རང་བཙན་དང་དབུ་མའི་རྩོད་པ། ད་དུང་ངའི་བསམ་ཚུལ།

པཀྵི།

བར་ལམ་ཞིག་ནས་རང་བཙན་པ་དང་དབུ་མ་བ་གཉིས་ཀྱི་བར་ལ་རྩོད་གླེང་ཅུང་ལྷུག་པོ་ཡོང་གི་ཡོད་པ་མཐའ་གཅིག་ཏུ་ངན་པ་རང་མ་ཡིན། ཆབ་སྲིད་ཀྱི་ལམ་ཁ་ཆེན་པོ་དེ་གཉིས་ཀྱི་གཞི་ལམ་འབྲས་གསུམ་ལ་ངེས་ཤེས་ཟབ་མོ་ཞིག་རྙེད་པའི་སྒོ་ནས་རང་གི་ཆབ་སྲིད་ཀྱི་ཁ་ཕྱོགས་ཐག་གཅོད་བྱེད་རྒྱུ་ནི། སྐྱེ་བོ་ཟེར་རྗེས་མི་འབྲངས་པ་ཞིག་ལ་ངེས་པར་ཡོད་དགོས་པའི་ཚུགས་ཐུབ་ཀྱི་རང་གཤིས་དེ་རེད། དེ་བས་དོན་གནད་གང་ཞིག་ལ་བགྲོ་གླེང་དང་རྩོད་པ་བྱེད་པ་ནི་དོན་དག་དེ་ཉིད་ཀྱི་ངོ་བོ་དམར་རྗེན་མར་མཐོང་བར་ཕན་ཐོགས་ཡོད་པ་གྲྭ་སར་འགྲིམས་མྱོང་མཁན་ཞིག་ཡིན་ན་གསལ་བོ་ཡིན་པས། ང་ཚོས་རྩོད་པ་གང་ཞིག་ཡིན་རུང་གཞན་གྱི་ལྟ་ཚུལ་ལ་གུས་བརྩི་ཡོད་པའི་སྒོ་ནས་བྱས་ཚེ་གནོད་ལས་ཕན་ཆེ་བར་སྙམ་ན།ཚང་མས་རྩོད་པ་དེ་གཉིས་གུས་ཀྱི་ལམ་ནས་བྱེད་རྒྱུ་ནི་དམངས་གཙོའི་སྤྱི་ཚོགས་ཤིག་ལ་མེད་མི་རུང་བའི་ཆ་རྐྱེན་ཞིག་ཡིན་པ་ངེས་པར་མཁྱེན་དགོས་པ་འདྲ།

རེད་དེ། ང་ཚོས་རང་བཙན་དང་དབུ་མ་གཉིས་ཀྱི་གང་ཞིག་ལ་རྩོད་པ་བྱས་པ་ཡིན་ནའང་། འབྲས་བུ་ལ་བརྩད་ནས་བསྡད་ཡོད་པ་རེད། རྐུན་མ་ཇི་ལྟར་བཟུང་རྒྱུ་མ་བཤད་པར་རྐུན་མར་ཇི་ལྟར་གཅར་རྒྱུར་བརྩད་ནས་བསྡད་ཡོད་པ་རེད། ང་ལ་མཚོན་ན་དེ་ནི་ཁྱད་མཚར་ཞིག་རེད། མིག་མདུན་གྱི་བསྒྲུབ་དགོས་པའི་དོན་དག་ཟུར་དུ་བཞག་ནས་འབྲས་བུ་འདི་དགོས་པ་དང་དེ་མི་དགོས་པའི་འདེམས་ཀ་བཏང་ནས་བསྡད་ན་བྱབ་ཆུང་གི་བྱེད་སྟངས་མ་ཡིན་ནམ། ལྷག་པར་དུ་རང་བཙན་རྩོད་མཁན་ཞིག་ཡིན་ན་རང་བཙན་དེ་ཁྱེད་ཀྱི་ཆབ་སྲིད་ཀྱི་བཞེངས་ཕྱོགས་ཡིན་པ་ཡང་ནས་བསྐྱར་དུ་