ཟླ་ཀླུང་།
ཞེན་པས་གང་ཟག་ཚང་མ་དབང་སྒྱུར་བྱེད་ཀྱི་ཡོད་པས་ན་ང་ཚོ་ཡང་ལོས་ཡིན། ཆོས་སྲིད་རིག་གཞུང་གི་ཚོགས་འདུ་མང་པོ་ཞིག་ཏུ་ང་ཁྱོད་ཀྱི་རྩོད་གླེང་སྔར་བློ་ཡི་ཡུལ་ན་འཁོར་མྱོང་མེད་པ་བྱེད་དགོས་ཐུག་གིན་ཡོད་པའི་སྟབས་ཀྱིས་ངའི་ཆོས་རྒྱུད་ཀྱི་ཞེན་པ་ཡང་སྔར་ལས་ཤུགས་ཆེ་རུ་སོང་བ་ལས་ཆུང་དུ་སོང་མེད། ཡིན་ནའང་། ང་ཚོ་སྤྱི་ཚོགས་ཀྱི་ནང་དུ་འཚོ་གནས་བྱ་བ་ལས་ཐབས་གཞན་མེད་པ་དེས། ཞེན་པ་རྐྱང་པའི་རྟོག་འཆར་དང་། སྤྱི་ཚོགས་སྟབས་སྟུན་གྱིས་སྡོད་དགོས་ཐུག་པ་ཁྱོན་ནས་མི་འདྲ་བ་དང་། ལྟ་བ་ལྷ་དང་མཉམ་ཡང་སྤྱོད་པ་མི་དང་སྟུན་དགོས་པའི་བསླབ་བྱ་དག་ལ་ངེས་ཤེས་གསལ་པོ་སྐྱེས་པས་གཞན་སྟུན་གྱི་སྤྱོད་པ་ལ་ཅུང་མཁས་སུ་སོང་བ་དེས་ག་དུས་ཡིན་ནའང་གཤིས་སྤྱོད་སྤྱི་ཚོགས་དང་སྟུན་དགོས་པའི་སྐད་ཆ་བཤད་ཀྱིན་ཡོད། ཁེ་ཕན་ཆུང་བའི་རྙོག་ཟིང་གིས་མི་ཚེའི་བྱ་བཞག་ལ་བར་ཆད་ཆེན་པོ་བྱེད་པས་ཆེ་ལེན་ཆུང་སྐྱུར་ནམ་ཡང་ནོར་མི་ཉེན།
ཕྱོགས་ཞེན་གྱི་ཐལ་མཐར་ལྷུང་ན་ཡག་པོ་མེད། བྷེན་ལག་ཌན་གྱིས་ཀྱང་ཁོའི་བུ་རྣམས་ལ་ཁོའི་ལས་མཇུག་སྐྱོང་མི་རུང་བ་དང་། ཁོའི་ཚོགས་པའི་བྱ་སྤྱོད་ལེགས་བཅོས་མ་བཏང་ན་ཁ་ཆེའི་སྤྱི་ཚོགས་ནས་ཀྱང་མཐོང་སྣང་ཡག་པོ་མེད་པའི་ཡི་གེ་བྲིས་ཡོད། ང་ཚོའི་ནང་ནས་ཤེས་འཇོན་ང་མི་ཆེ་ནའང་སྤྱི་ཚོགས་ཀྱི་ནང་དུ་དངོས་སུ་ཞུགས་པའི་གོ་སྐབས་ང་མང་བ་དེས་སྤྱི་ཚོགས་ལ་རྒྱུས་མངའ་ང་ཆེ་བ་ལྟ་བུར་འདུག་ལ། ང་ཚོ་ནི་འདི་ནས་བྱང་ཆུབ་ཀྱི་བར་དུ་སྐྱིད་སྡུག་མཉམ་མྱོང་བྱེད་དགོས་པའི་མཆེད་པོ་དམ་ཚིག་ཅན་རྐྱང་ཡིན་ཅིང་། ང་ཚོའི་ནང་ནས་ལོ་ན་ང་ཆེ་བའི་སྟབས་ཀྱིས་ཁྱོད་ཚོ་ནམ་ཡང་ཉམ་ངའི་གཡང་དུ་ལྷུང་མ་སོང་བ་ཞིག་བྱ་རྒྱུ་ནི་ངའི་འགན་འཁྲི་ཡིན་པ་ཤེས་པས་གཟབ་གཟབ་དགོས་པའི་སྐད་ཆ་བཤད་པ་ལ་ཐུགས་སུན་མ་གནང་། ད་དུང་ཡང་མུ་མཐུད་ནས་བཤད་རྒྱུ་ལས་མཚམས་འཇོག་བྱ་ཆོག་པ་ཞིག་མིན་པ་ཤེས་དགོས།
དངོས་བདེན་རེད། གང་ཟག་ཁ་ཅིག་གིས་སོ་སོའི་ཆོས་ལུགས་དང་སོ་སོའི་བླ་མ་ལ་བསྟོད་བསྔགས་དང་། གཞན་གྱི་བླ་མ་དང་ཆོས་ལུགས་ལ་སྐྱོན་བཙུགས་སྣ་ཚོགས་བྱས་ཏེ། སོ་སོའི་བླ་མ་སྐྱོན་ཅན་ཡིན་ནའང་སྦས་གང་ཐུབ་བྱས། སོ་སོའི་ཆོས་བརྒྱུད་སྤེལ་གང་ཐུབ་དང་། གཞན་གྱི་ཆོས་བརྒྱུད་རྩ་མེད་བཏང་རྒྱུའི་བསམ་མནོ་ལྡན་ན། དེ་ནི་སྦན་ལ་དྷན་དང་ཁྱད་པར་ཅི།