རྒྱ་ནག་གི་གད་སྙིགས་ཁྲོད་ཀྱི་བོད།

ནམ་མཁའ། ༼སྔོན་མའི་འཕྲོས༽

བཞི་བ། རྨ་ལྷོ་ལ་འགྲུལ་བཞུད་བྱས་བའི་ལམ་བར་གྱི་མཐོང་ཐོས།
པེ་ཅིན་བུ་མོའི་གདོང་ལ་འཛུམ་མདངས་ཞིག་ལངས་ཞོར་ཕྲན་གྱིས་ཉན་འདོད་ཡོད་པའི་ཡུལ་སྐོར་ཟིན་ཐོའི་མཇུག་འདི་ལྟར་མཐུད་སོང་། དེའི་ཕྱི་ཉིན་ཞོགས་པ་སྔ་བོ་ནས་གུས་མོའི་སྣེ་ཤེན་བུ་མོ་དང་ངེད་གཉིས་ཀྱིས་རླུང་འཁོར་ཆུང་བ་ཞིག་ཆེད་མངགས་ཀྱིས་གླས་ཏེ་མཚོ་བྱང་ནས་ཐོན་པ་ཡིན།འགྲོ་ཞོར་མཚོ་སྔོན་པོའི་འགྲམ་ལ་ཡང་བསྐྱར་ཕྱིན་ཏེ། ངས་རོགས་པ་བྱེད་སའི་བྱིས་པ་དེའི་ནང་མིར་ཐུགས་འཕྲད་ཞིག་བྱས་ནས་བྲལ་ཁའི་བདེ་མོ་བཞག་སྟེ་ཟི་ལིང་ལ་ཕྱིན། རྒྱ་རིགས་དང་ཁ་ཆེ་རིགས་མང་པའི་གནའ་བོའི་བོད་ཀྱི་ཟི་ལིང་གྲོང་ཁྱེར་ནས་ཉིན་གཅིག་ངལ་གསོ་བྱས་ཏེ་བསྡད། ཆུ་ཚོད་འགའི་རིང་གུས་མོའི་སྣེ་ཤེན་བུ་མོས་གནའ་བོའི་གྲོང་ཁྱེར་ཟི་ལིང་མཁར་རུ་ལྟད་མོར་ཁྲིད་སོང་། ཐོག་མར་མེ་འཁོར་འབབ་ཚུགས་ཀྱི་ཉེ་འགྲམ་རུ་ཡོད་པའི་བོད་ཀྱི་ཁྲོམ་རའི་སྲང་ལམ་དེར་བལྟ་རུ་ཕྱིན། དེ་གར་བོད་མི་རིགས་ཀྱི་ཁྱད་ཆོས་ལྡན་པའི་གྱོན་ཆས་དང་དེ་མིན་ཅ་ལག་འདྲ་མིན་སྣ་ཚོགས་འདུག་མོད། ཡིན་ཡང་བོད་རང་གི་མི་རིགས་ཀྱིས་བཟུང་བའི་ཚོང་ཁང་དང་ཟ་ཁང་ནི་མཛུབ་མོའི་རྩེ་ནས་གྲངས་ཀ་ལས་སླ་བོས་སྒོ་ནས་བགྲངས་ཐུབ། དེས་རྐྱེན་བོད་ཀྱི་ས་ཁུལ་གྱི་གྲོང་ཁྱེར་ཞིག་དང་མི་འདྲ་བར་མི་རིགས་གཞན་རྒྱ་རིགས་དང་ཁ་ཆེ་སོགས་ཀྱིས་བཟུང་བའི་ཚོང་ཁང་དང་ཟ་ཁང་ནི་གཞི་རྒྱ་ཆེ་ལ་གྲངས་ཀ་ཡང་ལས་སླ་མོས་བགྲངས་མི་ཐུབ་པས། གུས་མོས་སྔོན་དུ་བཤད་པ་བཞིན་བོད་ཀྱི་གྲོང་ཁྱེར་ཞིག་རེད་ཟེར་ན་སུས་ཡིད་ཆེས་བྱེད་ཐུབ། འདི་གཅིག་པོས་ཀྱང་བོད་ཀྱི་ས་ཁུལ་ཡོངས་སུ་བོད་རིགས་ལས་རྒྱ་རིགས་མང་པོ་ཡོད་པ་བདེན་དཔང་བྱེད་ཐུབ།

གང་ལྟར་སེམས་སྐྱོ་སའི་ཚོང་ཁང་དང་ཟ་ཁང་སོགས་ཀྱི་ཁྲོམ་སྲང་ནས་ཕྱིར་བུད་དེ། ཟམ་པ་ཆུང་ངུ་ཞིག་གི་ཐོག་ནས་མེ་འཁོར་འབབ་ཚུགས་སུ་ཕྱིན་པ་ཡིན། ཟམ་པ་དེའི་ཐོག་ནས་མར་བལྟས་ཚེ་འབག་བཙོགས་ཅན་གྱི་རྒྱུགས་ཆུ་ཆུང་ཆུང་ཞིག་མཐོང་སོང་། མ་ཟད་གཙང་འགྲམ་གཡས་གཡོན་ཆ་ཚང་གྲོང་ཁྱེར་གྱི་གད་སྙིགས་ཀྱིས་ཁེངས་འདུག གུས་མོའི་སྣེ་ཤེན་བུ་མོར་རྒྱུགས་ཆུ་འདིའི་མིང་ལ་ག་རེ་ཟེར་གྱི་ཡོད་པ་རེད་ཅེས་སྐད་ཆ་དྲིས་པ་ཡིན། མོས་འདིའི་མིང་ལ་༼ཙོང་ཆུ་༽ཟེར་གྱི་ཡོད་པ་རེད་ཟེར། མ་ཟད་མོ་རང་གིས་ཟི་ལིང་གྲོང་ཁྱེར་གྱི་འབག་བཙོགས་ཀྱི་ཆུ་ཆ་ཚང་འདིའི་བཞུར་གྱི་ཡོད་པ་རེད་ཟེར་ཞོར། ད་དུང་བོད་ཀྱི་ཁོར་ཡུག་ཆ་ཚང་གད་སྙིགས་དང་གཏེར་ཁ་བསྔོགས་འདོན་གྱིས་ས་གཞི་ཐམས་ཅད་ཀྱི་ཕྱི་ཤུན་ལུག་པགས་བཤུ་བ་བཞིན་བཤུས་ཚར་ལ་ཡོད་པ་རེད་ཟེར། གུས་མོའི་སྣེ་ཤེན་བུ་མོས་ཚིག་འདི་དག་བཤད་ཞོར་ཡིད་ཐང་ཆད་པའི་དབུགས་རིང་ཞིག་བཏང་སོང་། གུས་མོའི་སྣེ་ཤེན་བུ་མོའི་གདོང་ལ་ཤིན་ཏུ་སྐྱོ་ཉམས་ཞིག་མཐོང་བ་ནི་དེ་རིང་ཟི་ལིང་ནས་མཐོང་བ་ཐོག་མ་ཡིན།
ཉིན་འགའི་རིང་མཚོ་སྔོན་པོའི་འགྲམ་ལ་ལྟ་སྐོར་བྱས་དུས་གནས་ཚུལ་འདྲ་མིན་ཞིག་མཐོང་མོད། ཡིན་ཡང་ངའི་སྣེ་ཤེན་བུ་མོའི་གདོང་ལ་འདི་འདྲའི་སྐྱོ་ཉམས་ཞིག་བྱུང་བ་མཐོང་མ་སོང་བས། གུས་མོས་ཅི་ཞིག་བཤད་དགོས་པ་ཡང་མ་ཤེས་བར་ཡུན་ཙམ་རིང་ཁུ་སིམ་མེར་བསྡད་པ་ཡིན། གུས་མོས་ངའི་སྣེ་ཤེན་བུ་མོ་ལ་འདི་ལྟར་བཤད་པ་ཡིན། རེད་རེད། སྤྱིར་འཛམ་གླིང་གི་ཁོར་ཁུག་ལ་གཏོར་བཤུག་བཏང་པ་ཚད་ལས་རྒལ་བ་བྱུང་ཡོད་པས་འབྱུང་བཞིའི་གནོད་པ་འཛམ་གླིང་གང་སར་བྱུང་དང་འབྱུང་བཞིན་རེད། སྤྱིར་ན་དེང་སང་འཛམ་གླིང་འདིའི་སྒང་ནས་རྒྱུགས་ཆུ་ལག་པ་རྒྱབ་ནས་འཐུང་ཆོག་པ་བོད་གངས་ཅན་གྱི་ལྗོངས་ཆུ་བོ་དག་རེད། ཡིན་ཡང་དེ་རིང་གི་ཙོང་ཆུ་འདི་མཐོང་དུས་བོད་གངས་ཅན་ལྗོངས་ཀྱི་ཆུ་བོ་ཚང་མ་ཡང་རྒྱ་ནག་སྲིད་གཞུང་གིས་འབག་བཙོགས་བཟོས་ཚར་ཡོད་པས། ལག་པ་རྒྱབ་སྟེ་འཐུང་ན་འགྲིག་པའི་རྒྱུགས་ཆུ་ཞིག་འཛམ་གླིང་སྟེང་དཀོན་པོ་རེད་ཅེས་གུས་མོས་གནས་ལུགས་སམ་སེམས་གསོ་ལྟ་བུའི་དྲང་བདེན་གྱི་ཚིག་འགའ་བཤད་པ་ཡིན་ཟེར།

མཚམས་འདིར་ཕྲན་གྱིས་ཀྱང་པེ་ཅིན་བུ་མོར་འདི་ལྟར་བཤད་པ་ཡིན། བདེན་པ་རེད། དེང་སང་འཛམ་གླིང་འདིའི་སྟེང་ཆུའི་དཀའ་ངལ་རིམ་གྱིས་འཕྲད་ཡོང་གི་ཡོད། དེ་ཡང་རྒྱ་ནག་ལྟ་བུའི་སྲིད་གཞུང་དག་གིས་ཁོར་ཡུག་ལ་བདག་སྐྱོང་ཡག་པོ་ཞིག་བྱེད་རྒྱུ་ལས་གཏོར་བཤིག་གཏོང་བ་མང་དྲགས་པས་ས་ཁུལ་མང་པོ་ཞིག་ལ་འབྱུང་བཞིའི་གནོད་པ་མང་པོ་འབྱུང་གི་ཡོད། དཔེར་ན་རྒྱ་ནག་ལྟ་བུ་ལ་མཚོན་ན་ལོ་ལྟར་ཆུས་གནོད་སྐྱོན་མང་པོ་ཐེབས་ཏེ། མི་མང་པོའི་ཚེ་སྲོག་དང་སྡོད་གནས་སོགས་ལ་གནོད་སྐྱོན་ཕལ་ཆེར་ལོ་ལྟར་འབྱུང་གི་འདུག་ལབ་ན་མི་འགྲིག་པ་མི་འདུག་སྙམ། འདི་ནི་ང་རང་ཉིད་ཀྱི་བསམ་ཚུལ་ཁོ་ན་ཡིན་པ་ལས་མི་གཞན་གྱིས་ཟེར་སྒྲོས་ཞིག་བསྐྱར་བཟློས་བྱས་པ་མིན་ཅེས་ལབ་ཞོར་རྒྱ་མོ་གཉིས་ཀྱི་གདོང་ལ་གསལ་བོ་ཞིག་བལྟས་པ་ཡིན། ཁོ་མོ་གཉིས་ཀྱི་སེམས་ཁོང་ནས་ཡིན་མིན་མི་ཤེས་ཀྱང་མགོ་བོ་གུག་གུག་བྱས་ཏེ་ཕྲན་ལ་བདེན་ཁ་སྦྱིན་སོང་། ཕྲན་གྱིས་ད་རུང་ཡང་མུ་མཐུད་དེ། པེ་ཅིན་བུ་མོར་ང་ཚོའི་བོད་ཀྱི་སྲོལ་རྒྱུན་ནང་ཁོར་ཡུག་སྲུང་སྐྱོབ་བྱེད་སྟངས་ཞིག་ཡོད་པ་རེད། ངས་ཁྱེད་གཉིས་ལ་བཤད་འདོད་བྱུང་སོང་ལབ་པ་ཡིན། པེ་ཅིན་བུ་མོ་དང་མོའི་ཚ་མོ་གཉིས་ཀྱི་གདོང་ལ་ཧ་ལས་མདོག་གི་འཛུམ་ཞིག་ལངས་ཞོར། དེ་ག་འདྲ་ཞིག་ཡོད་པ་རེད་ཅེས་ཕྲན་ལ་དྲི་བ་འདྲི་སྟངས་ལ་ལྟས་ཚེ་ཉན་འདོད་པ་ཕྲན་གྱིས་ཤེས་སོང་།
ཕྲན་གྱིས་ཁོ་མོ་གཉིས་ལ་འདི་ལྟར་བཤད་པ་ཡིན། སྔོན་མ་ང་རང་བོད་ན་ཡོད་དུས་བོད་ཀྱི་སྲོལ་རྒྱུན་གྱི་ཁོར་ཡུག་སྲུང་སྐྱོབ་བྱེད་སྟངས་ངོས་འཛིན་ཡག་པོ་ཞིག་བྱེད་ཤེས་ཀྱི་མེད། ཡིན་ཡང་ཕྱིས་སུ་རྒྱ་གར་ལ་སླེབས་རྗེས་གནས་ཚུལ་འདྲ་མིན་མཐོང་ཐོས་མང་པོ་བྱུང་རྗེས་བསམ་བློ་དེ་འདྲ་འཁོར་མྱོང་ཡོད། དེ་ནི་གཞན་ཞིག་མ་ཡིན་པར་འཛམ་གླིང་སྟེང་ཁོར་ཡུག་སྲུང་སྐྱོབ་སྐོར་མང་པོ་བཤད་ཀྱི་ཡོད་སྟབས་། རང་གི་རིག་གཞུང་ནང་ཁ་ཕྱིར་འཁོར་ནས་བསམ་བློ་བཏང་པ་ཡིན།

