བློ་མཐུན་སྲིད་སྐྱོང་གིས་བོད་ནང་དམར་པོའི་དབང་བསྒྱུར་ལ་ངོས་ལེན།

བོད་ཀྱི་ཆབ་སྲིད་སྐྱར་ཞིབ་རྩོམ་སྒྲིག་ཚོགས་ཆུང་གིས་བརྩམས། རིག་འཛིན་ལྷུན་གྲུབ་ཀྱིས་བསྒྱུར།

ཕྱི་ལོ་༢༠༡༣ཟླ་༥ཚེས་༨ཉིན་ཨ་རིའི་རྒྱལ་ས་ཝ་ཤིང་ཊོན་དུ་ཕྱི་འབྲེལ་ལྷན་ཚོགས་ཐོག་སྲིད་སྐྱོང་མཆོག་གིས་གཏམ་བཤད་ཀྱི་ནང་ཧང་སངས་པའི་འགྲེལ་བརྗོད་གསུམ་གནང་ཡོད། དང་པོ་བོད་ལ་མང་གཙོའི་ལམ་ལུགས་མི་དགོས་པ་དང་དམར་པོའི་དབང་བསྒྱུར་གྱི་ཆོག་པ། གཉིས་པ་བོད་ལ་མིང་དོན་མཚུངས་པའི་རང་སྐྱོང་ནི་དུས་ཡུན་ཚད་ངེས་ཅན་ཞིག་ཡིན་པ། གསུམ་པ་བོད་ནང་དམག་དཔུང་འགྲེམས་འཇོག་ནི་རྒྱ་ནག་གི་རང་འདོད་ཡིན་པ་བཅས་རེད།

སྲིད་སྐྱོང་མཆོག་གིས་དམིགས་བཀར་གྱིས་བརྗོད་དོན། གལ་ཏེ་རྒྱ་གཞུང་གིས་རྩ་ཁྲིམས་ལག་ལེན་བསྟར་ཚེ་ང་ཚོས་དེ་ནི་མིང་དོན་མཚུངས་པའི་རང་སྐྱོང་ལ་ངོས་འཛིན་བྱེད་ཆོག ང་ཚོས་དམར་པོའི་གཞུང་ཕྱིར་འཐེན་བྱེད་དགོས་ཀྱི་དགོས་འདུན་དང་ཁ་གཏད་བྱེད་ཀྱི་མེད། དེར་བརྟེན་ད་ལྟའི་དབང་བསྒྱུར་ལ་དགོས་འདུན་དང་ཁ་གཏད་བྱེད་ཀྱི་མེད། ཅེས་དང། ང་ཚོས་བོད་ནང་མང་གཙོའི་ལམ་ལུགས་ལག་ལེན་དགོས་པའམ་ཐོག་བསྐྱོད་ཆོག་པའི་དགོས་འདུན་འདོན་གྱི་མེད། ང་ཚོས་རྩོད་པ་ནི་རྒྱ་ནག་གི་རྩ་ཁྲིམས་སུ་གསལ་པའི་ཐོབ་ཐང་རེད། བྱས་ཙང་མང་གཙོའི་ལམ་ལུགས་ནི་ང་ཚོས་ལག་བསྟར་བཞིན་པ་དེ་རེད་ལ་དེ་ནི་ང་ཚོའི་མངོན་འདོད་རེད། འོན་ཀྱང། དེ་ནི་ང་ཚོས་རྒྱ་གཞུང་ལ་བཏོན་པའི་དགོས་འདུན་གྱི་ཆ་ཤས་ཤིག་མ་རེད། ཅེས་ཟེར།
སྲིད་སྐྱོང་མཆོག་གིས་གཏམ་བཤད་ཀྱི་སྐབས་དེར་གཙོ་སྐྱོང་པ་ཇེ་རོམེ་ཁུ་ཧན་མ་གཏོགས་གཞན་སུ་ཞིག་གིས་ཧང་སངས་པའི་འགྲེལ་བརྗོད་དེ་དག་གི་སྐོར་འདྲི་རྩད་བྱེད་མཁན་བྱུང་མེད།
གསོ་སྐྱོང་པས་སྲིད་སྐྱོང་མཆོག་ལ་དྲིས་དོན། གལ་ཏེ་དམར་ཤོག་སྲིད་གཞུང་གིས་དབང་བསྒྱུར་རྒྱུན་གནས་འོག་ཇི་ལྟར་བྱས་ནས་རང་སྐྱོང་བྱས་ནས་སྡོད་ཐུབ་ཀྱི་རེད་དམ། ཞེས་དྲིས་པར།
སྐུ་ཞབས་སེངྒེ་ལགས་ཀྱིས་ལན་ནི། ཇི་སྲིད་བོད་རིགས་མགོ་ཁྲིད་ཀྱི་འགན་དབང་ཡོད་པ། ཞེས་སོང།
སློབ་དཔོན་ཁུ་ཧན་གྱིས་དྲན་སྐུལ་གྱིས་བརྗོད་དོན། རེད། དེང་སྐབས་རང་སྐྱོང་ལྗོངས་ཀྱིས་དབང་འཛིན་པ་བོད་རིགས་རེད། ཅེས་བརྗོད་པར།
སྐུ་ཞབས་སེངྒེ་ལགས་ཀྱིས་དམར་ཤོག་དྲུང་ཆེ་ནི་མི་དབང་ཆ་ཆེ་ཤོས་དེ་རེད། བོད་རང་སྐྱོང་ལྗོངས་ཀྱི་དྲུང་ཆེ་ནམ་ཡང་བོད་རིགས་མིན་པ་རེད། ཅེས་ལན་བསྐྱོན།
དེ་ནས་སློབ་དཔོན་ཁུ་ཧན་གྱིས་ཁྱེད་ཀྱིས་མིང་དོན་མཚུངས་པའི་བོད་རང་སྐྱོང་ནང་མང་གཙོའི་ལམ་ལུགས་ལག་ལེན་ཐུབ་ཀྱི་རེད་བསམ་གྱིས་འདུག་གམ། ཞེས་དང། དོན་དམ་གྱི་ཆབ་སྲིད་འོས་འཕེན་གྱི་རང་དབང་དང་སྨྲ་བརྗོད་རང་དབང་ཡོང་ཐུབ་བམ། ཞེས་དྲིས།
སེངྒེས་བརྗོད་དོན། ང་ཚོས་རྒྱ་ནག་གི་རྩ་ཁྲིམས་འོག་ཏུ་ཐོབ་ཐང་རྩོད་པ་མ་གཏོགས་བོད་ནང་དུ་མང་གཙོའི་ལམ་ལུགས་རྩོད་ཀྱི་མེད། ང་ཚོེར་དགོས་པ་ནི་རྒྱ་ནག་གིས་ཤང་ཀང་དང་ཨའོ་མོན་ལ་སྤྲད་པ་དང་གཅིག་མཚུངས་ཞིག་རེད། ཅེས་བརྗོད་པར།