བཤད་རྒྱུ་ཙམ་མ་ཡིན་པར། རང་བཙན་ཇི་ལྟར་རྩོད་རྒྱུ་དེ་ལ་ངེས་པར་དགོངས་བཞེས་དང་འཆར་གཞི་འདིང་དགོས་པ་མ་གཏོགས་རང་བཙན་བཤད་ནས་འཐོབ་རྒྱུ་མེད་པ་ནི་མི་ལོ་ལྔ་བཅུའི་ང་ཚོའི་ཉམས་མྱོང་ལས་རྗེས་སུ་དཔོགས་ཐུབ་པ་རེད། ཡང་གལ་ཏེ་མི་རབས་རྗེས་མ་དག་གིས་ལས་བདའ་མི་བྱེད་པ་ཙམ་གྱི་ཆེད་དུ་ང་ཚོས་རང་བཙན་བདམས་པ་ཡིན་ན། རང་བཙན་ཟེར་བ་དེ་ཡང་མྱི་ཁ་འགོག་བྱེད་ཙམ་དུ་ཟད་འདུག་གོ།

དེ་འདྲ་མ་ཡིན་པར་ང་ཚོས་དགོས་པ་དང་རྒྱུ་མཚན་མང་པོ་ཞིག་མཐོང་བའི་ཐོག་ནས་རང་བཙན་བདམས་པ་དང་། ཆབས་ཅིག་རང་བཙན་རྩོད་པ་ལ་ཡོད་དགོས་པའི་སྙིང་སྟོབས་དང་། ཚང་དགོས་པའི་བསམ་བློའི་གོ་ཆ་ཡོངས་སུ་རྫོགས་པ་ཞིག་སོ་སོ་རང་ཉིད་ལ་ཡོད་པའི་ངེས་ཤེས་ཟབ་མོ་ཞིག་རྙེད་པར་གྱུར་བ་ན། དེ་ནས་ང་ཚོས་དབུ་མ་མི་དགོས་རང་བཙན་དགོས་ཞེས་བརྗོད་ནའང་བརྗོད་ཆོག་པ་རེད་ལ། བརྗོད་པ་ལྟར་རང་ཉིད་ལའང་གདེངས་ཚོད་ཅིག་དང་སྤོབས་པ་ཞིག་ཡོད་ངེས་ཡིན་པས། མ་མཐའ་ཡང་ཁ་བཤད་ཙམ་གྱི་རང་བཙན་པ་དག་ལས་ལྗིད་ཁོག་ཅུང་ཆེ་བར་སྙམ།

བར་འདི་ནས་འུ་ཚོས་དམིགས་ཡུལ་གྱི་སྐད་ཆ་དེ་ཟུར་བཞག་ནས། ལག་ལེན་གྱི་དྲི་བ་ཚ་བོ་ཞིག་དྲིས་པ་ཡིན་ན། ད་འོ་ན་ང་ཚོས་རང་བཙན་ཇི་ལྟར་ལེན་རྒྱུ་ཡིན་ཞེས་པ་དེ་རེད། དྲི་བ་འདི་ལ་རང་བཙན་པ་མང་པོས་དགའ་བོ་མི་བྱེད་པ་ངས་ཤེས་གི་ཡོད། ཁོང་ཚོ་དྲི་བ་འདིར་མི་དགའ་བའི་རྒྱུ་མཚན་ནི་ཁོང་ཚོར་དྲིས་ལན་གནད་ལ་འཁེལ་བ་ཞིག་འདེབས་རྒྱུ་མེད་པས་རེད། རེད་དེ་དྲི་བ་འདི་ནི་ང་ཚོས་ངེས་པར་འདྲི་དགོས་ཤིང་། དྲི་བ་འདིའི་ལན་ནི་ང་ཚོས་ཅིས་ཀྱང་རྙེད་དགོས་པ་རེད། ང་ཚོས་ཇི་སྲིད་དྲི་བ་འདིའི་ལན་མ་རྙེད་པ་དེ་སྲིད་དུ་ང་ཚོར