ང་རང་ཆུང་དུས་སུ་བོད་ཀྱི་སྲོལ་རྒྱུན་ནང་འདི་ལྟར་རྒྱུན་ཏུ་བོད་མི་རྒན་རྒོན་ཚོས་བཤད་ཀྱི་ཡོད། རི་བོ་དང་ཆུ་འགྲམ་སོགས་ནས་ས་བརྐོ་རྡོ་སློག་བྱས་ཚེ། ལྷ་དང་ཀླུས་གནོད་པ་བྱེད་ངེས་ཡིན་པས་དེ་འདྲ་མ་བྱེད་ཅེས་དོགས་པ་རྣམ་རྟོག་བསླངས་ཀྱི་ཡོད་པས་མི་ཚང་མས་དེ་ལ་འཛེམས་ཟོན་བྱས་ཏེ། གང་གཟབ་ཀྱིས་ཁོར་ཡུག་དེར་བདག་གཅེས་བྱེད་ཀྱི་ཡོད། ཤིང་ནག་གཅོད་འབྲེག་སོགས་བྱས་ཚེ་ཡང་ཤིང་ནགས་ཡོད་སའི་རི་དེ་གར་གཞི་བདག་ག་གེ་མོ་ཡོད་པས་ཁོ་རང་ཁྲོས་ཏེ་གནོད་པ་བྱེད་ངེས་ཡིན་ཅེས་བཤད་ཀྱི་ཡོད། བོད་མི་ཚོས་ཀྱང་སྲོལ་རྒྱུན་གྱི་བཤད་སྲོལ་དེར་ཡིད་ཆེས་བྱས་ཏེ་ཤིང་ནགས་གཅོད་འབྲེག་བྱེད་མཁན་ཉུང་ཉུང་རེད། མ་ཟད་རྫ་རི་སོགས་སུ་ཡོད་པའི་རི་དྭགས་སོགས་ཀྱང་ལྷ་ག་གེ་མོ་ཞིག་གི་སྒོ་ཟོག་ཡིན་པས་གསོད་མི་ཉན་ཅེས་དུས་རྒྱུན་བཤད་ཅིང་བོད་མི་རྒན་གཞོན་མང་པོ་ཞིག་སྐད་ཆ་དེར་ཡིད་ཆེས་བྱེད་ཀྱི་ཡོད།
གལ་སྲིད་ཤིང་ནགས་གཅོད་དགོས་ཚེ། ཤིང་ནགས་གཅོད་མཁན་གྱི་མི་དེས་གནས་དེར་བསང་གསོལ་བྱས་ཏེ་ཆང་དང་ཁ་བཏགས་སོགས་ཕུལ་ནས་སློང་གི་ཡོད།གཅིག་བྱས་ན་རྨོངས་དད་ཡིན་སྲིད་མོད། འོན་ཀྱང་མི་ཡ་རབས་ཀྱི་བྱེད་སྟངས་ཞིག་རེད་ལབ་ན་འགྲིག་གི་རེད། དེ་རིང་རྗེས་ནས་བོད་པའི་སྲོལ་རྒྱུན་གྱི་བཤད་སྲོལ་དེ་དག་ལ་བསམ་བློ་བཏང་ཚེ། དེ་ནི་དངོས་གནས་ཁོར་ཡུག་སྲུང་སྐྱོབ་བྱེད་པའི་ཐབས་ཡག་ཤོས་ཞིག་རེད་འདོད་ཡོད། ཡིན་ཡང་ཁྱེད་ཀྱི་སྣེ་ཤེན་བུ་མོར་སྐད་ཆ་འདི་དག་བཤད་ན་མོས་རྨོངས་དད་ཀྱི་བྱེད་སྟངས་ཞིག་ལ་ངོས་འཛིན་བྱེད་སྲིད།
རྒྱུ་མཚན་ནི། ང་ཚོ་བོད་རིགས་གཞོན་སྐྱེས་མང་པོ་ཞིག་སློབ་ཆེན་ནང་སླེབས་ཚེ། ལམ་སང་གསར་བརྗེ་ཡི་བསམ་བློ་ཞིག་སླེབས་ནས་རང་གི་སྲོལ་རྒྱུན་རིག་གནས་ལ་རང་གི་མི་རིགས་ཀྱིས་རྒོལ་གྱི་ཡོད། དེ་ནི་སློབ་ཕྲུག་ཚོའི་སྐྱོན་ཆ་ཞིག་མ་ཡིན་པར་དགེ་རྒན་ཚོའི་སྐྱོན་ཆ་ཞིག་རེད། སློབ་ཆེན་གྱི་དགེ་རྒན་མང་པོ་ཞིག་གི་ཀླད་པ་གུང་ཁྲན་ཏང་གིས་གཙང་བཀྲུ་བྱས་ཚར་ཡོད། དགེ་རྒན་དེ་ཚོས་སློབ་གསོའི་ཁ་ཕྱོགས་ནོར་ཡོད་ཀྱང་ཁོ་རང་ཚོས་ད་རུང་ཡང་ནོར་འཁྲུལ་ཞིག་ཏུ་ཁས་མི་ལེན་པར་སྔོན་ཐོན་ཞིག་ཏུ་ངོས་འཛིན་བྱེད་ཀྱི་ཡོད་པ་རེད་ཅེས་ལབ་པ་ཡིན། ཡིན་ཡང་མི་རིགས་ཀྱི་ཞེན་ཁོག་སྔོན་ལས་དེང་སང་ཤུགས་ཆེ་རུ་ཕྱིན་ཡོད། སྐད་ཆ་བཤད་ཞོར་ཕྲན་གྱིས་རྒྱ་རིགས་བུ་མོ་གཉིས་ཀྱི་གདོང་ལ་ཡག་པོ་ཞིག་བལྟས་པ་ཡིན།
ཁོ་རང་གཉིས་ཀྱིས་ཕྲན་ལ་རྣ་བ་གཏད་དེ་ཉན་འདུག་སྟངས་ལ་བལྟས་ན་སྙན་མོ་བྱུང་ཡོད་པ་འདྲ། པེ་ཅིན་བུ་མོའི་གདོང་ལ་འཛུམ་མདངས་བཅོས་མིན་ཞིག་གིས་ཁེངས་ཏེ། དངོས་གནས་དེ་འདྲ་ཞིག་ཡིན་ཚེ་རྗེས་མ་གུས་མོ་ཡང་བསྐྱར་བོད་ལ་འགྲོ་དུས་དེའི་སྐོར་དོ་སྣང་ཡག་པོ་ཞིག་བྱས་ཏེ་སྐད་ཆ་འདྲི་འདོད་བྱུང་ཟེར། མོ་རང་གི་ཚ་མོས་ཀྱང་དེ་འདྲའི་སྐོར་སྐད་ཆ་ཞིབ་འདྲི་བྱས་ཏེ་ཞིབ་འཇུག་ཞིག་བྱེད་ཐུབ་ན་བོད་རིགས་ཙམ་མ་ཡིན་པར་ནང་པའི་ཁོར་ཡུག་སྲུང་སྐྱོབ་ཀྱི་སྡེ་ཚན་རུ་བཞག་ན་འགྲིག་གི་རེད་ཅེས་སྤྲོ་སྣང་ལྡན་པའི་སྒོ་ནས་བཤད་སོང་།

མཚམས་འདིར་པེ་ཅིན་བུ་མོས་ཡང་བསྐྱར་དྲི་བ་ཞིག་འདི་ལྟར་དྲིས་སོང་། དེང་སང་བོད་ནང་གོང་དུ་བཤད་པ་བཞིན་དེ་འདྲའི་སྲོལ་རྒྱུན་གྱི་བཤད་སྲོལ་དེ་ལ་དོན་སྣང་བྱས་ཏེ་ཁོར་ཡུག་ལ་སྲུང་སྐྱོབ་བྱེད་ཀྱི་ཡོད་དམ་ཟེར། དེང་སང་ཡང་ས་ཁུལ་ཁ་ཤས་སུ་དེ་འདྲ་ཡོད་ངེས་རེད། ཡིན་ཡང་ཁྱེད་ཀྱི་སྣེ་ཤེན་བུ་མོས་བཤད་པ་བཞིན། བོད་མི་རིགས་གངས་ཅན་ལྗོངས་དེར་གཞི་ཆགས་པ་ནས་བཟུང་རི་ཆུ་སོགས་སུ་ལག་པ་འཆང་མ་མྱོང་བའི་ས་ཁུལ་མང་པོ་ཞིག་ལ་གུང་ཁྲན་ཏང་གིས་ལུག་པགས་བཤུ་བ་བཞིན་རི་ཆུ་ཆ་ཚང་ནས་གཏེར་ཁ་སྔོགས་འདོན་གྱིས་རྨ་བཏོད་མེད་པའི་རི་ཆུ་ཞིག་ཕལ་ཆེར་དཀོན་པོ་རེད་ལབ་པ་ཡིན། ཕྲན་གྱིས་སྐད་ཆ་འདི་བཤད་ཚར་རྗེས་སུ་ཡིད་ལ་ཞིག་དྲན་སོང་། དེ་ནི་ཁོ་མོ་གཉིས་ལ་ཕོག་ཐུག་འདྲ་སོང་མེད་དམ་སྙམ་ནས་མོ་རང་གི་ཚ་མོ་ལ་ག་ལེར་ཅིག་བལྟས་པ་ཡིན། པེ་ཅིན་བུ་མོའི་ཚ་མོའི་མགོ་བོ་སྒུར་ནས་བསྡད་འདུག་པས་ཅུང་ཟད་འཚེར་སྣང་འདྲ་བྱུང་བ་ཡིན་ནམ། ཡང་ན་སྐྱོ་སྣང་འདྲ་བྱུང་བ་ཡིན་གང་ཡིན་གསལ་བོ་མ་ཤེས་མོད། གང་ལྟར་མོ་རང་གི་མགོ་བོ་སྒུར་ཏེ་ཕྲན་གྱིས་བཤད་པའི་སྐད་ཆ་ལ་ཉན་བཞིན་འདུག་པས། ཕྲན་ཡང་ཅུང་ཟད་འཚེར་སྣང་ལྟ་བུ་ཞིག་བྱུང་སྟེ། ཕྲན་གྱིས་བཤད་པའི་སྐད་ཆ་ནོར་འཁྲུལ་བྱུང་ཡོད་སྲིད་པས་ཁྱེད་རང་གཉིས་ལ་དགོངས་འགལ་མེད་པར་ཞུ་ལབ་པ་ཡིན། ཡིན་ཡང་པེ་ཅིན་བུ་མོས་མ་རེད་མ་རེད། ཁྱེད་ཀྱིས་བཤད་པའི་སྐད་ཆ་བདེན་པ་རེད། རྒྱུ་མཚན་ནི། གུས་མོས་ཟི་ལིང་གྲོང་ཁྱེར་ནས་མཐོང་བའི་འབག་བཙོགས་ཅན་གྱི༼ཙོང་ཆུ༽གུང་ཁྲན་ཏང་གིས་བོད་ཀྱི་ཁོར་ཡུག་ལ་གཏོར་སྐྱོན་བཏང་བའི་འབྲས་བུ་རེད་ཟེར། དེ་མ་ཡིན་པའི་གུས་མོའི་སྣེ་ཤེན་བུ་མོ་དང་ངེད་གཉིས་རྨ་ལྷོ་འགྲོ་བའི་སྐབས་ཀྱང་གནས་ཚུལ་དེ་འདྲའི་རིགས་མང་པོ་མཐོང་སོང་ཟེར།

