སྡེ་སྣོད་དེ་དག་གི་ཁུངས་དང་རྒྱུད་པ་གང་ནས་བྱུང་བའི་སྐོར།

ཧི་མ་ལ་ཡའི་འཕྲུལ་སྨྱུག

དེ་དག་གི་ཁུངས་དང་རྒྱུད་པ་གང་ཡིན་དྲིས་པ་ན། ཀླུ་སྒྲུབ་ཀྱིས་ཁོ་རང་ས་འོག་ཏུ་འཛུལ་ནས་ཡར་ལ་དྲངས་པ་ཡིན་ཚུལ་དང༌། ཐོགས་མེད་ཀྱིས་ཁོ་རང་ནམ་མཁར་འཛེགས་ནས་མར་ལ་ཕབ་པ་ཡིན་ཚུལ་སོགས་གསུངས་པ་མ་གཏོགས། འཇིག་རྟེན་མི་ཡུལ་འདིར་མཛུབ་མོ་འཛུགས་ས་གཅིག་ཀྱང་རག་མེད་པ་རེད། ༼དབུ་འཇུག་གི་འགྲེལ་བ་དྭགས་རྒྱུད་གྲུབ་པའི་ཤིང་རྟ་དང༌། གདམས་ངག་མཛོད་ནང་སེམས་བསྐྱེད་གཉིས་ཀྱི་བརྒྱུད་རིམ་དང༌། ཇོ་བོ་རྗེའི་མཛད་པའི་ཟབ་མོ་ལྟ་བའི་ལུགས་ཀྱི་བྱང་ཆུབ་སེམས་བསྐྱེད་པའི་ཆོ་ག་བྱང་ཆུབ་ཆེན་པོའི་གཞུང་ལམ་གྱི་རྒྱུད་ཚུལ་རྣམས་སུ་གསལ་ཁ་འཁོད་ཡོད་ལ།༽ ཁོང་རྣམ་གཉིས་ལ་བསྟན་པའི་ཤིང་རྟ་ཆེན་མོར་བགྲང་བའི་རྒྱུ་མཚན་ཡང་དྲང་མོར་ཞས་ན། ཁུངས་ལུང་མེད་པའི་གྲུབ་མཐའ་མི་འདྲ་བ་གཉིས་གསར་དུ་སྤེལ་མཁན་ཡིན་པ་འདི་ལ་ཐུག་ཡོད། ༼ཅེས་པའང་མི་གྲུབ་སྟེ། ཁྱེད་རང་གིས་འདོད་པ་གཞིར་བཞག་ནའང༌། ཁོང་རྣམ་པ་གཉིས་ལས་སྔོན་དུ་(སེམས་ཙམ་པའི་སློབ་དཔོན་ལྔ་བརྒྱ་སོགས་)བྱོན་ཟིན་པའི་ཕྱིར་རོ།།༽

