གྲུབ་མཐའི་སྡོམ་ཚིག་ཤེས་རབ་སྒོ་འབྱེད་གསེར་གྱི་ལྡེ་མིག

ཀླུ་སྨྱོན།

༄༅། །བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །
གྲུབ་མཐའི་གཞུང་ལུགས་སྦྱངས་པ་མཐར་སོན་ཏེ། །གྲུབ་མཐའི་དེ་ཉིད་ཀུ་ཤའི་རྩེ་མོ་བཞིན། །གྲུབ་མཐའ་ཤེས་འདོད་དག་ལ་སྟོན་མཛད་པའི། །གྲུབ་མཐའ་མཁན་པོ་དེ་དག་སྤྱི་བོས་མཆོད། །གངས་རིའི་ཁྲོད་ཀྱི་ལུང་རིགས་སྨྲ་བའི་དབུས། །འཇིགས་མེད་གདོང་ལྔའི་སྒྲ་དབྱངས་སྒྲོགས་མཁས་པ། །མཁས་པའི་དབང་པོའི་གྲུབ་མཐའ་རིན་ཆེན་ཕྲེང་། །སྡོམ་ཚིག་དར་གྱི་སྲད་བུར་བདག་གིས་འདྲེན། །དེ་ཡང་ཚེ་འདིའི་རྙེད་དང་བཀུར་སྟི་དང་། །ཚིགས་སུ་བཅད་པ་དག་ལ་མི་བལྟ་ཞིང་། །སྙིང་ནས་གྲོལ་བ་དོན་གཉེར་གང་ཟག་གིས། །བདག་ཏུ་གྲུབ་པ་མེད་པའི་ལྟ་བ་ཆེ། །ཁོང་དུ་ཆུད་པའི་ཐབས་ལ་འབད་དགོས་ཏེ། །ཟབ་མོའི་ལྟ་དང་བྲལ་ན་བྱམས་པ་དང་། །སྙིང་རྗེ་བྱང་ཆུབ་སེམས་ལ་ཅི་ཙམ་ཞིག །གོམས་པར་བྱས་ཀྱང་སྡུག་བསྔལ་གསུམ་པོ་ཡི། །རྩ་བ་དྲུངས་ནས་འབྱིན་པར་མི་ནུས་ཕྱིར། །འཇམ་དབྱངས་རྣམ་སྤྲུལ་རྗེ་བཙུན་ཙོང་ཁ་པས། །གནས་ལུགས་རྟོགས་པའི་ཤེས་རབ་མི་ལྡན་ན། །ངེས་འབྱུང་བྱང་ཆུབ་སེམས་ལ་གོམས་བྱས་ཀྱང་། །སྲིད་པའི་རྩ་བ་གཅོད་པར་མི་ནུས་པས། །དེ་ཕྱིར་རྟེན་འབྲེལ་རྟོགས་པའི་ཐབས་ལ་འབད། །དེས་ན་ལྟ་བའི་གོལ་ས་སྤང་བ་དང་། །བདག་མེད་ཕྲ་རགས་རིམ་པ་ངེས་བྱའི་ཕྱིར། །རང་དང་གཞན་གྱི་གྲུབ་མཐའི་རྣམ་བཞག་ནི། །མདོར་བསྡུས་བརྗོད་པར་བྱ་བ་འདི་ལ་གཉིས། །སྤྱིར་བསྟན་དང་ནི་བྱེ་བྲག་བཤད་པའོ། །དང་པོ་གྲུབ་མཐའ་ཞེས་པའི་ཐ་སྙད་འདི། །རང་བཟོ་མིན་ཏེ་ལུང་ལས་གསུངས་པའི་ཕྱིར། །ཇི་སྐད་ལང་ཀར་གཤེགས་པའི་མདོ་སྡེ་ལས། །ང་ཡི་ཆོས་ཚུལ་འདི་ལ་རྣམ་གཉིས་ཏེ། །བསྟན་པ་དང་ནི་གྲུབ་མཐའི་རྣམ་བཞག་གོ །བློ་དམན་བྱིས་པ་རྣམས་ལ་བསྟན་པ་བཤད། །བློ་ལྡན་རྣལ་འབྱོར་བ་ལ་གྲུབ་མཐའ་འོ། །ཞེས་གསུངས་གང་ཟག་དབྱེ་ན་རྣམ་གཉིས་ཏེ། །གྲུབ་མཐས་བློ་མ་བསྒྱུར་དང་བསྒྱུར་པའོ། །དང་པོ་གཞུང་ལུགས་གང་ལའང་མ་སྦྱངས་པར། །མ་བརྟགས་མ་དཔྱད་ལྷན་སྐྱེས་བསམ་བློ་ཡིས། །ཚེ་འདིའི་བདེ་བ་དོན་དུ་གཉེར་བའོ། །གཉིས་པ་གཞུང་ལུགས་མང་པོར་སྦྱངས་བྱས་ཏེ། །གཞི་ལམ་འབྲས་བུ་གསུམ་གྱི་རྣམ་བཞག་ནི། །གང་ཟག་རང་གི་བློ་ངོར་གྲུབ་པའི་ཚུལ། །ལུང་རིགས་ལམ་ནས་སྨྲ་བར་བྱེད་པ་སྟེ། །གྲུབ་མཐའི་སྒྲ་བཤད་འགྲེལ་བཤད་ཚིག་གསལ་ལས། །གྲུབ་པའི་མཐའ་སྟེ་ལུང་དང་རིགས་པ་ཡིས། །རབ་ཏུ་བསྟན་པར་རང་གི་འདོད་གྲུབ༷་ཅིང་། །དེ་ལས་ཕར་འགྲོ་མེད་པས་མཐ༷འ་ཞེས་གསུངས། །ལུང་དང་རིགས་པ་གང་རུང་ལ་བརྟེན་ནས། །ཐག་བཅད་གྲུབ་པའི་དམ་བཅའི་དོན་དེ་ཉིད། །རང་གི་བློ་ངོར་ངང་ཚུལ་དེ་ཉིད་ལས། །གཞན་དུ་འདོར་བ་མེད་པས་གྲུབ་མཐར་བརྗོད། །
དེ་ལ་ནང་གསེས་དབྱེ་བ་གཉིས་ཡོད་དེ། །ཕྱི་རོལ་པ་དང་ནང་པའི་གྲུབ་མཐའ་འོ། །ཕྱི་བ་ནང་པ་ཙམ་གྱི་ཁྱད་པར་ནི། །སྙིང་ཐག་པ་ནས་དཀོན་མཆོག་རྣམ་གསུམ་ལ། །སྐྱབས་སུ་འགྲོ་བའི་གང་ཟག་ནང་པ་དང་། །དཀོན་མཆོག་གསུམ་ལ་བློ་རྩེ་མི་གཏོད་པར། །འཇིག་རྟེན་ལྷ་ལ་སྐྱབས་འཚོལ་ཕྱི་རོལ་པ། །ཕྱི་ནང་གྲུབ་མཐའ་སྨྲ་བའི་ཁྱད་པར་ནི། །སྟོན་དང་བསྟན་པ་ལྟ་བ་གསུམ་གྱིས་འབྱེད། །དེ་ཡང་རང་སྡེ་རྣམས་ཀྱི་སྟོན་པ་ནི། །སྐྱོན་ཀུན་ཟད་ཅིང་ཡོན་ཏན་རྫོགས་པ་དང་། །བསྟན་པ་སེམས་ཅན་འཚེ་བ་མེད་པ་དང་། །ལྟ་བ་རྟག་པ་གཅིག་བུ་རང་དབང་གི །བདག་གིས་སྟོང་བར་འདོད་པའི་ཁྱད་པར་གསུམ། །གཞན་སྡེ་རྣམས་ནི་དེ་ལས་ཟློག་པ་སྟེ། །སྟོན་པ་སྐྱོན་དང་བཅས་ཤིང་ཡོན་ཏན་ཉུང་། །བསྟན་པ་སེམས་ཅན་གནོད་ཅིང་འཚེ་བ་དང་། །ལྟ་བ་རྟག་པ་གཅིག་བུ་རང་དབང་གི །བདག་ཏུ་གྲུབ་པར་ཁས་ལེན་ཁྱད་པར་གསུམ། །
གཉིས་པ་བྱེ་བྲག་ཕྱེས་ཏེ་བཤད་པ་ལ། །ཕྱི་རོལ་གྲུབ་མཐའི་རྣམ་བཞག་མདོར་བསྡུས་དང་། །རང་སྡེའི་གྲུབ་མཐའི་རྣམ་བཞག་རྒྱས་ཙམ་འཆད། །དང་པོ་གྲུབ་མཐའ་སྨྲ་བའི་ནང་ཚན་དང་། །དཀོན་མཆོག་གསུམ་ལ་སྐྱབས་སུ་མི་འགྲོ་ཞིང་། །དེ་ལས་གཞན་པའི་གཞུང་ལུགས་སྟོན་པ་པོ། །ཡོད་པར་སྙིང་ནས་ཁས་ལེན་གང་ཟག་དེ། །ཕྱི་རོལ་གྲུབ་མཐའ་སྨྲ་བའི་མཚན་ཉིད་དོ། །དེ་ལ་རྒྱས་པར་དབྱེ་ན་མཐའ་ཡས་ཀྱང་། །བསྡུ་ན་ཁྱབ་འཇུག་པ་དང་དབང་ཕྱུག་པ། །རྒྱལ་བ་པ་དང་དྲང་སྲོང་སེར་སྐྱ་པ། །ཕུར་བུ་པ་བཅས་རྟོག་གེ་སྡེ་ལྔར་གྲགས། །རྩ་བའི་སྡེ་དྲུག་ཏུ་ཡང་བཤད་པ་སྟེ། །བྱེ་བྲག་པ་དང་རིག་པ་ཅན་པ་དང་། །གྲངས་ཅན་པ་དང་དཔྱོད་པ་བ་དང་ནི། །གཅེར་བུ་པ་དང་རྒྱང་འཕེན་པ་རྣམས་སོ། །དེ་རྣམས་དང་པོ་ལྔ་ནི་རྟག་ལྟ་དང་། །ཕྱི་མ་རྒྱང་འཕེན་པ་ནི་ཆད་ལྟ་འོ། །དེ་ཡང་བྱེ་བྲག་པ་དང་རིག་པ་ཅན། །གཉིས་ནི་རིམ་བཞིན་དྲང་སྲོང་གཟེགས་ཟན་དང་། །བྲམ་ཟེ་རྐང་མིག་གཉིས་ཀྱི་རྗེས་འབྲངས་ཏེ། །འདི་གཉིས་ནང་གསེས་འདོད་པའི་ཁྱད་པར་ནི། །མི་མཐུན་ཅུང་ཞིག་ཡོད་ཀྱང་རྩ་བ་ཡི། །གྲུབ་མཐའ་སྤྱི་ཡི་འདོད་ཚུལ་མཐུན་པ་འོ། །
དེ་ཡང་བྱེ་རིག་གཉིས་ཀྱི་འདོད་ཚུལ་ནི། །ཤེས་བྱ་ཐམས་ཅད་རྫས་དགུར་འདུས་པ་དང་། །ཁྲུས་དང་དབང་བསྐུར་པ་དང་སྨྱུང་གནས་དང་། །མཆོད་སྦྱིན་སྦྱིན་སྲེག་ལ་སོགས་ཐར་ལམ་འདོད། །ནམ་ཞིག་དུས་ན་བླ་མའི་མན་ངག་ལས། །རྣལ་འབྱོར་བསྒོམས་ཏེ་བདག་དབང་སོགས་རྣམས་ལས། །དོན་གཞན་དུ་ཤེས་དེ་ཁོ་ན་ཉིད་མཐོང་། །ཚིག་གི་དོན་དྲུག་རང་བཞིན་ཁོང་ཆུད་ཚེ། །བདག་ནི་ཁྱབ་པའི་རང་བཞིན་ཡིན་ན་ཡང་། །བྱེད་པ་མེད་པའི་རང་བཞིན་ངོ་འཕྲོད་དེ། །ཆོས་དང་ཆོས་མ་ཡིན་པ་གང་རུང་གི །ལས་ནི་གང་ཡང་གསོག་པར་མི་བྱེད་ཅིང་། །ལས་གསར་མ་བསགས་རྙིང་པ་ཟད་པ་ཡིས། །སླར་བླངས་ལུས་དང་དབང་པོ་བློ་དང་ནི། །བདེ་སྡུག་འདོད་སྡང་ལ་སོགས་བདག་བྲལ་ཞིང་། །གསར་པའི་ལུས་དང་དབང་པོ་མ་བླངས་པས། །བུད་ཤིང་ཟད་པའི་མེ་དང་འདྲ་བར་ནི། །སྐྱེ་བའི་རྒྱུན་ཆད་དེ་ཚེ་བདག་འབའ་ཞིག །གྱུར་པའི་ཚེ་ན་ཐར་པ་ཐོབ་ཅེས་ཟེར། །
