རྒྱ་ནག་གི་ཁྲིན་ཏུའུ་གྲོང་ཁྱེར་གྱི་ནང་དུ་མོ་ཊའི་ཁ་ལོ་པ་རྣམས་ཀྱིས་མོ་ཊའི་དུང་བརྡ་བརྒྱབ་མི་ཆོག་པའི་ཁྲིམས་གཞི་བཟོས་ནས་ཡུན་རིང་ཙམ་སོང་། ཡིན་ན་ཡང་བོད་པའི་ས་ཁུལ་ནས་ཡོང་བའི་བོད་པའི་ཁ་ལོ་པ་རྣམས་ད་དུང་ཁྲིམས་གཞི་དེ་ལ་གོམས་མེད། བོད་པ་ཁ་ལོ་པ་ཞིག་གིས་ཁྲིན་ཏུའུ་ཡི་ཁྲོམ་ལམ་ཞིག་ཏུ་དུང་བརྡ་ཞིག་བརྒྱབ་མ་ཐག་སྤྱི་བདེ་མི་སྣ་ཞིག་གིས་ཁོ་ལམ་ཟུར་དུ་བཀག་ནས་ཆད་པ་ལ་སྒོར་མོ་ལྔ་དགོས་ཞེས་བཤད། ཁ་ལོ་པ་དེ་ལ་ལྔ་ལོ་མེད་པར་བཅུ་ལོ་ཞིག་སྤྱི་བདེ་མི་སྣ་དེ་ལ་སྤྲད། སྤྱི་བདེ་མི་སྣ་དེས་ཁོ་ལ་སློག་རྒྱུ་མེད་ཅེས་ནས་བཅུ་ལོ་དེ་ཕྱིར་ཁ་ལོ་པ་ལ་སྤྲོད་སྐབས། ཁ་ལོ་པ་དེས་ཁོ་ལ་ཡང་ལྔ་ལོ་མེད་ཅེས་ཏེ་ཡང་སྐྱར་དུང་བརྡ་ཞིག་བརྒྱབ་ནས་ད་སློག་མི་དགོས་ཞེས་ཏེ་ཕྱིན་པ་རེད་ཟེར།
དུང་བརྡ་གཅིག་ལ་སྒོར་མོ་ལྔ་དང་གཉིས་ལ་སྒོར་མོ་བཅུ། འདི་དངོས་གནས་ཡིན་ནམ་མཚར་གཏམ་ཡིན། གང་ལྟར་ངས་གོ་མ་ཐུབ་པར་ཅུང་ཟད་ལུས་ཤིང་། གོ་རྗེས་ཁེར་དགོད་ཅིག་བྱས་པ་ཡིན།
མཚར་གཏམ་མམ་དངོས་གནས་གང་ཡིན་མ་ཤེས། མདང་དགོང་ཁྲིན་ཏུའུ་ནས་ཡོང་བའི་གྲོགས་རྙིང་ཞིག་གིས་གཏམ་རྒྱུད་འདི་བཤད་ནས་ང་ཚོ་ཚང་མ་ཧབ་ཆ་ཏིར་རེ་སོང་། དྲ་གྲོགས་རྣམས་ལ་ཡང་ཧབ་ཆ་རེ་ཨེ་སློང་བསམས་ནས་འདིར་བཀོད་པ་ཡིན།
ལོ་འགའི་སྔོན། ཕྱི་རྒྱལ་བ་ཞིག་གིས་ནམ་རྒྱུན་ཕྱིར་གཏོང་དངོས་རྫས་བཟོ་སའི་རྒྱ་ནག་གི་བཟོ་གྲྭ་ཆེན་པོ་ཞིག་ཏུ་འགྲེལ་བཤད་མང་པོ་མ་བརྒྱབ་པར་རས་ལེབ་སྔོ་ཁྲ་སྟོང་ཕྲག་ཁ་ཤས་བཟོ་རྒྱུ་མངགས་པ་དང་། ལས་བཟོ་བ་ཚོས་དགའ་སྤྲོའི་ངང་རས་ལེབ་སྟོང་ཕྲག་ཙམ་ཞིག་དཔར་ཚར་བའི་རྗེས་སུ། གཞི་ནས་བརྙན་འཕྲིན་ལས་ཕྱི་རྒྱལ་གྱི་བོད་དོན་ངོ་རྒོལ་བའི་ལག་གི་བོད་པའི་དར་ཆ་མཐོང་ནས། བཟོ་གྲྭ་དེ་ནས་དཔར་བཞིན་པའི་རས་ལེབ་དེ་དག་གི་རས་ལེབ་དཀྱུས་མ་ཞིག་གཏན་ནས་མ་ཡིན་པར། རྒྱ་ནག་ཏུ་མཐོང་རྒྱུ་དཀོན་ཞིང་རྒྱལ་སྤྱིའི་སྟེང་གྲགས་པ་ཅན་གྱི་བོད་པའི་དར་ཆ་ཡིན་པ་གཞི་ནས་ཧ་གོ་སྟེ། བཟོ་གྲྭའི་སྦྱིན་བདག་དང་ལས་བཟོ་བ་ཚང་མས་དངངས་སྐྲག་ཆེན་པོ་ཞིག་གི་ཀློང་ནས་ཚར་སྟོང་ཕྲག་གི་བོད་པའི་རྒྱལ་དར་དེ་དག་མེ་ལ་སྲེག་དགོས་བྱུང་འདུག་ཟེར།