རང་མོས་སྙན་ངག་གི་ཕྱོགས་ནས་རོབ་ཙམ་གླེང་བ།

རྩེ་སྐར།

སྤྱིའི་ཆ་ནས་མིའི་རིགས་ཀྱི་སྤྱི་ཚོགས་འདིར་རྩོལ་སྒྲུབ་ཀྱི་རིག་གནས་གང་དང་གང་ཞིག་ཡིན་ན་དེ་ལ་ཐོག་མའི་སྲོལ་གསར་དུ་བཏོད་མཁན་ཞིག་ཅིས་ཀྱང་ཡོད་ཅེས་བཤད་ཆོག དེ་བས་ན་སྙན་ངག་གསར་པའམ་རང་མོས་སྙན་ངག་གི་སྲོལ་བཏོད་མཁན་ནི་ཨ་མེ་རི་ཁའི་སྙན་ངག་པ་གྲགས་ཆེན་ཝོད་ཝེས་ཊི་མན་(walt whiteman)ཟེར་བ་དེ་ཡིན་ཞིང༌། ཁོང་གིས་དུས་མཚམས་དེར་མིའི་རིགས་ཀྱི་སྤྱི་ཚོགས་འཚོ་བ་དངོས་ལ་རྟོག་གཞིགས་ཟབ་མོས་བྲན་གཡོག་ལམ་ལུགས་ཀྱི་གདོང་ནས་འགྲེང་སྟེ། མང་གཙོར་ཕྱོགས་པའི་རྟོགས་སད་ཀྱི་བསམ་བློ་གསར་པ་ཞིག་འཁྱེར་ཏེ། རང་གི་ཚོར་རྟོག་དང་རྣམ་དཔྱོད་ཀྱིས་བརྩམས་གནང་བའི་སྙན་དེབ་<<རྩྭ་ལོ་ཕྱོགས་བསྒྲིགས་>>ཞེས་པ་པར་བསྐྲུན་བྱས་པ་ནས་ཨ་མེ་རི་ཁའི་གནའ་སྲོལ་རྩོམ་རིག་གི་གར་སྟེགས་སྟེང་སྙན་ངག་གསར་པའི་མྱུ་གུ་འབུས་མགོ་ཚུགས།
སྤྱིར་སྲོལ་རྒྱུན་ལ་མོས་པ་ཆེ་ས་ནས་གསར་གཏོད་གྱི་དགོས་པ་མ་རྟོགས་པར་དགག་སྒྲུབ་བྱེད་པ་ནི་མིའི་རིགས་ཀྱི་སྤྱི་ཚོགས་ཚང་མར་མངའ་བའི་སྤྱི་འགྲོས་སམ་ཆོས་ཉིད་ལྟ་བུ་ཞིག་ཡིན། དེར་བརྟེན་ཝེས་ཊི་མཱན་གྱིས་རང་མོས་སྙན་ངག་ཐོག་མར་སྲོལ་བཏོད་པ་དང་མི་མང་པོ་ཞིག་ཁ་གཏད་ནས་ལངས་ཏེ་ངོ་རྒོལ་གྱིས་དགག་པའང་བརྒྱབ་ཡོད་སྐད། ཡིན་ནའང་སྤྱི་ཚོགས་ཀྱི་གནས་བབ་དུས་རབས་གསར་པར་ཕྱོགས་པའི་འགྲོས་དང་བསྟུན་སྙན་ངག་གསར་པའི་འཕེལ་རྒྱས་ལ་བར་བགེགས་ཅི་ཡང་མེད་པར། ཨ་རི་ཙམ་མ་ཟད་འཛམ་གླིང་གི་རྩོམ་རིག་གར་སྟེགས་སྟེང་གོ་གནས་གལ་ཆེན་ཞིག་བཟུང་སྟེ་མུ་མཐུད་དུ་གནས་ཐུབ་བྱུང་ཡོད།