གྲངས་ཅན་པ་ནི་དྲང་སོང་སེར་སྐྱ་ཡི། །རྗེས་འབྲངས་ཤེས་བྱ་ཐམས་ཅད་ཉེར་ལྔ་རུ། །གྲངས་ངེས་དེ་ཡང་བདག་དང་གཙོ་བོ་དང་། །ཆེན་པོ་ང་རྒྱལ་དེ་ཙམ་ལྔ་དང་ནི། །དབང་པོ་བཅུ་གཅིག་འབྱུང་བ་ལྔ་བཅས་སོ། །དེ་ཙམ་ལྔ་ནི་གཟུགས་སྒྲ་དྲི་རོ་རེག །དབང་བོ་བཅུ་གཅིག་བློ་ཡི་དབང་པོ་ལྔ། །ལས་ཀྱི་དབང་པོ་ལྔ་དང་ཡིད་དབང་ངོ་། །བློ་དབང་ལྔ་ནི་མིག་རྣ་སྣ་ལྕེ་པགས། །ལས་དབང་ལྔ་ནི་ངག་ལག་རྐང་རྐུབ་འདོམས། །འབྱུང་ལྔ་ས་ཆུ་མེ་རླུང་ནམ་མཁའ་འོ། །
དེ་དག་རྣམས་ལས་སྐྱེས་བུ་ཤེས་པ་དང་། །ལྷག་མ་ཉེར་བཞི་འདུས་བསགས་བེམ་པོར་འདོད། །གཙོ་བོ་སྐྱེས་བུ་གཉིས་ནི་དོན་དམ་དང་ །གཞན་རྣམས་ཀུན་རྫོབ་བདེན་པ་ཡིན་པར་འདོད། །དེ་ལ་རྒྱུ་ཡིན་འབྲས་བུ་མིན་པ་དང་། །གཉིས་ཀ་ཡིན་དང་འབྲས་ཡིན་རྒྱུ་མ་ཡིན། །གཉིས་ཀ་མིན་པའི་མུ་དང་བཞིར་འདོད་དེ། །དང་པོ་སྤྱི་གཙོ་བོ་དང་གཉིས་པ་ནི། །བློ་དང་ང་རྒྱལ་དེ་ཙམ་ལྔ་སྟེ་བདུན། །མུ་གསུམ་པ་ནི་ལྷག་མ་བཅུ་དྲུག་དང་། །བཞི་པར་སྐྱེས་བུ་འདོད་པ་ཤེས་པར་བྱ། །དེ་ཡང་དབང་ཕྱུག་ནག་པོའི་རྒྱུད་ལས་ནི། །རྩ་བའི་རང་བཞིན་རྣམ་པར་འགྱུར་མིན་ལ། །ཆེན་པོ་བདུན་སོགས་རང་བཞིན་རྣམ་འགྱུར་ཞིང་། །བཅུ་དྲུག་པོ་ནི་རྣམ་པར་འགྱུར་བ་སྟེ། །སྐྱེས་བུ་རང་བཞིན་མ་ཡིན་རྣམ་འགྱུར་མིན། །ཞེས་བཤད་དེ་ཡང་རྩ་བའི་རང་བཞིན་དང་། །སྤྱི་དང་གཙོ་བོ་དོན་གཅིག་ཁྱད་ཆོས་ནི། །དྲུག་ལྡན་ཤེས་བྱ་ཞིག་ཏུ་འདོད་པ་དང་། །སྐྱེས་བུ་བདག་ཤེས་རིག་རྣམས་དོན་གཅིག་གོ །
ལྷག་པ་ཉེར་གསུམ་པོ་ཡི་སྐྱེ་ཚུལ་ནི། །གང་ཚེ་སྐྱེས་བུར་ཡུལ་ལ་ལོངས་སྤྱོད་པའི། །འདོད་པ་སྐྱེས་ཚེ་རྩ་བའི་རང་བཞིན་གྱིས། །སྒྲ་ལ་སོགས་པའི་རྣམ་འགྱུར་སྤྲུལ་བར་བྱེད། །དེ་ཡང་གཙོ་བོ་ལས་ནི་ཆེན་པོ་དང་། །བློ་དང་ཆེན་པོ་མིང་གི་རྣམ་གྲངས་ཏེ། །དེ་ཡང་ཕྱི་ནས་ཡུལ་དང་ནང་རོལ་ཏུ། །སྐྱེས་བུའི་གཟུགས་འཆར་མེ་ལོང་ངོས་གཉིས་བཞིན། །དེ་ལས་ང་རྒྱལ་སྐྱེ་ཞིང་དེ་ལ་ཡང་། །རྣམ་པར་འགྱུར་བ་ཅན་གྱི་ང་རྒྱལ་དང་། །སྙིང་སྟོབས་ཅན་དང་མུན་པ་ཅན་ཏེ་གསུམ། །དང་པོ་ལས་ནི་དེ་ཙམ་ལྔ་སྐྱེ་ཞིང་། །དེ་ལས་འབྱུང་བ་ལྔ་ནི་སྐྱེ་བ་དང་། །གཉིས་པ་ལས་ནི་དབང་པོ་བཅུ་གཅིག་སྐྱེ། །གསུམ་པར་ང་རྒྱལ་གཞན་གཉིས་འཇུག་པར་འདོད། །ལོང་བ་རྐང་ཅན་ལྟ་བུའི་རང་བཞིན་དང་། །ཞ་བོ་མིག་ཅན་ལྟ་བུའི་སྐྱེས་བུ་གཉིས། །གཅིག་ཏུ་འཁྲུལ་ཏེ་རྩ་བའི་རང་བཞིན་གྱིས། །རྣམ་འགྱུར་སྤྲུལ་བའི་ཚུལ་ནི་མ་ཤེས་པའི། །དབང་གིས་འཁོར་བར་འཁོར་བར་འདོད་པ་འོ། །ནམ་ཞིག་བླ་མས་ཉེ་བར་བསྟན་པ་ཡི། །མན་ངག་ཐོས་པ་ལ་བརྟེན་རྣམ་འགྱུར་དག །རང་བཞིན་གྱིས་སྤྲུལ་ཙམ་དུ་ཟད་དོ་ཞེས། །ངེས་ཤེས་ལྷག་པར་སྐྱེས་པའི་དུས་ཉིད་དུ། །རིམ་གྱིས་ཡུལ་ལ་དམིགས་པའི་ཆགས་པ་དང་། །བྲལ་བར་གྱུར་ཚེ་བསམ་གཏན་ལ་བརྟེན་ནས། །ལྷ་ཡི་མིག་གིས་མངོན་ཤེས་རབ་བསྐྱེད་ཅིང་། །དེ་ཡིས་གཙོ་བོར་དམིགས་ནས་བལྟས་པའི་ཚེ། །དེ་ནི་གཞན་གྱི་བུད་མེད་ཇི་བཞིན་དུ། །ངོ་ཚས་སྐྱེངས་ཏེ་རྣམ་འགྱུར་ཉེར་བསྡུས་ཏེ། །རང་བཞིན་ཡན་གར་གནས་པ་དེ་ཡི་ཚེ། །རྣལ་འབྱོར་པ་ཡི་བློ་ངོར་ཀུན་རྫོབ་ཀྱི། །སྣང་བ་ཐམས་ཅད་ལོག་སྟེ་སྐྱེས་བུ་ཡིས། །ཡུལ་ལ་ལོངས་སྤྱོད་མེད་ཅིང་བྱེད་པ་ཡང་། །མེད་པར་གནས་ཚེ་ཐར་པ་ཐོབ་པར་འདོད། །
དཔྱོད་པ་བ་ནི་རྒྱལ་དཔོག་རྗེས་འབྲངས་ཏེ། །རིག་བྱེད་ལ་ནི་གང་སྣང་རང་བྱུང་སྟེ། །དེ་ནི་དེ་ཁོ་ན་ཉིད་ཡིན་ནོ་ཞེས། །སྒྲོ་བཏགས་མཆོད་སྦྱིན་ལ་སོགས་འབའ་ཞིག་གིས། །མཐོ་རིས་གོ་འཕང་ཐོབ་པར་འདོད་པ་དང་། །དེ་ནི་ངན་སོང་གསུམ་གྱི་སྡུག་བསྔལ་ལས། །གྲོལ་པའི་ཐར་བ་ཙམ་དུ་ཁས་ལེན་ཀྱང་། །སྡུག་བསྔལ་ཉེར་ཞིའི་ཐར་པ་མི་འདོད་དེ། །དྲི་མ་སེམས་ཀྱི་རང་བཞིན་ཞུགས་ཕྱིར་དང་། །ཐམས་ཅད་མཁྱེན་མེད་ཤེས་བྱ་མཐའ་ཡས་ཕྱིར། །དེ་བས་བདེན་པའི་ངག་ཀྱང་མེད་པར་འདོད། །
གཅེར་བུ་པ་ནི་རྒྱལ་བ་དམ་པ་ཡི། །རྗེས་སུ་འབྲངས་ནས་གྲུབ་མཐའ་སྨྲ་བ་དང་། །ཤེས་བྱ་ཐམས་ཅད་དོན་དགུར་འདུས་པ་སྟེ། །སྲོག་ཟག་སྡོམ་པ་ངེས་པར་རྒ་བ་དང་། །འཆིང་ལས་སྡིག་དང་བསོད་ནམས་ཐར་པ་འོ། །དེ་ལ་དང་པོ་སྲོག་ནི་བདག་ཡིན་ལ། །སྐྱེས་བུ་རྣམས་ཀྱི་ལུས་ཀྱི་ཚད་ཅི་བཞིན། །ཡོད་པ་ངོ་བོ་རྟག་ལ་གནས་སྐབས་སུ། །མི་རྟག་པ་ཡི་རང་བཞིན་ཅན་ཡིན་ནོ། །ཟག་པ་དགེ་དང་མི་དགེའི་ལས་རྣམས་ཏེ། །དེ་ཡི་དབང་གིས་འཁོར་བར་ཟག་པར་བྱེད། །སྡོམ་པ་ཟག་པ་འགོག་པར་བྱེད་པ་སྟེ། །ལས་གསར་མི་གསོག་པ་ཡི་ཕྱིར་ན་འོ། །ངེས་པར་རྒ་བ་སྐོམ་མི་འཐུང་བ་དང་། །གདུང་བ་ལ་སོགས་དཀའ་ཐུབ་སྒོ་ནས་ནི། །སྔོན་བསགས་ལས་རྣམས་ཟད་པར་བྱེད་པ་དང་། །འཆིང་བའི་ངོ་བོ་ལོག་པར་ལྟ་བ་འོ། །ལས་ནི་རྣམ་པ་བཞི་རུ་བཀྲལ་བ་སྟེ། །ཕྱིས་ནས་མྱོང་འགྱུར་མིང་དང་རུས་དང་ཚེ། །སྡིག་པ་ཆོས་མིན་བསོད་ནམས་ཆོས་སུ་འདོད། །ཐར་པ་གཅེར་བུ་དང་ནི་ངག་མི་སྨྲ། །མེ་ལྔ་བརྟེན་པ་ལ་སོགས་དཀའ་ཐུབ་ཀྱི། །སྤྱོད་པ་ལ་བརྟེན་སྔར་བྱས་ལས་ཟད་ཅིང་། །ལས་གསར་མ་བསགས་འཇིག་རྟེན་ཐམས་ཅད་ཀྱི། །སྟེང་གནས་འཇིག་རྟེན་འདུས་པ་ཞེས་བྱ་བ། །དབྱིབས་ནི་གདུགས་དཀར་གྱེན་དུ་བསླངས་པ་བཞིན། །མདོག་ནི་ཞོ་འམ་ཀུ་མུ་ཏ་ལྟར་དཀར། །ཚད་ནི་དཔག་ཚད་འབུམ་ཕྲག་ཞེ་ལྔ་ཡོད། །སྲོག་ཡོད་པ་ཡིས་དངོས་པོ་ཡིན་པ་དང་། །འཁོར་བ་ལས་གྲོལ་དངོས་མེད་ཡིན་པ་དེར། །འགྲོ་སྟེ་གནས་དེར་ཐར་པ་ཞེས་བྱ་འོ། །དེ་སྐད་དུ་ཡང་རྒྱལ་བ་དམ་པ་ཡིས། །ཁ་བ་རྒྱ་སྤོས་མེ་ཏོག་བ་ཞོ་དང་། །བ་མོ་མུ་ཏིག་མདོག་དང་གདུགས་དཀར་དབྱིབས། །ཐར་པ་ཡིན་པར་རྒྱལ་བས་བཤད་ཅེས་འབྱུང་། །