ཁུ་ཧན་གྱིས་གསལ་སྟོན་བྱས་དོན། ཤང་ཀང་ནང་སྨྲ་བརྗོད་རང་དབང་ཡོད་ཀྱང་མང་གཙོ་མེད་པ་དང་ཤང་ཀང་གི་རང་སྐྱོང་ནི་ཕྱི་ལོ་༡༩༩༧ནས་བཟུང་ལོ་ངོ་ལྔ་བཅུའི་དུས་ཡུན་ཡིན་པ་རེད། སེངྒེའི་སྐད་ཆའི་ཤུགས་སུ་ཁོང་རང་གིས་ཇི་སྲིད་རྒྱ་ནག་གིས་མིང་དོན་མཚུངས་པའི་རང་སྐྱོང་གི་གནད་དོན་མོས་མཐུན་བྱས་ཚེ་བོད་ནང་དུས་ཡུན་ངེས་ཅན་གྱི་མིང་དོན་མཚུངས་པའི་རང་སྐྱོང་ཁས་ལེན་བྱས་པ་དེ་རེད། བོད་ལ་དུས་ཡུན་ངེས་ཅན་གྱི་རང་སྐྱོང་ཁས་ལེན་བྱེད་པའི་ཐོག་ལ།
སེངྒེས་དྲི་བ་དྲི་ལན་གྱི་མཇུག་བསྡུས་སྐབས་ཧང་སངས་དགོས་པའི་འགྲེལ་བརྗོད་གཞན་ཞིག་ཀྱང་གནང་དོན། དམག་དཔུང་འགྲེམས་འཇོག་གི་གནད་དོན་ནི་རྒྱ་ནག་གི་རང་འདོད་ལྟར་ཡིན་ངེས། འོན་ཀྱང། ང་ཚོས་མཐའ་མཚམས་ས་ཁུལ་དུ་ཉུང་ཙམ་ཡོང་བའི་རེ་བ་བྱེད། ཅེས་བརྗོད།
དེར་བརྟེན། སེངྒེས་བོད་ནང་དྲག་དམག་འགྲེམ་འཇོག་ནི་རྒྱ་ནག་གི་རང་འདོད་བྱེད་ཆོག་པ་ཁས་ལེན་བྱས་པ་རེད། སྲིད་སྐྱོང་སེངྒེ་མཆོག་གིས་འགྲེལ་བརྗོད་དེ་དག་དབུས་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ལ་གཞིར་བཅོལ་པ་དང་སྒྲིག་འཛུགས་ཀྱི་གཞུང་འབྲེལ་ལྟ་ཚུལ་མཚོན་གྱི་ཡོད་པ་ངོས་འཛིན་བྱེད་ཆོག

ཕྱི་ལོ་༢༠༠༨ལོར་དབུས་བོད་མིའི་སྒྲིག་འཛུགས་ཀྱིས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་རྒྱ་གཞུང་ལ་སྤྲད་པ་རེད། དེ་ནི་ཕྱི་ལོ་༡༩༨༨ལོའི་སི་ཊསི་སྦག་གྲོས་འཆར་ལ་སྐྱར་སྒྲིག་དང་སྐྱར་ཞིབ་བྱས་པ་ཐེངས་དང་པོ་དེ་ཆགས་ཀྱི་ཡོད་པ་རེད། བསམ་འཆར་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་འོག་བོད་ཆོལ་གསུམ་གཅིག་ཏུ་སྒྲིལ་པའི་མིང་དོན་མཚུངས་པའི་རང་སྐྱོང་ཞེས་པ་དེ་རེད། འོན་ཀྱང། བསམ་འཆར་ནང་བོད་ནང་ཆབ་སྲིད་ལམ་ལུགས་ཅི་འདྲ་ཞིག་དགོས་ཀྱི་ཐད་དམིགས་བཀར་གླེང་སློང་བྱས་མེད། བསམ་འཆར་ནང་བཀོད་དོན། མིང་དོན་མཚུངས་པའི་རང་སྐྱོང་ལག་བསྟར་བྱེད་པའི་ནང་བོད་མིར་སོ་སོའི་དགོས་མཁོ་དང་ཁྱད་ཆོས་དང་འཚམས་པའི་ས་གནས་གཞུང་དང། གཞུང་གི་སྒྲིག་འཛུགས་ཁག དེ་བཞིན་ལམ་ལུགས་བཅས་བཟོ་རྒྱུའི་ཐོབ་ཐང་ཡང་ཚུད་ཡོད། རང་སྐྱོང་ས་གནས་ཀྱི་མི་དམངས་འཐུས་མི་ཚོགས་ཆེན་ལ་ས་གནས་ནང་ཁུལ་གྱི་གནད་དོན་ཚང་མའི་༼རང་སྐྱོང་གི་གནད་དོན་གོང་དུ་གསལ་བ་རྣམས་ལ་གོ༽ཐོག་ཁྲིམས་བཟོ་རྒྱུའི་དབང་ཆ་དང། རང་སྐྱོང་གཞུང་གི་ལས་ཁུངས་ཁག་ལ་ལག་བསྟར་དབང་ཆ་དང་རང་དབང་གི་སྒོ་ནས་ཐག་གཅོད་བྱེད་རྒྱུའི་དབང་ཆ་ཡོད་དགོས་པ་ཡིན།
མང་གཙོ་ཞེས་པའི་ཚིག་འདི་བསམ་འཆར་ནང་བཀོལ་མེད། རྒྱ་ནག་གིས་ཕྱི་ལོ་༢༠༠༨ལོའི་བསམ་འཆར་ལ་ཕྱོགས་ཡོངས་ནས་ངོས་ལེན་བྱས་མེད། ཕྱི་ལོ་༢༠༡༠ལོ་བོད་མིའི་སྒྲིག་འཛུགས་ཀྱིས་བསམ་འཆར་གྱི་འགྲེལ་བརྗོད་ཡིག་ཆ་ཞིག་སྤྲད་པའི་ནང། དེ་བཞིན་སྤྱི་ཚོགས་རིང་ལུགས་ཀྱི་ལམ་ལུགས་ལའང་ཁ་གཏད་གནང་གི་མེད། བསམ་འཆར་གྱི་ཚིག་ཟུར་གང་དུའང་ལམ་ལུགས་དེར་བསྒྱུར་བཅོས་དགོས་པའམ་བོད་ཀྱི་ས་ཁུལ་རྣམས་སུ་ལག་བསྟར་མི་དགོས་པ་གསལ་མེད། མི་མང་ཉམ་དམས་ཚོའི་ཡར་རྒྱས་དང། ཁེ་ཕན། འདྲ་མཉམ་བཅས་བསྐྲུན་རྒྱུའི་སྤྱི་ཚོགས་རིང་ལུགས་ཀྱི་ལྟ་གྲུབ་ལ་༧གོང་ས་མཆོག་གིས་ཐུགས་མོས་ཆེན་མོ་གནང་གི་ཡོད་པ་ཡོངས་གྲགས་རེད། དེའི་ནང་དུའང་མང་གཙོ་ཞེས་པའི་ཚིག་འདི་གསལ་མེད། སྤྱི་ཚོགས་རིང་