ཁྱོད་ལ་བཀྲོལ་བའི་བདག་གི་སེམས་ཀྱི་རོལ་དབྱངས། གྲིབ་གཟུགས།

ཁྱོད་ཀྱིས་བཀྲོལ་བའི་སྒྲ་སྙན་དེ་ནི།
སྐབས་ཀྱི་སྐྱོ་བ་སེལ་བའི་རོལ་དབྱངས་ཤིག་ཡིན་ནམ།
རོལ་དབྱངས་དེའི་རྩེར།
ཁྱོད་ཀྱི་མངོན་འདོད་ཀྱི་སེམས་དམར་པོ་འཕྱོ་བཞིན་འདུག
ཁྱོད་ཀྱི་བུ་མོའི་ངུ་སྒྲ་དེ་ནི།
ཁྱོད་དང་ང་ལ་མཚོན་ན་སྐྱོ་བ་འགུག་པའི་རོལ་དབྱངས་ཤིག་ཡིན་ནམ།
སྲོད་རུབ་ལ་ཁད་པའི་དུས་ཚིགས་འདིར།
བྱིས་པའི་ངུ་སྐད་གཙེར་གཙེར་པོ་དེ་ནི།
རྣ་བས་བཟོད་དཀའ་བའམ།
སེམས་པ་ཆུང་ཆུང་དེའི་མངོན་འདུན་དེ་ངུ་ངག་ལ་གྱེར་དུས།
ཁོ་མོའི་མངོན་འདུན་དེ་ནི་ང་ཚོས་ཇི་ལྟར་ཤེས་ཐུབ་ཨང་་་
བདག་གི་བརྩེ་བའི་གཅེན་པོ་ཀུན་དགའ་ལགས་་་་་

ནག་ཚུབ་བེ་ཡིན་པའི་དུས་ཚོད་འདིར།
ཁྱོད་ཀྱིས་བུ་མོ་ཟླ་སྒྲོལ་གྱི་དགོད་སྒྲ་མཐོང་ཐུབ་བམ།
ཁྱོད་ཀྱིས་རང་གི་ཆུང་མའི་སྐྲ་ལོའི་མཛེས་པ་རིག་ཐུབ་བམ།
གང་ལྟར་དེ་དག་གིས་ཁྱོད་ལ་དགའ་བ་བསྐྱེད་ཀྱིན་འདུག་གམ།
བདག་གི་བརྩེ་བའི་གཅེན་པོ་ཀུན་དགའ་ལགས་་་་་

བྱིས་པ་རྣབ་ལུག་ཅིག་ནས་གྲྭ་པ་ཡ་མེད་ཅིག
གྲྭ་པ་ཡ་མེད་ཅིག་ནས་ཁྱིམ་པ་ཕོ་རྒོད་ཅིག
ཁྱིམ་པ་ཕོ་རྒོད་ཅིག་ནས་ཁྱིམ་བདག་ཉམ་ཆུང་ཅིག་ཏུ་འགྱུར་ཚུལ་དག་ནི།
ཁྱོད་ཀྱི་མི་ཚེའི་འགྱུར་མདོག་རེད།
བདག་གི་བརྩེ་བའི་གཅེན་པོ་ཀུན་དགའ་ལགས་་་་་་

འཕོ་འགྱུར་གྱི་རླུང་འཚུབ་ཇི་ཙམ་གཡུགས་རུང་།
ཁྱོད་ཀྱི་སེམས་པར་འགྱུར་མདོག་གི་རྣམ་པ་མི་འདུག
ཁྱོད་ཀྱི་སེམས་པ་ནམ་ཡང་དྭངས་གཙང་རེད།
དྭངས་གཙང་ཡིན་པའི་སེམས་པ་དེས།
ང་དང་ཁྱོད་ཀྱི་ཉེ་སར་བཅར་བའི་མི་ཚོགས་དག་ལ།
བག་ཆགས་ཀྱི་མཁར་རྨང་གང་འཚམས་ཤིག་བརྩིགས་ཡོད།
མི་ཚེའི་བསླབ་གཞི་གང་མང་ཞིག་ང་ཚོའི་མདུན་དུ་སྤུངས་ཡོད།
བདག་གི་བརྩེ་བའི་གཅེན་པོ་ཀུན་དགའ་ལགས་་་་་

ཁུ་སིམ་དང་དབེན་འཇགས་ཡིན་པའི་གྲུ་ག་འདི་ནས།
ཁྱོན་ཡངས་པའི་ནམ་མཁའི་ཕ་མཐའ་གཞལ་བའི་གླག་རྒོད་ཁྱོད་ལ།
དགའ་བ་དང་སྐྱོ་བ་གང་ཞིག་གི་ལེགས་སྐྱེས་མང་བ།
ངས་བཤད་ཚོད་ཐིག་གིན་མི་འདུག
བདག་གི་བརྩེ་བའི་གཅེན་པོ་ཀུན་དགའ་ལགས་་་་་