རྒྱང་འཕེན་པ་ནི་སྐྱེ་བ་སྔ་མ་ནས། །འདིར་འོང་མེད་དེ་སྔ་མ་མ་མཐོང་ཕྱིར། །གློ་བུར་ལུས་ལས་གློ་བུར་སེམས་གྲུབ་སྟེ། །གློ་བུར་མེ་ལས་གློ་བུར་འོད་གྲུབ་བཞིན། །སྐྱེ་བ་འདི་ནས་ཕྱི་མར་འགྲོ་བ་ཡང་། །མེད་དེ་ལུས་སེམས་རྫས་གཅིག་ལུས་འཇིག་ཚེ། །བློ་འཇིག་རྡོ་འཇིག་རྡོ་ཡི་རི་མོ་བཞིན། །དེས་ན་འདི་ཡིས་གཞལ་བྱ་རང་མཚན་དང་། །ཚད་མ་ལ་ནི་མངོན་སུམ་ཚད་མས་ཁྱབ། །སྤྱི་མཚན་རྗེས་དཔག་ཚད་མ་ཁས་མི་ལེན། །རྒྱང་འཕེན་པ་ཡི་ཁྱད་པར་འགའ་ཞིག་ནི། །དངོས་པོ་རྒྱུ་མེད་ངོ་བོ་ཉིད་བྱུང་སྟེ། །ཉི་ཤར་ཆུ་བོ་ཐུར་དུ་འབབ་པ་དང་། །སྲན་ཟླུམ་ཚེར་མ་གཟེངས་རིང་རྣོ་བ་དང་། །རྨ་བྱའི་མདོང་ལ་སོགས་པའི་ཆོས་རྣམས་ཀུན། །སུས་ཀྱང་མ་བྱས་ངོ་བོ་ཉིད་ལས་བྱུང་། །
 
གཉིས་པ་རང་སྡེ་གྲུབ་མཐའི་རྣམ་བཞག་ལ། །སྤྱིར་བསྟན་པ་དང་བྱེ་བྲག་བཤད་པ་འོ། །དང་པོ་མཉམ་མེད་ཤྰཀྱའི་རྒྱལ་པོ་དེས། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ཅིང་། །བར་དུ་གྲངས་མེད་གསུམ་དུ་ཚོགས་གཉིས་བསགས། །མཐའ་མར་རྡོ་རྗེ་གདན་དུ་སངས་རྒྱས་ཏེ། །ཝྰ་ར་ཎ་སྰིར་ལྔ་སྡེ་བཟང་པོ་ལ། །དང་པོ་བདེན་བཞིའི་ཆོས་ཀྱི་འཁོར་ལོ་བསྐོར། །དེ་ནས་བྱ་རྒོད་ཕུང་པོའི་རི་བོའི་རྩེར། །བར་པ་མཚན་ཉིད་མེད་པའི་ཆོས་འཁོར་བསྐོར། །དེ་ནས་ཡངས་པ་ཅན་སོགས་གནས་རྣམས་སུ། །ཐ་མ་ལེགས་ཕྱེའི་ཆོས་འཁོར་རྒྱ་ཆེར་བསྐོར། །མུ་སྟེགས་སྟོན་པ་དྲུག་ལ་སོགས་པ་ཡི། །སྨྲ་བ་ངན་པ་ཐམས་ཅད་ཟིལ་མནན་ནས། །ཕན་བདེའི་འབྱུང་གནས་ཀུན་མཁྱེན་སངས་རྒྱས་ཀྱི། །བསྟན་པ་རིན་ཆེན་དར་ཞིང་རྒྱས་པར་མཛད། །དེ་ཡི་འོག་ཏུ་འགྲེལ་བྱེད་སློབ་དཔོན་ཚོས། །འཁོར་ལོ་གསུམ་གྱི་དགོངས་པ་སོ་སོ་རུ། །བཀྲལ་པས་གྲུབ་མཐའ་སྨྲ་བ་བཞི་བྱུང་སྟེ། །དེ་དག་རྣམས་ལས་དོན་སྨྲ་སྡེ་གཉིས་ཀྱིས། །འཁོར་ལོའི་དང་པོའི་རྗེས་སུ་འབྲངས་པ་དང་། །ངོ་བོ་ཉིད་མེད་སྨྲ་བས་བར་པ་དང་། །རྣལ་འབྱོར་སྤྱོད་རྣམས་འཁོར་ལོ་ཐ་མ་ཡི། །རྗེས་འབྲངས་གཞི་ལམ་འབྲས་གསུམ་རྣམ་བཞག་བྱེད། །རང་སྡེ་སྟོན་པའི་རྗེས་སུ་འབྲངས་པ་ཡི། །གྲུབ་མཐའ་སྨྲ་བར་བྱེ་མདོ་དབུ་སེམས་ཏེ། །བཞི་རུ་གྲངས་ངེས་དེ་ལས་ལོགས་གྱུར་པའི། །གྲུབ་མཐའ་ལྔ་པ་ཐེག་པ་བཞི་པ་མེད། །རྡོ་རྗེ་སྙིང་འགྲེལ་ལས་ནི་སངས་རྒྱས་པར། །ཐེག་པ་བཞི་པ་གྲུབ་མཐའ་ལྔ་པ་ནི། །ཐུབ་པའི་དགོངས་པ་མིན་ཞེས་གསུངས་པ་འོ། །རང་རྒྱུད་མན་ཆད་རང་སྡེ་འདི་དག་ནི། །ཐལ་འགྱུར་ལུགས་ལ་རྟག་ཆད་མཐར་ལྟུང་ཡང་། །རང་རང་ལུགས་ལ་དབུ་མར་འདོད་པ་སྟེ། །རྟག་ཆད་མཐའ་བྲལ་དབུས་སྨྲ་རློམ་པའི་ཕྱིར། །
གྲུབ་མཐའ་བཞི་ཡི་མཐའ་གཉིས་སྤོང་ཚུལ་ནི། །བྱེ་སྨྲས་འབྲས་སྐྱེ་རྒྱུ་འགག་རྟག་མཐའ་སྤོང་། །རྒྱུའི་མཇུག་འབྲས་བུ་འབྱུང་བས་ཆད་མཐའ་སྤོང་། །མདོ་སྡེ་པ་དག་འདུས་བྱས་ཆོས་རྣམས་ཀུན། །རྒྱུན་ཆད་མེད་པར་འཇུག་པས་ཆད་མཐའ་སྤོང་། །སྐད་ཅིག་འཇིག་པས་རྟག་པའི་མཐའ་གྲོལ་འདོད། །སེམས་ཙམ་ཀུན་བཏགས་བདེན་པར་མ་གྲུབ་པས། །རྟག་པའི་མཐའ་སྤོང་གཞན་དབང་བདེན་གྲུབ་ཀྱིས། །ཆད་པའི་མཐའ་ལས་གྲོལ་ཅེས་འདོད་པ་འོ། །དབུ་བ་པ་ཡིས་ཆོས་རྣམས་ཐ་སྙད་དུ། །ཡོད་པས་ཆད་མཐའ་ལས་གྲོལ་དོན་དམ་དུ། །མེད་པས་རྟག་པའི་མཐའ་ལས་གྲོལ་བར་བཞེད། །གྲུབ་མཐའ་གོང་མ་གོང་མས་འོག་མ་ཚོའི། །ཐུན་མིན་གྲུབ་མཐའ་འགོག་པར་བྱེད་ན་ཡང་། །འོག་མ་འོག་མའི་ལྟ་བ་གོ་བ་དེ། །གོང་མའི་ལྟ་བ་གོ་བའི་ཐབས་དམ་པར། །སྣང་བས་གྲུབ་མཐའ་གོང་མར་མཆོག་བཟུང་ནས། །འོག་མ་དག་ལ་སྡང་བར་མི་བྱ་འོ། །ལྟ་བ་བཀར་བཏགས་ཕྱག་རྒྱ་བཞི་པོ་དེ། །ཁས་ལེན་ནང་པའི་གྲུབ་མཐའ་སྨྲ་བར་འདོད། །འདུས་བྱས་མི་རྟག་ཟག་བཅས་སྡུག་བསྔལ་དང་། །ཆོས་རྣམས་བདག་མེད་མྱང་འདས་ཞི་བ་འོ། །གནས་མ་བུ་པས་བདག་ཁས་བླངས་པ་ཡིས། །ནང་པའི་གྲུབ་མཐའ་སྤོང་བར་མི་འགྱུར་ཏེ། །དེ་ཡི་བདག་ནི་རང་རྐྱ་ཐུབ་པའི་རྫས། །ཕྱག་རྒྱ་བཞི་ཡི་ནང་གི་བདག་མེད་ནི། །རྟག་གཅིག་རང་དབང་ཅན་གྱིས་སྟོང་པ་ཡི། །བདག་ཡིན་དེ་ནི་མང་བཀུར་སྡེ་ལྔས་འདོད། །

གཉིས་པ་རང་སྡེ་བྱེ་བྲག་བཤད་པ་ལ། །བྱེ་མདོ་སེམས་ཙམ་པ་དང་དབུ་མ་པ། །
