ཤར་ཕྱོགས་ཁུག་རྟ།
༄༅ །། ཁོ་བོ་དང་སྲིད་སྐྱོང་གི་རྙོག་གླེང་བྱུང་ནས་ཉིན་གཉིས་གསུམ་ཙམ་ལ་གྲོགས་རྨོག་རུ་བསྟན་པའི་ཁ་པར་བསླེབས་ཏེ། མྱུར་བར་དབུ་མའི་ལམ་ལས་འགུལ་ཁང་དུ་ལས་ཀ་བྱེད་དུ་ཡོང་རྒྱུའི་གྲོས་མགོ་བཏོན་པ་ལྟར། ལས་རྒྱུན་རིང་དབུ་མའི་ལམ་ལས་འགུལ་ཁང་གི་ལས་དོན་ཐད་གསོན་ཤུགས་གང་ཡོང་སྤེལ་ཐུབ་པ་བྱུང་ལ། དབུས་འགན་འཛིན་སོགས་གནད་དོན་གང་ཅིར་གྲོས་བསྡུར་ཞུ་ས་ངོ་ཡོད་དབུས་རྒྱུན་རྣམས་ཀྱིས་བྱས་པའི་ངོ་སོ་ཡར་ལ་བསྟད་པ་ཙམ་དུ་མ་ཟད། དབུ་མའི་ལམ་གྱི་རིག་པའི་གཞུང་ལུགས་དང་དེའི་ལག་ལེན་ཐད་རྣམ་དཔྱོད་ལྡན་པར་ངོས་འཛིན་ཡིད་སྨོན་གནང་པ་ནི་ལས་འགུལ་ཁང་གི་རྒྱུན་ལས་ཞུས་རིང་གི་ཚེ་ནོམ་ཡག་ཤོས་ཤིག་ཡིན། ཉེ་ཆར་ཚོགས་གཙོ་གཞོན་གཉིས་བརྗེ་ལེན་དང་འབྲེལ་གསར་འགོད་བསྒྲགས་གཏམ་ནང་དུའང་སྐུ་ངོ་ཟླ་བ་ཚེ་རིང་ལགས་དང་ཁོ་བོའི་བྱས་པར་བསྟོད་བསྔགས་གནང་བ་ནི་དཀའ་ལས་བརྒྱབ་པར་གྲུབ་འབྲས་བྱུང་བ་ཞིག་ཡིན་པར་ངོས་འཛིན་ཞུ་བཞིན་ཡོད་ལ། ལས་འགུལ་ཁང་གི་དཀའ་ངལ་ཧ་ཅང་ཆེ་བའི་ལས་གནས་སྟངས་འོག་དབུ་མའི་ལམ་ཐད་ཕྱག་སྟོང་སྤྱན་སྟོང་གི་རྣམ་པར་སྤྲུལ་བ་ལྟར་རྒྱ་བོད་ཕྱོགས་གཉིས་སུ་གོ་བརྡ་དང་ལན་འདེབས་སྤྲོད་སར་ནོར་འཕྱུག་མེད་པར་སྤྲད་པ་དེ་ནི་ཕྱི་མའི་ལམ་རྒྱགས་ཡག་ཤོས་དང། མཁས་པའི་མདུན་སར་མགོ་བོ་དམའ་མི་དགོས་པའི་རྣམ་དཔྱོད་ཡག་ཤོས། ཉམས་སངས་ཅན་དང་མགོ་ཐོག་ཚད་ཀྱིས་མི་འཁྱོངས་པའི་གནས་སྟངས་དངོས་གནས་དེ་ཡིན་སྟབས་སྤྲོ་བ་བླ་ལྷག་ཏུ་འཕེལ་བཞིན་རང་དབང་གི་རྩོམ་འབྲི་དང། ཞིབ་འཇུག་གི་ལས་ལ་ཞུགས་བཞིན་པའི་དེ་རིང། ཁ་སང་དཔར་པའི་༼ ཆབ་སྲིད་དཔྱད་གླེང་༽དང་འབྲེལ་ནས་ལས་ཁུངས་གི་གསལ་བཤད་ཅིག་ཕེབས་པར་དྲ་འབུ་དང་འདྲིས་གྲོགས་ཆོ་འཕྲུལ་ཅན་རེ་ཟུང་གིས་མ་འགྲན་མ་བཟོད་པའི་རྣམ་འགྱུར་ཆེས་ཆེར་ཐོན་བཞིན་འདུག་ཟེར་ནའང། གནང་སྟངས་འདི་མིའི་འགྲན་རྩོད་ནང་རང་བཞིན་ཆོས་ཉིད་ལྟ་བུར་སོང། ཁོ་བོ་ལ་ནི་སྙིང་རྗེ་སྐྱེ་བའམ་མི་རྟག་པ་མྱོང་བ་མངོན་སུམ་དུ་འཕྲོད་པའི་རྒྱུ་རུ་འགྲོ་བས་དེ་དག་བཀའ་དྲིན་ཤིན་ཏུ་ཆེ་ནའང། ཉེ་རིང་ཆགས་སྡང་གི་སྣང་ཚོད་གནས་ཚོད་དང་བསྟུན་པའམ་ཆབ་སྲིད་འཁྲུགས་ཀློང་གི་ཁོར་ཡུག་ནང་གསལ་བཤད་ཅིག་མ་བྱས་ན་མ་འགྲིག་པ་འདུག་པས། དངོས་དོན་༼ ཆབ་སྲིད་དཔྱད་གླེང་༽ཁོ་བོའི་རྔུལ་ནག་ལས་འདོན་ཐེངས་བཞི་ཙམ་པར་འགྲེམས་བྱས་ནའང། ལས་འགུལ་ཁང་གི་དཀའ་ངལ་གྱིས་མུ་མཐུད་པར་འགྲེམས་མ་ཐུབ་སྟབས་མངགས་ཉོ་གནང་མི་རེ་རེའི་སར་དྲུང་ཆེ་མངགས་ཏེ་གསར་རིན་ཕྱིར་སློག་བྱས་པ་ཡིན། འོན་ཀྱང་ཆབ་སྲིད་དཔྱད་གླེང་རྩོམ་སྒྲིག་བྱ་སྐབས་ས་གནས་རིང་ཐུང་སྣ་ཚོགས་ནས་གནད་ཡོད་དང་ཤེས་ཡོན་ཅན་མང་པོས་རྩོམ་ཡིག་བསྐུར་མཁན་མང་པོ་བྱུང་བ་དང། སྐར་ཁུང་དྲ་བ་སོགས་ལོ་ཙཱ་བའི་དཔུང་སྡེ་ཁག་ནས་ཀྱང་ཆབ་སྲིད་བསྒྱུར་རྩོམ་མཐུན་འགྱུར་ཞུས་པ་སོགས་ཀྱིས་༼་ཆབ་སྲིད་དཔྱད་གླེང་༽ལ་ཆེ་མཐོང་སྤྲད་པ་དང། རང་གི་རྩོམ་སྒྲིག་པའི་གཏམ་ཡང་ཤི་མིན་གསོན་མིན་མིན་པ་དབུས་རྒྱུན་ནང་ཁུལ་ནས་ཀྱང་ངར་ཁ་མ་བཟོད་པ་རེ་ཤོས་བྱུང་པ་ལ་གཞི་བྱས་ཏེ། ད་ལམ་སྒེར་ངོས་ནས་༼་ཆབ་སྲིད་དཔྱད་གླེང་༽མུ་མཐུད་པར་འགྲེམས་ཞུས་པ་ཡིན། གལ་སྲིད་མུ་མཐུད་མ་བཏོན་ན་སྤྱི་ཚོགས་ནང་ཤར་ཕྱོགས་ཁུག་རྟའི་ལས་གཞི་ཞིག་ལས་ལས་འགུལ་ཁང་གི་དཀའ་ངལ་གྱིས་མཚམས་བཞག་ཟིན་པ་མི་ཤེས་པ་མ་ཟད། ལས་གཞི་དེ་ལས་ཀའི་དགོས་དབང་གིས་བྱས་པ་མིན་པར་བསམ་བློས་དཔྱད་དེ་རྒྱུ་མཚན་མཐོང་ནས་གཉེར་པ་ཡིན་ཙང། མགོ་བཙུགས་ཟིན་པ་ཞིག་མཇུག་བསྐྱེལ་རྒྱུར་རང་དོན་བློས་གཏོང་དགོས་ཀྱང་འགྱོད་པ་མེད་པ་ནི་ཁོ་བོའི་གཤིས་ཀ་ཞིག་ཡིན་པ་ད་ལྟ་ཡོངས་གྲགས་ཆགས་ཟིན་སྟབས། གོམས་ལོབས་དེའི་དབང་གིས་མུ་མཐུད་འགྲེམས་སྤེལ་ཞུས་པ་ཡིན་ལ། དེ་དོན་སྔོན་གླེང་ནང་གསལ་བཤད་ཀྱང་ཞུས་ཡོད་སྟབས། འགན་འཛིན་གཙོ་གཞོན་གཉིས་ཀྱི་གསལ་བཤད་དེ་ཁོ་བོའི་གསལ་བཤད་ཀྱི་མཇུག་སྣོན་ལྟ་བུར་ཆགས་འདུག་པ་ལས། ང་ཚོ་ནང་ཁུལ་དུ་སྐད་ཆ་འདྲ་མིན་བསྐྲུན་རྩིས་བྱེད་པ་དག་ལ་ངལ་བ་མ་གཏོགས་འབྲས་བུ་ཡོད་པ་མ་རེད་ཅེས་ཞུ་འདོད་བྱུང་ལ། ངོ་དགའ་བྱིལ་བྱིལ་བྱེད་མཁན་ཚོས་རྩོམ་གན་དང་འདི་ཟེར་མདོག་ཁ་པོའང་རེད་མོད། དེ་སུ་ཡིན་ནའང་ཐབས་ཤེས་གང་ཡང་མི་འདུག་ཅེས་ཀྱང་ཞུའོ།།།