མཚམས་འདིར་ཕྲན་གྱིས་ཉན་འདོད་ཡོད་པའི་རྨ་ལྷོའི་གནས་ཚུལ་གྱི་ཕྱོགས་སུ་སྐད་ཆའི་ཁ་བསྒྱུར་ཏེ་མོའི་ཡུལ་སྐོར་ཟིན་ཐོའི་མཇུག་ལ་འཐམས་སོང་། གུས་མོའི་སྣེ་ཤེན་བུ་མོ་དང་ངེད་གཉིས་ཟི་ལིང་གྲོང་ཁྱེར་ནས་རླངས་འཁོར་ཆུང་བ་ཞིག་གླས་ཏེ་རྨ་ལྷོར་ཕྱིན་པ་ཡིན། ཟི་ལིང་གྲོང་ཁྱེར་གྱི་ཕྱི་ལོགས་སུ་འབུད་རག་བར་དུ་ལམ་ཁའི་གཞུང་ལམ་རྒྱ་ཆེན་པོ་རེད། གྲོང་ཁྱེར་ཕྱི་ལོགས་སུ་བུད་ཚར་དུས་གཞུང་ལམ་དེ་ཙམ་བདེ་བོ་དང་རྒྱ་ཆེན་པོ་ཞིག་མ་རེད། ཡིན་ཡང་རླངས་འཁོར་གཏོང་མཁན་གྱིས་བཤད་ཚུལ་ལ། སྔོན་མ་ལམ་ཁ་བདེ་བོ་ཡོད་པ་མ་རེད། སྤྱི་སྤྱོད་རླུང་འཁོར་ནང་རྨ་ལྷོ་ནས་ཟི་ལིང་བར་དུ་ཆུ་ཚོད་༥དང་༦བར་འགྲུད་བཞུད་བྱེད་དགོས་ཡོད་པ་རེད་། ཁ་སང་དེ་རིང་ཆུ་ཚོད་༢དང་ཕྱེད་ལྟ་བུ་ཞིག་གིས་སླེབས་ཀྱི་ཡོད་པ་རེད་ཟེར་བས། ཁོ་རང་གིས་བཤད་ཚུལ་དེར་བལྟས་ན་གཞུང་ལམ་བདེ་རུ་བཟོས་པ་དེས་རླུང་འཁོར་གཏོང་མཁན་ཞིག་ལ་མཚོན་ན་སྤྲོ་སྣང་ལྡན་འདུག་སྙམ་སོང་། རྨ་ལྷོར་འགྲོ་སའི་ལམ་བར་ནི་རི་བོ་མང་པོ་བརྒྱུད་ནས་འགྲོ་དགོས་ཀྱི་འདུག་ལ། རི་གཏིང་ནས་ཡར་རི་རྩེ་བར་བལྟས་ཚེ་བོད་ཀྱི་གྲོང་སྡེ་ཐ་ཐོར་ཡང་མཐོང་ཐུབ་ཀྱི་འདུག་པ་མ་ཟད། རི་འདབས་མང་པོ་ཞིག་ན་ཁ་ཆེ་མི་རིགས་ཀྱི་གྲོང་སྡེ་མང་པོ་མཐོང་ཡ་འདུག ད་རུང་ཁོང་ཚོས་བོད་སྐད་གཙང་མ་བཤད་ཀྱི་རེད་ཅེས་ང་ཚོའི་རླུང་འཁོར་གཏོང་མཁན་གྱིས་བཤད་སོང་། རླུང་འཁོར་ཁ་ལོ་བས་བཤད་ན། སྔོན་མ་ཁོང་ཚོ་བོད་རིགས་རང་རེད། རྗེས་ནས་ཁ་ཆེ་ཆོས་ལུགས་སུ་བསྒྱུར་འདུག་པས་བོད་ཀྱི་ནང་ཆོས་བྱེད་མཁན་དང་ཁོང་ཚོའི་བར་འཁོན་འཛིངས་དང་ས་རྩོད་ཀྱི་རྙོག་དྲ་དུས་རྒྱུན་ཡོང་གི་ཡོད་པ་རེད་ཟེར།

མཚམས་འདིར་ཕྲན་གྱིས་ག་ལེར་པེ་ཅིན་བུ་མོའི་ཚ་མོར་ཅིག་བལྟས་པ་ཡིན། མོ་རང་གིས་རྣ་བ་གཏད་ནས་ཉན་བཞིན་ཡོད་པ་མ་ཟད། མོའི་སེམས་ནང་དྲི་བ་འགའ་སླེབས་ཡོད་པ་འདྲ། རྒྱུ་མཚན་ནི། མོས་ཨེ་ཡིན་ན་ཨེ་ཡིན་ན་ཅེས་དོགས་པའི་ཚིག་འདི་ཚར་ཁ་ཤས་བཤད་སོང་། ཡིན་ཡང་མོ་རང་ལ་དྲི་བ་གང་ཞིག་ཡོད་པ་དྲིས་མ་སོང་བས་ཕྲན་གྱིས་ཤེས་འདོད་པའི་མོ་རང་གི་སེམས་ཀྱི་དྲི་བ་དེ་ཕར་སྐད་ཆ་དྲིས་མེད། པེ་ཅིན་བུ་མོའི་མགོ་བོ་མོའི་འགྲམ་གྱི་ཚ་མོའི་ཕྱོགས་སུ་འཁོར་ནས། དེ་བདེན་པ་འདྲ། ང་ཚོའི་ལམ་བར་ནས་བོད་རིགས་སྐྱེ་དམན་འགས་སིལ་ཏོག་ཁམ་བུ་བཙོང་གི་ཡོད་པ་མཐོང་བས། གུས་མོའི་སྣེ་ཤེན་བུ་མོས་རླུང་འཁོར་ཁ་ལོ་བ་ལ་འདིར་ཅུང་ཙམ་འགོག་རོགས་ཟེར་ནས་བསྡད་པ་ཡིན། གུས་མོའི་སྣེ་ཤེན་བུ་མོས་ཁོང་ཚོའི་མཉམ་དུ་སྐད་ཆ་འགའ་བཤད་སོང་། གུས་མོས་ཁོང་ཚོའི་བཙོང་གི་ཡོད་པའི་སིལ་ཏོག་ཁམ་བུ་སྣ་མི་འདྲ་བ་འགའ་ཁྱད་མེད་པར་ཉོས་པ་ཡིན། དངོས་གནས་སིལ་ཏོག་གི་མངར་ཆའི་དྲོ་བ་དེ་རྒྱ་ནང་ན་བཙོང་གི་ཡོད་པ་དང་གཅིག་མཚུངས་མ་རེད། རྒྱ་ནང་དུ་བཙོང་གི་ཡོད་པའི་སིལ་ཏོག་རྣམས་ཕྱི་ཤུན་མཛེས་བོ་ཡོད་ན་ཡང་། ཟ་དུས་བོད་མཐོ་སྒང་ནས་སྐྱེས་བའི་སིལ་ཏོག་ཁམ་བུ་དང་ཁྱད་པར་ཆེན་པོ་འདུག གང་ལྟར་གུས་མོའི་སྣེ་ཤེན་བུ་མོས་ཁོང་ཚོའི་མཉམ་དུ་གླེང་མོལ་ཐུང་ངུ་ཞིག་མ་གཏོགས་བྱས་མེད་མོད། འོན་ཀྱང་གུས་མོས་ཤེས་འདོད་ཀྱིས་མོ་རང་ལ་སྐད་ཆ་དྲིས་པ་ཡིན།

སིལ་ཏོག་བཙོང་མཁན་གྱི་བུ་མོ་ཚོས་བཤད་ཚུལ་ལ། ཁོང་ཚོ་བོད་ཀྱི་གྲོང་སྡེ་འགའ་ཡོད་ན་ཡང་། ཁ་ཆེའི་མི་རིགས་ཀྱི་གྲོང་སྡེ་ང་ཚོ་བོད་ཀྱི་གྲོང་སྡེ་ལས་མང་པོ་རེད་། དེས་རྐྱེན་མི་གྲངས་ཡང་མང་པས་ང་ཚོའི་ཁོང་ཚོའི་འོག་ནས་དཀའ་ངལ་མང་པོ་ཞིག་ལ་བཟོད་སྒོམ་མི་བྱེད་ཐབས་མེད་རེད་ཅེས་གུས་མོའི་སྣེ་ཤེན་བུ་མོས་སྐད་བསྒྱུར་གནང་སོང་། མཚམས་འདིར་གུས་མོས་ཀྱང་དོ་སྣང་ཡག་པོ་བྱས་ཏེ་ཁོང་ཚོའི་གདོང་གི་རྣམ་འགྱུར་ལ་ཅིག་བལྟས་པ་ཡིན། སིལ་ཏོག་བཙོང་མཁན་གྱི་བོད་ཀྱི་བུད་མེད་དེ་ཚོའི་གདོང་ན་འཛུམ་མདངས་ཀྱིས་ཁེངས་ཡོད་ན་ཡང་། ལོ་གཞོན་བུད་མེད་ཚོའི་གདོང་གི་གཉེར་མའི་གསེབ་ན་སྡུག་བསྔལ་མང་པོ་ཞིག་སྦས་ཡོད་པ་གསལ་བོ་རེད། མ་ཟད་ཁོང་ཚོའི་ཕྲུག་གུ་ལོ་༨དང༩ཅན་འགའ་ཁྲིད་འདུག་པས། ངའི་སྣེ་ཤེན་བུ་མོར་གུས་མོས་ཁོང་ཚོར་སྐད་ཆ་འདྲི་འདོད་ཡོད་པས་ཁྱེད་ཚོར་དྲིས་ན་འགྲིག་གི་རེད་དམ་ཁོང་ཚོར་འདྲི་རོགས་ལབ་པ་ཡིན། ཁོང་ཚོས་དེ་འགྲིག་གི་རེད་ང་ཚོས་ཅི་ཡང་ཤེས་ཀྱི་མེད་མོད། ཡིན་ཡང་གང་ཤེས་པ་བཤད་ཆོག་ལབ་འདུག
ཁོང་ཚོའི་བོད་ཀྱི་ཕྲུག་གུ་དེ་ཚོ་བོད་ཡིག་སློབ་སའི་སློབ་གྲྭ་ཞིག་ཡོད་དམ་ཅེས་དྲིས་པ་ཡིན། སིལ་ཏོག་བཙོང་མཁན་གྱི་བོད་ཀྱི་གཞོན་ནུ་མ་དེ་ཚོས་འདི་ལྟར་བཤད་སོང་། ཁོང་ཚོའི་བོད་ཀྱི་ཕྲུག་གུ་ཚོ་ཡང་ཁ་ཆེའི་མི་རིགས་ཀྱི་སློབ་མ་མཉམ་དུ་རྒྱ་ཡིག་སློབ་རྒྱུ་ལས་བོད་ཡིག་བསླབས་སའི་སློབ་གྲྭ་ལོགས་སུ་ཡོད་པ་མ་རེད། མ་ཟད་ཁ་ཆེ་ཕྲུག་གུ་མང་པོ་ཡོད་སྟབས་བོད་ཀྱི་ཕྲུག་གུ་ཚོར་ནམ་རྒྱུན་གཅར་རྡུང་བྱེད་ཀྱི་འདུག་ཟེར་ནས་བོད་ཀྱི་ཕྲུག་གུ་མང་པོ་སློབ་གྲྭར་མ་སོང་བར་ཁྱིམ་ན་ཕ་མ་མཉམ་དུ་་བསྡད་ཡོད་པ་རེད་ཟེར། སྐད་ཆ་འདི་གུས་མོས་ཐོས་མ་ཐག་སེམས་ཤིན་ཏུ་སྐྱོ་ནས་ཅི་ཞིག་བཤད་དགོས་པ་ཡང་མ་ཤེས་བར་ཡུན་ཙམ་ཞིག་ལ་བསམ་བློ་གཏོང་དགོས་བྱུང་སོང་།