བྱེ་སྨྲ་མཚན་ཉིད་དབྱེ་བ་སྒྲ་བཤད་དང་། །འདོད་ཚུལ་བཞི་ལས་དང་པོ་མཚན་ཉིད་ནི། །རང་རིག་མི་འདོད་ཕྱི་དོན་བདེན་གྲུབ་ཏུ། །འདོད་པའི་ཐེག་དམན་གྲུབ་སྨྲ་བྱེ་སྨྲ་བ། །དབྱེ་ན་ཁ་ཆེའི་བྱེ་སྨྲ་ཉི་འོག་པ། །ཡུལ་དབུས་བྱེ་བྲག་སྨྲ་བ་གསུམ་དུ་ཡོད། །གསུམ་པ་དབྱིག་བཤེས་ཆོས་ཅན་ཁྱོད་རང་ལ། །བྱེ་བྲག་སྨྲ་བ་ཞེས་བརྗོད་རྒྱུ་མཚན་ནི། །ཡོད་དེ་བྱེ་བྲག་བཤད་མཚོ་ཆེན་མོ་ཡི། །རྗེས་སུ་འབྲངས་ནས་གྲུབ་མཐའ་སྨྲ་བས་སམ། །ཡང་ན་དུས་གསུམ་རྫས་ཀྱི་བྱེ་བྲག་ཏུ། །སྨྲ་བས་བྱེ་བྲག་སྨྲ་བ་ཞེས་བརྗོད་དོ། །བཞི་པ་གཞི་ལམ་འབྲས་བུའི་འདོད་ཚུལ་དང་། །དང་པོར་ཡུལ་དང་ཡུལ་ཅན་འདོད་ཚུལ་ལོ། །དང་པོ་ལུགས་འདིས་ཤེས་བྱ་ཡོད་དོ་ཅོག །གཞི་ལྔར་འདུས་འདོད་སྣང་བ་གཟུགས་ཀྱི་གཞི། །གཙོ་བོ་སེམས་གཞི་འཁོར་འདུས་སེམས་བྱུང་གཞི། །ལྡན་མིན་འདུ་གཞི་འདུས་མ་བྱས་གཞི་སོ། །གཞི་ལྔ་དག་ཀྱང་དངོས་པོར་འདོད་པ་སྟེ། །དོན་བྱེད་ནུས་པ་དངོས་པོའི་མཚན་ཉིད་དང་། །ཡོད་པ་ཤེས་བྱ་དངོས་པོ་དོན་གཅིག་གོ །འདུས་མ་བྱས་ཆོས་རྟག་པའི་དངོས་པོ་དང་། །གཟུགས་ཤེས་ལྡན་མིན་འདུ་བྱེད་མི་རྟག་དངོས། །དངོས་པོར་རྫས་གྲུབ་ཀྱིས་ཁྱབ་རྫས་ཡོད་ཀྱིས། །མ་ཁྱབ་དོན་དམ་བདེན་པ་རྫས་ཡོད་དང་། །དོན་གཅིག་ཀུན་རྫོབ་བདེན་དང་བཏགས་ཡོད་གཅིག །དབྱེ་ན་བདེན་པ་གཉིས་སུ་དབྱེ་བ་དང་། །ཟག་བཅས་ཟག་མེད་གཉིས་སུ་དབྱེ་བ་དང་། །འཕྲོས་དོན་གཞན་དག་བསྟན་པ་གསུམ་དུ་འདུ། །དང་པོར་བཅོམ་མམ་བློ་ཡིས་ཆ་ཤས་སུ། །སོར་བསལ་རང་འཛིན་བློ་འདོར་ཆོས་དམིགས་དེ། །ཀུན་རྫོབ་བདེན་པའི་མཚན་ཉིད་མཚན་གཞི་ནི། །རྫ་བུམ་དང་ནི་ཕྲེང་བ་སོགས་ཡིན་ཏེ། །རྫ་བུམ་ཐོ་བས་བཅོམ་ཚེ་རྫ་བུམ་དུ། །འཛིན་པའི་བློ་འདོར་ཕྲེང་རྡོག་བསལ་བ་ན། །ཕྲེང་བར་འཛིན་པའི་བློ་ནི་འདོར་བའི་ཕྱིར། །བཅོམ་མམ་བློ་ཡིས་ཆ་ཤས་སོར་བསལ་ན། །རང་འཛིན་བློ་མི་འདོར་བའི་ཆོས་སུ་དམིགས། །དོན་དམ་བདེན་པའི་མཚན་ཉིད་མཚན་གཞི་ནི། །རྡུལ་ཕྲན་ཕྱོགས་ཆ་མེད་དང་ཤེས་པ་ནི། །སྐད་ཅིག་ཆ་མེད་འདུས་མ་བྱས་ཀྱི་མཁའ། །མཛོད་ལས་གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་བུམ་ཆུ་བཞིན། །ཀུན་རྫོབ་ཏུ་ཡོད་དོན་དམ་ཡོད་གཞན་གསུངས། །དེས་ན་ཀུན་རྫོབ་བདེན་རྣམས་དོན་དམ་དུ། །མ་གྲུབ་བདེན་གྲུབ་ཏུ་ནི་འདོད་པ་སྟེ། །ལུགས་འདིས་དངོས་པོར་བདེན་གྲུབ་ཁྱབ་པར་འདོད། །གཉིས་པ་དམིགས་པ་མཚུངས་ལྡན་གང་རུང་སྒོས། །ཟག་པ་རྒྱས་སུ་རུང་བ་ཟག་བཅས་ཀྱི། །མཚན་ཉིད་མཚན་གཞི་ཕུང་པོ་ལྔ་ལྟ་བུ། །དེ་ལས་ལྡོག་པ་ཟག་བཅས་ཀྱི་མཚན་ཉིད། །མཚན་གཞི་ལམ་བདེན་དང་ནི་འདུས་མ་བྱས། །མཛོད་ལས་ལས་མ་གཏོགས་པའི་འདུས་བྱས་རྣམས། །ཟག་བཅས་ཞེས་དང་ཟག་མེད་ལམ་བདེན་དང་། །འདུས་མ་བྱས་རྣམས་གསུམ་ཡང་སྟེ་ཞེས་གསུངས། ཟག་བཅས་སྤང་བྱས་ཁྱབ་སྟེ་ཚོགས་སྦྱོར་བཞིན། །མཐོང་ལམ་ཟག་མེད་ཁོ་ན་སྒོམ་ལམ་དང་། །མི་སློབ་ལམ་ལ་ཟག་བཅས་ཟག་མེད་གཉིས། །འཕགས་ལམ་ལ་ནི་ཟག་མེད་ཀྱིས་ཁྱབ་ཀྱང་། །འཕགས་རྒྱུད་ལམ་ལ་མ་ཁྱབ་སྒོམ་ལམ་པའི། །ཞི་རགས་རྣམ་ཅན་ལམ་བདེན་ཟག་མེད་དོ། །
གསུམ་པ་འཕྲོས་དོན་གཞན་ནི་དུས་གསུམ་རྫས། །བུམ་པ་བུམ་པའི་འདས་པའི་དུས་སུ་ཡོད། །དེ་བཞིན་མ་འོངས་དུས་སུའང་ཡོད་པར་འདོད། །དགག་སྒྲུབ་ཁས་ལེན་མེད་དགག་མི་འདོད་དེ། །དགག་ལ་མ་ཡིན་དགག་གིས་ཁྱབ་པར་འདོད། །ཁ་ཆེ་བྱེ་སྨྲ་མདོ་སྡེ་པ་བཞིན་དུ། །ལས་འབྲས་རྟེན་དུ་རྣམ་ཤེས་རྒྱུན་ཁས་ལེན། །དེ་མ་གཏོགས་པའི་བྱེ་སྨྲ་ལས་འབྲས་ཀྱི། །འབྲེལ་བའི་རྟེན་དུ་ཐོབ་དང་བུ་ལོན་གྱི། །དཔང་རྒྱ་འདྲ་བའི་ཆུད་མི་ཟ་བ་ཞེས། །ལྡན་མིན་འདུ་བྱེད་གྱུར་པ་ཁས་ལེན་ཞིང་། །ཐལ་འགྱུར་བ་དང་འདི་ཡི་ལུགས་ལ་ནི། །ལུས་ངག་ལས་ནི་གཟུགས་ཅན་དུ་འདོད་དོ། །འདུས་བྱས་ཆོས་ལ་མི་རྟག་པས་ཁྱབ་ཀྱང་། །སྐད་ཅིག་རེ་རེར་འཇིག་པས་མ་ཁྱབ་སྟེ། །སྐྱེས་ཟིན་འོག་ཏུ་གནས་པའི་བྱ་བ་དང་། །དེའི་འོག་འཇིག་པའི་བྱ་བ་འཇུག་པར་འདོད། །
གཉིས་པ་ཡུལ་ཅན་གྱི་ནི་འདོད་ཚུལ་ལ། །གང་ཟག་ཤེས་པ་རྗོད་བྱེད་སྒྲ་དང་གསུམ། །དང་པོ་གདགས་གཞི་ཕུང་པོ་ལྔའི་ཚོགས་ཙམ། །གང་ཟག་མཚན་ཉིད་མང་བཀུར་ཁ་ཅིག་གིས། །ཕུང་པོ་ལྔ་ཆར་གང་ཟག་མཚན་གཞི་དང་། །སྲུང་བ་པ་ཡིས་སེམས་གཅིག་པུ་འདོད་དོ། །གཉིས་པར་ཚད་མ་དང་ནི་ཚད་མིན་གཉིས། །དང་པོར་མངོན་སུམ་རྗེས་དཔག་ཚད་མ་གཉིས། །དང་པོར་དབང་ཡིད་རྣལ་འབྱོར་མངོན་སུམ་གསུམ། །ཡོད་ཀྱང་རང་རིག་མངོན་སུམ་ཁས་མི་ལེན། །དབང་མངོན་ཚད་མར་ཤེས་པས་མ་ཁྱབ་སྟེ། །མིག་དབང་གཟུགས་ཅན་བེམ་པོ་ལྟ་བ་དང་། །ཚད་མ་གསུམ་ཀའི་གཞི་མཐུན་ཡིན་པའི་ཕྱིར། །དབང་པོའི་ཤེས་པས་ཡུལ་རྣམས་རྣམ་མེད་དུ། །རྗེན་ཆར་གཞལ་ཞིང་རྟེན་བཅས་མིག་གི་དབང་། །གཟུགས་ཅན་པས་ཀྱང་གཟུགས་བརྙན་མཐོང་འདོད་དེ། །གལ་ཏེ་རྣམ་ཤེས་ཁོ་ནས་མཐོང་ན་ནི། །རྩིགས་སོགས་བར་ཆོད་གཟུགས་ཀྱང་མཐོང་འགྱུར་ཞིང་། །སེམས་དང་སེམས་བྱུང་ཐ་དད་རྫས་སུ་འདོད། །
གསུམ་པ་སྤྱིར་གཏང་སྒྲ་ཙམ་ལ་དབྱེ་ན ། །ཟིན་པའི་སྒྲ་དང་མ་ཟིན་སྒྲ་གཉིས་ཡོད། །རིམ་བཞིན་སྐྱེས་བུའི་ངག་དང་ཆུ་ཡི་སྒྲ། །ཟིན་དང་མ་ཟིན་རེ་རེར་སེམས་ཅན་ལ། །སྟོན་དང་མི་སྟོན་དབྱེ་བས་གཉིས་གཉིས་ཡོད། །སེམས་ཅན་སྟོན་དང་ངག་རིག་རྗོད་བྱེད་མཚུངས། །སེམས་ཅན་མི་སྟོན་ལ་སོགས་དེ་བཞིན་འགྲེ། །བཀའ་བསྟན་གཉིས་ཀྱང་མིང་ཚིག་ཡི་གེའི་ཚོགས། །འདུས་བདག་སྒྲ་སྤྱི་ལྡན་མིན་འདུ་བྱེད་འདོད། །ལུགས་འདིར་བེམ་པོ་ལྡན་མིན་འདུ་བྱེད་གཉིས། །འགལ་བ་མིན་པར་སྙམ་མོ་ཤེས་ལྡན་དག །
