པདྨ་རྡོ་རྗེ།
ཉེ་སྔོན་རང་རེའི་སྤྱི་ཚོགས་ནང་དེ་སྔོན་དང་མི་འདྲ་བར་རང་བཙན་དང་དབུ་མའི་ལྟ་བ་འཛིན་མཁན་དབར་གྱི་འགལ་བ་མི་ཉུང་བ་ཞིག་དྲ་རྒྱའི་ཁོར་ཡུག་ནང་དོན་དང་ཐོན་བཞིན་འདུག དེ་ལྟ་བུའི་ལྟ་གྲུབ་ཀྱི་རྩོད་གཞི་དེ་ལྟ་གྲུབ་ཀྱི་རྩོད་པར་མ་འགྱུར་བར་དེ་བས་མི་སྒེར་དང་། ཚོགས་སྡེ་རེ་ཟུང་ལ་སྡང་བའི་རྣམ་འགྱུར་ཡང་ཇེ་གསལ་དུ་གྱུར་བཞིན་འདུག ངའི་ངོས་ནས་བཤད་ན། ལྟ་གྲུབ་ཀྱི་རྩོད་གཞི་གང་ཞིག་རིགས་ལམ་དང་ལྟ་གྲུབ་ཀྱི་རྣམ་བཞག་ཐོག་ནས་བརྩོད་ན་དེ་ནི་ཡར་རྒྱས་ཀྱི་རྩ་བ་ཞིག་ལ་བརྩི་བཞིན་ཡོད། འོན་ཀྱང་། ལྟ་གྲུབ་ཀྱི་རྩོད་གཞི་གང་ཞིག་ལྟ་གྲུབ་ལས་འགལ་སྟེ་མི་སྒེར་གྱི་ཞན་ཆ་འཚོལ་བའི་ལག་ཆར་ཕྱིན་ན་དེ་ནི་སྤྱི་ཚོགས་ཀྱི་ནད་གཞི་ཞིག་ལས་སྨན་མཆོག་ཏུ་མི་འགྱུར་ཁོ་ཐག་རེད།
དཔེ་མཚོན་འགའ་བཤད་ན། དེང་སྐབས་དྲ་བའི་ནང་དབུ་མ་དང་རང་བཙན་བརྩོད་མཁན་འགའ་ཤས་ཁྲོད་ཕན་ཚུན་གཞི་མེད་ཀྱི་སྐྱོན་འཛུགས་དང་། དགོས་མེད་ཀྱི་སྙོག་གླེང་བཟོ་བཞིན་ཡོད། དེ་ཡང་། རང་བཙན་རྩོད་མི་འགས་དབུ་མའི་ཐབས་ལམ་རྩོད་མཁན་ཚོར་་་དབུ་མའི་སྲིད་བྱུས་འོག་ད་བར་འབྲས་བུ་གང་ཡུང་མཐོན་མེད་ལུགས་དང་། དེ་བས་རྫབ་ཆེ་ཙམ་བཤད་ན། བོད་བཙོང་ལུགས། མིང་དོན་མཚུངས་པའི་རང་སྐྱོང་ནས་དེ་བས་དམའ་བའི་གནས་བབ་ཞིག་ལ་བབ་ལུགས་སོགས་གླེང་བཞིན་ཡོད། དེ་བཞིན་དུ། དབུ་མའི་སྲིད་བྱུས་ལ་རྒྱབ་སྐྱོར་བྱེད་མཁན་འགས། རང་བཙན་བརྩོད་མཁན་ཚོར་ཐབས་བྱུས་ཀྱི་སྒྲོམ་གཞི་གཅིག་ཀྱང་མེད་པར་ཆོ་མེད་ཀྱི་ཉོག་གཏམ་བཤད་ལུགས་སོགས་མདོར་ན། རང་བཙན་དང་དབུ་མའི་གནས་བབ་དེ་གཉིས་རྒྱ་དམར་གྱི་ལག་ནས་བརྩོད་རྒྱུའི་ཚབ་ཏུ་བོད་མི་ནང་ཁུལ་དུ་བརྩོད་བཞིན་ཡོད། དེ་ནི་མཁས་དབང་ཟམ་གདོང་རིན་པོ་ཆེས། རང་བཙན་བརྩོད་ན་རྒྱ་ནག་ནས་བརྩོད་དགོས་རེད།
ཅེས་གསུངས་པ་དེ་ཡང་གནད་འགག་དེ་ལ་ཐུག་ཡོད།
