སོག་མདའ།
ཀླུ་ཆུ་སྔོན་པོའི་འགྲམ་རྒྱུད་གནས་པའི་ཁྱེད་དང་ང་ཡི་ཕ་ས་གཅིག །
ཕྱུགས་རིགས་རྐང་བཞིའི་ཁྱུ་ཚོགས་འཚོ་བའི་ཁྱེད་དང་ང་ཡི་འབྲོག་ཡུལ་གཅིག །
ཤ་མར་ཐུད་ཀྱི་ཁ་ཟས་སྣུམ་པོ་ཁྱེད་དང་ང་ཡི་ཁ་ཟས་གཅིག །
ཐེར་ཕྲུག་ཚར་རའི་གོས་ལྭ་གཅིག་པའི་ཁྱེད་དང་ང་ཡི་གོན་པ་གཅིག །
ཕ་ཡུལ་སྐྱིད་པོ་རྒྱབ་ཏུ་བསྐྱུར་ནས་གཞན་ཡུལ་འགྲིམས་པའི་ལས་དབང་གཅིག །
བྱམས་ཆེན་ཕ་མའི་ཁ་ནས་གླེང་ཞིང་སྙིང་ནས་དྲན་པའི་གཅེས་ཕྲུག་གཅིག །
མདུན་གྱི་རྡོག་སྒྲ་རྐང་པས་མནན་ནས་ས་ཆེན་བརྒལ་པའི་སྤོབས་པ་གཅིག །
དོན་གྱི་བདག་པོའི་གསེར་ཞལ་སྒོམ་ནས་ལམ་ལ་ཆས་པའི་རེ་སྨོན་གཅིག །
གནའ་མཁར་ཟི་ལིང་གྲོང་ཁྱེར་ཆེ་ནས་ལྷ་སར་འགྲོ་བའི་རླངས་འཁོར་གཅིག །
ལྷ་ལྡན་ཞིང་གི་ཇོ་བོའི་གསེར་ཞལ་ལྷན་ཏུ་མཇལ་བའི་དབུས་རོགས་གཅིག །
འཕགས་ཡུལ་རྐང་ཐང་ལ་མོ་བརྒྱབ་ཏེ་སྐྱིད་སྡུག་མྱོང་བའི་ལམ་རོགས་གཅིག །
རྡ་སའི་གྲོང་གི་སོག་སློབ་འགྲིམས་ཉིན་འཛིན་གྲྭ་གཅིག་པའི་སློབ་བུ་གཅིག །
ཡོ་རོབ་གླིང་གི་གྲུ་ཟུར་རེ་ན་ལས་ལ་བྲེལ་བའི་གླ་བ་གཅིག །
ཆུང་མ་གཉིས་ཀྱི་ཐུ་འོག་འཛུལ་ནས་མཆིན་པ་གླན་པའི་བརྩེ་བ་་གཅིག །
ཡོ་སྒོར་གོང་ཆེན་གང་མང་བསགས་ནས་ཕ་ཡུལ་འགྲོ་འདོད་་རེ་འདུན་གཅིག །
དོན་གྱི་བརྡར་ཤ་གང་ནས་དེད་ཀྱང་ཁྱེད་དང་ངེད་གཉིས་དམིགས་འདུན་གཅིག །
འདི་ན་འབྲུ་དྲུག་ནས་ལས་བཙགས་པ་ནས་ཆང་ཁམས་པ་དཀར་ཡོལ་གང་།།
འདི་ན་གཡང་དཀར་བལ་ལས་གྲུབ་པ་དག་གཙང་ཁ་བཏགས་འདོམས་ཆེན་གང་།
འདི་ན་དྲུག་འགྱུར་མགྲིན་ལས་བྱུང་བ་ཀླུ་ཆུའི་ཡུལ་གྱི་འབྲོག་གླུ་གང་།།
འདི་དག་གྲོགས་ཀྱི་སྐྱེས་སྐར་ཕུལ་བའི་རྣམ་དག་སེམས་ཀྱི་མཆོད་པ་ཡིན།།
༢༠༡༣་༥་༡༨ ཉིན་་རང་ཤག་ནས་བྲིས།།
ཡག་གི
གཞོན་དུ་དོན་འགྲུབ་དང་། ལྷ་མོ་དོན་འགྲུབ་གཉིས་ཀ་དོན་འགྲུབ་ཀྱི་མིང་དོན་གཅིག་ཡིན་པ་མཚུངས་པ་འདི་ཤིན་ཏུ་མཚར་བ་མ་ཡིན་ནམ།