མཚམས་འདིར་ཕྲན་གྱིས་པེ་ཅིན་བུ་མོའི་ཚ་མོར་ཅིག་ལྟས་པ་ཡིན། མོ་རང་ཡང་སྔོན་མ་ལས་ཡིད་ཆེས་ཅུང་ཟད་བྱུང་ཡོད་པ་འདྲ་སྙམ། ཚ་མོ་དེས་བོད་དང་ཁ་ཆེ་གཉིས་ཀྱི་གྲོང་པ་འདྲེས་ཡོད་ས་དེར་ལུང་པ་ཁུག་ཀྱོག་ཆུང་ཆུང་དེ་འདྲ་རེད་དམ་ཅེས་པེ་ཅིན་བུ་མོར་དྲི་བ་ཞིག་བཏང་སོང་། པེ་ཅིན་བུ་མོས་ཀྱང་མགོ་བོ་ནང་དུ་གུག་གུག་བྱེད་ཞོར་རེད་རེད། ལུང་པ་ཁུག་ཀྱོག་དེ་འདྲ་རེད། ཡིན་ན་ཡང་ཞིང་ས་ཡག་པོ་ཡོད་ས་རེད་བསམ་སོང་ཅེས་མོའི་ཚ་མོར་ལན་བཏབ་རྗེས།
མོས་མུ་མཐུད་ནས་གང་ཞིག་མཐོང་བ་འདི་ལྟར་བཤད་སོང་། གཞུང་ལམ་གྱི་གཡས་གཡོན་དེ་ཙམ་ཐག་རིང་པོ་མེད་པའི་སར་གྲོང་ཁྱིམ་ཐ་ཐོར་མཐོང་ཐུབ་ཀྱི་འདུག་སྟེ། ཁང་ཁྱིམ་མང་པོ་ཞིག་གི་སྟེང་དར་ལྕོག་ལྷབ་ལྷབ་ཏུ་གཡོ་བ་དེས་བོད་པའི་ཁྱིམ་ཚང་ཕལ་ཆེར་ངོས་འཛིན་བྱེད་ཐུབ་ཀྱི་འདུག གལ་སྲིད་བོད་པའི་རིག་གཞུང་གོམས་སྲོལ་ལ་དོ་སྣང་བྱེད་མཁན་ཞིག་ཡིན་ཚེ། བོད་རིགས་ཚོས་བསམ་བཞིན་རང་གི་ས་ཆར་རྟགས་བརྒྱབ་པ་མིན་ན་ཡང་། ཕ་མེས་ནས་བརྒྱུད་པའི་རིག་གཞུང་གོམས་སྲོལ་གྱིས་རི་རྩེ་ལ་དར་ལྕོག་དང་ལབ་རྩེ་བརྩིགས་པ། ཡང་ན་རྡོ་རིལ་ཆུང་ཆུང་མང་པོ་སྤུངས་ཏེ་རང་གི་ས་ཆར་བདག་འཛིན་དང་རྟགས་གསལ་བོ་བརྒྱབ་འདུག་ཟེར།
མཚམས་འདིར་ཕྲན་གྱི་སེམས་སུ་ཡང་། ཕ་ཡུལ་གྱི་རི་མཐོ་ས་དང་ས་ཆ་བཙན་ས་དེ་འདྲ་ལ་དར་ལྕོག་བཙུགས་པ་དང་རྡོ་འབུམ་སྤུངས་པ་སོགས་ནི། ང་ཚོའི་བོད་མི་ཚོས་གཞི་བདག་ག་གེ་མོའི་གནས་ཞིག་ཡིན་ཚུལ་དང་། ལྷ་ཀླུ་ག་གེ་མོ་ཞིག་གནས་ཡོད་ཚུལ་བཤད་ཀྱི་ཡོད་པ་ལས། རང་གི་ས་ཆ་ལ་བདག་འཛིན་བྱེད་ཀྱི་ཡོད་པ་ཞིག་ལ་ངོས་འཛིན་བྱེད་ཀྱི་མེད་སྙམ། ཡིན་ཡང་དེ་རིང་པེ་ཅིན་བུ་མོས་ཆབ་སྲིད་ཀྱི་ཕྱོགས་ནས་ངོས་འཛིན་བྱས་དུས་དེ་ཡང་གནས་ལུགས་ལྡན་པའི་ཆབ་སྲིད་ཀྱི་སྐད་ཆ་ཞིག་རེད་བསམ། མ་ཟད་ལོ་མང་པོའི་སྔོན་ཞིག་ལ་མདོ་སྨད་སྤྱི་ཟུར་དམ་པ་སྒོ་མང་བསྟན་པ་ཕ་ཡུལ་ལ་ཕྱིན་ཏེ། རེབ་གོང་ཨ་ཁུ་བློ་བཟང་ལ་ཡེ་ལ་ཐུག་འཕྲད་བྱས་བའི་ལོ་རྒྱུས་ཞིག་ཐོས་མྱོང་ཡོད། དེ་ནི་རེབ་གོང་ཨ་ཁུ་བློ་བཟང་ལ་ཡེ་ཡིས་ཁོང་ལ་འདི་ལྟར་གསུངས་འདུག ཁྱོད་རང་གིས་བོད་ཀྱི་ས་མཚམས་ཆུ་མཚམས་ཡག་པོ་ཞིག་མི་ཤེས་སྟབས། ཁྱེད་ཀྱིས་བོད་ཀྱི་ས་ཆ་ངོས་འཛིན་བྱེད་ཐུབ་དཀའ། ཡིན་ན་ཡང་རི་བོ་མང་པོའི་རྩེ་ན་ང་རང་ཡང་བོད་པ་ཡིན་འདིར་ཕེབས་ཤོག་ཟེར་ནས་ཁྱེད་ལ་ལག་བརྡ་གཏོང་མཁན་མང་པོ་མཐོང་གི་རེད། དེ་དག་ཚང་མ་བོད་པ་རང་ཡིན་ཅེས་གསུངས་སོང་ཟེར་བའི་གཏམ་རྒྱུད་ཞིག་ཐོས་མྱོང་ཡོད། དེ་རིང་དངོས་གནས་པེ་ཅིན་བུ་མོས་སྐད་ཆ་འདིས་ང་རང་ལ་བསམ་བློ་གཏོང་རྒྱུ་ཡོད་པ་ཞིག་དང་། སྔོན་མའི་ཕ་མེས་ཡང་མེས་ཚོའི་བསམ་བློ་ཡང་རྒྱ་ཆེན་པོ་ཞིག་ཡིན་པ་ཚོར་སོང་མོད། ཡིན་ཡང་ཕྲན་གྱིས་གང་བསམ་པ་དེ་ཁོ་མོ་གཉིས་ལ་ཅི་ཡང་མ་བཤད་པར་མོས་གཏམ་རྒྱུད་ལ་མུ་མཐུད་ནས་ཉན་པ་ཡིན།