འཁྱག་ཤུར་ཤུར་་་
ཁུ་སིམ་སིམ་་་
མཐོང་སྣང་རབ་རིབ།
ཐབས་ཁར་མེ་ལྕེ་མེད་ལ།
སེང་དང་སེང་གི་དགོད་སྒྲ་དག་དང་།
སྐབས་དང་སྐབས་ཀྱི་ངོ་འཛུམ་དག་གིས།
ཁྱོད་ལ་བདེ་དྲོད་ཇི་ཙམ་ཞིག་པར་གྱིན་འདུག་གམ།
བདག་གི་བརྩེ་བའི་གཅེན་པོ་ཀུན་དགའ་ལགས་་་་་་

མདུན་གྱི་མཐོང་སྣང་མང་ཆེ་བ་རས་ཡོལ་ངོས་ཀྱི་ལྷ་ཚོགས་དང་ཞིང་ཁམས་ཡིན་ལ།
ལག་པས་ཐོགས་ཤིང་རེག་པ་མང་ཆེ་བའང་པིར་སྨྱུག་དང་ལྕགས་མཚོན་རེད།
སེམས་པ་གཡེང་ས་དང་གུ་ཡངས་བྱེད་ས་མང་ཆེ་བའང་སྐད་སྒམ་ལས་མཆེད་འོང་བའི་རོལ་དབྱངས་དེ་རེད།
དོན་ངོ་མར་རོལ་དབྱངས་དེས་ཀྱང་ཁྱོད་ཀྱི་ཞེ་གཏིང་གི་སྐྱོ་བ་སེལ་ཐུབ་ཀྱིན་འདུག་གམ།
བདག་གི་བརྩེ་བའི་གཅེན་པོ་ཀུན་དགའ་ལགས་་་་་་

རྨི་ལམ་མོད་ཅིང་འཆར་སྒོ་མང་བའི་ཁྱོད།
སེམས་པ་ཆེན་པོ་ཞིག་ནམ་ཡང་ཁུར་ནས་ཡོད་པའི་ཁྱོད།
སྒྱུ་རྩལ་དང་རོལ་དབྱངས་ལ་ནམ་ཡང་སེམས་པ་འཁྲེང་བའི་ཁྱོད།
ཁྱོད་འདི་ལྟར་གྲུ་ག་ཆུང་ཆུང་ཞིག་ནས་འགུལ་ཞིང་སྐྱོད་པ་མཐོང་དུས།
བདག་ལ་སྐྱོ་བ་དང་ཕངས་སེམས་ཤིག་ཤུགས་རིང་དང་ལྷན་བུད་འོང་།
བདག་གི་བརྩེ་བའི་གཅེན་པོ་ཀུན་དགའ་ལགས་་་་་་

དཀའ་ལས་དང་སྡུག་བསྔལ་ལ་མགོ་བོ་སྒུར་མྱོང་མེད་ཅིང་།
ཡུལ་ཕྱོགས་གང་ནའང་དབུ་འཕང་གི་བ་དན་གཡོ་བའི།
བརྩེ་བའི་ཡབ་དམ་པའི་སྤྱན་ཟུང་ནང་གི་ལྷ་ཟླ་དཀར་པོ།
བདག་གི་བརྩེ་བའི་གཅེན་པོ་ཀུན་དགའ་ལགས་་་་་

ད་ལྟ་དགུན་དུས་ཡིན་པས།
ཁྱོད་ཀྱི་མཐའ་ཁོར་ནས་གྲང་རླུང་ཅུང་ཟད་ལྡང་སྲིད་ལ། ཉི་འོད་ཀྱང་མོག་པོ་ཡིན་སྲིད།
ཁྱོད་ལ་ཡོད་པའི་སེམས་པ་རྣམ་དག་དེ།
དཔྱིད་དཔལ་གྱིས་མགྱོག་མྱུར་བསུ་ངེས་ཡིན།
ཁྱོད་ལ་ཡོད་པའི་སེམས་ཀྱི་སྟོབས་ཤུགས་དེ།
དབྱར་གྱི་གཙང་ཆུའི་རྦ་རླབས་དང་དོང་ནས་གནམ་སྔོན་པོའི་དབུ་འཕང་ལ་རེག་ངེས་ཡིན།
ཁྱོད་ལ་ཡོད་པའི་སྒྱུ་རྩལ་དེ།
ཡུལ་གྲོང་འདིའི་དབེན་འཇགས་དང་ལྷན་མི་རུལ་བར།
ས་ཆེན་མོའི་གདིང་ནོར་དུ་ནམ་ཞིག་ལ་འགྱུར་ངེས་ཡིན།
བདག་གི་བརྩེ་བའི་གཅེན་པོ་ཀུན་དགའ་ལགས་་་་་་