སེར་ཤུལ་རིན་ཆེན་དོན་གྲུབ།
འཁྱག་འཁྱོག་གོམ་པ་འདོར་བའི་བྱེད་ནུས་དང་།།
གཙང་གཙོག་དབྱེ་འབྱེད་ནུས་པའི་སྟོབས་བྲལ་ཏེ།།
ཡོད་ཚད་ངུ་ངག་གཅིག་གིས་སྟོན་པའི་སྐབས།།
ཁྱེད་ཀྱིས་སྙོར་སྐྱོང་བཟང་པོའི་དྲོད་ཀྱིས་བསྐྱངས།།
ལྟ་བའི་མིག་དང་ལྡན་ཞིང་བགྲོད་སེམས་འཕྱོ།།
ཞིམ་པའི་རོ་ལ་སྲེད་ཅིང་འདོད་པས་ངུ།།
ཚ་གྲང་བཀྲེས་ལྟོགས་གཙོག་འདོར་ལས་ཚགས་ཀྱིས།།
ཁྱེད་ཀྱིས་ངལ་བའི་ཁུར་ཆེན་ཤུགས་ཀྱིས་བཏེགས།།
མཐོང་ཚད་རང་ལ་དགོས་པའི་ཡུས་བཤད་བྱས།།
ཞིམ་ཚད་ཡང་ཡང་སྟེར་ཞེས་ངུ་སྒྲ་སྒྲོག །
བསམ་ཤེས་ཅུང་ཙམ་མེད་པའི་ངན་སྤྱོད་ཀྱིས།།
ཁྱེད་ཀྱི་མི་ཚེའི་ཁུར་ཆེན་ལྗིད་ཀྱིས་མནན།།
ཁྱེད་ཀྱི་ཞིམ་པའི་བྱེ་མར་ཁ་ནས་འཕྲོག །
ཁྱེད་ཀྱི་མཛེས་པའི་གོ་བཟང་གཙོག་པས་སྦགས།།
ཁྱེད་ཀྱི་བརྩེ་བའི་ཁྱིམ་མཚེས་འཁོན་ལ་བསྐྱལ།།
ཡོད་ཚད་བུ་ཡི་ཆེད་ཡིན་དྲིན་ཆེན་མ།།
ཟ་ཉལ་འགྲོ་འདུག་སྤྱོད་པའི་སློབ་སྟོན་གནང་།།
བྱམས་སེམས་གཅེས་སྐྱོང་ཟབ་མོའི་དྲོད་ཁོལ་བྱིན།།
ལྷད་མེད་མཛེས་པ་འབུམ་གྱི་བདེ་སྐྱིད་ནི།།
ཁྱེད་ཉིད་ཁོ་ནས་གནངས་སོ་བྱམས་ལྡན་མ།།
ཁྱེད་ཀྱིས་རྒས་པའི་སྡུག་བསྔལ་མྱོང་བའི་སྐབས།།
བུ་ང་རྒྱང་རིང་གནས་སུ་བཞུད་དེ་སོང་།།
དྲིན་བྱས་དྲིན་ལན་མ་འཇལ་བུ་ཆུང་ངས།།
ད་ལྟ་འགྱོད་གདུང་མྱ་ངན་དབྱངས་ལ་གྱེར།།
མི་རྟག་འཆི་བདག་རྒྱལ་བོའི་བཀའ་བཙན་གྱིས།།
མགྲོན་བསུའི་བརྡ་རྟགས་སླེབ་པའི་དུས་སུ་ཡང་།།
བདེ་བར་ཕེབས་ཞེས་སྐྱེལ་མ་ཙམ་ཡང་མེད།།
སྙིང་ནས་འགྱོད་པས་གདུང་ངོ་དྲིན་ཆེན་མ།།
མི་རྟག་གཤིས་ལུགས་ལྡོག་པའི་ཆོས་ཉིད་བྲལ།།
གྱེས་གདུང་ཉམས་སུ་མྱོང་དགོས་ལས་ཀྱིས་གྲུབ།།
དེས་ན་ཡུམ་ཆེན་དུས་ཀྱི་ཚེས་བཟང་འདིར།།
བདག་གིས་འདས་སོང་བདེ་སྣང་དྲན་པས་བསུ།།
བརྩེ་བའི་བང་མཛོད་དུ་གྲུབ་སྙིང་གི་མ།།
བདེ་བར་ལས་ཀྱི་འབྲེལ་བའི་གནས་སུ་ཕེབས།།
བུ་ངས་སྐྱེས་སྦྱང་རིག་པའི་འདང་ཚད་ཀྱིས།།
ཁྱེད་ཀྱི་གསུང་བཞིན་འགྲོ་ཕན་ལས་ལ་བརྩོན།།
༢༠༡༣/༥/༡༢ ཏེ་ཡུམ་གྱི་དུས་དྲན་ཉིན་ཕུལ།