ལུགས་ནང་མང་གཙོའི་འོས་འཕེན་དང་འོས་སྡུའི་ཐོབ་ཐང་ཡོད་ཆོག་༼དཔེར་ན། སེཁནཌིནཝེཡན་རྒྱལ་ཁབ་ཁག་ནང་སྤྱི་ཚོགས་རིང་ལུགས་ཀྱི་དཔའ་འབྱོར་དང་མང་གཙོའི་འོས་འདེམས་ཀྱི་སྲིད་གཞུང་ཡོད།༽ཀྱང་བསམ་འཆར་གྱི་འགྲེལ་བརྗོད་དེའི་ནང་བོད་ཁུལ་དུ་སྤྱི་ཚོགས་རིང་ལུགས་ཀྱང་ཁ་གཏད་བྱས་མེད། སྤྱི་ཚོགས་རིང་ལུགས་ཀྱི་མང་གཙོ་ཡོད་ཆོག་པ་དང་བསམ་འཆར་གྱི་འགྲེལ་བརྗོད་དེས་མངོན་གསལ་གྱིས་བོད་ནང་མང་གཙོའི་སྲིད་གཞུང་ངོས་ལེན་མེད་པ་བརྗོད་མེད།

མིང་དོན་མཚུངས་པའི་རང་སྐྱོང་གི་ཆེད་བོད་དུ་མང་གཙོའི་ལམ་ལུགས་སྤོང་པ་ནི་དབུ་མའི་ལམ་གྱི་གཞི་རྩ་ལྟ་བུའི་ཕྱི་ལོ་༡༩༨༨ལོའི་སི་ཊསི་སྦག་གྲོས་འཆར་ལ་བསྒྱུར་ལྡོག་ཆེན་པོ་ཞིག་ཕྱིན་ཡོད། དེའི་ནང་༧གོང་ས་མཆོག་གིས་གསུངས་དོན། བོད་ཀྱི་གཞུང་གི་ལམ་ལུགས་ནི་མི་དམངས་ཀྱི་འོས་འདེམས་བྱས་པའི་འཛིན་སྐྱོང་དང། གྲོས་ཚོགས་གཉིས་ཅན་དང། རང་དབང་ཅན་གྱི་ཁྲིམས་ལུགས་ཅན་ཞིག་ཡིན་དགོས། ཅེས་གསུངས། མང་གཙོའི་ལམ་ལུགས་སྤོང་པ་ནི་ལོ་མང་སྔོན་ནས་༧གོང་ས་མཆོག་གིས་ཆེས་ཆེར་བསྔགས་པའི་མང་གཙོའི་ལམ་ལུགས་སྐོར་གྱི་གསུང་དོན་དག་ལས་ཀྱང་འགལ་བཞིན་ཡོད། ༧གོང་ས་མཆོག་གིས་མང་གཙོའི་ལམ་ལུགས་ལ་ངོས་རང་སྒེར་གྱིས་ཡིད་རངས་ཡོད། འབྱུང་འགྱུར་བོད་གཞུང་གི་མགོ་ཁྲིད་ནི་མི་དམངས་ཀྱི་འོས་འདེམས་བྱས་པའི་མགོ་ཁྲིད་ཅིག་ཡིན་དགོས། དེང་རབས་མང་གཙོའི་ལམ་ལུགས་ནི་འགྲོ་བ་མི་ཚང་མ་འདྲ་མཉམ་ཡིན་པའི་ལྟ་ཚུལ་གཞི་བཅོལ་ཐོག་མི་རེ་ངོ་རེ་ལ་འདྲ་མཉམ་གྱི་འཚོ་སྡོད་དང་རང་དབང། བདེ་སྐྱིད་ཀྱི་ཐོབ་ཐང་ཡོད་པ་རེད། ཅེས་གསུངས།
ཆབ་སྲིད་ཀྱི་རང་དབང་དང། སྤྱི་ཚོགས་ཀྱི་རང་དབང་དང། རིག་གཞུང་གི་རང་དབང་ནི་མང་གཙོའི་ལམ་ལུགས་ཀྱི་གློ་སྙིང་ལྟ་བུ་སྟེ། ཧ་ཅང་རྩ་ཆེན་དང་གལ་གནད་ཅན་རེད། ཡང་དག་པའི་སྲིད་གཞུང་ལམ་ལུགས་ཤིག་མེད་ཀྱང་མང་གཙོའི་ལམ་ལུགས་ནི་འགྲོ་བ་མིའི་རང་གཤིས་དང་བློ་ཐག་ཉེ་ཤོས་ཤིག་རེད། དེ་ནི་དྲང་བདེན་དང་རང་དབང་གི་འཛམ་གླིང་སྤྱི་ཡོངས་ཀྱི་ཆབ་སྲིད་སྒྲོམ་གཞི་ཞིག་བཞེད་བསྐྲུན་ཐུབ་པའི་རྨངས་གཞི་གཏན་ཤོས་ཤིག་ཀྱང་རེད། དེར་བརྟེན། དེ་ནི་ཐུན་མོང་གི་མངོན་འདོད་ཤིག་ཡིན་སྟབས་མང་གཙོའི་ལམ་ལུགས་ལོངས་སྤྱོད་བཞིན་པ་ཚོས་དེ་ཉིད་ཀུན་ལ་ལོངས་སྤྱོད་ཀྱི་ཐོབ་ཐང་ཡོད་པར་རྒྱབ་སྐྱོར་བྱེད་དགོས། ༧གོང་ས་མཆོག་གིས་དམར་ཤོག་གཅིག་བསྡུས་དབང་བསྒྱུར་ལ་སྐྱོན་ཟློག་གནང་ཡོད། དམར་པོའི་རིང་ལུགས་ལ་ཕུལ་བྱུང་གི་ཁྱད་ཆོས་མང་པོ་ལྡན་ཞིང་གཞན་ཕན་གྱི་ལྟ་ཚུལ་ཡང་ཚུད་ཡོད་ཀྱང་མཐོ་རིམ་དབང་སྒྱུར་པ་ཚོས་སྲིད་དབང་སྒེར་སྤྱོད་ཀྱི་ལྟ་ཚུལ་ནི་གོད་ཆག་ཅན་ཞིག་ཡིན་པ་སྟོན་གྱི་ཡོད། སྲིད་གཞུང་གིས་སྤྱི་ཚོགས་ཐོག་ཧ་ཅང་སྟངས་འཛིན་བྱེད་པ་དང་མི་དམངས་རྣམས་ཐུན་མོང་གི་ཁེ་ཕན་ཆེད་བྱ་བ་སྒྲུབ་དགོས་ཀྱི་སྐུལ་མ་བྱེད། གཉའ་གནོན་ཅན་གྱི་དབང་སྒྱུར་འོག་ནས་གྲོལ་པར་ཐོག་མར་མཁྲེགས་འཛིན་ཅན་གྱི་སྒྲིག་འཛུགས་ཤིག་དགོས་ངེས་ཡིན་མོད་ཀྱང་དགོས་དོན་གྲུབ་རྗེས་སུ་དེ་ལྟ་བུའི་མཁྲེགས་འཛིན་གྱིས་དོན་དམ་གྱི་སྤྱི་ཚོགས་འཆམ་མཐུན་ཅན་ཞིག་བསྐྲུན་རྒྱུ་དཀའ། དམར་པོའི་རིང་ལུགས་ལ་གྲུབ་འབྲས་གསོན་མེད་པ་ནི་དྲག་ཤུགས་ལ་བརྟེན་ནས་རང་གི་ལྟ་ཚུལ་དར་འཕེལ་གཏོང་ཐབས་བྱེད་པས་རེད། དེས་བསྐྲུན་པའི་དཀའ་སྡུག་འོག་འགྲོ་བ་མི་རྒྱུ་གནས་བྱེད་ཐུབ་ཐབས་མེད། ཅེས་གསུངས།