དེ་ལ་རང་མོས་སྙན་ངག་ནི་རང་ཅག་བོད་དུ་ལོ་རབས་བརྒྱད་ཅུ་པའི་ནང་དོན་གྲུབ་རྒྱལ་གྱིས་<<ལང་ཚོའི་རྦབ་ཆུ་>>བརྩམས་པ་ནས་གསར་དུ་དར་སྤེལ་བྱུང་བ་ཞིག་ལ་དེང་རབས་རྩོམ་རིག་སྨྲ་བ་ཚང་མས་ངོས་འཛིན་གནང་གིན་ཡོད་ལ། དུས་དེ་མཚམས་ནས་མང་པོ་ཞིག་གིས་ལང་ཚོའི་རྦབ་ཆུ་ལ་ལད་བཟླས་བྱས་ཏེ་རང་མོས་སྙན་ངག་འབྲི་བའི་མགོ་བརྩམས་ཤིང༌། ད་ལྟའི་བར་དུ་རང་མོས་སྙན་ངག་འཕེལ་འགྱུར་གྱི་སྒོ་ནས་རང་རེའི་སྤྱི་ཚོགས་ཁྲོད་རྩོམ་ལུས་བྱེ་བྲག་པ་ཞིག་གི་སྟེགས་བུ་བཟུང་ནས་ཡོད། ཡིན་ནའང་དོན་གྲུབ་རྒྱལ་གྱིས་ནུབ་ཕྱོགས་སུ་དར་བའི་སྙན་ངག་གསར་པའི་རྩོམ་གཤིས་སམ་རྩོམ་སྟངས་ལྟར་ཆུ་ལ་ཆུ་བཞག་གིས་རང་རེ་བོད་དུ་རང་མོས་སྙན་ངག་གི་སྲོལ་བཏོད་པ་ཞིག་མ་ཡིན་པར། སྙན་ངག་གསར་པའི་སྲོལ་འབྱེད་པ་ཝེས་ཊི་མན་གྱི་སྙན་ངག་གསར་པའི་རྩོམ་ཐབས་ཀྱི་རྒྱུན་རྒྱ་ནག་ནང་ལྔ་བཞིའི་ལས་འགུལ་གྱི་རྗེས་ཙམ་ནས་༼སྙན་ངག་པ་ཀའོ་མོ་རོ་ཡིས་བརྩམས་པའི་ལྷ་མོ་ཞེས་པའི་སྙན་རྩོམ་དེ་རང་མོས་སྙན་ངག་གི་ཐོག་མའམ་འཐུས་ཚབ་སྙན་ངག་ཡིན་ཟེར་༽རྒྱའི་སྐད་ཡིག་ཐོག་དར་སྤེལ་འཕེལ་རྒྱས་བྱུང་ཡོད་པའི་ཤུགས་རྐྱེན་འོག་དོན་གྲུབ་རྒྱལ་གྱིས་ལད་འབྲིའི་ཚུལ་དུ་<<ལང་ཚོའི་རྦབ་ཆུ་>>བོད་རང་སྐད་སྟེང་ཐོག་མར་བརྩམས་ཤིང༌། སྐབས་དེ་ཙམ་ནས་རང་རེ་བོད་དུའང་མི་རིགས་རང་གི་སྐད་ཡིག་ཐོག་རང་མོས་སྙན་ངག་འབྲི་རྩོམ་གྱི་སྲོལ་དར་སྤེལ་བྱུང་བ་ཞིག་ཡིན།
ཡིན་ནའང་བོད་རང་གི་ངོས་ནས་བཤད་ན་རང་མོས་སྙན་ངག་གི་གཞུང་ལུགས་ལྟ་བུ་ཞིག་ངོས་འཛིན་རྒྱུ་མེད་པས་ན། རང་མོས་སྙན་ངག་ནི་འདི་ལྟ་བུ་ཞིག་ཡིན་ཞེས་སུས་ཀྱང་ཚིག་གཏན་འཁེལ་བའི་སྒོ་ནས་རང་མོས་སྙན་ངག་གི་ངོ་བོ་དངོས་ཀྱི་རང་བཞིན་བཅས་ཁ་ཚོན་བཅད་དེ་བཤད་མི་ཐུབ་མོད། འོན་ཀྱང་རང་མོས་སྙན་ངག་ལའང་རང་གྲུབ་ཀྱི་ངོ་བོ་ཞིག་ནི་ཅིས་ཀྱང་ཡོད་དགོས་པ་དང་ཡོད་ངེས་པས་ན། ང་ཚོས་མི་བཏུབ་པའི་ཨམ་གཙིགས་བསྡམས་ནས་འདུག་རྒྱུ་མ་ཡིན་པར། ད་ཆ་རང་མོས་སྙན་ངག་ནི་འུ་ཅག་ཚོའི་རྩོམ་རིག་གི་བྱེ་བྲག་ཅིག་ཏུ་གྱུར་ཚར་ནས་ཡོད་པ་འདི་བཞིན་རང་མོས་སྙན་གི་གྲུབ་དོན་རང་བཞིན་འཚོལ་ཞིབ་སྒོས་གཞུང་ལུགས་ལྟ་བུའི་སྒྲིག་འཛུགས་ཤིག་ངེས་པར་དུ་གཏན་འབེབས་བྱེད་དགོས་པར་འདོད།།