པེ་ཅིན་བུ་མོས་མུ་མཐུད་ནས་བཤད་རྒྱུར། ང་ཚོ་ཡང་བསྐྱར་རླུང་འཁོར་ནང་བསྡད་དེ་རྨ་ལྷོའི་ཕྱོགས་སུ་བསྐྱོད་པ་ཡིན། མཚམས་ཞིག་ནས་གཙང་བོ་ཞིག་གི་འགྲམ་བརྒྱུད་ནས་འགྲོ་དགོས་ཀྱི་འདུག་པས། གུས་མོའི་སྣེ་ཤེན་བུ་མོ་ལ་གཙང་བོ་འདིའི་མིང་ལ་ག་རེ་ཟེར་གྱི་ཡོད་པ་རེད་ཅེས་མོ་ལ་དྲིས་པ་ཡིན། ངའི་སྣེ་ཤེན་བུ་མོས་གཙང་བོ་འདི་རྨ་ཆུ་རེད་ཟེར། རླུང་འཁོར་གཏོང་མཁན་གྱིས་ཀྱང་གུས་མོའི་དྲི་བ་དེ་ལན་འདེབས་གནང་ཞོར་འདི་ལྟར་བཤད་སོང་། སྔོན་མ་རྨ་ཆུ་ཆེན་པོ་ཞེ་དྲག་བཞུར་གྱི་ཡོད་པ་རེད། ཁྱེད་ཀྱིས་ལྟོས་དང་རྨ་ཆུའི་ཆུ་གཞུང་རྒྱས་བའི་སྐབས་ཀྱི་རྟགས་མཚམས་གསལ་བོ་ཡོད་། གུས་མོས་ཀྱང་རྨ་ཆུ་བཞུར་སའི་ལུང་གཞུང་གི་བྲག་ཐེམ་ངོས་སུ་གསལ་བོ་ལྟས་པ་ཡིན། དངོས་གནས་རྨ་ཆུ་རྒྱས་བའི་སྐབས་ཀྱི་རྟགས་གསལ་བོ་བྲག་ངོས་སུ་འདུག་མོད། ཡིན་ཡང་དེང་སང་སྔོན་མ་རྨ་ཆུ་བྲག་ཐེམ་ངོས་ཀྱི་རྟགས་མཚམས་འདི་བར་དུ་ཡོད་པ་རེད་ཟེར་བ་ཙམ་མ་གཏོགས་མི་རབས་རྗེས་མ་སུ་ཞིག་ཡིད་ཆེས་བྱེད་ཐུབ་བམ་ཟེར། གུས་མོས་རླུང་འཁོར་གཏོང་མཁན་ལ་རྨ་ཆུ་འདི་འདྲའི་ཆུང་རུ་འགྲོ་དགོས་བའི་རྒྱུ་མཚན་ཅི་རེད་ཅེས་དྲིས་པ་ཡིན། ཁོས་རྨ་ཆུ་རྒྱལ་ཁབ་གཞུང་གིས་ས་གནས་མང་པོ་ནས་ཆུ་མཛོད་བསྐྱིལ་དེ་གློག་ཁང་མང་པོ་བཙུགས་པ་ཡོད་པ་རེད་ཟེར་ཞོར་ང་ཚོའི་མདུན་ཕྱོགས་ཀྱི་ཆུ་མཛོད་ཆུང་ཆུང་ཁ་ཤས་ཞིག་བསྟན་སོང་། རླུང་འཁོར་གཏོང་མཁན་གྱིས་མུ་མཐུད་ནས། དེང་སང་ས་གནས་ལས་བྱེད་འགོ་ཁྲིད་ལ་འབྲེལ་བ་ཡག་པོ་ཡོད་མཁན་ཞིག་ཡིན་ཚེ། འདི་འདྲའི་ཆུ་གློག་འཛུག་སྐྲུན་སོགས་ཀྱི་ལས་འཆར་དང་འབྲེལ་དངུལ་མང་པོ་བཟོ་ཐུབ་ཀྱི་ཡོད་པ་རེད། གལ་སྲིད་འཛུགས་སྐྲུན་དེ་ཆ་ཚང་ཞིག་ལེགས་འགྲུབ་མ་བྱུང་ན་ཡང་ལས་གནས་འགོ་ཁྲིད་དང་ཁོང་ཚོའི་འབྲེལ་ཡོད་ཀྱི་མི་ལ་དགོས་བའི་དངུལ་རེག་ཐུབ་ཀྱི་ཡོད།
གལ་སྲིད་ང་རང་ལྟ་བུ་གཞུང་གི་འགོ་ཁྲིད་ལ་འབྲེལ་བ་བྱེད་མི་ཐུབ་པའི་མི་དམངས་ཚོའི་འདི་འདྲའི་འཁོར་གླ་ལྟ་བུ་དང་། ལུས་ཤུགས་ཁོ་ན་ལ་རྟེན་ནས་འཚོ་བ་བསྐྱལ་དགོས་ཀྱི་ཡོད་པ་རེད་ཅེས་ངའི་སྣེ་ཤེན་བུ་མོ་དང་ངེད་གཉིས་ལ་རྒྱ་སྐད་སྟབས་བདེ་མོ་ཞིག་གིས་བཤད་སོང་། ཁོས་ད་རུང་མུ་མཐུད་ནས་དབུགས་རིང་ཞིག་གཏོང་ཞོར་འདི་ལྟར་ཡིད་ཐང་ཆད་པའི་གཏམ་རྒྱུད་ཞིག་གི་འགོ་བརྩམས་སོང་། གལ་སྲིད་ཁྱེད་རང་གཞུང་གི་ལས་བྱེད་ཞིག་ཡིན་ན་ཡང་། འགོ་ཁྲིད་ལ་འདུག་འདོད་ཡོད་ཚེ་ཡང་ན་དངུལ་མང་པོས་འགྲོ་གྲོན་གཏོང་དགོས་ཀྱི་རེད། དེ་མིན་ཁྱོ་ག་རང་གི་ཆུང་མ་མཛེས་མ་དང་གཡོ་སྒྱུ་མཁས་བོ་ཞིག་ཡིན་ཚེ་མི་རྒྱུ་གཉིས་ཀ་བཀོལ་ནས་འགོ་ཁྲིད་ཀྱི་ཐོབ་གོ་གནས་ཉོ་གི་རེད། དེ་མིན་ལས་ཀ་དྲང་བདེན་གྱི་ལམ་ནས་ཐོབ་གོ་གནས་ཞིག་རེག་ཐུབ་མེད་ཟེར། འདི་འདྲའི་མི་གཡོ་སྒྱུ་ཅན་དང་ཁྲམ་པའི་རིགས་ཀྱི་བར་ནས་ལས་བྱེད་འགོ་ཁྲིད་ཀྱི་ཐོབ་གོ་གནས་ཕར་བཙོང་ཚུར་ཉོ་བྱེད་ཀྱི་ཡོད་པས། བར་མཚམས་ནས་མི་སེར་དཀྱུས་མ་ཚོའི་སྡུག་བསྔལ་མང་པོ་མྱང་གི་ཡོད་པ་རེད་ཅེས་སེམས་སྐྱོ་བཞིན་བཤད་སོང་ཟེར། སྐད་ཆའི་བཤད་མཚམས་འདིར་གུས་མོའི་སྣེ་ཤེན་བུ་མོས་ཁོ་ལ་དགོད་གཏམ་ཞིག་བཤད་སོང་བས་ང་ཚོ་ཆ་ཚང་རླུང་འཁོར་བཀག་སྟེ་གད་མོ་བྲོ་ཁོག་ན་བར་གད་པ་ཡིན་ཟེར། མཚམས་འདིར་མོ་རང་གི་ཚ་མོས་ཁྱེད་ཀྱི་གྲོགས་མོས་ག་རེ་བཤད་སོང་ཅེས་འཛུམ་མདངས་ཞིག་ལངས་ཞོར་དྲིས་སོང་།

པེ་ཅིན་བུ་མོའི་གདོང་ལ་འགོག་ཐབས་བྲལ་བའི་འཛུམ་མདངས་ཞིག་ལང་ཞོར་འདི་ལྟར་བཤད་སོང་། གུས་མོའི་སྣེ་ཤེན་བུ་མོས་རླུང་འཁོར་གཏོང་མཁན་གྱི་རྒྱབ་ལ་ལག་པས་རྡབ་ཞོར། དེ་ལྟར་ཡིན་ན་མོ་རང་གི་གདོང་གི་སྐྱི་པགས་འདི་སྨན་ཁང་ཞིག་ནས་བཟོ་བཅོས་རྒྱབ་སྟེ་ཐོབ་གོ་གནས་ཞིག་ཉོ་གི་ཡིན། དེ་མིན་ང་རང་ལ་དངུལ་ཡང་མེད་ལ་ལས་བྱེད་འགོ་ཁྲིད་བུ་ཚོའི་སེམས་འགུག་ཐུབ་པའི་མཛེས་ཉམས་དང་གཡོ་འཁྲུལ་གྱི་ཚིག་ཀྱང་བཤད་མི་ཤེས་ཟེར་བས་ང་ཚོ་གད་མོ་ཤོར་བ་རེད་ཟེར། པེ་ཅིན་བུ་མོའི་ཚ་མོ་ཡང་མཚམས་འདིར་གད་མོ་ཤུགས་ཆེན་པོ་ཞིག་ཤོར་ནས་ཇ་ཁང་ནང་གི་མགྲོན་པོ་ཚོས་ཡང་བསྐྱར་ང་ཚོར་བལྟ་དགོས་བ་ཞིག་བཟོས་སོང་། ཡིན་ན་ཡང་ཕྲན་གྱི་སེམས་སུ་འདི་འདྲ་ཞིག་དྲན་སོང་། དེང་སང་བོད་ནང་གི་བོད་མི་ཚོ་ཡང་རྒྱ་ནག་གི་མི་བཞིན་སེམས་སུ་ན་ཚ་ཆེན་པོ་ཞིག་ཕོག་འདུག་སྙམ། ན་ཚ་དེ་ནི་མིའི་བར་གྱི་བརྩེ་བ་ཆ་ཚང་བོར་བརླག་ཏུ་ཕྱིན་ཏེ། མི་དང་མིའི་བར་གྱི་བརྩེ་བ་རྒྱུ་ནོར་གྱི་སྟེང་ལ་ཆགས་པའི་ན་ཚ་ཞིག་རེད། ན་ཚ་འདིས་ཕ་མ་དང་སྤུན་ཟླ་བཟའ་ཟླ་སོགས་ཀྱི་བར་ལ་ཡང་བདེ་སྐྱིད་མེད་པར་སྡུག་བསྔལ་ཞིག་མགོ་བསླངས་ཡོད་ངེས་ཡིན་སྙམ།
སྔོན་མ་དཔལ་འབྱོར་སྐྱོ་བའི་སྐབས་མི་དང་མིའི་བར་བརྩེ་འདངས་ཟབ་མོ་ཞིག་ཡོད་ལ། དཔལ་འབྱོར་གྱི་འགྲན་བསྡུར་དང་ཐོབ་གོ་གནས་ལ་དམིགས་ནས་མགོ་སྐོར་གཏོང་མཁན་ཡང་ཉུང་ངུ་ལས་མེད། དེང་སང་གོང་དུ་རླུང་འཁོར་གཏོང་མཁན་གྱིས་བཤད་པའི་གླེང་མོལ་འདིས། ཕྲན་གྱི་སེམས་ནང་ཕ་ཡུལ་ནས་ཀྱང་མིའི་བར་གྱི་བརྩེ་འདངས་ཟབ་མོ་དེ་རེག་ཐུབ་དཀའ་བ་ཞིག་ཡིན་པ་ཤེས་སོང་བས། སེམས་ནང་སྐྱོ་སྣང་ཆེན་པོ་ཞིག་བྱུང་སོང་མོད་། འོན་ཀྱང་ཕྲན་གྱི་གླེང་མོལ་བྱེད་རོགས་རྒྱ་རིགས་བུ་མོ་གཉིས་ལ་ངའི་སེམས་ཀྱི་ཚོར་སྣང་ཅི་ཡང་བཤད་མེད།

ད་རུང་ཕྲན་གྱི་སེམས་སུ་དེང་སང་འཛམ་གླིང་འདིའི་སྟེང་ཆེས་ཤིན་ཏུ་དཀའ་ངལ་ཆེ་ཤོས་ཞིག་ཡོད། དེ་ནི་མི་དང་མིའི་བར་ལ་བརྩེ་བ་མེད་པར་ཕན་ཚུན་གྱི་ཡིད་ཆེས་བྱེད་སའི་མི་ཞིག་རྙེད་མ་ཐུབ་པར་རྙོག་འཛིངས་དུས་རྒྱུན་ཡོང་གི་ཡོད། ཡོ་རུབ་དང་ཨ་རི་སོགས་ཀྱི་མི་ཚོས་བོད་མི་ཚོའི་སེམས་ཀྱི་རྟེན་ས་ནང་ཆོས་འདིའི་རྐྱེན་གྱིས་ཁོང་ཚོ་དཀའ་ངལ་ཅི་ཙམ་ཡོད་ན་ཡང་། བདེ་སྐྱིད་དངོས་གནས་སེམས་ཀྱི་མྱོང་བ་དེ་རོལ་ཐུབ་ཀྱི་ཡོད་པ་རེད་ཅེས་ཚན་རིག་པ་མང་པོ་གཙོ་བྱས་ཏེ་བཤད་ཀྱི་ཡོད། ཐབས་སྐྱོ་བ་ཞིག་ལ། དེ་རིང་གི་གནས་ཚུལ་འདིས་བོད་མི་ཚོའི་སེམས་རྟེན་ས་དེ་དངུལ་གྱི་ངོ་བོར་འགྱུར་འདུག་པས། དངུལ་ཚར་བའི་ཉིན་མོ་བརྩེ་བ་ཡང་ཡལ་བ་རེད་སྙམ་པའི་བསམ་བློའི་ཀློངས་སུ་འཁྱམས་པའི་སྐབས་དེར། ་པེ་ཅིན་བུ་མོའི་ཚ་མོས་ཕྲན་ལ་ཁྱེད་ཀྱིས་མོའི་ཨ་ཅེ་གདོང་པ་ལ་ཅེར་ནས་མ་འདུག་ཅེས་དགོད་གཏམ་ཞིག་གིས་ང་རང་བསམ་བློའི་ཀློང་ནས་ཕྱིར་དྲངས་སོང་། ང་རང་ཡང་ཅུང་ཟད་ངོ་ཚ་ཞིག་གིས་འགྲེལ་བཤད་ཐུང་ངུ་རྒྱག་འདོད་བྱུང་མོད། འོན་ཀྱང་པེ་ཅིན་བུ་མོས་མོ་རང་གི་ཚ་མོ་ལ་ལག་པས་གཞུས་ཏེ། དེ་འདྲ་མ་བཤད་རོགས་ཟེར་ཞོར་ཕྲན་གྱི་གདོང་ལ་མོས་མིག་ཤེལ་དཀར་བོ་དེའི་འོག་ནས་ག་ལེར་བལྟ་ཙམ་བྱས་སོང་བ་ཕྲན་གྱིས་དོ་སྣང་ཡག་པོ་ཞིག་བྱུང་། ཕྲན་གྱིས་ཀྱང་དགོད་གཏམ་དང་འདྲེས་མའི་དེ་རིང་གི་ཡུལ་སྐོར་ཟིན་ཐོའི་གླེང་མོལ་དང་། ཁྱེད་གཉིས་ཀྱི་ཉམས་འགྱུར་སྙིང་རྗེ་བོ་དེས་ངའི་སེམས་ཡོངས་སུ་འཕྲོག་སོང་ལབ་པ་ཡིན། པེ་ཅིན་བུ་མོའི་ཚ་མོས་ཕྲན་ལ་ཁྱེད་ངེད་གཉིས་ཀ་ལ་སེམས་པ་ཤོར་བ་ཨེ་རེད་ཟེར་བས་ང་ཚོ་ཆ་ཚང་གི་དགོད་སྒྲས་ཇ་ཁང་ནང་ཁེངས་སོང་།