སྤྱིར་བཏང་ནས་ཕྱི་ལོ་༢༠༠༨ལོའི་བསམ་འཆར་ཡིག་ཆ་དང་ཕྱི་ལོ་༢༠༡༠ལོའི་བསམ་འཆར་གྱི་འགྲེལ་བརྗོད་གཉིས་གསར་པ་གང་ཡང་མིན་མོད། སྲིད་སྐྱོང་གིས་ཉེ་སྔོན་འགྲེལ་བརྗོད་ནི་ང་ཚོས་ཤེས་ཚོད་བྱས་ན་ཐེངས་དང་པོ་སྟེ། བོད་མིའི་སྒྲིག་འཛུགས་ཀྱི་གཞུང་འཛིན་པ་ཞིག་གིས་དབུ་མའི་ལམ་གྱི་དམིགས་ཚད་ནི་དུས་ཡུན་ངེས་ཅན་༼རང་སྐྱོང་༽ཞིག་དང། དྲག་དམག་འགྲེམ་འཇོག་རྒྱ་ནག་གི་རང་འདོད་ཡིན་པ་དང་། ལྷག་པར་དུ་གལ་ཆེ་ཞིག་ནི་མང་གཙོའི་ལམ་ལུགས་མིན་པ་བཅས་ཐག་གཅོད་བྱས་པ་དེ་རེད།

སྲིད་སྐྱོང་གི་འགྲེལ་བརྗོད་ལ་ཡ་ལན།

སྲིད་སྐྱོང་གིས་འགྲེལ་བརྗོད་ལ་སྐྱོན་བརྗོད་དྲག་པོའི་ཡ་ལན་འཐོན་ཡོད། འོད་ཟེར་ལགས་ཀྱིས་ངོ་དེབ་ཐོག གལ་ཏེ་ཁོང་གིས་གསུང་པ་དེ་དངོས་བདེན་ཡིན་ཚེ། ངས་ངོ་སྤྲོད་རྒྱབ་གཉེར་ཤུགས་ཆེན་བྱེད་ཀྱི་ཡིན། སྲིད་སྐྱོང་བློ་བཟང་སེངྒེ་ལགས་ཀྱིས་དམར་ཤོག་ཚོགས་པར་བཞུགས་རྒྱུའི་སྙན་ཞུ་འབུལ་རོགས་གནང། གལ་ཏེ་སྐུ་ཉིད་རྒྱ་ནག་གི་ཨོ་བྷ་མ་གནང་འདོད་ཡོད་ཚེ་སྐུ་ཉིད་དམར་ཤོག་ཚོགས་པར་བཞུགས་མི་ཐུབ་པ་ཅི་ཡིན་ནམ། རང་ལུས་མེར་སྲེག་པ་༡༢༡གིས་རིན་བབ་འཇལ་ཡོད། ང་ལ་ཁུ་ཚུར་གྱིས་རྡེག་པ་ལྟ་བུའི་ཚོར་སྣང་བྱུང། དེ་ནི་ཧ་ཅང་གི་ན་ཟུག་ཆེ།
བུ་ཆུང་ཌི་བསོད་ནམས་ལགས་དང། ཨེལོཊེ་སེཔར་ལིང་དང། མའུ་ར་མོཡནེ་ཧན་བཅས་ཀྱིས་ཀྱང་སྲིད་སྐྱོང་གི་འགྲེལ་བརྗོད་ལ་སྐྱོན་བརྗོད་གནང་ཡོད། ད་དུང་ངེས་དགོས་པ་ཞིག་ནི་བོད་མི་རང་ལུས་མེར་སྲེག་གནང་མཁན་རྣམས་ཀྱིས་འབོད་པ་ནི་རང་དབང་དང་རང་བཙན་ཡིན་པ་ལས་རང་སྐྱོང་ཡང་མིན་མོད་དམར་ཤོག་དབང་བསྒྱུར་རང་དགར་འཇོག་པ་དེ་རེད། སྐྱོན་བརྗོད་དེ་དག་གིས་སྲིད་སྐྱོང་གིས་ཕྱི་འབྲེལ་ལྷན་ཚོགས་སུ་གསུངས་པའི་འགྲེལ་བརྗོད་ལ་བོད་མིའི་སྒྲིག་འཛུགས་ཀྱིས་གསལ་བཤད་དགོས་པའི་དྲན་སྐུལ་བཏང་པ་ཞིག་ཡིན་སྟབས། གསལ་བཤད་ནང། ཁོང་གི་ཕྱི་འབྲེལ་ལྷན་ཚོགས་ཀྱི་གསུང་བཤད་ནང་སྲིད་སྐྱོང་མཆོག་གིས་རྒྱལ་ཁབ་ཀྱི་གནས་བབ་ཐོག་གི་རྒྱ་ནག་གི་སྤྱི་ཚོགས་རིང་ལུགས་ལ་གོ་ཡི་ཡོད། དབུ་མའི་ལམ་གྱིས་རྒྱ་ནག་གི་རྩ་ཁྲིམས་ཀྱི་སྒྲོམ་གཞི་འོག་མིང་དོན་མཚུངས་པའི་རང་སྐྱོང་རྩོད་ཀྱི་ཡོད་པ་ནི་ད་ཡོད་གནས་བབ་བརྗེ་བསྒྱུར་ཐོག་བོད་ཁམས་ཡོངས་རྫོགས་འཛིགས་སྐྱོང་དང་ཁྲིམས་ལུགས་གཅིག་གི་འོག་བཙུད་དགོས་པ་རེད། ཅེས་བཀོད།
འོན་ཀྱང། དེ་ནི་སྲིད་སྐྱོང་གི་འགྲེལ་བརྗོད་ལ་གཡས་སྐོར་གཡོན་སྐོར་བྱས་པ་ཙམ་ལས་མ་འདས། གསལ་བཤད་དགོས་དོན་གང་ཡང་མ་མཐོང། རྒྱུ་མཚན་ནི། ཁོང་གི་འགྲེལ་བརྗོད་ལ་འཁྲུལ་གཞི་གང་ཡང་ཡོང་རྐྱེན་མེད། ཕྱི་འབྲེལ་ལྷན་ཚོགས་ཀྱི་དྲ་རྒྱའི་ཐོག་གཏམ་བཤད་ཆ་ཚང་ཡིག་ཐོག་ཏུ་ཕབ་ལེན་བྱས་ཡོད་པ་དང། སྐུ་ཞབས་སེངྒེ་ལགས་ཀྱིས་རྒྱལ་ཁབ་ཀྱི་གནས་བབ་ཐོག་གི་རྒྱ་ནག་གི་ཆབ་སྲིད་ལམ་ལུགས་ཀྱི་སྐོར་གསུངས་མེད་པ་ཁ་གསལ་གཏིང་གསལ་རེད། སྐུ་ཞབས་སེངྒེ་མཆོག་གིས་ཁོ་རང་གིས་བོད་ནང་དམར་ཤོག་དབང་བསྒྱུར་ལ་ཁ་གཏད་བྱེད་ཀྱི་མེད་པ་དང་བོད་ནང་བོད་མི་ཚོར་མང་གཙོའི་ལམ་ལུགས་དགོས་འདུན་བྱེད་ཀྱི་མེད་པ་གསུངས་ཡོད།