སྤྱིར་རྩོམ་ལུས་བྱེ་བྲག་པ་གང་ཞིག་གི་རྩ་བའི་གྲུབ་སྟངས་ལ་དཔག་ཅིང་གཞིགས་ན། རྩོམ་གྱི་ངོ་བོ་སོགས་གཤིས་ལུགས་རང་བཞིན་གྱི་ཆ་དང་ཇི་བཞིན་སྡོད་ལུགས་དེ་ཕལ་ཆེར་ངེས་རྟོགས་ཐུབ་པའི་ཚོད་དུ་ཡོད། དེ་བཞིན་རང་མོས་སྙན་ངག་ལ་མཚོན་ནའང་རྩ་བའི་ཆ་ནས་རྩོམ་གཤིས་ཀྱི་དབྱངས་འགྲོས་རང་དབང་གིས་ངག་ལ་གྱེར་ཞིང་འདོན་པར་འོས་པའི་འགྱུར་ཉམས་དང་ལྡན་པའི་ཚིག་འགྲོས་ཀྱི་ཀློང་དུ་མངོན་འདུག་པ་དང༌། དེ་བཞིན་རྩོམ་ལུས་ཀྱི་ཆ་ནས་ཀྱང་རང་དབང་ངམ་རང་མོས་ཅན་ཞིག་ཏུ་སྣང༌ངོ་།། རང་མོས་རང་དབང་ཅན་ཟེར་བ་ནི་རང་མོས་སྙན་ངག་གི་རྗོད་བྱེད་ཚིག་ལ་སྒྲིག་འཛུགས་མེད་པར་དོ་མི་མཉམ་པའི་ཚུལ་དུ་བྱུང་རྒྱལ་ལམ་རང་དབང་གིས་གླེང་ཆོག་པ་ཞིག་ལ་གོ་བ་ལེན་རྒྱུ་མ་ཡིན། རང་མོས་སྙན་ངག་གི་བརྗོད་བྱེད་ཚིག་འགྲོས་ལ་བརྗོད་བྱའི་དོན་དང་བསྟུན་པའི་གདངས་དབྱངས་ཀྱི་འདེགས་འཇོག་སོགས་ཆ་ཐམས་ཅད་ནས་ངེས་གཏན་གྱི་སྒྲིག་འཛུགས་ཡོད་དགོས་སོ།། རང་མོས་སྙན་ངག་རང་རེ་བོད་སྤྱི་ཚོགས་ནང་དར་སྤེལ་བྱུང་ནས་ལོ་ངོ་དེ་འདྲའི་མང་པོ་ཞིག་འགོར་མེད་ནའང༌། རང་མོས་སྙན་ངག་ནི་ཆར་ཤུལ་གྱི་ཤ་མོ་བཞིན་སྐྱེ་སྟོབས་འཕེལ་ཞིང་གྲགས་པ་རྒྱས་ཏེ། སྙན་ངག་ལ་མོས་པའི་ན་གཞོན་མང་པོ་ཞིག་གིས་རང་མོས་སྙན་ངག་འབྲི་བ་དང་གྱེར་བ་ལ་དགའ་ཞེན་གྱི་སྤྱོད་སྒོའི་ལག་ལེན་ནི་སྲོལ་རྒྱུན་སྙན་ངག་ལ་བལྟས་ནའང་ཅུང་ཐོད་བརྒལ་ལྟ་བུ་ཞིག་ཆགས་ཡོད་མོད། འོན་ཀྱང་རང་མོས་སྙན་ངག་གི་ངོ་བོ་དངོས་དང་གྲུབ་དོན་ཚང་བ་ཞིག་འབྲི་ཤེས་མཁན་ནི་ཆེས་ཉུང་ཉུང་ཞིག་ལས་མེད་པ་དང༌། མང་པོ་ཞིག་གིས་རང་མོས་སྙན་ངག་ཡིན་ཚོད་ཀྱི་ཞེན་པས་ཚིག་རྐང་དོ་མི་མཉམ་ཞིང་ཚིག་གི་སྦྱོར་སྡེབ་བརྗོད་མི་བདེ་པ་འགའ་རེ་བཙན་ཚུགས་ཀྱིས་བྲིས་ཏེ་རང་མོས་སྙན་ངག་ཏུ་རློམ་ནས་འུར་འདྲོགས་ལངས་བཞིན་ཡོད།
