བྲག་རྗེ་སྐལ།
མགོ་ལ་སྐྲ་ལོ་མེད་ཀྱང་སྐྱེ་རྒྱུ་ཡོད།།
ཁ་ན་ཧིན་དབྱིན་མེད་ཀྱང་སྦྱོང་རྒྱུ་ཡོད།།
ཡུལ་སྲོལ་འགྲོ་སྟངས་མེད་ཀྱང་གོམས་རྒྱུ་ཡོད།།
ཀ་ཅ་གླེན་ལྐུགས་གསུངས་རྐྱང་མ་གནང་རོགས།།
ལུས་ལ་ཤམ་ལོ་གྱོན་ཡང་མི་ཞིག་ཡིན།།
ཡུལ་དགོན་དབེན་པར་འགྲིམ་ཡང་སེམས་ཤིག་ཡོད།།
འདུལ་སྡོམ་ཁྲིམས་སུ་གནས་ཀྱང་འདང་ཞིག་ཡོད།།
བསྟན་བཤིག་ཞབས་འདྲེན་གསུངས་རྐྱང་མ་གནང་རོགས།།
འཁོར་བར་མེ་འོབས་ལྟ་བའི་འདྲེན་བྱེད་མེད།།
སྣོད་བཅུད་ལྷ་རུ་གཟིགས་པའི་དག་སྣང་མེད།།
བྱིན་རླབས་དངོས་གྲུབ་སྩོལ་བའི་ནུས་མཐུ་མེད།།
གསོལ་འདེབས་ཐལ་མོ་དེ་ཡང་མ་སྦྱར་རོ།།
ངོ་དེབ་སྐྲ་སེར་སྒྲེན་མོར་བལྟས་མྱོང་མེད།།
འཕྲིན་ཕྲན་རྒྱ་མོའི་འཁུན་སྒྲར་ཉན་མྱོང་མེད།།
རོང་མཚམས་འཆལ་མོའི་ཨང་གྲངས་ལེན་མྱོང་མེད།།
ཁྲེལ་མེད་བླ་བཙོང་དེ་འདྲ་མ་གསུངས་རོགས།།
གྲོང་ཁྱེར་ཞབས་བྲོ་མཚན་ཚོགས་འགྲིམ་མྱོང་མེད།།
འབྲོག་ཁུལ་སྦྲ་སྒོ་ཁྱི་ཁ་གཤགས་མྱོང་མེད།།
རྩ་གསེང་ཤིང་གསེང་མྱུལ་ནས་སྡོད་མྱོང་མེད།།
འཁྲབ་ཏོ་ཡ་མེད་ཟེར་ནས་མ་དམོད་རོགས།།
ལུས་ཀྱི་ལང་ཚོའི་ན་ཚོད་སྨིན་ནས་ཡོད།།
ཤ་རུས་ཁྲག་དང་རྩ་ཁམས་དར་ནས་ཡོད།།
སེམས་པ་དུང་བ་དམར་པོས་ཚོས་ནས་ཡོད།།
མིག་ལོག་མཆུ་ཚུགས་བྱེད་རྐྱང་མ་གནང་རོགས།།
རྩེ་རོགས་མར་ལོ་འདྲ་ཞིག་བསམ་ནས་ཡོད།།
བརྩེ་བ་མར་ཁུ་འདྲ་ཞིག་བསྐྱིལ་ནས་ཡོད།།
སྙིང་གཏམ་འོ་མ་འདྲ་ཞིག་བསྙལ་ནས་ཡོད།།
ཁ་ཡག་མགོ་བདེ་ལབ་ནས་མ་སྡུག་རོགས།།