དྲང་མོ་བཤད་ན་ངའི་ཕ་ཡུལ་གྱི་ཡུལ་མི་ཚོས་བྱ་སྤྱོད་དེས་ང་རང་བསམ་གཞིགས་ཀྱི་ཀློངས་སུ་མི་འདོད་བཞིན་དུ་ཁྲིད་སོང་། འོན་ཀྱང་ཕ་ཡུལ་གྱི་གནས་ཚུལ་འགྱུར་ལྡོག་འདི་ལ་ཕྲན་ལྟ་བུ་ནུས་མེད་ཞིག་གིས་ཅི་ཞིག་བྱེད་ཐུབ་བམ་བསམ། གང་ལྟར་ཕྲན་གྱིས་མུ་མཐུད་ནས་པེ་ཅིན་བུ་མོས་གླེང་མོལ་ལ་ཉན་པ་ཡིན། པེ་ཅིན་བུ་མོའི་གདོང་ལ་ཡིད་དབང་འཕྲོག་པའི་འཛུམ་མདངས་ཞིག་ལང་ཞོར་འདི་ལྟར་མཇུག་མཐུད་སོང་། གང་ལྟར་ང་ཚོའི་རླུང་འཁོར་གཏོང་མཁན་གྱིས་མུ་མཐུད་ནས་ལོ་མང་པོ་ཞིག་གི་ཡར་སྔོན་ནས་རྨ་ཆུ་བཀག་སྟེ་ཆུ་མཛོད་ཆེན་པོ་ཞིག་སྐྱིལ་ཡོད། དེའི་མིང་ལ་ལིས་ཅྰ་ཞྰ་ཟེར་གི་ཡོད་ཕལ་ཆེར་དེ་ཁྱེད་གཉིས་ཀྱིས་ཤེས་གསལ་རེད། དེས་རྐྱེན་མཐའ་འཁོར་གྱི་བོད་ཀྱི་གྲོང་སྡེ་མང་པོ་མི་འདོད་བཞིན་དུ་ས་གནས་གཞན་ལ་གནས་སྤོར་བྱེད་དགོས་བྱུང་ཡོད་པ་ཟེར། ཆུ་མཛོད་ཆེན་པོ་དེ་སྐྱིལ་ནས་གློག་བཙོང་བའི་ཡོང་སྒོ་ཅུང་ཟད་ཙམ་ཡང་དེའི་མཐའ་འཁོར་གྱི་བོད་ཀྱི་གྲོང་སྡེ་ཡི་མི་རྣམས་ལ་རེག་ཐུབ་མེད་ཟེར། མཚམས་འདིར་གུས་མོས་ཀྱང་རླུང་འཁོར་ནང་གི་ཤེལ་སྒོ་ཆུང་ཆུང་དེའི་ནང་ནས་ང་ཚོའི་རླུང་འཁོར་གཏོང་མཁན་གྱི་གདོང་པ་མཐོང་ཐུབ་ཀྱི་འདུག་པས། ཁོའི་གདོང་ན་ཁོང་ཁྲོ་དང་སྐྱོ་ཉམས་འདྲེས་མ་ཞིག་གིས་ཡོངས་སུ་གཉེར་མ་འགའ་མིག་ཟུང་བར་ན་བསྡུས་ཡོད་པ་མཐོང་སོང་།
མཚམས་འདིར་གུས་མོའི་སེམས་སུ་འཁོར་གླའི་ལས་ཀ་བྱེད་མཁན་གྱི་མི་སེར་དཀྱུས་མ་ཞིག་ཡིན་ཡང་གནས་ཚུལ་ཆ་ཚང་གསལ་བོ་རྟོགས་ཡོད་པས། བོད་རིགས་ཡོངས་ཀྱི་སེམས་སུ་གུང་ཁྲན་ཏང་གིས་བརྗེད་མི་ཐུབ་པའི་རྨ་ཆེན་པོ་ཞིག་བཟོས་ཡོད་པ་གསལ་བོ་རེད་སྙམ་སོང་། ཡིན་ཡང་གུས་མོས་རླུང་འཁོར་གཏོང་མཁན་དང་གུས་མོའི་སྣེ་ཤེན་བུ་མོ་གཉིས་ལ་གུས་མོའི་གང་ཞིག་ཡིད་ལ་དྲན་པ་མ་བཤད་པར་རླུང་འཁོར་གཏོང་མཁན་ལ་དྲི་བ་ཞིག་དྲིས་པ་ཡིན།
བོད་རིགས་གྲོང་སྡེ་དེ་ཚོ་དེང་སང་གང་དུ་གནས་སྤོར་བྱས་ཡོད་པ་རེད་ཅེས་དྲིས་པ་ཡིན། དེང་སང་མི་ཚང་བཞི་བརྒྱ་ཙམ་རེབ་གོང་ཐོ་རྒྱ་༼རྒྱ་སྡེ༽ཟེར་བའི་གྲོང་སྡེ་ཞིག་ཡོད་པ་རེད། ཁོང་ཚོ་དེར་གནས་སྤོར་བྱས་ཡོད། སྔོན་མ་དེ་གར་རྒྱ་རིགས་ཀྱི་གྲོང་སྡེ་ཞིག་ཡོད། དེང་སང་རྒྱ་རིགས་ཚོས་ས་ཞིང་དང་ཁང་པ་ཚང་མ་བཞག་སྟེ་ཁུལ་ཐོག་ན་བསྡད་ཡོད་པས་དེའི་གྲོང་སྡེ་ནང་གནས་སྤོར་བྱས་ཏེ་ཡོད་ཟེར། ང་ཚོ་ཐོ་རྒྱའི་གྲོང་སྡེ་བརྒྱུད་ནས་འགྲོ་རྒྱུ་ཡིན་དེ་དུས་ངས་ཁྱེད་གཉིས་ལ་བསྟན་ཆོག་ཟེར། དེ་མ་ཡིན་པའི་རྩེ་ཁོག་གི་འབྲོག་པ་མང་པོ་ལ་ཡང་ནོར་ལུག་ཚང་མ་སྲིད་གཞུང་གིས་གཡོ་ཐབས་དང་བཙན་དབང་གཉིས་བཀོལ་གྱིས་བཙོང་གི་བཅུགས་ཏེ་ཁུལ་ཐོག་ཏུ་གནས་སྤོར་བྱེད་དུ་བཅུགས་ཡོད། ཁོང་ཚོར་འཕྲད་སེལ་རིང་སྲིད་གཞུང་གིས་འཚོ་ཐབས་ལ་དངུལ་ཅུང་ཟད་རེ་སྤྲད་ཀྱི་ཡོད། ཡིན་ན་ཡང་དངུལ་དེ་དག་དུས་ཡུན་གང་མཚམས་ཞིག་ནས་སྲིད་གཞུང་གིས་གཅོད་ངེས་ཡིན་པ་ཐག་གིས་ཆོད། དེ་དུས་འབྲོག་པ་དེ་ཚོས་འཚོ་བ་ག་འདྲ་བྱས་ཏེ་བསྐྱལ་དགོས་མིན་ང་ཚོ་ཆ་ཚང་གིས་རྟོགས་ཐུབ། ད་ལྟ་ནས་འབྲོག་པ་མང་པོ་ཞིག་ལ་འཚོ་བའི་དཀའ་ངལ་འཕྲད་བཞིན་རེད་ཟེར།

མཚམས་འདིར་གུས་མོའི་སེམས་སུ་རྒྱུ་མཚན་གང་ཞིག་ལ་བརྟེན་ནས་འབྲོག་པའི་རྩྭ་ཐང་ནས། གྲོང་ཁྱེར་ནང་བཙན་འདེད་བྱེད་དགོས་དོན་ཅི་ཡིན་ནམ་སྙམ་སོང་མོད། ཡིན་ཡང་ཁོ་ལ་སྐད་ཆ་འདྲི་ཁོམ་བྱུང་མ་སོང་། དེ་རིང་ཡང་ད་རུང་གུས་མོས་རྒྱུ་མཚན་གསལ་བོ་ཞིག་རྙེད་ཐུབ་ཀྱི་མི་འདུག་ཟེར། མཚམས་འདིར་ཕྲན་གྱིས་ཀྱང་པེ་ཅིན་བུ་མོར། ངས་ཀྱང་དེ་འདྲའི་གནས་ཚུལ་ཞིག་ཡོ་རུབ་དང་ཨ་རིའི་འགྲོ་བ་མིའི་ཐོབ་ཐང་ཚོགས་པའི་གཏམ་བཤད་ཞིག་མཐོང་སོང་བས་དེ་བདེན་པ་ཡིན་པ་འདྲ་ལབ་པ་ཡིན། མ་ཟད་རྒྱ་གཞུང་གིས་བོད་ཀྱི་འབྲོག་པ་ཚོ་གྲོང་ཁྱེར་ནང་བཙན་འདེད་བྱེད་དོན་ནི། ཕལ་ཆེར་རྒྱ་མི་རིགས་སུ་བསྒྱུར་འདོད་པ་དེ་མིན་ནམ་སྙམ། ཡིན་ཡང་ཁྱེད་ཀྱིས་མཚོ་སྔོན་པོའི་འགྲམ་ནས་ཁྱེད་ཀྱི་སྣེ་ཤེན་བུ་མོས་བསང་གསོལ་བྱེད་སྟངས་མཐོང་ནས་གསུངས་པ་བཞིན། མི་ཡི་སེམས་པ་བསྒྱུར་མ་ཐུབ་ཚེ་ཆ་ལུགས་ཁོ་ནས་བསྒྱུར་ཐུབ་མེད་པ་རེད། འོན་ཀྱང་བོད་ཀྱི་སྐད་ཡིག་འདི་བསྒྱུར་ཚར་དུས་རང་བཞིན་གྱིས་རྒྱ་རིགས་སུ་འགྱུར་བའི་ཉེན་ཁ་ཆེན་པོ་རེད་ལབ་པ་ཡིན། པེ་ཅིན་བུ་མོའི་ཚ་མོས་མགོ་བོ་ནང་དུ་གུག་གུག་བྱེད་ཞོར། གུང་ཁྲན་ཏང་གིས་ལོ་ངོ་ལྔ་བཅུའི་རིང་མེ་མདས་བོད་རིགས་དང་དེ་མ་ཡིན་པའི་གྲངས་ཉུང་མི་རིགས་མང་པོ་རྒྱ་རིགས་སུ་བསྒྱུར་ཐབས་ལ་འབད་པ་རེད། ཡིན་ཡང་མང་པོ་ཞིག་གི་སེམས་སུ་རྨ་ཁ་ཆེན་པོ་བཟོས་ཏེ་ད་དུང་མཁྲེགས་པོ་རུ་གྱུར་ཡོད། ཡིན་ན་ཡང་ནང་སོག་མང་པོ་ཞིག་གིས་རྒྱ་སྐད་མ་གཏོགས་སོག་སྐད་མི་ཤེས་མཁན་མང་པོ་རེད་ཅེས་དཔེ་མཚོན་ལྟ་བུ་ཞིག་བཤད་སོང་། མཚམས་འདིར་པེ་ཅིན་བུ་མོས་ནང་སོག་ཚོ་འགོ་ཁྲིད་མཁན་ཡག་པོ་ཞིག་མེད་པའི་ཐོག་རྒྱ་ནག་གི་མི་སེར་སྤེལ་ཡུལ་དུ་གྱུར་ནས་ལོ་ངོ་མང་པོ་རེད་ཅེས་འགྲེལ་བཤད་སྟབས་བདེ་ཞིག་གནང་ཞོར། མོ་རང་གི་ཡུལ་སྐོར་ཟིན་ཐོའི་མཇུག་མཐུད་སོང་།