གསུམ་པ་འབྲས་བུའི་རྣམ་བཞག་ཉན་ཐོས་ཀྱི། །རིགས་ཅན་རྣམས་ཀྱིས་མི་རྟག་སོགས་བཅུ་དྲུག །ཚེ་གསུམ་སོགས་གོམས་མཐར་ནི་ཉན་ཐོས་ཀྱི། །སྒོམ་ལམ་རྡོ་རྗེ་ལྟ་བུའི་ཏིང་འཛིན་གྱིས། །ཉོན་སྒྲིབ་ཐོབ་པ་ཆད་པའི་ཚུལ་སྤངས་ཏེ། །དགྲ་བཅོམ་པ་ཡི་འབྲས་བུ་མངོན་དུ་བྱེད། །བསེ་རུ་ལྟ་བུའི་རང་རྒྱལ་རྣམས་ཀྱིས་ནི། །གང་ཟག་རང་རྐྱ་ཐུབ་པའི་རྫས་ཡོད་ཀྱིས། །གཞི་ནས་སྟོང་པར་རྟོགས་པའི་ལྟ་བ་དེ། །བསྐལ་ཆེན་བརྒྱ་ལ་སོགས་པའི་ཚོགས་སྦྲེལ་ཏེ། །ཚོགས་ལམ་ཆེན་པོའི་བར་དུ་ཉམས་བླངས་ནས། །སྦྱོར་ལམ་དྲོད་ནས་མི་སློབ་ལམ་གྱི་བར། །སྟན་ཐོག་གཅིག་ལ་མངོན་དུ་བྱེད་པ་འོ། །དམན་པའི་དགྲ་བཅོམ་རང་གི་སྤངས་རྟོགས་ལས། །ཉམས་ནས་རྒྱུན་ཞུགས་འགྱུར་བར་སྲིད་པ་ཡིས། །ཉམས་པའི་ཆོས་ཅན་སོགས་ཀྱང་ཁས་ལེན་ནོ།།ཉན་ཐོས་ལ་ནི་དགེ་འདུན་ཉི་ཤུ་དང་། །ཞུགས་གནས་བརྒྱད་འདོད་ཅིག་ཅར་ཁས་མི་ལེན། །ཞུགས་གནས་བརྒྱད་པོར་འཕགས་པས་ཁྱབ་པར་འདོད། །བྱང་སེམས་རྣམས་ཀྱིས་ཚོགས་ལམ་གནས་སྐབས་སུ། །བསྐལ་ཆེན་གྲངས་མེད་གསུམ་གྱི་ཚོགས་རྫོགས་ཅིང་། །དེ་ནས་བསྐལ་བརྒྱར་མཚན་བཟང་རྒྱུ་བསྒྲུབས་ཏེ། །སྲིད་པ་ཐ་མའི་ཚེ་ན་བྱང་ཆུབ་ཀྱི། །ཤིང་དྲུང་སྲོད་ལ་ལྷའི་བུའི་བདུད་བཏུལ་ཅིང་། །གུང་ལ་མཉམ་བཞག་སྦྱོར་མཐོང་སྒོམ་ལམ་གསུམ། །མངོན་བྱས་ཐོ་རངས་སྐྱ་རེངས་ཤར་བའི་དུས། །མི་སློབ་ལམ་དེ་མངོན་དུ་བྱེད་པ་འོ། །དེས་ན་བདུད་བཏུལ་ཡན་ཆད་སོ་སྐྱེ་དང་། །བྱང་སེམས་ལམ་གྱི་སྦྱོར་མཐོང་སྒོམ་གསུམ་ལ། །མཉམ་བཞག་ཁོ་ནས་ཁྱབ་པར་འདོད་པ་དང་། །མཛད་བཅུའི་དང་པོ་དགུ་ནི་བྱང་སེམས་དང་། །ཕྱི་མ་གསུམ་ནི་སངས་རྒྱས་མཛད་པར་འདོད། །ཆོས་ཀྱི་འཁོར་ལོར་མཐོང་ལམ་གྱིས་ཁྱབ་ཅིང་། །ལུང་གི་ཆོས་འཁོར་ལ་ནི་བདེན་བཞི་ཡི། །ཆོས་ཀྱི་འཁོར་ལོས་ཁྱབ་པར་འདོད་པ་དང་། །མངོན་པ་སྡེ་བདུན་སངས་རྒྱས་བཀར་ཁས་ལེན། །བཀའ་ལ་སྒྲ་ཅི་བཞིན་པས་ཁྱབ་པ་དང་། །ཆོས་ཀྱི་ཕུང་པོ་བརྒྱད་ཁྲི་མ་གཏོགས་པར། །བརྒྱད་ཁྲི་བཞི་སྟོང་རྣམ་བཞག་ཁས་མི་ལེན། །མཛོད་ལས་ཆོས་ཀྱི་ཕུང་པོ་བརྒྱད་ཁྲི་དག །གང་རྣམས་ཐུབ་པས་གསུངས་དེ་དག་ཅེས་གསུངས། །བྱང་སེམས་སྲིད་མཐས་བྱང་ཆུབ་མངོན་བྱེད་གནས། །འདོད་ཁམས་ཁོ་ནར་ངེས་པས་འོག་མིན་དང་། །ལོངས་སྐུ་རྣམ་མཁྱེན་སོགས་ཀྱང་མི་འདོད་དོ། །
ཐེག་གསུམ་དགྲ་བཅོམ་ལྷག་བཅས་པས་ཁྱབ་སྟེ། །ལྷག་མ་མེད་པར་མྱ་ངན་འདས་པའི་ཚེ། །མར་མེ་ཤི་ལྟར་རིག་པ་རྒྱུན་འཆད་ཅིང་། །དེས་ན་མཐར་ཐུག་ཐེག་གསུམ་གྲུབ་པར་འདོད། །ཁ་ཅིག་སྟོན་པ་མྱ་ངན་འདས་པའི་ཚེ། །གདུལ་བྱ་འགའ་ངོར་གཟུགས་སྐུ་བསྡུས་ཙམ་ལས། །དོན་ལ་མྱ་ངན་འདས་པ་མེད་དོ་ཞེས། །སྨྲ་བ་ཉ་དང་ཉུང་མ་བསྲེས་པ་འོ། །སངས་འཕགས་སྡུག་ཀུན་མ་ལུས་སྤངས་ཟིན་ཀྱང་། །དེའི་རྒྱུད་སྡུག་བདེན་ཡོད་པ་མི་འགལ་ཏེ། །སྡུག་བདེན་དམིགས་པའི་ཉོན་མོངས་མ་ལུས་པ། །སྤངས་ཚེ་སྡུག་བདེན་སྤངས་པས་འཇོག་པའི་ཕྱིར། །གཟུགས་ཀྱི་སྐུ་ནི་བྱང་སེམས་སྦྱོར་ལམ་པའི། །ལུས་དང་ཚེ་གཅིག་གིས་ནི་བསྡུས་པའི་ཕྱིར། །སངས་རྒྱས་དཀོན་མཆོག་མིན་ཡང་སངས་རྒྱས་དང་། །སངས་རྒྱས་དཀོན་མཆོག་དེ་ཡི་ཐུགས་རྒྱུད་ཀྱི། །ཟད་མི་སྐྱེ་ཡི་ཡེ་ཤེས་ལ་འདོད་དོ། །དེ་བཞིན་སློབ་པའི་འཕགས་རྣམས་ཟག་བཅས་ཕྱིར། །དགེ་འདུན་དཀོན་མཆོག་མིན་ཡང་དགེ་འདུན་དང་། །དེའི་རྒྱུད་ལམ་བདེན་དགེ་འདུན་དཀོན་མཆོག་སྟེ། །ཐེག་གསུམ་མྱང་འགོག་ཆོས་དཀོན་མཆོག་ཏུ་འདོད། །
 
༈ གཉིས་པ་མདོ་སྡེ་པ་ཡི་གྲུབ་མཐའ་སྟེ། །མཚན་ཉིད་དབྱེ་བ་འདོད་ཚུལ་སྒྲ་བཤད་བཞི། །རང་རིག་ཕྱི་དོན་གཉིས་ཀ་བདེན་ཞེན་གྱིས། །ཁས་ལེན་ཐེག་དམན་གྲུབ་མཐའ་སྨྲ་བའི་སྡེའི། །མཚན་ཉིད་མདོ་སྡེ་དཔེ་སྟོན་སྡེ་གཉིས་གཅིག །གཉིས་པ་དབྱེ་ན་ལུང་རིགས་རྗེས་འབྲངས་གཉིས། །དང་པོ་མངོན་པ་མཛོད་ཀྱི་རྗེས་འབྲངས་དང་། །གཉིས་པ་ཚད་མ་སྡེ་བདུན་རྗེས་འབྲངས་སོ། །གསུམ་པ་སྒྲ་བཤད་མདོ་སྡེ་པ་དང་ནི། །དཔེ་སྟོན་སྡེ་ཞེས་བརྗོད་པའི་རྒྱུ་མཚན་ནི། །བྱེ་བྲག་བཤད་པའི་རྗེས་སུ་མི་འབྲངས་པར། །གཙོ་བོར་མདོ་ལ་བརྟེན་ནས་གྲུབ་པའི་མཐའ། །སྨྲ་བས་མདོ་སྡེ་བ་དང་ཆོས་ཐམས་ཅད། །དཔེ་ཡི་སྒོ་ནས་སྟོན་པས་དཔེ་སྟོན་ནོ། །
བཞི་པ་འདོད་ཚུལ་གཞི་ལམ་འབྲས་བུ་གསུམ། །དང་པོར་ཡུལ་དང་ཡུལ་ཅན་འདོད་ཚུལ་གཉིས། །དང་པོ་བློས་རིག་བྱ་བ་ཡུལ་མཚན་ཉིད། །བློའི་ཡུལ་རུང་བ་ཤེས་བྱའི་མཚན་ཉིད་དང་། །ཡུལ་དང་ཡོད་པ་ཤེས་བྱ་གཞི་གྲུབ་གཅིག །དེ་ལ་བདེན་གཉིས་རང་སྤྱི་དགག་སྒྲུབ་དང་། །མངོན་ལྐོག་དུས་གསུམ་གཅིག་དང་ཐ་དད་དབྱེ། །དང་པོ་སྒྲ་དང་རྟོག་པས་བཏགས་པ་ལ། །མ་ལྟོས་རང་གི་སྡོད་ལུགས་ཀྱི་ངོས་ནས། །རིགས་པས་དཔྱད་བཟོད་གྲུབ་པ་དོན་དམ་བདེན། །དངོས་པོ་དོན་དམ་བདེན་པ་རང་མཚན་དང་། །མི་རྟག་པ་དང་འདུས་བྱས་བདེན་གྲུབ་གཅིག །རྟོག་པས་བཏགས་པ་ཙམ་དུ་གྲུབ་པ་ཡི། །ཆོས་དེ་ཀུན་རྫོབ་བདེན་པའི་མཚན་ཉིད་དང་། །དངོས་མེད་ཆོས་དང་ཀུན་རྫོབ་བདེན་པ་དང་། །སྤྱི་མཚན་རྟག་པ་འདུས་མ་བྱས་ཆོས་དང་། །བརྫུན་པར་གྲུབ་པ་རྣམས་ནི་དོན་གཅིག་གོ །བདེན་གཉིས་སྒྲ་བཤད་འདུས་མ་བྱས་ཀྱི་མཁའ། །ཆོས་ཅན་ཀུན་རྫོབ་བདེན་པ་ཞེས་བྱ་སྟེ། །ཀུན་རྫོབ་བློ་ངོར་བདེན་པ་ཡིན་པའི་ཕྱིར། །འདི་ཡི་ཀུན་རྫོབ་པ་ནི་རྟོག་པ་སྟེ། །རང་མཚན་མངོན་སུམ་མཐོང་བར་སྒྲིབ་པ་ཡིས། །ཀུན་རྫོབ་ཞེས་བྱ་འདི་ཡང་སྒྲ་བཤད་དེ། །རྟོག་བློ་ཀུན་རྫོབ་པའི་ངོར་བདེན་པ་ཡིས། །ཀུན་རྫོབ་བདེན་པ་ཡིན་པས་མ་ཁྱབ་སྟེ། །དོན་དམ་བདེན་པའི་མཚན་གཞི་བུམ་པ་ཡང་། །ཀུན་རྫོབ་རྟོག་བློའི་ངོ་རུ་བདེན་པའི་ཕྱིར། །གང་ཟག་བདག་དང་སྒྲ་རྟག་པ་ལྟ་བུ། །ཀུན་རྫོབ་བློ་ངོར་བདེན་པ་ཡིན་ན་ཡང་། །ཐ་སྙད་དུ་ཡང་གྲུབ་པ་མེད་པའི་ཕྱིར། །བུམ་པ་ཆོས་ཅན་དོན་དམ་བདེན་པ་སྟེ། །དོན་དམ་བློ་ངོར་བདེན་པ་ཡིན་པའི་ཕྱིར། །འདི་ཡི་དོན་དམ་བློ་ནི་སྣང་ཡུལ་ལ། །མ་འཁྲུལ་ཤེས་པར་འདོད་དོ་དཔྱོད་ལྡན་དག །བདེན་གཉིས་འཇོག་ཚུལ་རིགས་པའི་རྗེས་འབྲངས་ལུགས། །ལུང་གི་རྗེས་འབྲངས་བདེན་གཉིས་བྱེ་སྨྲ་མཐུན། །