དེ་ལྟ་བུའི་སྤུན་ཟླ་ཕན་ཚུར་དབར་རྒྱུ་མཚན་མ་སྤུངས་པར་གཞི་མེད་ཀྱི་སྙོན་འཛུགས་ལ་གཞོལ་བའི་རྒྱུད་རིམ་ཁྲོད། སྨྱུག་ཐོགས་པ་མི་ཉུང་བ་ཞིག་གི་དུས་ཚོད་ཕལ་མོ་ཆེ་ཆུད་ཟོས་སུ་འགྲོ་བཞིན་ཡོད་པ་མ་ཟད་རང་རེའི་སྤྱི་ཚོགས་ལའང་ཤུགས་རྐྱེན་ངན་པ་ཞིག་ཞར་དང་ཞོར་དུ་སྐྲུན་བཞིན་ཡོད། དེ་ནི་རྒྱ་དམར་ལ་དགོས་པའི་ལག་རྟགས་གཅིག་རེད་ལ་ང་ཚོ་སྤུན་ཟླའི་སེམས་སུ་རྨ་ཁ་བཟོ་བའི་ཤན་གྲི་ཡང་རེད། དེས་ན། ང་ཚོ་སུ་ཞིག་གིས་རང་བཙན་དང་དབུ་མ་གཉིས་གང་ཞིག་བརྩོད་ཀྱང་ཕན་ཚུན་བརྩི་བཀུར་དང་། གཞུང་ལུགས་དང་། ཐབས་བྱུས་སོགས་ཀྱི་ཐད་ནས་བགྲོ་གླེང་བྱེད་པ་ལས་དོན་མེད་ཀྱི་སྙོན་འཛུགས་མ་གནང་རོགས་ཞུ་རྒྱུ་ཡིན།
ཧ་ཧ། སྨྲ་བརྗོད་རང་དབང་གི་སྤྱི་ཚོགས་ནང་གང་ཡང་ཡོང་ཆོག་གི་རེད། དེར་སྐྲག་དགོས་དོན་ཅི་ཡོད།
མྱི་སུམ་ཅུར་བསམ་པ་སུམ་ཅུ། མཛོ་སུམ་ཅུར་ར་ཁ་དྲུག་ཅུ་ཟེར་བ་དེ་རེད། ཆོས་ལ་རྨོངས་དད་བྱེད་པ་དང་སྲིད་ལ་རྨོངས་ཡིད་སྟེར་བ་གཉིས་གཅིག་པ་རེད། འདི་མ་གླེང་མ་བརྩད་པར་བཞག་ན་མི་བཟང་། རྩོད་རྒྱུ་ཡོད་ན་བརྩད་ན་བཟང་། མྱི་སུ་བཟང་སུ་ངན། ཇུས་གང་ཡག་གང་ངན་གྱི་གོ་ཐོས་མི་དམངས་ལ་སྤྲོད་དགོས་བ་དེ་གལ་ཆེན་ནང་གི་དོན་ཆེན་ཡིན། རྒྱལ་ཁབ་དང་མི་རིགས་ཀྱི་དོན་ལ་ཁོག་གཏམ་ཡག་སྡུག་གཉིས་ཀ་ལ་རིན་ཐང་གཅིག་པ་ཡིན། བསལ་འདེམས་བྱེད་ས་མེད་པའི་ཡག་པོ་ནི་ཡག་པོ་རྩ་བ་ཉིད་ནས་མིན། འདི་སྲིད་རེད། ཆོས་མ་རེད། དེར་བརྟེན། སྲིད་སྟེགས་ན་བླ་མ་ཟེར་སའི་ཕྱག་འཚལ་ས་ཞིག་དང་། སྐུ་ངོ་ཟེར་སའི་ལྕེ་སྣར་ཞིག་ཡོད་མི་ཆོག། རང་རོགས་ཀྱི་ཁ་ལྟོ་ཡི་ཆེད་དུ་ཤེས་འཇོན་ཤ་ཚ་ཅན་གྱི་བླ་མ། གྲྭ་བ། ཨ་ནི། མྱི་སྐྱ་ཕོ་མོ་སུ་ཞིག་ཡིན་པ་དེ་འདེམས་ཐུབ་པ་བྱེད་དགོས། དེ་ཐུབ་པ་ལ་བསྒྲོ་གླེང་དང་གོ་ཐོས་དགོས། སྔོན་གྱི་མགོ་དཔོན་ཚོའི་ལས་ཉེས་ལས་རགས་པའི་ཉམ་མྱོང་གིས། མ་འོང་དེ་འདྲ་བྱས་ན་གྱོང་ཁ་རང་ཚོ་ཚང་མ་ལ་ཡོད་པ་སེམས་དཀྱིལ་དུ་ཉེར་དགོས།