གལ་ཏེ་རང་མོས་སྙན་ངག་ཚད་ཐུབ་ཅིག་འབྲི་ཤེས་ཡོད་པའི་དབང་དུ་བཏང་ནའང༌། དེ་ལ་དཔག་པའི་ཀློག་པ་པོ་ཚོའི་ཁྲོད་དུའང་རང་མོས་སྙན་ངག་ལ་ཡོད་པའི་སྒྱུ་རྩལ་མཛེས་རྟོག་གི་གསེང་ལ་འཛུལ་ནས་རོལ་མྱོང་བྱེད་ཤེས་མཁན་ཧ་ཅང་གི་དཀོན་པོ་རེད། དེར་བརྟེན་སྲོལ་རྒྱུན་ལ་མོས་པ་མང་པོ་ཞིག་གིས་རང་མོས་སྙན་ངག་ལ་རྒྱུས་ལོན་དང་རོལ་མྱོང་བྱེད་པའི་བློ་སེམས་འཁོར་མ་ཐུབ་པའམ་མི་འདོད་པར་རྒྱང་དུ་བཀྱེད་ནས་རང་མོས་སྙན་ངག་ལ་(སྙན་ངག་རྐང་ཆག་མ་)ཞེས་པ་སོགས་འཕྱ་སྨོད་ཀྱི་ཚིག་གིས་སྡིགས་ར་དང་ལེབ་རྡུང་བྱས་ཏེ། ཁོ་བ་ཚོའི་ངོས་ནས་ཀྱང་ཚིག་རྐང་དོ་མི་མཉམ་པར་གང་བྲིས་པ་ཐམས་ཅད་པོ་རང་མོས་སྙན་ངག་ཏུ་རྩིས་འདུག དེ་ནི་ཁོ་བོས་གོང་སྨྲས་བཞིན་རང་མོས་སྙན་ངག་ལ་གཞུང་ལུགས་ལྟ་བུའི་ངེས་གཏན་གྱི་སྒྲིག་འཛུགས་ཤིག་མེད་སྟབས། རྩོམ་མཁན་དང་ཀློག་མཁན་གཉིས་ཀྱི་ངོས་ནས་རང་མོས་སྙན་ངག་གི་ངོ་བོ་དང༌། གྲུབ་སྟངས། གཤིས་ལུགས་སོགས་ལ་རྒྱུས་ལོན་རྟོག་ཞིབ་མ་ཐུབ་པའི་སྐྱོན་ཉེས་སུ་འཁུམས།

དེང་རབས་ཀྱི་ན་གཞོན་མང་པོ་ཞིག་སྲོལ་རྒྱུན་སྙན་ངག་ལས་རང་མོས་སྙན་ངག་འབྲི་བ་དང་གྱེར་འདོན་བྱེད་པར་སྤྲོ་བ་ཡོད་པ་འདི་ནི་རྒྱུ་མཚན་ཅི་ཞིག་གིས་ཡིན་ནམ་ཟེར་ན། ང་ཚོའི་སྲོལ་རྒྱུན་སྙན་ངག་དང་བསྡུར་ན་རང་མོས་སྙན་ངག་རང་སྟེང་ལ་ཚང་དགོས་པའམ་གྲུབ་དགོས་པའི་ཁྱད་ཆོས་སམ་སྒྱུ་རྩལ་གྱི་འགུག་ཤུགས་ཤིག་གི་ནུས་པའི་ཆ་ནས་ཡིན་ལ། སྒྱུ་རྩལ་གྱི་སྣང་ཆ་དེ་ང་ཚོས་རི་མོའི་མཛེས་རྩལ་སྣང་བརྙན་ཇི་བཞིན་མངོན་གྱུར་གྱི་ཚུལ་དུ་མིག་གིས་མཐོང་ཐུབ་པ་ཞིག་མ་ཡིན་པར། རང་མོས་སྙན་ངག་གྱེར་བ་དང་ཀློག་ལ་ཞུགས་པའི་རོལ་མྱོང་གི་བར་གསེང་ནས་ང་ཚོའི་ཡིད་སེམས་ལ་གཡོ་འགུལ་སློང་བའི་ཚོར་རྟོག་ཁྱད་པར་བ་ཞིག་སྤྲོད་ཀྱི་ཡོད།