གཉིས་པ་དོན་དམ་དོན་བྱེད་ནུས་པའི་ཆོས། །རང་མཚན་མཚན་གཞི་བུམ་པ་ལྟ་བུ་དང་། །དེ་ལས་ལྡོག་པ་སྤྱི་མཚན་མཚན་གཞི་མཁའ། །སྤྱི་བྱེ་གཅིག་དང་ཐ་དད་འགལ་འབྲེལ་སོགས། །སྒྲོ་བཏགས་ཆོས་རྣམས་སྤྱི་མཚན་ཡིན་མོད་ཀྱང་། །དེ་ཡིས་སྤྱི་མཚན་མ་ཁྱབ་ཁྱད་པར་ཕྱེས། །
གསུམ་པ་དགག་བྱ་དངོས་སུ་བཅད་པ་ཡི། །ཚུལ་གྱིས་རྟོགས་པར་བྱ་བ་དགག་པ་སྟེ། །གཞན་སེལ་དོན་གཅིག་དབྱེ་ན་མེད་མིན་དགག །རང་དངོས་རྟོགས་བློས་རང་གི་དགག་བྱ་དེ། །བཅད་ཙམ་རྟོགས་པར་བྱ་བ་མེད་དགག་དང་། །དཔེར་ན་བྲམ་ཟེ་ཆང་མི་འཐུང་བ་བཞིན། །རང་དངོས་རྟོགས་བློས་རང་གི་དགག་བྱ་དེ། །བཀག་ཤུལ་ཆོས་གཞན་མ་ཡིན་དགག་སྒྲུབ་གཉིས། །གང་རུང་འཕེན་པ་མ་ཡིན་དགག་ཏུ་འདོད། །ལྷས་སྦྱིན་ཚོན་པོ་ཉིན་ཟས་མི་བཟའ་བཞིན། །རང་དངོས་རྟོིགས་བློས་རང་གི་དགག་བྱ་དེ། །དངོས་སུ་བཅད་ནས་རྟོགས་བྱ་མ་ཡིན་ཆོས། །སྒྲུབ་པའི་མཚན་ཉིད་བུམ་པ་ལྟ་བུ་འོ། །
བཞི་པ་མངོན་སུམ་ཚད་མས་དངོས་རྟོགས་ཆོས། །མངོན་གྱུར་མཚན་ཉིད་དངོས་པོ་དོན་གཅིག་དང་། །རྗེས་དཔག་ཚད་མས་དངོས་རྟོགས་བྱ་བའི་ཆོས། །ལྐོག་གྱུར་མཚན་ཉིད་དེ་དང་ཤེས་བྱ་གཅིག །
ལྔ་པ་དངོས་པོ་གཞན་ཞིག་རང་གྲུབ་དུས། །སྐད་ཅིག་གཉིས་པར་ཞིག་ཆ་འདས་པ་དང་། །དངོས་པོ་གཞན་ཞིག་སྐྱེ་བའི་རྒྱུ་ཡོད་ཀྱང་། །རྐྱེན་མ་ཚང་བས་ཡུལ་དུས་འགའ་ཞིག་ཏུ། །མ་སྐྱེས་ཆ་དེ་མ་འོངས་མཚན་ཉིད་དང་། །སྐྱེས་ལ་མ་འགག་ད་ལྟ་བ་རུ་འདོད། །འདས་དང་མ་འོངས་པ་གཉིས་རྟག་པ་དང་། །ད་ལྟ་བ་དང་དངོས་པོ་དོན་གཅིག་གོ །དངོས་དེའི་འདས་པ་དེ་ཡི་ཕྱི་ལོགས་གྲུབ། །མ་འོངས་དེ་ཡི་སྔ་ལོགས་གྲུབ་པ་འོ། །
དྲུག་པ་སོ་སོ་མིན་ཆོས་གཅིག་མཚན་ཉིད། །ལྡོག་ཆོས་ཐ་དད་བུམ་དང་ཀ་བུམ་བཞིན། །ངོ་བོ་ཐ་དད་ལྡོག་པ་ཐ་དད་ཀྱིས། །ཁྱབ་ཀྱང་ལྡོག་མིན་བྱས་དང་མི་རྟག་བཞིན། །གཞན་ཡང་རྡུལ་ཕྲན་ཕྱོགས་ཀྱི་ཆ་མེད་དང་། །ཤེས་པ་སྐད་ཅིག་ཆ་མེད་ཁས་ལེན་སོགས། །བྱེ་སྨྲ་མཐུན་ཀྱང་ཐམས་ཅད་མི་འདྲ་སྟེ། །བྱེ་སྨྲས་ཆོས་རྣམས་རྫས་གྲུབ་ཏུ་འདོད་ཀྱང་། །མདོ་སྡེ་པ་ཡིས་དེ་ལྟར་མི་འདོད་ཅིང་། །རྣམ་རིག་མིན་གཟུགས་བྱེ་སྨྲ་ཐལ་འགྱུར་བས། །གཟུགས་འདོད་མདོ་སེམས་རང་རྒྱུད་གསུམ་མི་འདོད། །བྱེ་སྨྲས་རྒྱུ་འབྲས་དུས་མཉམ་གཞན་སྡེས་མིན། །
གཉིས་པ་ལུགས་འདིའི་ཡུལ་ཅན་འདོད་ཚུལ་ལ། །གང་ཟག་ཤེས་པ་རྗོད་བྱེད་སྒྲ་དང་གསུམ། །དང་པོ་ལུང་གི་རྗེས་འབྲངས་ཕུང་པོའི་རྒྱུན། །གང་ཟག་མཚན་གཞི་རིགས་པའི་རྗེས་འབྲངས་རྣམས། །ཡིད་ཀྱི་རྣམ་ཤེས་གང་ཟག་མཚན་གཞིར་འདོད། །གཉིས་པར་ཚད་མ་དང་ནི་ཚད་མིན་བློ། །ཚད་མར་མངོན་སུམ་རྗེས་སུ་དཔག་པ་གཉིས། །དང་པོར་དབང་ཡིད་རང་རིག་རྣལ་འབྱོར་བཞི། །དབང་པོ་གཟུགས་ཅན་ཚད་མར་མི་རུང་སྟེ། །གསལ་རིག་གིས་སྟོང་རང་ཡུལ་མི་གཞལ་ཕྱིར། །ཚད་མིན་བློ་ལ་བཅད་ཤེས་ལོག་ཤེས་དང་། །ཐེ་ཚོམ་ཡིད་དཔྱོད་སྣང་ལ་མ་ངེས་ལྔ། །དེ་ལས་མངོན་སུམ་སྣང་ལ་མ་ངེས་བློ། །རྟོག་བྲལ་མ་འཁྲུལ་རྗེས་དཔག་ཡིད་དཔྱོད་དང་། །ཐེ་ཚོམ་གསུམ་ནི་རྟོག་པ་ཁོ་ན་འོ། །ཤེས་པས་ཡུལ་འཇལ་ཚེ་ན་རྣམ་བཅས་སུ། །རྟོགས་ཤིང་སེམས་དང་སེམས་བྱུང་རྫས་གཅིག་འདོད། །གསུམ་པ་རང་གི་བརྗོད་བྱའི་དོན་གོ་བའི། །མཉན་བྱ་རྗོད་བྱེད་སྒྲ་ཡི་མཚན་ཉིད་དང་། །བརྗོད་བྱའི་སྒོ་ནས་རིགས་བརྗོད་ཚོགས་བརྗོད་སྒྲ། །རིམ་བཞིན་གཟུགས་དང་བུམ་པ་ཞེས་བརྗོད་སྒྲ། །བརྗོད་ཚུལ་སྒོ་ནས་ཆོས་དང་ཆོས་བརྗོད་སྒྲ། །རིམ་བཞིན་སྒྲའི་མི་རྟག་དང་སྒྲ་མི་རྟག །
གཉིས་པ་ལམ་གྱི་འདོད་ཚུལ་བརྗོད་པར་གསུམ། །ལམ་གྱི་དམིགས་པ་སྤང་བྱ་འབྲས་བུ་གསུམ། །དང་པོ་བདེན་རྣམ་མི་རྟག་སོགས་བཅུ་དྲུག །བདག་མེད་ཕྲ་མོ་གང་ཟག་བདག་ཕྲ་གཅིག །གང་ཟག་རྟག་གཅིག་རང་དབང་གིས་སྟོང་པ། །བདག་མེད་རགས་པ་གང་ཟག་རང་རྐྱ་པའི། །རྫས་ཡོད་ཀྱིས་སྟོང་གང་བདག་ཕྲ་མོར་འདོད། །གཉིས་པ་སྤང་བྱར་གང་ཟག་བདག་འཛིན་དང་། །ཉོན་མོངས་ཅན་དང་ཉོན་མོངས་ཅན་མིན་པའི། །མི་ཤེས་པ་སོགས་ཐ་སྙད་ཙམ་མ་གཏོགས། །ཆོས་བདག་ཤེས་སྒྲིབ་བྱེ་སྨྲ་བཞིན་མི་འདོད། །ཐེག་གསུམ་ལམ་ལ་ལམ་ལྔའི་རྣམ་བཞག་དང་། །ཤེས་བཟོད་སྐད་ཅིག་བཅུ་དྲུག་མཐོང་ལམ་འདོད། །མངོན་སུམ་སྣང་ཡུལ་རང་མཚན་དགོས་པ་ཡིས། །གང་ཟག་བདག་མེད་ཕྲ་མོ་ཉན་ཐོས་ཀྱི། །མཐོང་ལམ་བར་ཆད་མེད་ལམ་འཛིན་སྟངས་ཀྱི། །ཡུལ་དུ་མི་འདོད་དེ་ཡིས་གང་ཟག་གི །བདག་གིས་དབེན་པའི་འདུ་བྱེད་དངོས་གཞལ་པའི། །ཤུགས་ལ་གང་ཟག་བདག་ཕྲ་རྟོགས་པར་འདོད། །
གསུམ་པ་འབྲས་བུའི་རྣམ་བཞག་བསྟན་པ་ནི། །དགྲ་བཅོམ་སྤངས་རྟོགས་ལས་ཉམས་མི་སྲིད་ཅིང་། །སངས་རྒྱས་གཟུགས་ཕུང་སངས་རྒྱས་ཁས་ལེན་པ། །མ་གཏོགས་ཐེག་གསུམ་འབྲས་བུ་བྱེ་སྨྲ་མཚུངས། །བྱེ་མདོས་ཐེག་ཆེན་བཀའ་རུ་ཁས་མི་ལེན། །འོན་ཀྱང་ཕྱི་རབས་བཀར་ཁས་ལེན་ཡོད་འདོད། །
 
