བསོད་ནམས་ནོར་བུ།
གནམ་སྔོན་མོ་གཡུ་ཡི་མར་ཤོད་ན།།
ས་སེར་པོ་གསེར་གྱི་སྒལ་སྟེང་དུ།།
སྤྲིན་དཀར་པོ་མཆོང་བའི་ཁ་ཐུག་ནས།།
ངག་དམར་པོས་གླུ་ཆུང་ཟ་ཟིར་འཐེན།།
སྔོན་བདག་ཅག་སྟོན་པས་རྫུ་འཕྲུལ་གྱིས།།
གཅུང་དགའ་བོ་ལྷ་ཡུལ་སྐྱེལ་རབས་དང་།།
ལྷ་དབྱངས་ཅན་ཕྱག་གིས་ཀློང་ཆེན་པ།།
རིའི་རྩེ་མོར་ཁུར་བ་གཏམ་རྒྱུད་ཙམ།།
དུས་དེང་སང་ཚན་རྩལ་ལག་དྲིན་ལས།།
བྱ་མིན་ཡང་གནམ་ལ་འཕུར་མཁན་དང་།།
ཉ་མིན་ཡང་ཆུ་ལ་རྐྱལ་མཁན་གྱི།།
ངོ་མཚར་མོའི་གནམ་གྲུ་མཚོ་གྲུ་མང་།།
བདག་ཡིག་ཁུག་དམར་པོའི་འཚང་ཁ་དང་།།
དར་དཀར་དམར་འཕྱང་འཕྲུལ་རྒོད་པ་ཡི།།
ཐོབ་གོ་གནས་ཅན་ཞིག་མ་ཡིན་ཡང་།།
དགུང་སྔོན་མོར་མིག་གཡུག་ཐེངས་ཤིག་བྱས།།
ཐང་བདེ་མོ་མེ་ལོང་ངོས་འདྲ་ནས།།
རྐང་འཁོར་ལོ་རེག་ལ་མ་རེག་ངང་།།
སྐད་འུར་སྒྲས་གནམ་ས་འགེངས་བཞིན་དུ།།
བྱ་དཀར་མོའི་གཤོག་ཟུང་གནམ་ལ་བརྐྱང་།།
སྔོན་ཐོན་མི་བཻ་རོ་ལ་སོགས་པས།།
ལུས་དཀའ་སྡུག་རྔུལ་ནག་འཚིར་བཞིན་དུ།།
ཉིན་ཟླ་ལམ་རྡོག་པས་བཅད་པའི་སར།།
དུས་དེ་རིང་ཡུད་ཀྱིས་བརྒལ་ལ་ལྟོས།།
སའི་གོ་ལར་གྱེས་ཁའི་མིག་ཞགས་གཡུགས།།
སྤྲིན་དཀར་པོའི་འདབ་མ་ལག་པས་བྱིལ།།
རྒྱང་མིག་ཟུང་ནམ་མཁའི་མཐའ་ལ་བསྲིང་།།
ཕུགས་རེ་བཞག་ཁྲག་རྩའི་སྦུབས་ནས་གླེང་།།
ཡར་ལྟོས་དང་ལྷ་ལམ་ཡངས་པའི་ཁྱོན།།
འོད་ཐིག་ལེ་ཐིག་ཕྲན་འཕྲོ་ཞིང་སྡུད།།
མིག་ལྟ་བས་མི་མངོན་ཕ་མཐའ་བྲལ།།
སེམས་དྲན་སྣང་རིག་པ་སྟོང་ཧང་ཧང་།།
ཕྱོགས་གནམ་མཐའ་རི་བོས་རྒྱང་ནས་འདེཊ།།
རྒྱབ་ཉི་མས་འོད་ཟེར་ས་འོག་འཐེན།།
སྤྲིན་སྨུག་པས་སྐོར་ལྡིང་ལང་ལོང་བྱེད།།
བློ་ཀུན་རྟོག་འགྱུ་བས་བྲང་ཁོག་བརྡུང་།།
མར་ལྟོས་དང་ལྟད་མོ་འདི་འདྲ་གདའ།།
གངས་དཀར་པོས་སྤྲིན་གྱི་སྐེ་རྒྱན་དཀྲིས།།
ཆུ་གཙང་པོས་རླངས་པའི་ཕྱུ་པ་བསྣམས།།
ནགས་ལྗོན་ཤིང་གཟི་བྱུར་འབྲས་བུས་དུད།།
རྫ་བྲག་རི་སྒར་ཆེན་བཏབ་པ་འདྲ།།
ནགས་གཡུ་ལོ་མདུང་རིང་སློང་བ་བཞིན།།
མཚོ་དྭངས་མོ་མེ་ལོང་བཤམ་འདྲ་སྟེ།།
གནའི་རང་བྱུང་བཀོད་པ་མཛེས་ཤིང་སྡུག།
གངས་ལྷུན་བརྩེགས་སྤུ་གྲིའི་སོ་ཁ་ཅན།།
ཁྱོད་མཐོ་སྙམ་སྤོབས་པས་མ་འགྱིང་དང་།།
སྔར་གནམ་འདེགས་ཀ་བ་འབོད་ན་ཡང་།།
དུས་དེ་རིང་ཨ་ཕོའི་འཕོངས་ཞབས་རེད།།
དགུང་ལྕགས་བྱ་ཉ་མོའི་ལུས་དབྱིབས་ཅན།།
འཕུར་འཕུར་ནས་མགོ་བོ་ཕབ་ཐེངས་རེར།།
མིག་ཆུ་བུར་འོད་ཀྱི་བརྙན་འཕྲིན་ལས།།
དེང་གྲོང་ཁྱེར་དཔལ་ཡོན་འདི་འདྲའང་ཤར།།
མཐོ་ཁང་རྩེག་ཕ་བོང་སྒྲིག་འདྲ་ནས།།
མི་ཆུང་ཆུང་འབའ་འབུ་རྒྱུ་འདྲ་དང་།།
གཞུང་སྣུམ་ལམ་གཙང་ཆུ་འབབ་འདྲའི་སྟེང་།།
འཕྲུལ་རླངས་འཁོར་མེ་སྟག་ཡར་ཡར་མཐོང་།།
ཚོང་ཁྲོམ་ར་རྒྱལ་དར་བཀྲམ་འདྲ་ལ།།
གློག་དཀར་དམར་མེ་ཏོག་བཞད་བཞད་དང་།།
སྐད་འུར་ཟིང་སྦྲང་ཚང་སློག་སློག་སྟེ།།
མིའི་འཇིག་རྟེན་འཚོ་བ་ཁྲ་ཁྲ་རེད།།
༢༧/ ༣/ ༢༠༡༣/