བོད་མིའི་སྒྲིག་འཛུགས་ཀྱི་གསལ་བཤད་ནང། ༧གོང་ས་མཆོག་གིས་གལ་ཏེ་རྒྱ་ནག་གིས་བོད་མི་ཚོར་མིང་དོན་མཚུངས་པའི་རང་སྐྱོང་སྤྲད་ཚེ་རྒྱ་ནག་གི་སྤྱི་ཚོགས་རིང་ལུགས་ངོས་ལེན་བྱེད་ཆོག་ཅེས་གསུངས་ཡོད། ཅེས་ཟེར། སྤྱི་ཚོགས་རིང་ལུགས་ངོས་ལེན་གནང་པས་རང་སྐྱོང་ཅན་གྱི་བོད་དུ་དམར་ཤོག་དབང་བསྒྱུར་ངོས་ལེན་བྱེད་དགོས་པ་ཁྱབ་ཀྱི་མེད། རང་སྐྱོང་གི་གནད་དོན་ཡོངས་རྫོགས་རང་སྐྱོང་ས་ཁུལ་དང་ཐ་དད་རེད། དེར་བརྟེན། ༧གོང་ས་མཆོག་གི་འབོད་སྐུལ་གྱི་གསལ་བཤད་ཀྱིས་སྲིད་སྐྱོང་གི་ལངས་ཕྱོགས་ལ་ངོ་བསྟོད་ཆགས་ཐུབ་ཀྱི་མེད།
སྲིད་སྐྱོང་མཆོག་ནི་ཤེས་ཡོན་ཅན་དང་དབྱིན་སྐད་བྱང་ཆུབ་པ་ཞིག་ངོས་ནས་མི་དམངས་ལ་གཏམ་བཤད་དང་བཅར་འདྲི་མང་པོ་གནང་ཡོད། དེར་བརྟེན། ཁོང་གིས་རྗོད་བྱེད་ཚིག་ལ་ཡིད་ཟབ་དང་ནན་ཏན་གྱིས་བཀོལ་ངེས། ང་ཚོས་དཔག་ཐུབ་པ་ནི་སྐུ་ཞབས་སེངྒེ་ལགས་ཀྱིས་ཁ་བཤད་དོན་ལ་གནས་པ་དེ་རེད། འོན་ཀྱང། གསལ་བཤད་ནི་བོད་མིའི་སྒྲིག་འཛུགས་ཀྱི་གསར་འགོད་ལས་བྱེད་ཀྱིས་བྱས་པ་ལས་སེངྒེ་ཁོ་རང་ངོ་མས་གནང་མེད། བོད་མིའི་སྒྲིག་འཛུགས་ཀྱི་གསལ་བཤད་དང་སེངྒེའི་འགྲེལ་བརྗོད་ངོ་མར་གསར་འགོད་ལྷན་ཚོགས་ཀྱིས་དྲི་རྩད་བྱེད་མི་ཆོག

དཔྱད་ཞིབ།
སེངྒེའི་ཉེ་སྔོན་གྱི་འགྲེལ་བརྗོད་དེ་དག་བོད་མིའི་སྒྲིག་འཛུགས་ཀྱི་ཕྱི་ལོ་༢༠༠༨ལོའི་བསམ་འཆར་ཡིག་ཆ་དང་ཕྱི་ལོ་༢༠༡༠ལོའི་བསམ་འཆར་གྱི་འགྲེལ་བརྗོད་གཉིས་དང་ཕྱོགས་ཡོངས་ནས་འགྱུར་ལྡོག་ཅན་ཞིག་མིན་མོད། འོན་ཀྱང། ཁོང་གིས་དབུ་མའི་ལམ་གྱི་འགྲེལ་ཚུལ་དེ་བཞིན་ཡིག་ཆ་གཉིས་ནང་གི་དགོས་འདུན་ལས་ཀྱང་ཆག་ཡང་མང་དུ་བཏང་ཡོད། བོད་མིའི་སྒྲིག་འཛུགས་ཀྱི་འོས་འདེམས་བྱུང་བའི་མགོ་ཁྲིད་ཅིག་གིས་ཡོངས་གྲགས་སུ་བོད་མིའི་སྒྲིག་འཛུགས་ཀྱིས་བོད་ནང་བོད་མི་ཚོར་མང་གཙོའི་ལམ་ལུགས་རྩོད་ཀྱི་མེད་པ་དང་བོད་ནང་དམར་པོའི་དབང་བསྒྱུར་ལ་ངོས་ལེན་བྱས་པ་ཆེས་ཐེངས་དང་པོ་དེ་ཆགས་ཀྱི་ཡོད། དེ་ནི་བོད་མིའི་སྒྲིག་འཛུགས་ཀྱིས་ཁས་ལེན་བྱེད་དགོས་ལ་སེངྒེས་ཀྱང་ཕྱིར་འཐེན་བྱེད་རྒྱུ་ལྷག་མེད། ད་ཆ་མངོན་གསལ་དུ་འགྱུར་པ་ནི་བོད་མིའི་སྒྲིག་འཛུགས་ཀྱིས་དབུ་མའི་ལམ་གྱི་ཐོག་མའི་རྩ་དོན་ཞིག་ཟུར་སྐྱུར་བྱས་པ་རེད། ཡ་མཚན་པ་ཞིག་ནི་བཙན་བྱོལ་བོད་མི་༡༣༠༠༠༠ཙམ་ནང་འོས་འདེམས་བྱུང་པའི་མང་གཙོའི་སྒྲིག་འཛུགས་ཀྱིས་བོད་ནང་བོད་མི་ས་ཡ་༦གི་ཆེད་མང་གཙོའི་ལམ་ལུགས་ཟུར་སྐྱུར་བྱས་པ་དེ་རེད། ཡ་མཚན་ཞེས་པའི་ཚིག་ལས་ཀྱང་ཚིག་རྣོ་པ་ཞིག་བཀོལ་ཆོག
སྐུ་ཞབས་སེངྒེིའི་འགྲེལ་བརྗོད་ནང་བོད་མི་དམར་ཤོག་མགོ་ཁྲིད་ཀྱི་ཐད་རྒྱ་ནག་གི་ཨོ་བྷ་མ་ཞེས་པའི་རྩོད་རྙོག་དེ་འོད་ཟེར་ལགས་ཀྱིས་སྐྱར་ཟློས་བྱས་ཡོད། ཕྱི་ལོ་༢༠༡༠ལོར་TPRརྩོམ་སྒྲིག་པས་སེངྒེ་ལགས་ཀྱི་ཕྱི་ལོ་༢༠༠༨ལོར་ཝེལསོན་ལྟེ་གནས་སུ་གཏམ་བཤད་ཟིན་ཐོར་བཀོད་དོན། བོད་ཀྱི་འཐབ་རྩོད་ནི་རང་དབང་དང་རང་ཐག་རང་གཅོད་ནས་སྤྱི་དམངས་ཐོབ་ཐང་དང་སྲིད་གཞུང་ནང་འཐུས་མི་ཡོད་པ་ཞིག་ཏུ་འགྱུར་ལྡོག ཅེས་བརྗོད། དེ་ལྟར་ངེས་ན་དེ་ནི་༧གོང་ས་མཆོག་གིས་དབུ་མའི་ལམ་གྱི་དགོངས་དོན་སྟེ། ལོགས་སུ་བོད་རིགས་རང་སྐྱོང་དང་ཐ་དད་ཆགས་ཀྱི་ཡོད།
