ཧི་མ་ལ་ཡའི་འཕྲུལ་སྨྱུག
དེ་འདྲའི་འཐོབ་བྱ་དང་ཐོབ་བྱེད་ཀྱི་འབྲེལ་བ་དེ་དངོས་སྟོབས་ཀྱི་རིགས་པས་མ་འགྲུབ་པའི་ཕྱིར་ན་ཡིད་ཆེས་པའི་ལུང་ལ་བརྟེན་དགོས་ཤིང༌། ལུང་གང་ཞིག་ཡིད་ཆེས་པའི་གནས་སུ་འཛིན་འོས་མིན་ནི་དཔྱད་གསུམ་གྱིས་དག་དང་མ་དག་ལ་འཇོག་དགོས་ཞེས་ཚད་གཞུང་དུ་བཤད་འདུག དཔྱད་གསུམ་གྱིས་དག་པའི་ཚུལ་ལ་མཁས་པ་སོ་སོའམ་འདོད་ཚུལ་ཤིན་ཏུ་མང་ཞིང༌། མཁས་གྲུབ་དགེ་ལེགས་དཔལ་བཟང་སོགས་མཁས་པ་ཁ་ཅིག་གིས། དཔེ་ཆ་རེ་རེའི་ནང་དུ་འགྲེལ་བཤད་མི་འདྲ་བ་རེ་རེ་བསྐྱོན་བཞིན་འདུག་པ་ལ་བལྟས་ན་ཁོང་རྣམ་ཚོ་ལ་ཏིག་ཏིག་ཅིག་མེད་པ་འདྲ།
མངོན་གྱུར་བསྟན་པ་མངོན་སུམ་དང་མི་འགལ། ལྐོག་གྱུར་བསྟན་པ་རྗེས་དཔག་དང་མི་འགལ། ཤིན་ལྐོག་བསྟན་པ་རང་ཚིག་སྔ་ཕྱི་དང་བརྗོད་བྱ་དངོས་ཤུགས་མི་འགལ། ཞེས་སོགས་བཤད་ཡམས་ཅི་འདྲ་བྱས་ཀྱང་དོན་དུ་ནི་ནམ་རྒྱུན་རྫུན་བཤད་པ་མཐོང་ཐོས་མེད་ཅིང༌། ད་རེས་་ཀྱི་སྐད་ཆ་གོང་འོག་ལྷུ་ཐུག་པ་ཞིག་བྱུང་སོང་ན་ཆ་འཇོག་བྱ་དགོས་ཞེས་པ་དེ་ཙམ་ཞིག་ཡིན་པར་སྣང་སྟེ། དེ་ལྟར་ན་གཞི་ལ་བཞག་ནས་བཀོད་པ་ཡིན་འདུག་པས་དཔྱད་པ་ཡིན་འདུག་པས་དཔྱད་དགོས་ཤིང༌། དུས་ད་ལྟའི་བར་དུ་དངོས་གཙོ་སྨྲ་བ་དང༌། འཕེལ་འགྱུར་སྨྲ་བ་སུས་ཀྱང་འགྲེལ་བཤད་བློ་ཡིད་ཚིམས་པ་ཞིག་བརྒྱབ་ཐུབ་མེད་མོད། ཚན་རིག་གི་ཤེས་ཚད་གོང་འཕེལ་དུ་ཕྱིན་ཚེ་ནམ་ཞིག་བློ་ཡུལ་ལས་འདས་པའི་གསང་བ་ཞིག་རྙེད་སྲིད་ཡིན།
མི་ཁ་ཅིག་གིས། རྨི་ལམ་གྱི་ནང་ནས་རྗེས་ཕྱོགས་ཀྱི་དོན་དག་སྔོན་དཔག་བྱེད་ཐུབ་ཀྱང་རྨི་ལམ་གྱི་ཤེས་པ་དེ་མ་འོངས་པ་ནས་ཡར་ལ་བསླེབས་པ་ཞིག་ཡིན་མི་སྲིད་པ་བཞིན། ཚེ་རབས་དྲན་པའི་བསམ་བློ་དེའང་གཅིག་བྱས་ན་འདི་འདྲའི་དོན་དག་ཅིག་ཡིན་ཤས་ཆེ། སྐྱེ་བ་སྔ་མའི་ལུས་ཀྱི་ཤ་མཚན་ཕྱི་མའི་ལུས་སྟེང་དུ་འཕོས་པ་ཡོད་པ་ལྟར་ན། སྐྱེ་བ་སྔ་ཕྱི་གཉིས་ཀྱི་བར་དུ་བརྡ་འཕྲིན་དང་གློག་རླབས་ལྟ་བུ་གཞི་རྒྱུ་ཕྲ་མོའི་འབྲེལ་བ་ཞིག་ཡོད་པ་ཡིན་ཡང་སྲིད།