གཅུང་དབྱིག་གཉེན་སྐུ་ན་གཞོན་དུས་ཐེག་པ་ཆེ་ཆུང་གི་བར་ན་རྩོད་པ་ཛ་དྲག་ཆེ་བའི་སྒང་ཡིན་པ་འདིས། སྐབས་དེར་ཐེག་ཆེན་༼གྱི་སྡེ་སྣོད་རྣམས་རྒྱ་གར་གྱི་༽ས་ཐོག་ཏུ་༼ཡོངས་གྲགས་སུ་༽བུད་༼མགོ་ཚུགས་༽ནས་དུས་ཡུན་མི་རིང་བར་ཤེས་ཐུབ་༼ལ། (ཁུངས་ལུང་མེད་པའི་གྲུབ་མཐའ་མི་འདྲ་བ་གཉིས)་ཀྱི་ཡ་རྒྱལ་རྒྱ་ཆེན་སྤྱོད་པའི་ལུགས་དེར་འཛུལ་མཁན་ཉན་ཐོས་ཐེག་པའི་སློབ་དཔོན་དེ་ཡང་དབུ་སྐོར་ཇི་ལྟ་བུ་ཞིག་ཐེབས་མིན་བཀའ་འདྲི་ཞུ་དགོས་པར་འདུག་གོ།༽
དེས་ན་སློབ་དཔོན་ཀླུ་སྒྲུབ་ཁོང་༼སྟོན་པ་༽འདས་རྗེས་ཀྱི་ལོ་བཞི་བརྒྱ་ལོན་དུས་སྐུ་འཁྲུངས་ཤིང༌། དགུང་གྲངས་དྲུག་བརྒྱའི་བར་དུ་བཞུགས་པ་སོགས་ནི་གཏམ་རྒྱུད་ཙམ་༼མ་ཡིན་པར། དོན་དངོས་ལ་བབ་པའི་ལོ་རྒྱུས་༽དང་༼འབྲེལ་བ་ཡོད་དེ། བྲམ་ཟེ་ཆེན་པོས་སྐུ་ཚེ་སྲིང་བའི་ཆོ་ག་ལ་བརྟེན་ནས་བྱུང་བའི་ཕྱིར་དང༌། དེ་ཡང་ངེས་པ་ཡོད་དེ། ཐེག་པ་རང་སར་བདེན་ཞེས་པའི་གསུང་འགྲོས་ལྟར། ཐུན་མིན་གསང་སྔགས་ཀྱི་ཐེག་པའི་བཞེད་པ་ཡིན་པའི་ཕྱིར། ཞེས་པ་ཙམ་གྱི་མཐའ་མ་སྐྱལ་བར། ཉན་ཐོས་ཐེག་པའི་ལུགས་ལའང༌། མངོན་མཛོད་ལས། སྲོག་ནི་ཚེ་ཡིན་དྲོད་དང་ནི། །ཞེས་པའི་སྐབས་སུ། རྒྱལ་དབང་འཕྲིན་ལས་རྣམ་རྒྱལ་གྱི་འགྲེལ་བ་ལས། ཚེ་རྐྱང་པ་དང༌། ཚེ་དང་བསོད་ནམས་གཉིས་ཀ་ཟད་ནས་འཆི་བ་ནི། འཕགས་པ་ཚེ་ལ་དབང་བ་རྣམས་མ་གཏོགས་པས། ཚེ་བསྲིང་བའི་ཐབས་མེད་ཅིང༌། བསོད་ནམས་ཟད་པས་འཆི་བ་ནི། དགེ་སྦྱོར་དང་སྦྱིན་པ་ལ་སོགས་ཚེ་བསྲིང་དུ་ཡོད་ལ། ཞེས་གསུངས་པའི་ཕྱིར་རོ།།༽
དགུ་བརྒྱ་ཙམ་དུ་འཁྲུངས་ཤིང་སྟོང་ཕྲག་ཡས་མས་སུ་གྲོངས་པ་ནི། དངོས་དོན་དུ་བཟུང་ན་འགྲིག ༼ཅེས་པ་ལ་དཔག་ན་ཀླུ་སྒྲུབ་ཅེས་པ་ཞིག་བྱུང་ཡོད་པ་ནི་ཁྱེད་ཀྱི་ཀྱང་ཁས་བླངས་འདུག་ན། འཁྲུངས་འདས་དེ་གཞིར་བཅོལ་སའི་ཁུངས་ལྡན་ཞིག་བྲི་དགོས་པར་གྱུར་རོ།།༽
མཁས་དབང་དགེ་ཆོས་ལགས་ཀྱིས། ལེགས་ལྡན་དང་ཆོས་གྲགས་སོགས་གསང་སྔགས་ལ་ཆ་རྒྱུས་མེད་པར་གསུངས་པ་ལྟར། དུས་རབས་བདུན་པའི་གཡས་གཡོན་ཙམ་ལ་ཡང་ཡོངས་གྲགས་སུ་གསང་སྔགས་ནང་བསྒྱུར་གནང་བའི་མགོ་ཕལ་ཆེར་ཚུགས་མེད་པ་འདྲ།༼རྒྱ་གར་ཆོས་འབྱུང་དང༌། བུ་སྟོན་ཆོས་འབྱུང་གཉིས་ཀྱི་ནང་དུ་ཞིབ་ཆ་ལྟ་དགོས་པ་མ་ཟད།༽ ༼དབྱིག་གཉེན་དང་ཕྱོགས་གླང་སོགས་གསང་སྔགས་ལ་མཉམ་བཞེས་གནང་ཡོད་མེད་བརྟག་དགོས་པ་དང༌། དབྱིག་གཉེན་འདས་སྐབས་རྣམ་རྒྱལ་མའི་གཟུང་འགོ་ཟློག་ནས་བཟླས་པར་གསུངས་པ་དེ་དང༌། འཕགས་པ་སྒོ་དྲུག་པའི་གཟུངས་ཀྱི་རྣམ་བཤད་གཉིས། གསང་སྔགས་ཡིན་མིན་ཡང་དཔྱད་པ་བྱེད་དགོས།༽

རྒྱ་ཆེའི་ཀློག་པ་པོ་རྣམ་ལ་གསལ་བཤད་ཞུ་རྒྱུ། སྤྱི་ཡོངས་ཀྱི་ཡི་གེ་དཀྱུས་མ་རྣམས་ནི། ཚ་བ་མདའ་སྨྱུག་པའི་ལོག་རྟོགས་སྙིང་སྟོབས་ཀྱི་ཚིག་འབྲུ་རང་སོར་བཞག་པ་ཞིག་ཡིན་ལ། དབྱིན་ཡིག་གི་གུག་རྟགས་()འདིའི་ནང་བཀོད་པའི་ཡི་གེ་རྣམས་ནི། བསྒྲགས་རྩོམ་འདིའི་ཚིག་ཕྲེང་ལུང་འདྲེན་གྱི་ཚུལ་དུ་ཐད་ཀར་དྲངས་པ་ཞིག་ཡིན། གུག་རྟགས་༼༽འདིའི་ནང་དུ་བཅུག་པའི་ཡི་གེ་རྣམས་ནི། ཁོ་བོས་བསམ་ཚུལ་གསར་དུ་བྲིས་པ་ཞིག་ཡིན་པ་དགོངས༌འཇག་འཚལ།