དབུ་མའི་ལམ་ནི་བོད་མི་ཚོར་བོད་ནང་རང་བཙན་དང་བོད་ནང་བཟོད་དཀའ་བའི་གནས་བབ་གཉིས་ཀྱི་བར་རྒྱུ་མཚན་ལྡན་པའི་ནང་འགྲིགས་ཤིག་རེད། དེས་རྒྱ་ནག་གིས་བོད་དུ་མངའ་དབང་ཡོད་ཐོག་བོད་མི་ཚོེར་སྤྱི་ཚོགས་དང། རིག་གཞུང་དང། ཆོས་ཀྱི་ཐོབ་ཐང་འགན་སྲུང་ཡོད་པ་དང་རང་སྐྱོང་གི་གནས་བབ་སྤྲོད་པའི་ཐབས་ལམ་ཞིག་ཡིན། མང་གཙོའི་ལམ་ལུགས་ཀྱི་འོས་འདེམས་བྱས་པའི་གྲོས་ཚོགས་དང་སྲིད་སྐྱོང་ཡོད་པ་ཞིག་ནི་དབུ་མའི་ལམ་གྱི་མ་ཡིག་གི་ཆ་ཤས་རེད།
ཕྱི་ལོ་༡༩༩༧ལོར་བཙན་བྱོལ་ནང་བསམ་ཤོག་བསྡུ་ལེན་གྱི་ནང་བརྒྱ་༦༤ཡིས་༧གོང་ས་མཆོག་གི་དགོངས་གཞི་ཡག་ཤོས་ཡིན་པར་རྒྱབ་སྐྱོར་བྱས་ཡོད། དེའི་གཞི་རྩའི་ཆ་ཤས་སུ་དབུ་མའི་ལམ་གྱིས་བོད་ནང་མང་གཙོའི་ལམ་ལུགས་ཀྱི་འོས་འདེམས་ཀྱི་སྲིད་གཞུང་དགོས་འདུན་བཏོན་ཡོད། ཕྱི་ལོ་༢༠༠༨ལོར་དམིགས་བསལ་ཚོགས་ཆེན་རྗེས་སུ་གྲོས་ཚོགས་སུ་སྤྱི་མོས་ཀྱིས་དབུ་མའི་ལམ་ལ་རྒྱབ་སྐྱོར་ཡོད་པའི་གྲོས་ཆོད་བཞག སླར་ཡང་གྲོས་ཚོགས་དང། དམིགས་བསལ་ཚོགས་ཆེན་འཛུལ་ཞུགས་པ་དང། མི་དམངས་ཀྱིས་ལྟ་སྣང་ལ་དབུ་མའི་ལམ་གྱི་སྲིད་བྱུས་ནང་བོད་ནང་མང་གཙོའི་ལམ་ལུགས་དགོས་འདུན་ཚུད་ཡོད་ཤག་བྱས་ཡོད།
འོན་ཀྱང། ད་ལྟའི་ཆ་ལ་སྲིད་སྐྱོང་མཆོག་གིས་བོད་རིགས་རང་སྐྱོང་ནི་ཤང་ཀང་ལྟ་བུའི་དུས་ཡུན་ངེས་ཅན་༼ལོ་༥༠༽ཞིག་ལ་འགྲེལ་བརྗོད་གནང་ཡོད། ང་ཚོས་ཤེས་ཚོད་བྱས་ན། དེ་ནི་བོད་མིའི་སྒྲིག་འཛུགས་ཀྱི་ལས་ཀྱི་སྣེ་མོ་པ་ཞིག་གིས་བོད་ལ་རང་སྐྱོང་ནི་དུས་ཡུན་ངེས་ཅན་ཞིག་ཡིན་པའི་འགྲེལ་བརྗོད་བྱས་པ་ཆེས་ཐོག་མ་དེ་ཆགས་ཀྱི་ཡོད། ཕྱི་༢༠༠༨ལོའི་བསམ་འཆར་དང་ཕྱི་ལོ་༢༠༡༠ལོའི་བསམ་འཆར་གྱི་འགྲེལ་བརྗོད་ནང་དུས་ཡུན་ངེས་ཅན་ཡིན་པ་བཀོད་མེད། ད་ནས་བོད་མིའི་སྒྲིག་འཛུགས་ཀྱིས་རྩོད་རྒྱུ་བོད་རིགས་རང་སྐྱོང་ཡིན་ནའང་དེ་ནི་དུས་ཡུན་ངེས་ཅན་ཞིག་ལ་ངོས་ལེན་བྱེད་ངེས།
སྐུ་ཞབས་སེངྒེ་མཆོག་གིས་བོད་ནང་དམག་དཔུང་འགྲེམ་འཇོག་ནི་རྒྱ་ནག་གི་རང་འདོད་ལྟར་བྱེད་ཆོག་པར་ཁས་ལེན་བྱས། དེའི་དོན་ནི་བོད་མཐོ་སྒང་དུ་དྲག་དམག་ཇི་ཙམ་དང་ཅི་འདྲ་ཞིག་འཇོག་གི་ཐག་གཅོད་ནི་བོད་གཞུང་ལ་མེད་པར་བཅིངས་གྲོལ་དམག་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཐག་གཅོད་བྱེད་ཅེས་པའོ།། སེངྒེའི་འགྲེལ་བརྗོད་ཀྱིས་ཕྱི་༢༠༡༠ལོའི་བསམ་འཆར་གྱི་འགྲེལ་བརྗོད་ནང་བོད་ནས་བཅིངས་གྲོལ་དམག་ཕྱེར་འཐེན་བྱེད་དགོས་པའི་གྲོས་དོན་བཏོན་མེད་པ་ཙམ་ལས་ཀྱང་ལྷག་ཚོད་ཀྱི་ཆག་ཡང་བཏང་ཡོད།