གང་ལྟར་དེའི་རྒྱུ་མཚན་འདྲི་ལོང་མ་བྱུང་བར་རླུང་འཁོར་གཏོང་མཁན་དང་གླེང་མོལ་བྱེད་ཞོར། རླུང་འཁོར་གཏོང་མཁན་གྱིས་རེབ་གོང་ཐོ་རྒྱ་ལ་སླེབས་སོང་ཟེར་བར་དུ། རེབ་གོང་ས་ཐོག་ལ་འབྱོར་བ་ཡང་གུས་མོས་ཤེས་མ་སོང་། རེབ་གོང་ཐོ་རྒྱ་ཟེར་བའི་གྲོང་སྡེ་དེ་ཅུང་ཟད་ཆེན་པོ་ཞིག་ཏུ་སྣང་སོང་། གཞུང་ལམ་འགྲམ་གྱི་གཡས་གཡོན་དུ་རྒྱ་བོད་ཁ་ཆེ་སོགས་ཀྱིས་ཟ་ཁང་དང་ཚོང་ཁང་ཐ་ཐོར་རེ་བཟུང་ཡོད་པ་མཐོང་སོང་། ཡིན་ཡང་གུས་མོས་བལྟ་འདོད་ཆེ་བའི་ཐོ་རྒྱའི་རྒྱ་སྡེའི་ཤུལ་དུ་བོད་རིགས་མང་པོ་གནས་སྤོར་བྱས་ཡོད་པ་དེ་འགྲོ་ཐུབ་མ་སོང་། རྒྱུ་མཚན་ནི། པེ་ཅིན་གྱི་གུས་མོའི་གྲོགས་པོ་བོད་པའི་བུ་དེས་མངགས་བཅོལ་བྱས་བའི་བུ་མོས་ཁ་པར་ཚར་ཁ་ཤས་འབྱོར་ནས་སྒུགས་ཡོད་ཟེར་བས། དེང་སེང་བོད་ཀྱི་གྲོང་སྡེ་ཞིག་ཏུ་གྱུར་བའི་བོད་སྡེ་གསར་བ་དེར་འགྲོ་ཁོམ་མ་བྱུང་བས་ཅུང་ཟད་བློ་ཕམ་བྱུང་། ཕྲན་གྱིས་ལྟ་སྟངས་ནོར་མེད་ན། པེ་ཅིན་བུ་མོ་བོད་ཀྱི་གྲོང་སྡེ་གསར་བ་ཞིག་ཏུ་གྱུར་བའི་གནས་ཚུལ་དངོས་ཡོད་ཡིན་མིན་ཐེ་ཚོམ་ཅུང་ཡོད་པ་འདྲ་སྙམ་སོང་བས། ཕྲན་གྱིས་པེ་ཅིན་བུ་མོར་ཐོ་རྒྱའི་རྒྱ་སྡེ་ཞིག་བོད་ཀྱི་གྲོང་སྡེ་ཞིག་ཏུ་གྱུར་བ་ལ་ལྟ་འདོད་དེ་ཙམ་ཆེན་པོ་ཡོད་པའི་རྒྱུ་མཚན་ཅི་ཡིན་ནམ་ཞེས་དྲི་བ་ཞིག་བཏང་པ་ཡིན། པེ་ཅིན་བུ་མོས་བསམ་གཞིགས་ཙམ་ཡང་མ་བྱས་བར་ཕྲན་ལ་འདི་ལྟར་ལན་འདེབས་གནང་སོང་། གུས་མོས་ཁོང་ཚོ་གནས་སྤོར་བྱས་དུས་ས་གནས་སྲིད་གཞུང་གིས་རོགས་རམ་དང་། དེ་མ་ཡིན་པའི་རང་ཉིད་ཀྱི་ལྟེ་ཁྲག་ཕོད་སའི་ས་ལོབ་ཆུ་ལོབ་ཏུ་སོང་ས་ཞིག་ནས་ཡོད་ཚད་བཞག་སྟེ་འགྲོ་དགོས་དུས་ཁོང་ཚོའི་སེམས་ཚོར་ག་འདྲ་ཞིག་ཡིན་མིན་ཤེས་འདོད་བྱུང་སོང་ཟེར། ཕྲན་གྱིས་ཀྱང་དེ་བདེན་པ་རེད་ཅེས་མོ་རང་གི་བསམ་ཚུལ་ལ་བདེན་ཁ་སྦྱིན་པ་ཡིན།

མཚམས་འདིར་པེ་ཅིན་བུ་མོའི་ཚ་མོས་ཞིང་པ་ཞིག་ཞིང་ལས་བྱེད་སར་གནས་སྤོར་བྱས་ཚེ་དེ་ཙམ་དཀའ་ངལ་ཡོད་ཀྱི་མ་རེད་མོད། འོན་ཀྱང་ཞིང་ལས་རྩ་བ་ནས་བྱས་མ་མྱོང་བའི་འབྲོག་པ་ཚོ་གྲོང་ཁྱེར་ནང་གནས་སྤོར་བྱེད་དུ་བཅུགས་པ་འདི་དངོས་གནས་དཀའ་ངལ་ཆེན་པོ་ཡོད་སྲིད། ཁོང་ཚོ་གནམ་གཤིས་དྲོད་གྲང་དང་འཚོ་བ་རོལ་སྟངས་ཀྱི་ཆ་ནས་ཀྱང་ཁྱད་པར་ཆེན་པོ་ཡོད་པས་དཀའ་ངལ་ལས་ཐར་ཐབས་ལས་སླ་བོ་ཡོད་ཀྱི་མ་རེད་ཟེར། པེ་ཅིན་བུ་མོས་ཀྱང་དེ་དངོས་གནས་རེད། གུང་ཁྲན་ཏང་གིས་མི་དམངས་ཀྱི་བདེ་སྡུག་ལ་བསམ་བློ་ནམ་ཡང་གཏོང་གི་མ་རེད། གུང་ཁྲན་ཏང་གིས་ལོ་ངོ་༦༠རིང་ནམ་ཡང་མི་དམངས་ཀྱི་བདེ་སྡུག་ལ་བསམ་གཞིགས་བྱས་མེད། གལ་སྲིད་མི་དམངས་ཀྱི་བདེ་སྡུག་ལ་བསམ་གཞིགས་བྱས་ཡོད་ཚེ། དེ་རིང་གི་བོད་མི་རིགས་གཙོ་བྱས་བའི་གྲངས་ཉུང་མི་རིགས་དང་རྒྱ་ནག་ནང་ཁུལ་གྱི་རྙོག་དྲ་འདི་བྱུང་ཡོད་པ་མ་རེད་ཅེས་སྡོམ་ཚིག་འདྲ་ཞིག་བཤད་སོང་། གང་ལྟར་པེ་ཅིན་བུ་མོས་ཇ་ཁང་ནང་ནས་ཕྱི་ལོགས་སུ་ལྟ་ཙམ་བྱེད་ཞོར། དེ་རིང་གི་གནམ་གཤིས་འདིས་ང་ཚོའི་གླེང་མོལ་ལ་གྲོགས་བྱེད་ཀྱི་ཡོད་ས་རེད་ཟེར། དངོས་གནས་གནམ་གཤིས་འདིས་ཕྲན་གྱིས་ཉན་འདོད་ཆེ་བའི་ཡུལ་སྐོར་ཟིན་ཐོ་ལ་མུ་མཐུད་ཉན་འདོད་ཀྱི་གོ་སྐབས་སྤྲོད་ཀྱི་འདུག་མོད། ཡིན་ཡང་ཕྲན་ཅུང་ཟད་འཚེར་སྣང་སྐྱེས་ཞོར་རྨ་ལྷོ་ཁུལ་ཐོག་གི་མཐོང་ཐོས་སྐོར་གྱི་སྐད་ཆ་དྲིས་པ་ཡིན།
ཕྲན་གྱིས་ཞོར་དུ་པེ་ཅིན་བུ་མོའི་ཚ་མོའི་གདོང་ལ་ག་ལེར་ཅིག་བལྟས་པ་ཡིན། མོའི་གདོང་ལ་འཛུམ་མདངས་འགོག་ཐབས་མེད་པ་ཞིག་ལངས་ཏེ་འདི་འདི་ལྟར་བཤད་སོང་། ཁྱེད་ཀྱིས་དེ་རིང་ཉིན་གང་བོ་ངེད་གཉིས་ཇ་ཁང་འདིའི་ནང་ནས་ཕྱི་ལོགས་སུ་གཏོང་འདོད་མེད་པ་འདྲ་ཟེར་བས། པེ་ཅིན་བུ་མོས་ཁོ་རང་ཕ་ཡུལ་གྱི་གནས་ཚུལ་ལ་ཉན་འདོད་ཆེན་པོ་ཡོད་པ་འདི་ཆོས་ཉིད་རེད། ཁྱེད་ཀྱིས་ཀྱང་གུས་མོར་ནང་མི་དང་ཁྱེད་ཀྱི་གྲོགས་པོ་གྲོགས་མོ་ཚོའི་སྐོར་དྲིས་ཏེ། མཚན་གང་བོར་ངེད་གཉིས་ཀྱིས་སྐད་ཆ་ད་རུང་བཤད་ཚར་མེད་ཅེས་ཁོ་མོ་གཉིས་ཀྱི་གླེང་མོལ་བྱས་ཚུལ་བཤད་པས། པེ་ཅིན་བུ་མོའི་ཚ་མོའི་གདོང་ལ་དགའ་སྐྱོ་འདྲེས་མ་ཞིག་གི་གཉེར་མ་འགས་མོའི་གདོང་ལ་སྐྱོ་སྣང་གི་རི་མོ་འགའ་གསལ་བོ་བྲིས་སོང་། དེ་ནི་མོ་རང་གི་འདས་བའི་མི་ཚེ་དང་དེ་རིང་གི་ས་མཐའི་སྐྱོ་གདུང་གང་ཡིན་གསལ་བོ་མ་ཤེས་མོད། འོན་ཀྱང་མར་མནོན་ཐབས་དཀའ་བའི་སྡུག་བསྔལ་གྱི་མཚོན་རྟགས་ཞིག་ཡིན་པ་སུས་ལྟས་ཀྱང་ཤེས་ཐུབ། མ་ཟད་པེ་ཅིན་བུ་མོས་ཀྱང་མོའི་ཚ་མོའི་གདོང་གི་སྐྱོ་སྣང་མཐོང་སྟེ། མོས་ཚ་མོའི་རྒྱབ་ལ་ལག་པས་བྱིལ་བྱིལ་བྱེད་ཞོར། ད་དེ་འདྲའི་བསམ་བློ་མང་པོ་མ་གཏོང་དང་ཉིན་ཞིག་ང་ཚོའི་མཉམ་དུ་གནམ་བདེ་སྒོ་མོ་ཆེ་ཡི་ཐང་ཆེན་ནས་གཞས༼མིང་༽འདི་མཉམ་དུ་ལེན་ཆོག་ཟེར།
རྒྱ་གཞས་དེའི་མིང་དང་དོན་དག་ཅི་ཡིན་ཕྲན་གྱིས་ཁོ་མོ་གཉིས་ལ་སྐད་ཆ་དྲིས་མེད། ཡིན་ཡང་ནུབ་ཕྱོགས་སུ་ལུས་ཡོད་པའི་བུ་མོའི་མིག་མཐར་འོད་གྱི་ལེ་མཆི་མ་འཁྱིལ་ནས་ཡོད་པ་ཕྲན་གྱིས་གསལ་བོ་མཐོང་བས། ཕྲན་ཡང་ཆུང་དུས་ཕ་ཡུལ་ནས་ཟོག་རྫི་འགྲོ་སའི་རི་ལུང་དང་རྫ་ཆུ་བསིལ་མ་བཞུར་བཞིན་ཡུལ་ལྗོངས་སོགས་སེམས་གཏིང་ནས་དྲན་སྟེ། ཕྲན་གྱི་སེམས་ཡོངས་སུ་ཕ་ཡུལ་ཕྱོགས་སུ་འཁོར་ནས་སྐྱོ་སྣང་ཆེན་པོ་ཞིག་གིས་སེམས་སྨྲེངས་སུ་བཅུགས་སོང་། ཡིན་ཡང་འདི་འདྲའི་སྐྱོ་སྣང་གི་སེམས་པ་དེ་རིང་གཅིག་པོ་མ་ཡིན་པར་ཐེངས་མང་པོ་བྱུང་མྱོང་། ལྷག་པར་དུ་ཡང་དཔྱིད་འགོར་ལྗོན་ཤིང་ལ་ལོ་འདབ་འབུས་བའི་སྐབས་དང་སྟོན་ཁའི་སྡོང་ལོ་སེར་ཐིག་ལྷུང་དུས། ཕ་ཡུལ་གྱི་འདས་བའི་མི་ཚེ་ལ་ཕྱིར་དྲན་རང་དབང་མེད་པར་སེམས་ཚོར་ཞིག་སླེབས་ཀྱི་ཡོད། འདི་ནི་ཕལ་ཆེར་བྱེས་བའི་བོད་རིགས་སྤུན་ཟླ་མང་པོ་ཞིག་ལ་ཡོང་ཡོད་སྲིད། ཡིན་ཡང་རང་གི་སེམས་པ་སྨྲེངས་བའི་རི་མོ་ཕྱི་ལ་མ་སྟོན་པར་པེ་ཅིན་བུ་མོའི་གླེང་མོལ་གྱི་འཕྲོ་ལ་སྒུགས་པ་ཡིན།