ཤར་མར་གང་དྲན་བྲིས་པ་ལས་ཞུ་དག་འགྲོ་རྒྱུའི་དུས་ཚོད་མ་བྱུང་དགོངས་སེལ་ཞུ།། ༢༠༡༣། ༦། ༡༠།།
བདེན་པ་རིན་ཆེན་སྲོག་གི་དབྱུག་པ་ཡིས།།
ལན་བརྒྱར་གཞུས་པའི་མི་ཕྱེད་སྙིང་གི་འདང།།
གང་ལྟར་རང་ཉིད་ཀྱི་ལས་གཞི་གང་ཞིག་ཡིན་རུང་ཐོག་མར་རྩ་མོ་ཞིག་འདོད་ན་ཡང་རྗེས་སུ་འཇུག་སྐྱོང་དཀའ་བ་གོང་ཞུས་ལྟར་རེད་ཡིན་ཡང་ཉིད་ཀྱིས་ངལ་བ་བྱས་ནས་འདི་འདྲ་ཆབ་སྲིད་དཔྱད་གླེང་ཞིག་འདོན་བཞིན་པ་བདག་གི་དེ་རིང་མགོ་ནས་རྩོམ་གསུམ་ཙམ་ཀློབ་པ་ཡིན་དེ་འདྲ་ཡིན་དུས་དེ་ལ་བལྟས་ནས་ཅུང་ཙམ་ཞུ་ཁུར་བྱས་པ་ཡིན་ན་ཧ་ཅིང་གལ་ཆེན་ཞིག་རེད་དྲན་སོང་གང་ཡིན་ཟེར་ན་ད་བར་འུ་ཚོས་སྤྱི་ཚོགས་ནང་དུ་བདེན་རྫུན་གང་ཡིན་མ་ངེས་པར་དཔྱད་གླེང་འདྲ་མིན་ཞིག་བྱུང་དང་འབྱུང་བཞིན་ཡོད་པ་ཡིན་དུས་འདི་ཚོ་གསལ་བཤད་བྱེད་ས་ཞིག་དང་དྲང་བདེན་རྩོད་སའི་ཞིང་ས་ཞིག་ཏུ་འགྱུར་བའི་སྨོན་འདུག་ཞུ་བཞིན་ཡོད་རྗེས་སུ་རང་ནུས་གང་ཡོད་ཀྱི་རྩོམ་ཐུང་རེད་སྐུར་ངེས་ཡིན་ད་བདེ་མོ།
དབུ་མའི་ལམ་ལས་འགུལ་ཁང་ལ་གསོན་ཤུགས་རྒྱས་འཇུག་མཁན་ཤར་ཁུག་ཡིན་ཟེར།
དབུ་མའི་ལམ་གྱི་རིག་པའི་གཞུང་ལུགས་དང་དེའི་ལག་ལེན་ཐད་རྣམ་དཔྱོད་ལྡན་པའི་ལས་ཀ་བྱས་ཡོད་ཟེར།
དབུ་མའི་ལམ་གྱི་སྐོར་ཕྱག་སྟོང་སྤྱན་སྟོང་གི་རྣམ་པར་སྤྲུལ་ནས་ནོར་འཕྱུགས་མེད་པའི་གོ་བརྡ་སྤྲད་ཡོད་ཟེར།
ཉམས་སངས་ཅན་དང་མགོ་ཐོག་ཚད་ཀྱིས་མི་འཁྱོངས་པའི་ལས་ཀ་བྱས་ཡོད་ཟེར།
ཆབ་སྲིད་དཔྱད་གླེང་ནི་ངའི་རྔུལ་ནག་ལས་ཐོན་པ་ཞིག་ཡིན་ཟེར།
ཆབ་སྲིད་དཔྱད་གླེང་མུ་མཐུད་མ་བཏོན་ན་སྤྱི་ཚོགས་ནང་ཤར་ཕྱོགས་ཁུག་རྟའི་ལས་གཞི་ཞིག་ལས་འགུལ་ཁང་གི་དཀའ་ངལ་གྱིས་མཚམས་བཞག་ཟིན་པ་མི་ཤེས་ཟེར།
འགན་འཛིན་གཙོ་གཞོན་གཉིས་ཀྱི་གསལ་བཤད་དེ་ཁོ་བོའི་གསལ་བཤད་ཀྱི་མཇུག་སྣོན་ལྟ་བུར་ཆགས་འདུག་ཟེར།
ཤར་ཕྱོགས་ཁུག་རྟ་འངྲ་བའི་ཁ་ཡོད་ལག་ཡོད་ཀྱི་མྱི་གང་མང་ཡོད་ན་བོད་དོན་དང་། བོད་ཀྱི་གནད་དོན་ཚ་ཚ་འུར་འུར་ཡོང་རྒྱུ་རེད་ཡ།