་རང་བཙན་གྱི་གོ་སྐབས་གཏན་ནས་མེད་པ་ཡིན། དེ་བས་དྲི་ལན་འདི་གནམ་ན་ཡོད་རུང་ང་ཚོས་འཛིན་དགོས་ལ་ས་ན་ཡོད་རུང་ང་ཚོས་བརྐོ་དགོས་པ་རེད། ངས་བལྟས་ན་དྲི་ལན་འདི་ཚོར་བ་གཅིག་བུ་ལས་ནམ་ཡང་འཚོལ་མི་རུང་། ཚོར་བ་གཅིག་བུ་ལས་བཙལ་བའི་དྲི་ལན་དེ་དག་ནི་ཁ་བཤད་ཆུ་ཡི་ལྦུ་བ་དེ་ཚོ་རེད། དྲི་ལན་འདི་འཚོལ་བ་ལ་གཞུང་ལུགས་ཀྱི་རྒྱབ་ལྗོངས་བརྟན་པོ་ཞིག་དགོས་པའི་མི་ཚད་སྙིང་སྟོབས་དང་བློས་གཏོང་ཚད་མེད་ཅིག་དང་འགྲོགས་དགོས་པ་ཡིན། མ་ཟད་ཡོད་ཚད་རང་ཉིད་ནས་མགོ་རྩོམ་དགོས་པའི་ངེས་ཤེས་ཟབ་མོ་ཞིག་གིས་གཞི་འདིང་དགོས་པ་རེད། དེ་ལྟར་བྱུང་བ་ཡིན་ན་ད་བཟོད་ང་ཚོས་དྲི་ལན་དེ་བདེ་བླགས་ངང་རྙེད་ཐུབ་པར་ཐེ་ཚོམ་ཅི་ཡང་མེད།

ལོ་རྒྱུས་ལ་ཕྱིར་བལྟས་སློག་སྟེ་བཤད་ན་དྲི་བ་འདིའི་ལན་ལ་ཞི་དྲག་གི་སྦྱོར་བ་སྣ་ཚོགས་ཤིག་བྱུང་ཡོད་ལ། དེ་ལས་ཁ་ཤས་ལེགས་འགྲུབ་བྱུང་ཡོད་པ་དང་། མང་པོ་ཞིག་ཕམ་ཉེས་དང་བློ་ཕམ་གྱི་གནས་སུ་གྱུར་ཡོད་པ་རེད། ང་ཚོའི་ཉེ་རབས་ཀྱི་ལོ་རྒྱུས་ལ་བལྟས་པ་ཡིན་ནའང་། ཆུ་བཞི་སྒང་དྲུག་གི་དྲག་རྒོལ་ལ་ཕམ་ཉེས་བྱུང་བ་དང་། ང་དགུ་ལོའི་རང་དབང་སྒེར་ལངས་དང་པོར་དྲག་གནོན་ཐེབས་ནས་དགའ་ལྡན་ཕོ་བྲང་བཙན་བྱོལ་དུ་ཡོང་དགོས་ཐུག་པ་སོགས་ནི། ལེགས་འགྲུབ་མ་བྱུང་བའི་དྲི་བ་འདིའི་ལན་གསོན་པོ་དག་རེད། གང་ལྟར་འདས་པ་ནི་འདས་ཚར་བ་རེད། དེ་ལ་འཁང་ར་དང་སྡུག་ཡུས་བགྲང་ནས་ཡོང་རྒྱུ་ཅི་ཡང་མེད། ང་ཚོས་ཀོ་ཐག་ཁྱོན་ནས་གློད་མི་རུང་བ་ནི་ད་ལྟ་དང་དེ་ལས་ཀྱང་མ་འོངས་པ་རེད། དེ་རིང་ནས་བཟུང་མ་འོངས་པའི་དུས་སྐབས་གསེར་འདྲ་བ་དེ་དག་གི་ནང་དུ་ང་ཚོས་རང་ཉིད་ནས་འགོ་ཅི་ཞིག་རྩོམ་རྒྱུ་ཡིན