སྲིད་སྐྱོང་མཆོག་གིས་ཉེ་སྔོན་གཏམ་བཤད་ཀྱིས་ལན་ལས་དྲི་བ་མང་བ་ཐོན་ཡོད། གལ་ཏེ་བོད་དབང་ཆ་གཅིག་བསྔུ་དམར་ཤོག་གིས་འཛིན་སྐྱོང་བྱས་ཚེ་ཇི་ལྟར་བྱས་ནས་བོད་མི་ཚོས་སོ་སོའི་རང་སྐྱོང་འགན་སྲུང་བྱེད་སྲིད་དམ། བོད་ནང་དུ་ཚོགས་པའི་མགོ་གཙོ་ཚང་མ་བོད་རིགས་ཡིན་པའི་དབང་དུ་བཏང་ཡང་ཅིའི་ཕྱིར་ཁོ་ཚོས་དབུས་གཞུང་གི་མགོ་གཙོའི་ལམ་སྟོན་གྱི་རྗེས་སུ་མི་འཇུག་པ་དེ་འདྲ་ཡོང་མི་སྲིད་པ་རེད། རྒྱུ་མཚན་ནི་སྲིད་གཞུང་དང་ཚོགས་པའི་ལས་ཀྱི་སྣེ་མོ་བ་ཚང་མ་པེ་ཅིན་ནས་བསྐོ་བཞག་བྱེད་ངེས་རེད། བོད་རིགས་དམར་ཤོག་འགོ་ཁྲིད་ནི་རང་ཁ་རང་གསོ་བྱེད་མཁན་མཉམ་ལས་པ་ལེགས་མཆོག་དང་སྲིད་ཐར་ལྟ་བུ་ཡིན་ངེས་སམ། ཚོགས་པའི་ནང་གོ་གནས་སྤར་རྒྱུ་དང་ལས་འཁུར་རྣམས་དབུས་ལྷན་ཁང་གིས་ཆོག་མཆན་གཞིར་བཞག་ཡིན། གལ་ཏེ་བོད་རིགས་ཚོགས་མི་གནས་སྤོ་དང་གོ་གནས་ཐོབ་པར་དབུས་ཀྱི་སྲིད་བྱུས་དང་སྒྲིག་གཞི་གཞི་ལ་བརྩི་སྲུང་བྱེད་དགོས།
དམར་ཤོག་ཚོགས་པས་འདོད་པའི་ཆོས་མེད་རིང་ལུགས་ཐད་ཅི་བྱེད་དམ། བོད་རང་སྐྱོང་ལྗོངས་ཀྱི་བོད་རིགས་ཚོགས་མི་ཚོས་ཚོགས་པར་འཛུལ་པར་ཆོས་རྒྱབ་སྐྱུར་བྱེད་དགོས་སམ། ཇི་ལྟར་བྱས་ནས་མི་ཞིག་དམར་ཤོག་པ་དང་ནང་པ་གཉིས་ཀ་བྱེད་ཐུབ་བམ་རྒྱུ་མཚན་ནི་དབུས་ཀྱི་ལྟ་ཚུལ་ནི་ཆོས་མེད་རེད། བོད་རིགས་དམར་ཤོག་ཚོགས་པས་དགོན་སྡེ་ཁག་ལ་དོ་དམ་དང་གྲྭ་བཙུན་ཚོར་རྒྱལ་གཅེས་ཆོས་གཅེས་ཀྱི་སློབ་གསོ་ལག་བསྟར་གྱིས་ཁོ་ཚོས་རྒྱལ་ཁབ་དང་ཚོགས་པར་དགའ་མོས་ཡོད་པ་ངེས་བརྟན་བྱེད་དམ། བོད་རིགས་དམར་ཤོག་ཚོགས་པས་དགོན་སྡེ་ཁག་ནང་དམངས་གཙོའི་བཅོས་བསྒྱུར་ཚོགས་ཆུང་བཙན་འཛུགས་དང་གཞན་སྤྱི་ཚོགས་ཚོགས་སྡེ་ཚང་མའི་ནང་དེས་ཐེ་གཏོགས་ཡོད་པ་བྱེད་དམ།

དེའི་དོན་ནི་བོད་རིགས་ཚོས་ཚོགས་པ་གཞན་བཙུགས་མི་ཆོག་པ་དང་གལ་ཏེ་བཙུགས་ན་འཛིན་བཟུང་བཀག་ཉར་བྱེད་ཅེས་པ་ཡིན་ནམ། ཕྱོགས་འགལ་ཚོགས་པ་ནི་དེང་སྐབས་རྒྱ་ནག་ནང་ཁྲིམས་འགལ་ཡིན་པ་དང་དམར་ཤོག་མཇུག་བསྡུས་དགོས་པའི་འབོད་སྒྲ་སྒྲོག་མཁན་དག་བཙོན་འཇུག་བྱེད་ཀྱི་ཡོད། དམར་ཤོག་ཚོགས་པར་ངོ་རྒོལ་བྱེད་པ་དང་བོད་རང་བཙན་དང་མང་གཙོ་དོན་གཉེར་བྱེད་པའི་སྐོར་ལ་ཅི་བྱེད་དམ། སློབ་དཔོན་ཁུ་ཧན་གྱིས་ཁོང་གི་དྲི་བའི་ནང་སྨྲ་བརྗོད་རང་དབང་ཉུང་མཐར་ཐེངས་གསུམ་ཙམ་གླེང་སློང་གནང་སོང་མོད་ཀྱང་སྐུ་ཞབས་སེངྒེས་མུ་མཐུད་ནས་གནད་དོན་དེ་གཡོལ་བྱོལ་བྱས་སོང། བོད་རིགས་དམར་ཤོག་ཚོགས་པའི་མགོ་གཙོ་ཚོས་བོད་མི་ཚོས་ཚོགས་པའམ་རྒྱ་ནག་གི་དབང་བསྒྱུར་ལ་ངོ་རྒོལ་བྱེད་བཅུག་སྲིད་དམ།
གལ་ཏེ་རྒྱ་ནག་གིས་བོད་རང་བཙན་ངོ་རྒོལ་གྱིས་རྒྱ་ནག་གི་མངའ་དབང་ལ་དོ་ཕོག་བཟོས་ཀྱི་འདུག་ཅེས་བོད་སྲིད་གཞུང་གིས་ངོ་རྒོལ་པ་རྣམས་བཀག་ཉར་བྱེད་དགོས་པ་དང་གལ་སྲིད་བོད་སྲིད་གཞུང་གིས་ཁས་ལེན་མ་བྱས་ཚེ་བཅིངས་གྲོལ་དམག་གིས་དྲག་གནོན་བྱེད་རྒྱུའི་སྡིགས་ར་བྱས་ཚེ་ཅི་ཞིག་བྱེད་དམ། བོད་རིགས་དམར་ཤོག་གིས་འཛིན་སྐྱོང་བྱེད་པའི་བོད་སྲིད་གཞུང་གིས་ཚོགས་པར་འགན་འཁྲི་དང་ལེན་བྱེད་ཅིང་སོ་སོའི་མི་སེར་གྱི་ཐོག་གཉའ་གནོན་བྱེད་དམ། དེ་ནི་ཅི་བྱ་གཏོལ་མེད་ཀྱི་གཞན་སྐུལ་སྲིད་དབང་ཡིན་པ་དང་གྲུབ་འབྲས་ནི་སྤྱིར་བཏང་ནས་ཡིད་དུ་མི་འོང་པ་ཞིག་རེད།