འོ་ན་རང་མོས་སྙན་ངག་གི་སྒྱུ་རྩལ་འགུག་ཤུགས་དེ་གང་འདྲ་ཞིག་ལ་ངོས་འཛིན་དགོས་སམ་ཞེ་ན། སྤྱིར་སྙན་ངག་ནི་སྐད་ཆ་དང་རོ་གཅིག་ཏུ་གྱུར་ཡོད་སྟབས། རང་མོས་སྙན་ངག་ལ་མཚོན་ནའང་སྐད་ཆའི་འགྲོས་དང་དཀྱུས་གཅིག་ཏུ་གྲུབ་པའི་རོལ་དབྱངས་རང་བཞིན་གྱི་འགུགས་ཤུགས་ཁྱད་པར་ཞིག་ཡོད་ལ། ཁོ་བོས་བསམ་ན་སྐད་འགྲོས་ཀྱི་རོལ་དབྱངས་རང་བཞིན་དེ་རྩོམ་རིག་གཞན་དང་བསྡུར་ནའང་རང་མོས་སྙན་ངག་གི་སྒེར་ཆོས་སམ་གྲུབ་ཆའི་ཁྱད་ཆོས་གཙོ་བོ་ཞིག་ལ་ངོས་འཛིན་བྱེད་ཀྱི་ཡོད། དེར་བརྟེན་སྙན་ངག་གི་ཕྱོགས་ལ་ཡིད་ཀྱི་སྒོ་མོ་ཕྱེས་ཤིང་གོ་རྟོགས་འཕེལ་བ་མང་པོ་ཞིག་ལ་རང་མོས་སྙན་ངག་གི་ཚིག་འགྲོས་རོལ་དབྱངས་ཀྱི་མཛེས་ཆོས་དེས་ཚོར་ཤུགས་མི་དམན་པ་ཞིག་སྐྱེ་རུ་བཅུག་ཡོད་པའི་རྒྱུ་མཚན་གྱིས་རང་མོས་སྙན་ངག་འབྲི་བ་དང་གྱེར་བ་ལ་སྤྲོ་བའི་སྣང་ཚུལ་དེ་བྱུང་བ་ཡིན་པར་སེམས། མདོར་བསྡུས་ཏེ་བཤད་ན་རང་མོས་སྙན་ངག་གི་རོལ་དབྱངས་རང་བཞིན་གྱི་མཛེས་ཆོས་དེ་ཚིག་གི་སྒྱུ་རྩལ་དང་བསྡེབས་ཏེ་མཐོ་དམའ་དང༌། འདེགས་འཇོག གཅོད་མཚམས། དམ་ལྷོད་བཅས་དང་བརྒྱུས་ནས་ང་ཚོའི་ཚོར་ཤེས་ཀྱི་གསེང་ལ་འཐིམ་ནས་ཡོད་པ་ཞིག་ཡིན། དེའི་ཕྱིར་རང་མོས་སྙན་ངག་གི་རོལ་དབྱངས་དེ་ཀློག་པ་པོ་གང་ཞིག་གི་སྐད་ཆའི་ཉམས་འགྱུར་ལ་དྲངས་ཏེ་ཚུར་སྣང་དང་རོལ་མྱོང་བྱེད་དགོས་པ་ཞིག་ཡིན།

ཁོ་བོས་བསམ་ན་ཨ་རིའི་སྙན་ངག་མཁན་ཝེས་ཊི་མཱན་གྱིས་སྲོལ་བཏོད་པའི་རང་མོས་སྙན་ངག་གམ་སྙན་ངག་གསར་པ་ལ་དབྱངས་ཀྱི་འདེགས་འཇོག་གི་ཆ་ནས་སྒྱུ་རྩལ་གྱི་འགུག་ཤུགས་དེ་འདྲ་ཞིག་ལྷན་སྐྱེས་ཀྱི་ཚུལ་དུ་ཡོད་སྟོབས་ཀྱིས། སྔོན་ཨ་རི་སོགས་ནུབ་ཕྱོགས་སྤྱི་ཚོགས་ཁྲོད་སྲོལ་རྒྱུན་རིག་གནས་དང་སྐྱ་འཐབ་ཏེ་བཤད་ཡམས་མང་པོ་ཞིག་གི་ཁ་དམོད་རྡུང་རྡེག་གི་མནར་སྡུག་ཁྲོད་ནས་འགོ་འབུས་ཏེ། ཤར་ནུབ་ཀྱི་ཡུལ་གྲུ་ཀུན་ལ་ཁྱབ་ཅིང་དར་སྤེལ་བྱུང་བའི་བརྒྱུད་རིམ་ཁྲོད། མཐར་འཛམ་གླིང་གི་ཡང་རྩེ་རུ་འབོད་པའི་སྒང་བ་བོད་ཀྱི་ཡུལ་ཁམས་འདིར་ཡང་རང་མོས་སྙན་ངག་གི་རྒྱུན་ཚུགས་ཤིང་དར་འཕེལ་བྱུང་ཐུབ་པ་རེད་ལ། མ་ཟད་དེང་གི་སྐབས་ནུབ་ཕྱོགས་པའི་སྤྱི་ཚོགས་ནང་ཝེས་ཊི་མཱན་གྱི་སྙན་ངག་གི་བྲོ་བས་ཀློག་མཁན་དག་ལ་ཚོར་སྣང་ཁྱད་པར་བ་ཞིག་སྦྱིན་ཏེ། ཁོང་གི་སྙན་རྩོམ་<<བདག་གི་གཞས་>> (Song of myself ) ཞེས་པ་དང་། <<རུ་དཔོན། ངའི་རུ་དཔོན།>> (O Captain my captain ) ཞེས་པ་སོགས་སྒྱུ་རྩལ་སྣང་བརྙན་མཚོན་པའི་བརྙན་རིས་དང་ལྷན་ཐབས་སུ་སྦྱར་ཏེ་སྤྲོ་སྣང་གི་ཉམས་འགྱུར་ཀློང་ན་གྱེར་འདོན་བྱེད་ཀྱིན་པའི་སྣང་ཚུལ་འདི་ཡང་བྱུང་བ་རེད་སེམས་སོ།།

སྤྱིར་རང་མོས་སྙན་ངག་འབྲི་མཁན་ཞིག་ཡིན་ན་རང་མོས་སྙན་ངག་གི་སྒེར་ཆོས་ལྟ་བུའི་མཛེས་རྟོག་གམ་སྒྱུ་རྩལ་གྱིས་བཞེངས་པའི་དབྱངས་འགྲོས་ཀྱི་འགུགས་ཤུགས་དེ་ལྷང་ངེར་མངོན་བཏོད་ཐུབ་པ་ཞིག་དགོས། དེ་ལྟར་མངོན་བཏོད་མ་ཐུབ་པ་ཡིན་ན་རང་མོས་སྙན་ངག་ཚིག་གི་གཅོད་མཚམས་དོ་མི་མཉམ་པས་ན་སྲོལ་རྒྱུན་སྙན་ངག་གི་གྲས་སུ་མི་ཐེ་བར། ཕྱོགས་ཆ་མི་ཚང་བའི་ལྷུག་མའི་ཚུལ་གྱི་རྩོམ་གཤིས་ཤིག་འགས་ནས་སྤྱིར་བཏང་གི་སྒྲིག་འཛུགས་མེད་པར་རང་དགར་བཤད་པའི་སྐད་ཆ་དང་ཁྱད་མེད་པར་མཐོང༌། མ་ཟད་རང་མོས་སྙན་ངག་ཀློག་མཁན་ཞིག་ཡིན་ཕྱིན། དེས་ཀྱང་ཚིག་གི་དབྱངས་རུམ་ལ་བརྒྱུས་པའི་མཛེས་རྟོག་གི་ཁྱད་ཆོས་དེ་ལྷན་ནེར་རོལ་མྱོང་བྱེད་མ་ཤེས་པ་ཡིན་ན། རང་མོས་སྙན་ངག་ནི་གང་ཅི་ཡང་གོ་རྒྱུ་མེད་པའི་བརྡ་ལོག་དོན་སྟོང་གི་སྐད་ཆ་མགོ་རྔ་མེད་པ་ཞིག་ཏུ་མཐོང་སྲིད་དོ།།