། ཁ་སྟོང་ནང་གི་ཚིག་སྟོང་མ་ཡིན་པའི་སྦྱོར་བ་གང་ཞིག་རྩོམ་རྒྱུ་ཡིན། དྲག་པོའི་སྦྱོར་བ་རྩོམ་རྒྱུ་ཡིན་ནམ། ཡང་ན་ཞི་བའི་སྦྱོར་བ་རྩོམ་རྒྱུ་ཡིན། དྲག་པོ་བྱེད་ན་ཇི་ལྟར་བྱེད་རྒྱུ་ཡིན། ཞི་བ་བྱེད་ན་ཇི་ལྟར་བྱེད་རྒྱུ་ཡིན། དྲག་པོ་བྱེད་ན་དམག་རྒྱག་བྱེད་ཀྱི་ལག་ཆ་དང་། དམག་རྒྱག་སའི་ས་ཆ་གཉིས་ཀ་དགོས་པས་དེ་གཉིས་ཀ་ང་ཚོར་མེད། ཡང་ན་འཇིགས་རྒོལ་བ་བྱེད་རྒྱུ་ཡིན་ནམ། ཇི་ལྟར་་་་་་་། དེ་མིན་གྱི་བྱ་ཐབས་གཞན་མེད་པས། འདོད་ཀྱང་རུང་མི་འདོད་ཀྱང་རུང་ང་ཚོའི་མིག་མདུན་ན་འདེམས་ཀ་གཅིག་ལྷག་ཡོད་པ་ནི་ཚང་མའི་ཁ་ལ་གོམས་ཤིང་རྣ་ལ་བྱང་བའི་འཚེ་མེད་ཞི་བ་ཟེར་བ་དེ་རེད། འཚེ་མེད་ཞི་བ་ཟེར་བ་ནི་མི་ཤི་རྟ་འགྱེལ་མེད་པའི་འཐབ་རྩོད་ཅིག་ལ་ཟེར་རམ། ངེས་པ་ཡོད་པ་མ་རེད། མི་ཤི་རྟ་འགྱེལ་མེད་པར་བོད་རང་བཙན་ལེན་སྟངས་ཤིག་ངོ་སྤྲོད་བྱེད་ཀྱི་ཨེ་ཡོད། གཏན་ནས་ཡོད་པ་མ་རེད།

ངོ་མ་བཤད་ན་མི་ཤི་རྟ་འགྱེལ་མི་དགོས་པའི་ཆེད་དུ་༧གོང་ས་མཆོག་གིས་རྒྱ་མི་ལ་ཡང་བསམ་བློ་གཏོང་ས་ཡོད་པའི་དབུ་མའི་ལམ་གྱི་ཐབས་ལམ་དེ་བདམས་གནང་བ་རེད། ཕྱོགས་གཉིས་བར་གྱི་དོན་དག་ཅིག་ཞི་བའི་ལམ་ནས་ཐག་གཅོད་བྱེད་དགོས་ན། ངེས་པར་དུ་གྲོས་མོལ་བྱེད་དགོས་ཤིང་། གྲོས་མོལ་བྱེད་དགོས་ན་ངེས་པར་དུ་རྒྱ་ཅོག་སྒོར་མོའི་མཐའ་རུ་མཉམ་འཛོམས་བྱེད་དགོས་པ་རེད།དེ་ལྟར་མཉམ་འཛོམས་ཡོང་བར་ལམ་ཁ་གཉིས་ཡོད་པ་སྟེ། གཅིག་ནི་ཕྱོགས་གཉིས་ཀར་བསམ་བློ་གཏོང་ས་ཡོད་པའི་ཐོག་ནས་གྲོས་མོལ་གྱི་ལམ་དུ་ཞུགས་རྒྱུ་དང་། ཕྱོགས་གཞན་གཅིག་ནི་ངོ་རྒོལ་གྱི་ལམ་ནས་ཕར་ཕྱོགས་དེས་སྐད་ཆ་མ་བཤད་རང་བཤད་བཟོ་རྒྱུ་དེ་རེད། སྔ་མ་ནི་དབུ་མའི་ལམ་དང། ཕྱི་མ་ནི་གན་ངྷིའི་བདེན་པའི་ཨུ་ཚུགས་ལྟ་བུ་རེད། སྔ་མ་ནི་མི་ཤི་རྟ་འགྱེལ་མི་དགོས་པའི་འཚེ་མེད་ཞི་བའི་འཐབ་རྩོད་བྱེད་སྟངས་ཤིག་ཡིན་ལ། ཕྱི་མ་ནི་འཆི་བ་ལ་གྲ་སྒྲིག་ཡོད་པའི་ཐོག་ནས་བདེན་པ་རྩོད་སྟངས་ཁྱད་པར་ཅན་ཞིག་རེད། དབུ་མའི་ལམ་ནི་བསྟུན་པའི་བདེན་པ་རྩོད་སྟངས་ཤིག་ཡིན་ལ། བདེན་པའི་ཨུ་ཚུགས་ནི་མི་བསྟུན་པའི་བདེན་པ་རྩོད་སྟངས་ཤིག་རེད། འདི་ནི་དབུ་མའི་ལམ་དང་བདེན་པའི་ཨུ་ཚུགས་གཉིས་ཀྱི་རྩ་བའི་མི་འདྲ་བའི་ཁྱད་པར་དེ་ཡང་རེད།

འུ་ཚོས་ངོ་མ་རང་སྲེག་དང་འཆི་རྨས་མི་འདོད་ན་དབུ་མའི་ལམ་མ་གཏོགས་ལམ་ཁ་གཞན་ཡོད་པ་མ་རེད། བསྟུན་མཁས་དང་གུ་ཡངས་ཀྱི་ལམ་ནས་བོད་ཀྱི་གནད་དོན་སེལ་ཐབས་གནང་དགོས་པ་རེད། དེ་མིན་རང་བཙན་དང་དེ་ལས་ཀྱང་བཙན་པོའི་སྐབས་ཀྱི་རང་བཙན་དགོས་གི་ཡོད་ན། ད་བསམ་བློ་གཏོང་ས་གཞན་ལྷག་ཡོད་པ་མ་རེད། འཆི་བར་གྲ་སྒྲིག་བྱས་ནས་མི་བསྟུན་པའི་བདེན་པ་དེ་རྩོད་དགོས་པ་རེད། འཆི་རྨས་དང་གོད་ཆག་མང་པོ་ཡོང་གི་རེད། དེ་ཡོང་བར་བསམ་བློའི་ནང་གྲ་སྒྲིག་བརྒྱ་ཆ་བརྒྱ་ཐམ་པ་དགོས་པ་རེད། དེ་ལྟར་འཆི་བ་ལ་མི་སྐྲག་པའི་རང་བཙན་འཐབ་རྩོད་པ་མང་པོ་བྱུང་བ་ཡིན་ན་ང་ཚོས་རང་བཙན་ལེན་མི་ཐུབ་རྒྱུ་ཅི་ཡང་མེད། རང་སྲེག་ནི་འདིའི་དཔེ་མཚོན་ཡག་པོ་ཞིག་རེད། དེ་ལྟར་མ་ཡིན་པར་རང་ཉིད་རྐང་རྐྱང་ལག་རྐྱང་ངང་སྐྱིད་ཉལ་རྒྱག་བཞིན། ཁ་ནས་རང་བཙན་དང་བཙན་པོའི་སྐབས་ཀྱི་རང་བཙན་སོགས་སྐད་ཆ་སྦོམ་པོ་རེ་གླེང་བཞིན་འགན་མེད་དུ་བསྡད་ན་ཁྱེད་ཀྱིས་འདོད་པའི་བཙན་པོའི་སྐབས་ཀྱི་རང་བཙན་དེ་ཇི་ལྟར་ལེན་ཐུབ་བམ།

