མཁོ་སྤྲོད་པ། མེ་སཱོར་ཁྲིམས་ལུགས་སློབ་མ། བློ་བཟང་གྲགས་པ།
ཟླ་འདིའི་ཚེས་༢༩ ནས་༣༡ བར་གྱི་ཉིན་གསུམ་རིང་བཙན་བྱོལ་བོད་ཀྱི་ཤེས་རིག་ལས་ཁུངས་ཀྱི་སློབ་ཡོན་སྡེ་ཚན་ནས་རྒན་ཚེ་ལྷ་ལགས་འདི་གར་རྒྱ་གར་ལྷོ་ཕྱོགས་མེ་སཱོར་གྲོང་ཁྱེར་ཏུ་ཕེབས་ནས། བཙན་བྱོལ་བོད་ཀྱི་ཤེས་རིག་ལས་ཁུངས་ཀྱི་ཁྱབ་ཁོངས་གཙོས་བོད་ཀྱི་མཐོ་སློབ་སློབ་མ་རྣམས་ལ་ཤེས་རིག་ལས་ཁུངས་ཀྱི་ཤེས་ཡོན་སྲིད་ཇུས་གསར་པ་དང་། བཙན་བྱོལ་བོད་ཀྱི་གཞི་རྩའི་ཤེས་ཡོན་ལྟ་གྲུབ་སོགས་ངོ་སྤྲོད་དང་། དེ་བཞིན་འདི་གར་གནས་ཡོད་མཐོ་སློབ་ཁག་ལ་གཟིགས་སྐོར་ལྟ་ཞིབ་གནང་པ་དང་། མཐོ་སློབ་ཁག་གི་སློབ་སྤྱི་དང་འགན་འཛིན་ལྷན་ཚོགས་ཀྱི་ཚོགས་མི་སོགས་ཐུག་འཕྲད་ཀྱིས། བོད་ཀྱི་མཐོ་སློབ་སློབ་མ་རྣམས་ཀྱི་ཉིན་རེའི་མཐོ་སློབ་འཚོ་བ་དང་། སློབ་སྦྱོང་གི་གནས་སྟངས། བོད་ཀྱི་མཐོ་སློབ་སློབ་མ་ཁག་གི་སློབ་ཡོན་དང་བྱ་སྤྱོད་གཙོས་པའི་ལས་རིམ་སོགས་ལ་བཀའ་མོལ་གནང་ཡོད་པ་དང་། ད་ཐེངས་ཁོང་ཉིད་འདི་གར་ཕེབས་ནས་བོད་པའི་མཐོ་སློབ་སློབ་མ་རྣམས་ལ་ནམ་རྒྱུན་གོ་ཐོས་བྱུང་མེད་པའི་བོད་ཀྱི་ཤེས་ཡོན་དང་སློབ་ཡོན་སྲིད་ཇུས་ཐད་གསལ་ཁ་སྤྲོད་ཐུབ་པ་མ་ཚད། བོད་རིགས་མཐོ་སློབ་སློབ་མ་མང་པོར་རང་ཉིད་སློབ་མཐའ་ཕྱིན་རྗེས་བཙན་བྱོལ་བོད་ཀྱི་སྒྲིག་འཛུགས་སུ་ཕྱག་ལས་གནང་བའི་སེམས་ཤུགས་ཀྱང་གང་མང་སྤར་ཐུབ་སོང་ཞེས་སློབ་མ་མང་པོས་གསུང་གི་འདུག།
ཁོང་གི་ཉིན་འདི་དག་གི་རིང་མེ་སཱོར་ས་གནས་མཐོ་སློབ་ཁག་ལ་ཕེབས་པ་དང་མཐོ་སློབ་དེ་ཚོའི་སློབ་སྤྱི་དང་འགན་འཛིན་ལྷན་ཚོགས་ཀྱི་ཚོགས་མི་སོགས་སུ་ཐུག་འཕྲད་བྱས་པར། འབྲེལ་ཡོད་མཐོ་སློབ་ཁག་གི་སྣེ་ཡོད་མི་སྣ་ཚོས་ཀྱང་སྣེ་ལེན་གང་ལེགས་ཞུས་ཡོད་པ་དང་། ཁོང་ཚོས་བོད་རིགས་མཐོ་སློབ་སློབ་མ་རྣམས་ཀྱི་སྦྱངས་འབྲས་དང་བྱ་སྤྱོད་གཙོས་གནས་ཚུལ་མང་པོར་འགྲེལ་བརྗོད་གནང་ཡོད་པ་མ་ཟད། མཐོ་སློབ་རང་ངོས་ནས་བོད་རིགས་སློབ་མ་རྣམས་ཀྱི་དགོས་མཁོ་དང་བསྟུན་མཐུན་རྐྱེན་དང་རོགས་རམ་གང་ཐུབ་ཞུ་རྒྱུ་ཡིན་པའི་ཁས་ལེན་ཡང་བྱས་ཡོད་པ་དང་། ཁོང་ཚོས་ད་ཐེངས་བཙན་བྱོལ་བོད་ཀྱི་ཤེས་རིག་ལྷན་ཁང་ནས་ལས་བྱེད་ཆེད་གཏོང་བྱས་ནས་བོད་རིགས་མཐོ་སློབ་སློབ་མ་རྣམས་ལ་དངོས་སུ་ལྟ་ཞིབ་བྱེད་པར་ཕེབས་པར་དགའ་བསུ་དང་ཡི་རངས་ཞུས་པ་མ་ཚད། ཐེངས་འདིར་འབྲེལ་ཡོད་ལས་བྱེད་དང་དངོས་སུ་བཀའ་མོལ་དང་གྲོས་བསྡུར་བྱུང་པར་གཞལ་མེད་སྤྲོ་སེམས་སྐྱེས་པ་དང་། དེ་ནི་བཙན་བྱོལ་བོད་ཀྱི་ཤེས་རིག་ལྷན་ཁང་དང་མཐོ་སློབ་དབར་འབྲེལ་འཐུད་ཀྱི་གསེར་ཟངས་དེ་ཉིད་ཇེ་བརྟེན་ཏུ་འགྲོ་བའི་ཡིད་ཆེས་དང་དགའ་མོས་གནང་གི་འདུག་ཅེས་གསུངས་སོང་།
རྒན་ཚེ་ལྷ་ལགས་ས་གནས་འདི་གར་མ་ཕེབས་ཀྱི་གོང་དུ་རྒྱ་གར་ལྷོ་ཕྱོགས་གྲོང་ཁྱེར་བྷན་ལོར་ཕེབས་སྟེ་དེ་བཞིན་ལས་རིམ་བརྩམས་ཡོད་པ་དང་། ཚེས་༣༡ཉིན་དགོང་མོར་མེ་སཱོར་བོད་རིགས་མཐོ་སློབ་སློབ་མ་རྣམས་མཉམ་འཛོམས་ཀྱིས་དཀའ་སློབ་རིམ་པ་གནང་རྗེས་རྒྱ་གར་ལྷོ་ཕྱོགས་གྲོང་ཁྱེར་མན་ལོར་ལ་ལས་རིམ་བརྩམ་པར་ཕེབས་སོང་།