་བཤད་སོང་། འབྲོག་ཁྱི་ཆེན་པོ་དེས་ང་ཚོའི་ཐོག་ཟིག་འཐེན་བྱེད་སྟབས་ཨ་མ་རྒན་མོ་ཞིག་སྦྲ་ནང་ནས་ཕྱི་ལ་སླེབས་སོང་། ཕར་བལྟས་ཚོད་ཀྱིས་དགུང་ལོ་ཕལ་ཆེར་༧༠རྒལ་ཟིན་ཙམ་རེད་སྙམ། ཨ་མ་རྒན་མོས་ང་ཚོ་ཡར་སྦྲ་ཁྱིམ་དུ་མགྲོན་བསུ་བྱས་ཏེ་ང་ཚོ་ནང་ལ་ཕྱིན་པ་ཡིན། འབྲོག་པའི་སྦྲ་ཁྱིམ་ནང་ལ་ཕྱིན་པ་ཐོག་མ་ཡིན་པས་གུས་མོའི་སེམས་ནང་ཁྱད་མཚར་བ་ཞིག་རེད། རས་གུར་དང་གཅིག་པ་ཡང་རྩ་བ་ནས་མ་རེད། འབྲོག་ཐབ་དེ་ཡང་ཁྱིམ་གྱི་དཀྱིལ་ན་འདུག་ལ། དེ་ཡང་ཞེ་དྲག་སྟབས་བདེ་བོ་རེད། སྦྲ་ནང་གི་མཐའ་སྐོར་ནས་ཅ་ལག་འཇོག་སའི་ཤིང་སྒམ་མང་པོ་དང་ཀོ་པགས་ཀྱིས་བཟོས་བའི་སྒྲོ་བ་དེ་འདྲ་བཞག་འདུག གྲལ་འགོའི་ཤིང་སྒམ་ཞིག་གི་སྟེང་ལ་མཆོད་བཤམས་ཆུང་ངུ་ཞིག་འདུག་ལ། དེའི་ནང་༧གོང་ས༧ཏཱ་ལའི་བླ་མ་མཆོག་གི་སྐུ་པར་དང་པཎ་ཆེན་སྐུ་ཐོག་མའི་འདྲ་པར་ཞིག་གི་མདུན་དུ་ཆུ་མཆོད་ཞིག་བཤམས་ཏེ། དེའི་དཀྱིལ་ལ་མཆོད་མེ་ཆུང་ངུ་ཞིག་སྤར་འདུག་པས་འབྲོག་ཁྱིམ་སྦྲ་ནང་གི་གློག་སྒྲོན་བཞིན་འོད་མདངས་འཕྲོ་བཞིན་པས་བོད་རིགས་གཙང་མའི་ཁྱིམ་ཚང་ཞིག་ཡིན་པ་སུས་བལྟས་ཀྱང་ཤེས་ཐུབ། ཡིན་ཡང་གུས་མོའི་སེམས་སུ་དབྱར་དུས་གནམ་གཤིས་གྲང་མོ་དེ་ཙམ་མེད་མོད། འོན་ཀྱང་དགུན་དུས་ཡང་འདིའི་ནང་སྡོད་དགོས་ཚེ། འཁྱག་གྲང་གིས་དཀའ་ངལ་ཡོད་ངེས་སྙམ་པ་ལས་ཨ་མ་རྒན་མོ་དང་ངའི་གྲོགས་མོ་ཚོར་སྐད་ཆ་དྲིས་མེད།
གནས་མོ་ཨ་མ་རྒན་མོ་ལ་ང་ཚོས་ཤིང་ཏོག་དང་ཆུ་གྲང་མོ་དེ་འདྲ་འགའ་ལག་རྟགས་ཁྱེར་ཡོད་པ་མོ་ལ་སྤྲད་པ་ཡིན། ཨ་མ་རྒན་མོ་དགུང་ལོ་བགྲེས་པོ་ཡོད་ན་ཡང་ང་ཚོ་ལ་ལམ་སང་འོ་ཇ་དཀར་བོ་ཞིག་སྐོལ་ཏེ་རྩམ་པ་དང་འབྲི་མར་མཉམ་དུ་སྤྲད་སོང་། གུས་མོའི་གྲོགས་མོ་ཚོས་རྩམ་པ་དཀར་ཡོལ་ནང་རྫི་བ་ལ་དཀའ་ངལ་ཅི་ཡང་མེད་པར་བརྫིས་སོང་མོད། འོན་ཀྱང་ངའི་མི་ཚེ་ནང་བརྗེད་མི་ཐུབ་པའི་དགོད་བྲོ་བ་ཞིག་བྱུང་། ཁོང་ཚོས་དཀར་ཡོལ་ནང་ནས་རྩམ་པ་རྫི་སྟངས་ལ་ཡག་པོ་བལྟས་ཏེ་ཁོང་ཚོ་བཞིན་རྫིས་མོད། འོན་ཀྱང་དགོད་བྲོ་བ་ཞིག་ལ། གུས་མོའི་རྩམ་པ་རྣམས་ཐང་ལ་འཐོར་བ་མ་ཟད། གུས་མོའི་གྱོན་ཆས་ཐོག་ལ་ཡང་འཐོར་སྟེ་དཀར་ཆི་ལེ་བཏང་སོང་བས་ང་ཚོ་ཆ་ཚང་གད་མོ་ཤོར་དགོས་པ་ཞིག་བཟོས་སོང་། ཡིན་ཡང་གུས་མོའི་སྣེ་ཤེན་བུ་མོས་ང་ལ་རོགས་པ་བྱས་ཏེ་ལས་སླ་བོས་རྩམ་པ་འཆང་བུ་བྱས་ཏེ་གུས་མོར་སྤྲད་སོང་ཟེར་ཞོར། པེ་ཅིན་བུ་མོས་མོ་རང་གི་མདུན་གྱི་ཆང་དཀར་བཟུང་སྟེ་ལག་བརྡ་བྱས་ཏེ་ཕྲན་ལ་བསྟན་སོང་བས། མོ་རང་གི་ཚ་མོ་གད་མོ་མིག་ཆུ་ཤོར་བར་དུ་དགད་སོང་།

ཕྲན་གྱིས་ཀྱང་ལོ་ན་ཆུང་བའི་སྐབས་མི་ཚང་ཞིག་ནས་རྩམ་པ་རྫི་མ་ཤེས་བར་པེ་ཅིན་བུ་མོ་བཞིན་རྩམ་པ་ཐང་ལ་འཐོར་སྟེ། མི་ཚང་དེའི་ཨ་མས་ཕྲན་ལ་ཀུ་རེ་རྩེད་དེ་རང་འཐག་འཐག་སོང་ལབ་པ་དེ་རིང་གསལ་བོ་དྲན་གྱི་འདུག་པས་ཕྲན་ཡང་གད་མོ་ཤོར་སོང་། པེ་ཅིན་བུ་མོར་ཕྲན་གྱིས་དེ་དངོས་གནས་དེ་འདྲ་མང་པོ་བོད་རིགས་ནང་ན་ཡོད་པ་རེད། ང་རང་ཡང་ལོ་ན་ཆུང་དུས་རྩམ་པ་ཡག་པོ་ཞིག་རྫི་ཤེས་ཀྱི་མེད་ལབ་པ་ཡིན། མ་ཟད་བོད་ལུང་པ་ནས་རོང་འབྲོག་བར་གྱི་དགོད་གཏམ་ཁ་ཤས་ཞིག་ཁོ་གཉིས་ལ་བཤད་པས་ང་ཚོ་ཆ་ཚང་གི་དགོད་སྒྲ་ཇ་ཁང་ནང་ཁེངས་པ་ཞིག་བྱུང་སྟབས། ཇ་ཁང་ནང་གི་མགྲོན་པོ་ཚོས་ང་ཚོ་གསུམ་ལ་ལྟས་ནས་ཡོད་པ་རྒྱ་མོ་གཉིས་ཀྱང་དོན་སྣང་ཡག་པོ་བྱུང་སྟེ། ཁོ་གཉིས་ཀྱིས་ཕན་ཚུན་ལ་ལག་པས་གཞུ་རེ་བྱས་སོང་། པེ་ཅིན་བུ་མོས་གད་མོ་དགོད་ཞོར་མུ་མཐུད་ནས། དངོས་གནས་འབྲོག་པའི་རྩྭ་ཐང་དང་འབྲོག་ཁྱིམ་དེ་ནས་ལུས་སེམས་གཉིས་ཀ་སྐྱིད་པོ་ཞེ་དྲག་བྱུང་སོང་བས། དེའི་ཕྱི་དྲོ་ག་ལེར་རྩྭ་ཐང་དང་ཁ་བྲལ་ནས་འགྲོ་དུས། གུས་མོའི་སེམས་ཡོངས་སུ་རྩྭ་ཐང་དེར་ཆགས་འདུག་པས་ཕྱིར་ཁུལ་ཐོག་དེར་ལོག་འདོད་མེད་པ་ཞིག་བྱུང་། ཡིན་ཡང་ཐབས་ཤེས་མེད་པར་གོས་ལྗང་འདྲ་བའི་རྩྭ་ཐང་དང་ཨ་མ་རྒན་མོ་ད་རུང་འབྲོག་ཁྱི་ཆེན་པོ་དེ་བཞག་ནས་འགྲོ་དགོས་བྱུང་། རྒྱུ་མཚན་ནི། གུས་མོའི་སྣེ་ཤེན་བུ་མོ་དང་ངེད་གཉིས་ཕྱི་ཉིན་དེར་ཕྱིར་ཟི་ལིང་ལ་འགྲོ་བ་གཏན་འཁེལ་བྱས་ཟིན་པ་ཡིན། མ་ཟད་ད་རུང་གུས་མོའི་པེ་ཅིན་གྱི་བོད་པའི་གྲོགས་པོའི་ཆེད་རྨ་ཆུའི་ལྷོ་ཕྱོགས་སུ་འགྲོ་དགོས་ཡོད།

མུ་འགོད།