ལར་ན་བཙན་པོའི་སྐབས་ཀྱི་རང་བཙན་ཟེར་བ་དེ་བཙན་པོ་གང་གི་སྐབས་ལ་ཟེར་རྒྱུ་ཡིན་ནམ། བཙན་པོ་རེ་རེའི་སྐབས་ཀྱི་མངའ་ཐང་གི་རྒྱ་ཁྱོན་མི་འདྲ་བ་རེད། བཙན་པོའི་མངའ་ཐང་དར་ཆེ་ཤོས་ནི་ཁྲི་སྲོང་ལྡེ་བཙན་གྱི་སྐབས་ལ་རེད། དེ་ལྟར་ཡིན་ན་འབྲུག་ཡུལ་དང་རྒྱ་གར་ས་ཁོངས་སུ་གནས་པའི་ཧི་མ་ལ་ཡའི་མི་རིགས་དེ་ཚོའི་བདག་དབང་ཡང་ང་ཚོ་ཡིན་ཟེར་དགོས་པ་རེད། ད་ང་ཚོའི་རང་བཙན་རྒྱ་གར་གྱི་ས་ནས་ཀྱང་རྩོད་དགོས་ཐུག་རྒྱུ་རེད། སྐད་ཆ་བསམས་ནས་བཤད་དགོས་པ་རེད། མི་རིགས་འཕེལ་འགྲིབ་ལ་བརྟེན་ནས་ས་ཁོངས་ལ་འཕེལ་འགྲིབ་ཡོང་བ་དེ་ཆོས་ཉིད་ཅིག་རེད། རྒྱ་གར་ལྟ་བུ་ལ་མཚོན་ནའང་སྔར་ས་རྒྱ་ཧ་ཅང་ཆེན་པོ་རེད། ད་ལྟའི་པཱ་ཀི་སི་ཐན་དང་བྷང་ག་ལཱ་སོགས་སྔོན་མ་རྒྱ་གར་གྱི་ས་ཆ་རེད། རེད་དེ་ད་ལྟ་རྒྱལ་ཁབ་སོ་སོ་ཆགས་ཚར་བ་རེད། སྔར་གྱི་ལོ་རྒྱུས་གླེང་ནས་ད་ལྟའི་བདག་དབང་རྩོད་ཆོག་ཆོག་ཡོད་པ་མ་རེད། ཆབ་སྲིད་རྩོམ་ཡིག་འབྲི་རྒྱུ་དེ་སྙན་ངག་འབྲི་བ་ནང་བཞིན་ཚོར་བ་ཅི་ཡོད་གང་བྱུང་དུ་འབྲི་རྒྱུ་དེ་འདྲ་ཞིག་མ་རེད། དགོས་པ་རྒྱུ་མཚན་ལ་བསམ་བློ་གཏོང་དགོས་པ་རེད། སྤྱི་ཚོགས་ལ་ཡང་བསམ་བློ་གཏོང་དགོས་པ་རེད། དེ་མ་ཟད་རང་གིས་ཀྱང་འགན་ཞིག་འཁུར་དགོས་པ་རེད། དེ་ལྟར་མ་བྱུང་ན་རྙོག་དྲ་སློང་གི་རེད། ད་ཆབ་སྲིད་རྩོམ་ཡིག་མི་འབྲི་ཟེར་དགོས་ཐུག་གི་རེད།

གང་ལྟར་ངས་འདིར་མང་པོ་ཞིག་བཤད་པའི་སྙིང་པོ་ནི། སུ་ཞིག་གིས་རང་བཙན་འདོད་ནས་རང་བཙན་གྱི་ལས་སུ་ཞུགས་པ་ཡིན་ན། དེ་ནས་བཟུང་སྐུ་ཉིད་མི་བསྟུན་པའི་བདེན་པ་རྩོད་མཁན་དུ་རང་བཞིན་གྱིས་གྱུར་སོང་བ་ཡིན་ལ། མི་བསྟུན་པའི་བདེན་པ་རྩོད་པའི་བརྒྱུད་རིམ་ཁྲོད་ནས་ཚེ་སྲོག་གི་འགྲོ་སོང་ནི་རང་སྲེག་ལྟར་མུ་མཐུད་དུ་འགྲོ་རྒྱུ་ཡིན་པ་དང་། དེ་ཡང་ཚེ་སྲོག་བརྒྱ་སྟོང་ནས་ཁྲི་ཁྲག་བར་མ་བཏང་ན་རང་བཙན་ཟེར་བ་ལས་སླ་བོར་སྤྲོད་མཁན་མེད་པའི་གནས་ལུགས་འདི་ཤེས་པའི་ཐོག་ནས། འཆི་བ་དང་རང་བཙན་བརྗེ་དགོས་པའི་བདེན་པའི་ཨུ་ཚུགས་ཀྱི་བསམ་བློ་ཡང་དག་པ་ཞིག་རང་རྒྱུད་ལ་འཁྲུངས་པར་བྱས་ན། ད་བཟོད་རང་བཙན་ཟེར་བ་དེ་ཡང་རང་ཉིད་དང་ཐག་མི་རིང་བ་ཡིན། དེ་མིན་རང་སྲེག་དང་རང་བཙན་བརྗེ་མི་ཐུབ་པའི་རང་བཙན་པ་དག་ནི། འཚེ་མེད་ཞི་བའི་ལམ་ནས་མི་བསྟུན་པའི་བདེན་པ་རྩོད་སྟངས་ལ་ད་དུང་ཡི་ག་ཞུགས་མེད་པའི་ཏན་རྟགས་དེ་ལགས་པས། ངས་བལྟས་ན་རང་བཙན་ཁྱེད་རང་དང་ད་དུང་དཔག་ཚད་ཁྲི་ཁྲག་གི་ཕ་མཐའ་དེ་ནས་ལྷག་རྒྱུ་ངེས་ཅན་རེད། དེ་བས་རང་བཙན་འདོད་ན་མི་བསྟུན་པའི་བདེན་པ་དེ་རྩོད་དགོས་ཤིང་། མི་བསྟུན་པའི་བདེན་པ་དེ་རྩོད་དགོས་ན་འཆི་བར་སྐྲག་མི་རུང་བ་རེད། ཇི་སྲིད་ང་ཚོའི་སེམས་རྒྱུད་ལ་རང་བཙན་དང་འཆི་བ་བརྗེ་ཐུབ་པའི་བློ་སྤོབས་བཅོས་མ་མ་ཡིན་པ་ཞིག་མ་འཁྲུངས་པ་དེ་སྲིད་དུ་ང་ཚོ་རང་བཙན་འཐབ་རྩོད་པ་ངོ་མ་ཞིག་ཏུ་ད་དུང་གྱུར་མེད་པའི་གནས་ལུགས་འདི་ཅིས་ཀྱང་མཁྱེན་པ་གནང་རོགས་ཞུ་རྒྱུ་ཡིན།

ང་ལ་མཚོན་ན་དབུ་མ་དང་རང་བཙན་བརྩད་ནས་འགལ་བ་དང་གས་ཁ་ཇེ་ཆེར་འགྲོ་བཞིན་པ་འདིར་ཅུང་བློ་མ་བདེ། རང་བཙན་པ་ཡིན་ནའང་འདྲ། དབུ་མ་བ་ཡིན་ནའང་འདྲ། ཚང་མ་བོད་ཀྱི་གནད་དོན་ཐད་སེམས་ཁུར་བྱེད་མཁན་རྐྱང་ཡིན་པས་ང་ཚོས་ངོ་རྒོལ་ཞིག་བྱེད་ན་འདྲ། ལས་འགུལ་ཞིག་སྤེལ་ན་ཆོག ཚང་མ་མཉམ་འབྲེལ་དང་རྡོག་རྩ་གཅིག་སྒྲིལ་བྱེད་རྒྱུ་ཧ་ཅང་གལ་ཆེན་པོ་རེད། དབུ་མ་བས་ལས་འགུལ་སྤེལ་དུས་རང་བཙན་པས་བལྟས་ནས་བསྡད། རང་བཙན་པས་ངོ་རྒོལ་་བྱེད་དུས་དབུ་མ་བ་རྒྱང་བཀྱེད་ནས་བསྡད་ན་བོད་དོན་ཐད་ནུས་པ་ཐོན་རྒྱུ་ཧ་ཅང་དཀའ་མོ་རེད།