༈ གསུམ་པ་སེམས་ཙམ་པ་ཡི་གྲུབ་མཐའ་ལ། །མཚན་ཉིད་དབྱེ་བ་སྒྲ་བཤད་འདོད་ཚུལ་བཞི། །ཕྱི་དོན་མི་འདོད་གཞན་དབང་བདེན་གྲུབ་ཏུ། །འདོད་པའི་ནང་པའི་གྲུབ་སྨྲར་མཚན་ཉིད་དོ། །དབྱེ་ན་རྣམ་བདེན་པ་དང་རྣམ་རྫུན་གཉིས། །ཁྱད་པར་སྔོན་པོ་སྔོན་འཛིན་མིག་ཤེས་ལ། །སྔོན་པོར་སྣང་བ་འདི་གཉིས་རྩོད་པའི་གཞི། །རྣམ་བདེན་པ་ཡིས་སྔོན་འཛིན་མིག་ཤེས་ལ། །སྔོན་པོ་སྔོན་སྣང་གྲུབ་པར་ཁས་ལེན་ཞིང་། །རྣམ་རྫུན་པ་ནི་དེ་ལས་ལྡོག་པ་འོ། །རྣམ་བདེན་རྫུན་གཉིས་སྔོན་འཛིན་མིག་ཤེས་ལ། །སྔོན་པོ་སྔོན་པོར་སྣང་དང་རགས་པར་སྣང་། །སྔོན་པོ་ཕྱི་དོན་གྲུབ་པར་མཐུན་ན་ཡང་། །རྣམ་བདེན་ཕྱི་རོལ་དོན་སྣང་མ་རིག་བསླད། །སྔོན་སྣང་རགས་སྣང་མ་རིག་བསླད་མ་ཞུགས། །རྣམ་བརྫུན་གསུམ་གར་མ་རིག་བསླད་ཞུགས་འདོད། །དེས་ན་སེམས་ཙམ་གང་ཞིག་དབང་ཤེས་ལ། །རགས་པར་སྣང་བ་སྣང་བ་དེ་ལྟར་དུ། །གྲུབ་པར་འདོད་པ་སེམས་ཙམ་རྣམ་བདེན་པ། །དེ་ལས་ལྡོག་པ་སེམས་ཙམ་རྣམ་རྫུན་པ། །རྣམ་བདེན་པ་ལ་གཟུང་འཛིན་གྲངས་མཉམ་དང་། །སྒོ་ང་ཕྱེད་ཚལ་སྣ་ཚོགས་གཉིས་མེད་གསུམ། །འདི་གསུམ་ཁྱད་པར་མཁས་བཞེད་སྣ་ཚོགས་ཏེ། །གུང་རུ་རྒྱན་བཟང་དབུ་མའི་སྟོང་ཐུན་ལས། །ཕྱེ་ལེབ་གཤོག་སྟེང་ཁྲ་འཛིན་མིག་ཤེས་ཀྱིས། །ཁྲ་འཛིན་ཚེ་ན་ཡུལ་ངོས་སྔོ་སེར་སོགས། །མི་འདྲ་རེ་རེའི་རྣམ་པ་གཏད་པ་དང་། །ཡུལ་ཅན་ངོས་ནས་དེ་བཞིན་སྔོ་སེར་སོགས། །མི་འདྲ་རེ་རེའི་རྣམ་པ་རྣམ་བདེན་དུ། །སྐྱེ་བར་འདོད་པས་གཟུང་འཛིན་གྲངས་མཉམ་དང་། །དེ་ལྟར་འཛིན་ཚེ་ཡུལ་ངོས་སྔོ་སེར་སོགས། །མི་འདྲའི་རྣམ་པ་གཏད་ཅིང་ཡུལ་ཅན་ངོས། །མི་འདྲ་རེ་རེའི་རྣམ་པ་རྣམ་མེད་དུ། །སྐྱེ་བར་འདོད་པས་སྒོ་ང་ཕྱེད་ཚལ་དང་། །དེ་ལྟར་འཛིན་ཚེ་ཡུལ་ངོས་སྔོ་སེར་སོགས། །མི་འདྲའི་རྣམ་པ་མ་གཏད་ཁྲ་ཙམ་གཏད། །ཡུལ་ཅན་ངོས་ནས་སྔོ་སོགས་མི་འདྲ་བའི། །རྣམ་པ་རྣམ་མེད་མ་སྐྱེས་ཁྲ་ཙམ་གྱི། །རྣམ་པ་རྣམ་མེད་སྣ་ཚོགས་གཉིས་མེད་འདོད། །དྲུང་ཆེན་ལེགས་བཟང་པཎ་ཆེན་བསོད་གྲགས་སོགས། །ཁྲ་འཛིན་དབང་ཤེས་ལ་སྣང་སྔོ་སེར་གཉིས། །ཐ་དད་རྫས་བཞིན་ཁྲ་འཛིན་མིག་ཤེས་སྟེང་། །མིག་ཤེས་ཐ་དད་གཟུང་འཛིན་གྲངས་མཉམ་འདོད། ། སྔོན་འཛིན་མིག་ཤེས་དང་ནི་སྔོན་པོ་གཉིས། །སྤྱིར་བཏང་ཤེས་པའི་བདག་ཉིད་ཡིན་ན་ཡང་། །དེ་གཉིས་རྫས་ཐ་དད་པས་སྒོ་ཕྱེད་ཚལ། །ཁྲ་སྟེང་སྔོ་སེར་རྫས་གཅིག་ཡིན་པ་བཞིན། །ཁྲ་འཛིན་མིག་ཤེས་སྟེང་གི་སྔོ་སེར་གཉིས། །འཛིན་པའི་དབང་ཤེས་རྫས་གཅིག་གཉིས་མེད་པ། །གྲུབ་མཐའ་ཆེན་མོར་ཁྲ་འཛིན་མིག་ཤེས་ཀྱིས། །ཁྲ་བོར་བལྟས་ཚེ་དེའི་སྟེང་སྔོ་སེར་སོགས། །གྲངས་མཉམ་རྣམ་ཤེས་རིགས་མཐུན་ཅིག་ཅར་དུ། །སྐྱེ་བར་འདོད་པས་གཟུང་འཛིན་གྲངས་མཉམ་དང་། །སྔོན་པོ་དང་ནི་སྔོན་འཛིན་མིག་ཤེས་གཉིས། །གྲུབ་དུས་ལ་ལྟོས་སྔ་ཕྱི་ཡིན་ན་ཡང་། །དམིགས་དུས་ལ་ལྟོས་རྫས་གཅིག་སྒོང་ཕྱེད་ཚལ། །ཁྲ་འཛིན་མིག་ཤེས་རང་ཡུལ་བལྟས་པའི་ཚེ། །ཡུལ་སྟེང་སྔོ་སེར་སོགས་ཀྱི་གྲངས་མཉམ་པའི། །རྣམ་ཤེས་རིགས་མཐུན་ཅིག་ཅར་མི་སྐྱེ་བར། །ཁྲ་འཛིན་མིག་ཤེས་གཅིག་པུ་ཁྲ་བོའི་སྟེང་། །སྔོ་སོགས་འཛིན་དབང་ཁས་ལེན་གཉིས་མེད་པ། །དེ་གསུམ་ནང་ནས་གང་བདེ་གཟུང་བར་བྱ། །གཟུང་འཛིན་གྲངས་མཉམ་རྣམ་ཤེས་ཚོགས་བརྒྱད་དྲུག །སྣ་ཚོགས་གཉིས་མེད་རྣམ་ཤེས་ཚོགས་དྲུག་དང་། །རྣམ་ཤེས་གཅིག་བུར་སྨྲ་བ་གཉིས་ཡོད་འདོད། །
རྣམ་བརྫུན་པ་ལ་དྲི་བཅས་དྲི་མེད་གཉིས། །སེམས་ཀྱི་ངོ་བོ་མ་རིག་བག་ཆགས་ཀྱི། །དྲི་མས་བསླད་པར་འདོད་པས་དྲི་བཅས་དང་། །དེ་ལས་ལྡོག་པ་རྣམ་བརྫུན་དྲི་མེད་པ། །ཡང་ན་སངས་རྒྱས་ས་རུ་མ་རིག་པ། །མེད་ཀྱང་འཁྲུལ་སྣང་ཡོད་འདོད་དྲི་བཅས་དང་། །དེ་ལས་ལྡོག་པ་དྲི་མེད་པ་རུ་བཞེད། །སེམས་ཙམ་དབྱེ་གཞན་ལུང་རིགས་རྗེས་འབྲངས་གཉིས། །རིམ་བཞིན་ས་སྡེ་ལྔ་ཡི་རྗེས་འབྲངས་དང་། །ཚད་མ་སྡེ་བདུན་རྗེས་སུ་འབྲངས་རྣམས་སོ། །
གསུམ་པ་སྒྲ་བཤད་ཅིའི་ཕྱིར་སེམས་ཙམ་པ། །ཆོས་རྣམས་སེམས་ཀྱི་བདག་ཉིད་ཙམ་ཞིག་ཏུ། །སྨྲ་བས་སེམས་ཙམ་པ་འམ་རྣམ་རིག་པ། །རྣལ་འབྱོར་གཞི་སྒོས་ལམ་གྱི་སྤྱོད་པ་དང་། །ཉམས་ལེན་གཏན་ལ་འབེབ་པས་རྣལ་འབྱོར་སྤྱོད། །
བཞི་པ་གཞི་ལམ་འབྲས་བུའི་འདོད་ཚུལ་ལས། །དང་པོ་ཆོས་རྣམས་མཚན་ཉིད་གསུམ་འདུས་འདོད། །འདུས་བྱས་གཞན་དབང་ཆོས་ཉིད་ཡོངས་གྲུབ་དང་། །དེ་ལས་གཞན་རྣམས་ཀུན་བཏགས་འདོད་པའི་ཕྱིར། །དེ་གསུམ་རང་ངོས་རང་བཞིན་གྲུབ་འདོད་ཀྱང་། །བདེན་པར་གྲུབ་དང་མ་གྲུབ་ཁྱད་པར་ནི། །ཀུན་བཏགས་བདེན་མེད་གཞན་ཡོངས་བདེན་གྲུབ་འདོད། །དོན་དམ་མ་གྲུབ་རྟོག་ངོར་གྲུབ་པ་དེ། །ཀུན་བཏགས་མཚན་ཉིད་དེ་ལ་རྣམ་གཉིས་འདོད། །རྣམ་གྲངས་པ་དང་མཚན་ཉིད་ཡོངས་ཆད་གཉིས། །དང་པོར་ཤེས་བྱ་གཉིས་པར་བདག་གཉིས་འཇོག །རྒྱུ་རྐྱེན་གཞན་བརྟེན་ལས་བྱུང་ཡོངས་གྲུབ་ཀྱི། །རྟེན་དུ་གྱུར་པ་གཞན་དབང་མཚན་ཉིད་དང་། །དབྱེ་ན་དག་དང་མ་དག་གཞན་དབང་གཉིས། །དང་པོ་འཕགས་པའི་རྗེས་ཐོབ་ཡེ་ཤེས་དང་། །སངས་རྒྱས་འཕགས་པའི་མཚན་དཔེ་ལྟ་བུ་དང་། །གཉིས་པ་ཟག་བཅས་ཉེར་ལེན་ཕུང་པོ་འོ། །བདག་གཉིས་གང་རུང་གིས་སྟོང་དེ་བཞིན་ཉིད། །ཡོངས་གྲུབ་མཚན་ཉིད་དེ་ལ་དབྱེ་ན་གཉིས། །ཕྱིན་ཅི་མ་ལོག་འགྱུར་མེད་ཡོངས་གྲུབ་གཉིས། །རིམ་བཞིན་འཕགས་པའི་མཉམ་ཡེ་ཆོས་ཉིད་དོ། །ཕྱིན་ཅི་མ་ལོག་ཡོངས་གྲུབ་ཡོངས་གྲུབ་ཀྱི། །དབྱེ་བར་བཀོད་ཀྱང་ཡོངས་གྲུབ་མ་ཡིན་ཏེ། །གང་ལ་དམིགས་ན་སྒྲིབ་པ་ཟད་འགྱུར་བའི། །རྣམ་དག་ལམ་གྱི་དམིགས་པ་མཐར་ཐུག་མིན། །ཤེས་བྱར་དབྱེ་ན་ཀུན་རྫོབ་དོན་དམ་བདེན། །ཐ་སྙད་དཔྱོད་བྱེད་རིགས་ཤེས་ཚད་མ་ཡིས། །རྙེད་པའི་དོན་དེ་ཀུན་རྫོབ་བདེན་པ་དང་། །ཀུན་རྫོབ་བདེན་པ་ཐ་སྙད་བདེན་བརྫུན་གཅིག །དོན་དམ་དཔྱོད་བྱེད་རིགས་ཤེས་ཚད་མ་ཡིས། །རྙེད་པའི་དོན་དེ་དོན་དམ་བདེན་པ་དང་། །སྟོང་ཉིད་ཆོས་དབྱིངས་ཡོངས་གྲུབ་དོན་དམ་བདེན། །ཡང་དག་མཐའ་དང་དེ་བཞིན་ཉིད་རྣམས་གཅིག །དོན་དམ་བདེན་ལ་རང་གི་མཚན་ཉིད་ཀྱིས། །གྲུབ་པས་ཁྱབ་ཀྱང་ཀུན་རྫོབ་བདེན་པར་མིན། །གཞན་དབང་རང་གི་མཚན་ཉིད་ཀྱིས་གྲུབ་ཀྱང་། །ཀུན་བཏགས་ཆོས་རྣམས་དེ་ལས་ལྡོག་པ་འོ། །བརྫུན་པ་ཡིན་ན་བརྫུན་པར་གྲུབ་མི་དགོས། །གཞན་དབང་བརྫུན་ཀྱང་བརྫུན་པར་མ་གྲུབ་ཕྱིར། །དུས་གསུམ་མེད་དགག་མདོ་སེམས་རང་རྒྱུད་མཐུན། །གཟུགས་སོགས་དོན་ལྔ་ཕྱི་དོན་མ་གྲུབ་སྟེ། །ཀུན་གཞིའི་རྣམ་ཤེས་སྟེང་དུ་ཐུན་མོང་དང་། །ཐུན་མིན་ལས་ཀྱིས་བག་ཆགས་བཞག་པའི་མཐུས། །ནང་སེམས་ཤེས་པའི་རྫས་ལས་སྐྱེས་པའི་ཕྱིར། །རྣམ་བདེན་ལྟར་ན་གཟུགས་སོགས་དོན་ལྔ་པོ། །ཕྱི་དོན་མིན་ཀྱང་རགས་པར་གྲུབ་པར་འདོད། །རྣམ་བརྫུན་དེ་ལྟར་ཕྱི་དོན་གྲུབ་དགོས་པས། །རགས་པར་མ་གྲུབ་ཞལ་གྱིས་བཞེས་པ་འོ། །