པེ་ཅིན་བུ་མོའི་གདོང་ལ་དགོད་མ་འཛུམ་གྱི་མདངས་ཞིག་ཤར་ནས་འདི་ལྟར་ཡུལ་སྐོར་ཟིན་ཐོའི་མཐོང་ཐོས་ཀྱི་ལམ་ལ་ཞུགས་སོང་། གང་ལྟར་གུས་མོའི་གླེང་མོལ་འདིས་ཁྱེད་གཉིས་ཀྱི་སེམས་སུ་དགའ་སྐྱོ་འདྲེས་མའི་ཚོར་བ་བསྟུད་མར་སྤྲད་སོང་བས་དགོངས་འགལ་མེད་པར་ཞུ། ཡིན་ན་ཡང་གུས་མོ་ཡང་སྨྲ་བརྗོད་ཀྱི་རང་དབང་ཡོད་ས་ཞིག་ནས་འདིའི་སྐོར་གླེང་འདོད་ཡོད་ཆེན་པོ་ཞིག་བྱུང་སོང་། དེ་མིན་ཕྱིར་པེ་ཅིན་དུ་སླེབས་པའི་ཉིན་མོར་བརྗོད་འདོད་ཆེ་ཡང་། གྲངས་ཉུང་མི་རིགས་ཀྱི་བདེ་སྡུག་དང་། ལྷག་པར་དུ་བོད་ལུང་པ་ལ་རྒྱ་ནག་སྲིད་གཞུང་གིས་གདུག་རྩུབ་ཅི་ལྟར་བཀོལ་བཞིན་པའི་མཐོང་ཐོས་དངོས་ཡོད་བཤད་སའི་མི་ཡོད་ཀྱང་ཁོར་ཡུག་མེད་པས་རང་སེམས་སུ་སྦས་པ་ལས་ཐབས་ཅི་ཡང་མེད། འདི་ནི་རྒྱ་ནག་མི་རིགས་ཡོངས་བོད་ཐོག་ལ་འཛིན་སྟངས་ངན་པ་ཡོད་པའི་རྒྱུ་མཚན་མ་ཡིན་པར། གུང་ཁྲན་ཏང་གིས་ཏཱ་ལའི་རུ་ཚོགས་ལ་ཁ་བྲལ་རིང་ལུགས་སུ་ཁ་གཡར་སྟེ་སྐྱོན་བརྗོད་དང་སློབ་གསོ་སྤྲད་པའི་འབྲས་བུ་རེད།གལ་སྲིད་རྒྱ་ནག་གི་ཧན་མི་རིགས་ཀྱིས་བོད་ནང་གི་དངོས་ཡོད་གནས་སྟངས་མ་མཐོང་བ་ཚོས་སྲིད་གཞུང་གིས་ཅི་ཞིག་བཤད་པ་ལ་ཡིད་ཆེས་བྱེད་ཀྱི་ཡོད། དེས་རྐྱེན་གུས་མོས་བོད་ལུང་པ་ནས་དངོས་ཡོད་གནས་ཚུལ་མཐོང་བ་རྣམས་བཤད་ཀྱང་ཁོང་ཚོར་ཡིད་ཆེས་དཀའ་བ་ཞིག་རེད་ཟེར། ཕྲན་གྱིས་དེ་བདེན་པ་རེད་ཅེས་ལན་འདེབས་ཞོར། རྨ་ལྷོའི་ཁུལ་ཐོག་ནས་གང་སར་སོང་བ་ཡིན་ཅེས་དྲི་བ་ཞིག་ཡང་བསྐྱར་དྲིས་པ་ཡིན། དེས་རྒྱུ་མཚན་ནི་ང་ཚོས་གླེང་མོལ་བྱས་ཏེ་ཅུང་རྒྱུན་རིང་འགོར་ཡོད་པ་མ་ཟད། གནམ་གཤིས་ཡང་ཅུང་ཡག་རུ་ཕྱིན་ཏེ་ཉི་འོད་སྒེའུ་ཁུང་ནས་ང་ཚོའི་ཇ་ཁང་ནང་འཕྲོས་སོང་བས། ཕྲན་གྱིས་ཉན་འདོད་ཆེ་གནས་ཚུལ་རྣམས་འཕྲོ་ལུས་བར་དོགས་ནས་དྲི་བ་དེ་བསྐྱར་འདྲི་བྱེད་དགོས་བྱུང་།

པེ་ཅིན་བུ་མོའི་གདོང་ལ་འཛུམ་མདངས་ཞིག་ལངས་ཏེ། ཅི་ཞིག་རེད། ཁྱེད་རང་བྲེལ་འཚུབ་ཡོད་དམ་ཅེས་ཕྲན་ལ་དྲི་བ་དགོད་གཏམ་དང་འདྲེས་ནས་དྲིས་སོང་བས། ང་རང་བྲེལ་བ་མེད་མོད་ཁྱེད་རང་གྲོང་ཁྱེར་ནང་ལྟད་མོ་བལྟ་རུ་འགྲོ་འདོད་ཆེན་པོ་ཡོད་ངེས་ཡིན། དེས་རྐྱེན་ཕྲན་གྱིས་ཉན་འདོད་ཆེ་བའི་གནས་ཚུལ་རྣམས་འཕྲོ་ལུས་བར་དོགས་ཏེ། སྐད་ཆ་བསྐྱར་འདྲི་བྱས་པ་ཡིན་ཅེས་ཕྲན་གྱི་སེམས་སུ་གང་དྲན་པ་གསལ་བོར་བྱས་ཏེ་ལན་བཏབ་པ་ཡིན། མོས་ཀྱང་ཞོར་དུ་སྒེའུ་ཁུང་ནས་ཕྱི་ལོགས་སུ་ལྟས་ཏེ། ད་དངོས་གནས་གནམ་གཤིས་འདིའི་གུས་མོར་སྙིང་རྗེ་ཅུང་ཟད་སྐྱེས་ཏེ་བལྟ་སྐོར་གྱི་གོ་སྐབས་སྤྲོད་ས་རེད་ཟེར། པེ་ཅིན་བུ་མོའི་ཚ་མོས་ཕྲན་གྱི་བསམ་ཚུལ་གསལ་བོར་ཤེས་ནས་དགོད་གཏམ་ཡིན་དང་། དངོས་གནས་ཡིན་མིན་གང་ཡིན་གསལ་བོར་མ་ཤེས་མོད། འོན་ཀྱང་པེ་ཅིན་བུ་མོར་མིག་བཙུམས་ཞིག་འཛུམ་མདངས་བཅས་རྒྱག་ཞོར་ད་ཡིན་ན་ངེད་གཉིས་ཕྱི་ལོགས་སུ་འགྲོ་ཟེར། པེ་ཅིན་བུ་མོས་ཅུང་ཟད་སྒུགས་དང་གུས་མོས་ཁྱེད་གཉིས་ལ་ཧ་ལས་དགོས་བའི་གནས་ཚུལ་མདོར་བསྡུས་ཞིག་བཤད་རྒྱུ་ཡོད། དེ་བཤད་ཚར་རྗེས་སུ་ངེད་གཉིས་འགྲོ་ཆོག་ཟེར་ཞོར་མོ་ཡུལ་སྐོར་ཟིན་ཐོའི་མཇུག་ལ་འཐམས་སོང་། གུས་མོའི་སྣེ་ཤེན་བུ་མོས་ངེད་གཉིས་ཁྱེད་ཀྱི་གྲོགས་པོ་དེས་མངགས་བཅོལ་བྱས་བའི་བུ་མོས་ངེད་གཉིས་ལ་སྒུགས་ཡོད་ཟེར་བས་ངེད་གཉིས་ཁུལ་ཐོག་ལ་ཕྱིན་པ་ཡིན།

རྨ་ལྷོ་ཁུལ་ཐོག་ནི་རྒྱ་ཆེན་པོ་ཞིག་མ་ཡིན་པར་རི་བོ་ཆེན་པོ་གཉིས་ཀྱི་དཀྱིལ་དུ་ཆགས་འདུག་ལ། གུས་མོའི་གྲོགས་པོས་མངགས་བཅོལ་བྱེད་སའི་བུ་མོས་ངེད་གཉིས་ལ། གཞུང་ལམ་བཞི་མདོའི་ཉེ་འགྲམ་གྱི་མི་དམངས་དངུལ་ཁང་ཞིག་གི་སྒོ་འགྲམ་དུ་སྒུགས་འདུག

མུ་འགོད།