ད་ལྟའི་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་དབུས་གཞུང་དང། ཞིང་ཆེན་ཡོངས་དང། རང་སྐྱོང་ཁུལ་དང། ས་གནས་སྲིད་གཞུང་དང། དམག་དོན་དང། ཁྲིམས་ལུགས་དང། ཉེན་རྟོག་པ་དང། ཤེས་ཡོན་ལྟེ་གནས་ཆེ་ཁག་དང། རྒྱལ་ཁབ་ཀྱི་གསར་བསྒྱུར་དང་སྙན་འཕྲིན། གཞུང་གི་སྟངས་འཛིན་འོག་གི་ཚོང་ལས་སྒྲིག་འཛུགས་ཆེ་ཁག་བཅས་དམར་ཤོག་ཚོགས་པས་སྟངས་འཛིན་བྱེད་ཀྱི་ཡོད། ཚོགས་པས་གསར་བསྒྱུར་དང་དྲ་རྒྱ། གློག་སྙན་དང་སྙན་འཕྲིན་བཅས་ལ་ཞིབ་བཤེར་བྱེད་ཀྱི་ཡོད། རྒྱ་རིགས་མཁས་པ་དང་ཕྱོགས་འགལ་པ་མང་པོས་ཆབ་སྲིད་དབང་ཆ་གཅིག་བསྡུ་ཚོགས་པར་སྐྱོན་བརྗོད་བྱེད་ཀྱི་ཡོད། ནོ་བྷེ་ཞི་བདེའི་གཟེངས་རྟགས་ཐོབ་མཁན་ལེའུ་ཞོ་པའོ་ཡིས་རྒྱ་ནག་ནང་མང་གཙོའི་བཅོས་བསྒྱུར་གྱི་དགོས་འདུན་བཏོན་པར་ལོ་ངོ་བཅུ་གཅིག་གི་བཙུན་འཇུག་ཁྲིམས་ཆད་ཕོག དབང་ཆ་གཅིག་བསྡུ་ཚོགས་པའི་དཀའ་ངལ་ནི་དོན་གཉེར་པ་དཀྱིལ་མ་ཞིག་ལའང་མངོན་གསལ་ཆགས་ཡོད། དཔེན་མཚོན་ཆོག་པའི་དབང་ཆ་གཅིག་བསྡུས་སྲིད་གཞུང་འོག་གི་རང་སྐྱོང་ཡིན་བཞིན་པ་དེ་འདྲ་ང་ཚོར་རྒྱུས་མངའ་གང་ཡང་མེད། འོན་ཀྱང། སྲིད་སྐྱོང་མཆོག་གིས་དབང་ཆ་གཅིག་བསྡུ་སྲིད་གཞུང་གི་འོག་བོད་རིགས་མིང་དོན་མཚུངས་པའི་རང་སྐྱོང་ལ་ཡིད་ཆེས་བྱེད།
འགལ་ཟླའི་རང་བཞིན་ནི། སྲིད་སྐྱོང་གི་ཟླ་༥ཚེས་༨ཉིན་གྱི་འགྲེལ་བརྗོད་ཀྱི་རྗེས་སུའང་བོད་མིའི་སྒྲིག་འཛུགས་ཀྱིས་ད་དུང་ཡང་མང་གཙོའི་ལམ་ལུགས་ཀྱི་རིན་ཐང་སྐོར་བརྗོད་ཀྱི་འདུག ཕྱི་ལོ་༢༠༡༣ཟླ༥ཚེས་༣༡ཉིན་བྷར་ལེན་དུ་ཡོ་རོབ་༧གོང་ས་མཆོག་གི་དམིགས་བསལ་སྐུ་ཚབ་སྐལ་བཟང་རྒྱལ་མཚན་ལགས་ཀྱིས་གཏམ་བཤད་ནང་བརྗོད་དོན། དེང་སྐབས་གཉའ་གནོན་དང་སྡུག་སྦྱོང་མྱོང་མཁན་གྱི་མི་རིགས་ཀུན་གྱི་ཐུན་མོང་གི་མངོན་འདོད་ནི་འགྲོ་བ་མིའི་ཐོབ་ཐང་དང་། མང་གཙོ་དང་ཁྲིམས་ཀྱི་དབང་བསྒྱུར་རེད། ཅེས་བརྗོད། བོད་མིའི་སྒྲིག་འཛུགས་ཀྱི་མགོ་གཙོ་ཚོས་མང་གཙོ་ནི་མི་ཚང་མའི་མངོན་འདོད་རེད། འོན་ཀྱང། བོད་མིའི་མངོན་འདོད་མ་རེད་ཅེས་བརྗོད་ཀྱི་ཡོད་པ་རེད་དམ། ཅིའི་ཕྱིར་བོད་ཁོ་ན་མང་གཙོའི་ལམ་ལུགས་ཀྱི་གཞི་རྩ་ལས་ཟུར་སྐྱུར་བྱེད་དགོས་པ་རེད་དམ། གལ་ཏེ་བོད་མིའི་སྒྲིག་འཛུགས་ཀྱི་མགོ་གཙོ་ཚོས་བོད་ནང་དམར་ཤོག་དབང་བསྒྱུར་ངོས་ལེན་བྱེད་འོས་པ་ཞིག་ཡིན་པ་བརྗོད་ཀྱི་ཡོད་ན། ཅིའི་ཕྱིར་བོད་མིའི་སྒྲིག་འཛུགས་ཀྱིས་དམར་པོའི་རིང་ལུགས་དང་རྒྱ་ནག་དམར་ཤོག་ཚོགས་པའི་རིན་ཐང་ལ་བསྟོད་བསྔགས་མི་བྱེད་པ་རེད་དམ། དེས་དེང་སྐབས་བོད་མིའི་སྒྲིག་འཛུགས་ཀྱི་མགོ་ཁྲིད་ཚོས་དབུ་མའི་ལམ་གྱི་དམིགས་ཚད་ཇི་ལྟར་འཛིན་གྱི་ཐད་ཐེ་ཚོམ་དང་ནང་འགལ་ཡོད་པ་མཚོན་གྱི་ཡོད།

མཇུག་བསྡུས།
དབུ་མའི་ལམ་གྲོས་འཆར་གྱི་བོད་ལ་མང་གཙོའི་ལམ་ལུགས་ཀྱི་མིང་དོན་མཚུངས་པའི་རང་སྐྱོང་དང་དྲག་དམག་མེད་པ་ནས་མང་གཙོའི་ལམ་ལུགས་མེད་ཅིང་དམར་ཤོག་དབང་བསྒྱུར་དང། དུས་ཡུན་ངེས་ཅན་གྱི་རང་སྐྱོང་དང། བོད་མཐོ་སྒང་དུ་དྲག་དམག་འགྲེམ་འཇོག་ནི་རྒྱ་ནག་གི་རང་འདོད་ཡིན་པ་བཅས་སུ་གྱུར་ཟིན། ཕྱི་ལོ་༡༩༨༨ནས་དབུ་མའི་ལམ་ལ་དོན་གནད་ཆེན་པོས་སྒྱུར་བཅོས་བཏང་ཡོད་ཀྱང་ཉེ་སྔོན་གྱི་མང་གཙོ་ཟུར་སྐྱུར་བྱས་པ་ནི་གླེང་སློང་བྱེད་དགོས་པའི་གནད་དོན་གལ་ཆེན་ཞིག་རེད། གཞིས་བྱེས་གཉིས་ཀྱི་བོད་མི་ཚོས་ད་ལྟའི་དབུ་མའི་ལམ་གྱི་གནས་བབ་ལ་ངོས་འཛིན་བྱེད་དང་མི་བྱེད་ལྟ་རྒྱུ་ལྷག་ཡོད་རེད།

མ་རྩོམ་གྱི་དྲ་ཐགhttp://www.phayul.com/news/article.aspx?id=33551&t=1