སྤྱིར་བཏང་བྱས་ན་བསམ་གཞིག་གི་ལྟེ་གནས་ཀླད་ཆེན་ནི་མེད་དུ་མི་རུང་བ་ཞིག་ཡིན་ན་ཡང༌། དམིགས་གསལ་ཅན་གྱི་མི་རེ་གཉིས་ལ་ཀླད་ཆེན་མེད་ཀྱང་ཆོག་པ་ལྟར་སྐྱེ་བ་སྔ་ཕྱི་འདིའང་དམིགས་བསལ་གྱི་མི་སྣའི་དམིགས་བསལ་གྱི་ཁྱད་ཆོས་འདྲ་ཨེ་ཡིན། དེ་ལྟ་མིན་ན་འདུ་ཤེས་ཀྱི་འཕེལ་རིམ་ཚད་ངེས་ཅན་ཞིག་ལ་ཐོན་དུས། ད་གཟོད་རྣམ་ཤེས་བམ་པོ་ལས་ལོགས་སུ་མུ་མཐུད་དུ་འཚོ་གནས་ཐུབ་པ་ཡིན་རྒྱུ་རེད། ཚན་རིག་པའི་ཁྲོད་ནས་རྣམ་ཤེས་ཡོད་ཤས་ཆེ་ཟེར་མཁན་དེ་ཚོས་ཀྱང་དོན་འདི་འདྲ་ཞིག་ལ་ཐེ་ཚོམ་སྐྱེས་པ་ཙམ་མ་གཏོགས། ང་ཚོ་ལྟར་རྣམ་ཤེས་ཀྱི་ཐོག་མ་གཏན་མེད་དུ་ཁས་ལེན་རྩིས་རང་དག་མ་རེད་སྙམ།
མདོར་ན་དེང་སང་སྐྱེ་བ་སྔ་ཕྱི་དྲན་པ་དང༌། སྲིད་པ་ཕྱིར་ལྡོག་གི་ཆོ་ག རྣམ་ཤེས་འཁྱམས་པའི་ཉམས་མྱོང༌། ལུས་སེམས་བརྗེ་སྤོར་གྱི་མཐོང་སྣང་སོགས་ངོ་མཚར་ཆེ་བའི་བྱུང་འཇིག་རྟེན་གྱི་རྒན་པོ་ཡ་རབས་ཤིག་གི་སྐད་ཆ་ལས་ལྷག་པའི་ཁྱད་ཆོས་ཅི་ཡང་མི་འདུག་པས་ལུང་ཚད་མ་ཟེར་ཡང་དེ་ག་ཙམ་རེད། རྟོགས་དཀའ་བ་ངེས་ལེགས་ལ་མི་བསླུ་བར་རིགས་པས་གྲུབ་ན་སླ་བ་མངོན་མཐོ་ལ་མི་བསླུ་བར་ཡིད་ཆེས་བྱེད་ཆོག་ཟེར་ཡང༌། དཀའ་སླའི་ངེས་པ་དེ་ག་རང་ཡང་བསྒྲུབ་བྱེད་མིན་པས་ཕན་ག་ལ་ཐོགས།
དམིགས་གསལ་ཅན་གྱི་མི་རེ་གཉིས། བ་བསལ་ལས་ག་གསལ་འོང་བ་རྣམ་རྟོག་ཏུ་འབྱུང་སླ། འོན་ཀྱང་དོན་དངོས་མར་བསྟན་བཅོས་དག་ན། དམིགས་བསལ་ཞེས་བྲིས་སོ།
དཔྱད་གསུམ་དག་པའི་ལུང་ཞེས་པ་དེ་ཅི་ལྟ་བུ་ཞིག་ལ་ངོས་འཛིན་དགོས་ཡོད་མེད་གསལ་ཁ་ཞིག་གསུང་རོགས།
མཐོང་བ་མངོན་གྱུར་སྟོན་པ་ལ་མངོན་སུམ་ཚད་མས་གནོད་པ་མེད་པ། མ་མཐོང་ལྐོག་གྱུར་སྟོན་པ་ལ་རྗེས་དཔག་ཚད་མས་གནོད་པ་མེད་པ། ཤིན་ཏུ་ལྐོག་གྱུར་སྟོན་པ་ལ་ཡིད་ཆེས་རྗེས་དཔག་ཚད་མས་གནོད་པ་དང་གསུམ་མོ།
མཐོང་བ་མངོན་གྱུར་སྟོན་པ་ལ་མངོན་སུམ་ཚད་མས་གནོད་པ་མེད་པ། མ་མཐོང་ལྐོག་གྱུར་སྟོན་པ་ལ་རྗེས་དཔག་ཚད་མས་གནོད་པ་མེད་པ། ཤིན་ཏུ་ལྐོག་གྱུར་སྟོན་པ་ལ་ཡིད་ཆེས་རྗེས་དཔག་ཚད་མས་གནོད་པ་མེད་པ་དང་གསུམ་མོ།
རང་ལ་ཤིན་ཏུ་ལྐོག་གྱུར་སྟོན་པ་ལ་ཡིད་ཆེས་རྗེས་དཔག་ཚད་མ་རྙེད་པའི་ནུས་པ་མེད་ན། དད་པ་བྱས་ནས་ཁ་ཁར་སྡོད། ཡང་ན་དད་པ་མེདཔར་བློ་བདེར་སྡོད། རང་གི་དུས་ཚོད་འཕྲོ་བརླག་མ་གཏོང་། དད་ལྡན་གྱིས་གཞན་སེམས་མ་དཀྲུགས།