ངས་བྱས་ན་གཞུང་སྒེར་སུ་ཡིན་ཡང་བོད་ཀྱི་མ་འོངས་པའི་གནད་དོན་ཐད་དབུ་མ་དང་རང་བཙན་གང་དགོས་ཐག་གཅོད་ཀྱི་དབང་ཚད་ཡོད་པ་མ་རེད། ༧གོང་ས་མཆོག་གིས་རྟག་པར་གསུངས་པ་ལྟར་རྒྱལ་ཁབ་དེའི་བདག་པོ་རྒྱལ་ཁབ་དེའི་མི་དམངས་ཡིན་པས། བོད་མ་འོངས་པར་རང་བཙན་བྱེད་རྒྱུ་ཡིན་ནམ་ཡང་ན་རང་སྐྱོང་བྱེད་རྒྱུ་ཡིན། དེ་བོད་རྒྱ་ཆེའི་མི་དམངས་ཀྱིས་ཐག་གཅོད་དགོས་པ་རེད།

གཞུང་སྒེར་སུ་ཞིག་ལའང་དེ་ཐག་གཅོད་བྱེད་ཆོག་པའི་དབང་ཚད་ཡོད་པ་མ་རེད། ༧གོང་ས་མཆོག་གིས་ཀྱང་གསུང་བཤད་སྔ་རྗེས་མང་པོའི་ནང་མཐའ་མའི་ཐག་གཅོད་བོད་རྒྱ་ཆེའི་མི་དམངས་ཀྱི་ལག་པར་ཡོད་པའི་་ལམ་སྟོན་བཀའ་སློབ་ཁ་གསལ་མཛད་ཡོད་པ་ལྟར། ང་ཚོས་བོད་ནང་གི་ད་ལྟའི་གནས་སྟངས་ལ་ངོ་རྒོལ་ཀྱིས་བོད་ཀྱི་དཀའ་རྙོག་དེ་མ་སེལ་ན་མི་ཆོག་པ་དང་། མ་སེལ་ན་མི་སྡོད་པའི་ངོ་རྒོལ་དང་འོས་ལངས་རབས་དང་རིམ་པའི་ཁྲོད་ནས། བོད་རྒྱ་ཆེའི་མི་དམངས་ལ་རང་དབང་གི་ལམ་ནས་བོད་ཀྱི་མདུན་ལམ་ཐག་གཅོད་བྱེད་ཆོག་པའི་གོ་སྐབས་སམ་ཁོར་ཡུག་བཟང་པོ་ཞིག་བསྐྲུན་རྒྱུ་ནི་ད་ལྟའི་ང་ཚོའི་ཁ་ཚ་དགོས་གཏུགས་ཀྱི་ལས་འགན་དེ་རེད་ལ། ང་ཚོའི་དམིགས་ཡུལ་དེ་ཡང་རེད། འུ་ཚོ་ནི་གོ་སྐབས་སྐྲུན་མཁན་ཡིན་པ་ལས་ཐག་གཅོད་བྱེད་མཁན་དེ་མིན་པ་རེད། དེ་བས་རང་དབང་དང་། ཐོབ་ཐང་ཞིག་གི་ཆེད་དུ་ང་ཚོ་མཉམ་དུ་ལངས་དགོས་ལ། བདེན་པ་དང་། གནས་ལུགས་ཤིག་གི་ཆེད་དུ་ང་ཚོས་ལག་རྡང་མཉམ་དུ་སྦྲེལ་ཏེ། མཐའ་མའི་ཐག་གཅོད་ཀྱི་གཡུལ་ས་དེ་ལེན་པར་མཉམ་དུ་རྒྱུག་དགོས་ཨང་། གངས་ཅན་པ་ཚོ།