གཉིས་པ་ཡུལ་ཅན་འདོད་ཚུལ་བརྗོད་པ་ལ། །ལུང་གི་རྗེས་འབྲངས་རྣམ་ཤེས་ཚོགས་བརྒྱད་པོ། །འདོད་པས་ཡིད་དང་ཀུན་གཞིའི་རྣམ་ཤེས་ཟུང་། །གང་ཟག་ཏུ་འདོད་རིགས་པའི་རྗེས་འབྲངས་རྣམས། །ཡིད་ཀྱི་རྣམ་ཤེས་གང་ཟག་མཚན་གཞིར་འདོད། །ཀུན་གཞིའི་རྣམ་ཤེས་ནང་གི་བག་ཆགས་ལ། །དམིགས་ཤིང་རྣམ་པ་རིས་སུ་མ་ཆད་པ། །ངོ་བོ་མ་བསྒྲིབས་རང་བཞིན་ལུང་མ་བསྟན། །གྲོགས་ནི་སེམས་བྱུང་ཀུན་འགྲོ་ལྔ་ཁོ་ནར། །མཚུངས་ལྡན་གཙོ་བོ་ཡིད་ཀྱི་རྣམ་པར་རིག །བརྟན་པས་རབ་ཏུ་ཕྱེ་བ་ཞིག་ལ་འདོད། །བསྒྲིབས་པ་ལུང་མ་བསྟན་པ་མ་ཡིན་པ། །དགེ་རྩ་ཆད་རྒྱུད་ཡོད་པས་དགེ་བ་མིན། །གོང་མའི་ཁམས་ན་ཡོད་པས་མི་དགེའང་མིན། །ཉོན་ཡིད་དམིགས་པ་ཀུན་གཞི་ལ་དམིགས་ནས། །རྣམ་པ་ངར་སེམས་ངོ་བོ་བསྒྲིབས་ལུང་མིན། །འཇུག་ཤེས་དྲུག་གི་འཇོག་ཚུལ་སྤྱི་དང་མཐུན། །ཚད་མར་མངོན་རྗེས་གཉིས་དང་མངོན་སུམ་བཞིའི། །རྣམ་བཞག་ཁས་ལེན་རང་རིག་རྣལ་འབྱོར་གྱི། །མངོན་སུམ་གཉིས་ལ་མ་འཁྲུལ་ཤེས་པས་ཁྱབ། །རྣམ་བདེན་ཚུར་མཐོང་སྔོན་འཛིན་མིག་ཤེས་དེ། །མ་འཁྲུལ་ཤེས་པར་འདོད་ཅིང་རྣམ་བརྫུན་པས། །ཚུར་མཐོང་དབང་མངོན་འཁྲུལ་པའི་ཤེས་པས་ཁྱབ། །ཡིད་མངོན་འཁྲུལ་དང་མ་འཁྲུལ་ཆ་གཉིས་འདོད། །
གཉིས་པ་ལམ་གྱི་རྣམ་བཞག་ལ་ནི་གསུམ། །དང་པོ་བགྲོད་བྱའི་ལམ་གྱི་དམིགས་པ་ནི། །བདེན་བཞིའི་ཁྱད་ཆོས་མི་རྟག་སོགས་བཅུ་དྲུག །གང་ཟག་རྟག་གཅིག་རང་དབང་གིས་སྟོང་གཉིས། །གང་ཟག་བདག་མེད་རགས་པའི་མཚན་གཞི་དང་། །གང་ཟག་རང་རྐྱ་ཐུབ་པའི་རྫས་ཡོད་ཀྱིས། །སྟོང་པ་གང་ཟག་བདག་མེད་ཕྲ་མོ་ཡིན། །གཟུགས་དང་གཟུགས་འཛིན་ཚད་མ་རྫས་གཞན་སྟོང་། །གཟུགས་འཛིན་རྟོག་པའི་ཞེན་གཞིར་གཟུགས་དེ་ཉིད། །རང་གི་མཚན་ཉིད་མ་གྲུབ་སྟོང་པ་གཉིས། །གང་ཟག་བདག་མེད་ཕྲ་མོར་འདོད་པ་དང་། །བདག་མེད་ཕྲ་མོ་གཉིས་ཀ་སྟོང་ཉིད་འདོད། །སྟོང་ཉིད་ལ་ནི་དེ་གཉིས་མ་ངེས་ཏེ། །འགོག་བདེན་མྱང་འདས་གཉིས་ཀྱང་སྟོང་ཉིད་འདོད། །འདུས་བྱས་ཆོས་རྣམས་རང་འཛིན་ཚད་མ་དང་། །རྫས་གཅིག་ཏུ་འདོད་འདུས་མ་བྱས་ཆོས་རྣམས། །རང་འཛིན་ཚད་མར་ངོ་བོ་གཅིག་ཏུ་འདོད། །
གཉིས་པ་སྤང་བྱར་ཉོན་སྒྲིབ་ཤེས་སྒྲིབ་གཉིས། །དང་པོ་གང་བདག་ཕྲ་རགས་ས་བོན་བཅས། །རྩ་ཉོན་དྲུག་དང་ཉེ་ཉོན་ཉི་ཤུ་དང་། །གཉིས་པ་ཆོས་བདག་བག་ཆགས་དང་བཅས་སོ། །བྱང་སེམས་ཤེས་སྒྲིབ་སྤང་གཙོ་ཉོན་སྒྲིབ་མིན། །ཐེག་དམན་སློབ་པས་དེ་ལས་ལྡོག་སྟེ་སྤོང་། །
གསུམ་པ་རྣམ་བཞག་ཐེག་གསུམ་རེ་རེ་ལའང་། །ཚོགས་སྦྱོར་མཐོང་སྒོམ་མི་སློབ་ལམ་ལྔ་འདོད། །ཐེག་ཆེན་དེའི་སྟེང་ས་བཅུའི་རྣམ་བཞག་འདོད། །
གསུམ་པ་འབྲས་བུ་མངོན་དུ་བྱེད་ཚུལ་ནི། །ཐེག་དམན་རིགས་ངེས་གང་ཟག་བདག་མེད་ཀྱི། །དབང་བྱས་ཡོངས་གྲུབ་བསྒོམ་བྱའི་གཙོར་བྱས་ཏེ། །གོམས་པ་མཐར་ཕྱིན་ཚེ་ན་ཐེག་དམན་གྱི། །སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན། །བརྟེན་ནས་ཉོན་སྒྲིབ་མ་ལུས་སྤངས་པ་དང་། །དུས་མཉམ་ཐེག་དམན་དགྲ་བཅོམ་འབྲས་མངོན་བྱེད། །ཉན་རང་གཉིས་ཀྱི་བསྒོམ་བྱའི་བདག་མེད་དང་། །སྤང་བྱའི་ཉོན་མོངས་ཁྱད་པར་ཅུང་ཟད་ཀྱང་། །མེད་པས་གཉིས་ཀར་ཞུགས་གནས་བརྒྱད་འཐད་ཀྱང་། །རང་རྒྱལ་འདོད་རྟེན་དགེ་འདུན་ཉི་ཤུ་མེད། །ཉན་རང་གཉིས་ལ་ཁྱད་པར་མེད་མིན་ཏེ། །བསྐལ་བརྒྱར་བསོད་ནམས་ཚོགས་གསོག་མི་གསོག་དང་། །དེ་ཡིས་འབྲས་བུ་ལའང་མཆོག་དམན་འདོད། །ལུང་གི་རྗེས་འབྲངས་ཐེག་དམན་དགྲ་བཅོམ་པ། །ཞི་བགྲོད་གཅིག་པུ་ཐེག་ཆེན་ལམ་འཇུག་མིན། །བྱང་ཆུབ་ཡོངས་འགྱུར་དགྲ་བཅོམ་ཐེག་ཆེན་འཇུག །ལྷག་བཅས་ནས་འཇུག་ལྷག་མེད་མ་ཡིན་ཏེ། །མཐར་ཐུག་ཐེག་པ་གསུམ་དུ་གྲུབ་པར་འདོད། །རིགས་པའི་རྗེས་འབྲངས་ཐེག་དམན་དགྲ་བཅོམ་པ། །ཐེག་ཆེན་ལམ་འཇུག་མཐར་ཐུག་ཐེག་གཅིག་འདོད། །ཐེག་ཆེན་རིགས་ཅན་ཆོས་ཀྱི་བདག་མེད་ཀྱི། །དབང་བྱས་ཡོངས་གྲུབ་བསྒོམ་བྱའི་གཙོར་བྱས་ཏེ། །གྲངས་མེད་གསུམ་གྱི་ཚོགས་འབྲེལ་ཉམས་བླངས་ནས། །ས་བཅུ་ལམ་ལྔ་རིམ་བགྲོད་རྒྱུན་མཐའ་ཡི། །བར་ཆད་མེད་ལམ་སྒྲིབ་གཉིས་ཟད་སྤངས་ཏེ། །འོག་མིན་རང་དོན་ཕུན་ཚོགས་ཆོས་སྐུ་དང་། །གཞན་དོན་གཟུགས་ཀྱི་སྐུ་གཉིས་མངོན་དུ་བྱེད། །ཀུན་བཏུས་རྗེས་འབྲངས་མིའི་རྟེན་འཚང་རྒྱ་འདོད། །རྒྱལ་བའི་བཀའ་ལ་དྲང་ངེས་ཁས་ལེན་ཏེ། །དགོངས་འགྲེལ་ལས་བཤད་འཁོར་ལོ་དང་པོ་གཉིས། །དྲང་དོན་ཐ་མ་ངེས་དོན་མདོར་བཞེད་ཕྱིར། །དྲང་ངེས་དོན་ནི་དངོས་བསྟན་སྒྲ་ཇི་བཞིན། །ཁས་ལེན་མི་རུང་བ་དང་རུང་བའོ། །མྱང་འདས་ལྷག་བཅས་ལྷག་མེད་མི་གནས་གསུམ། །སངས་རྒྱས་སྐུ་ལ་ཆོས་ལོངས་སྤྲུལ་སྐུ་གསུམ། །ཆོས་སྐུར་ངོ་བོ་ཉིད་སྐུ་ཡེ་ཤེས་ཆོས། །ངོ་བོ་ཉིད་སྐུར་རང་བཞིན་རྣམ་དག་དང་། །གློ་བུར་དྲི་བྲལ་ངོ་བོ་ཉིད་སྐུ་བཅས། །འདོད་པས་ཐེག་པ་ཆེན་པོའི་གྲུབ་མཐར་བརྗོད། །
 
༈ བཞི་པ་ངོ་བོ་ཉིད་མེད་སྨྲ་བའམ། །དབུ་མའི་གྲུབ་མཐའི་རྣམ་བཞག་འཆད་པར་བཞི། །མཚན་ཉིད་སྒྲ་བཤད་དབྱེ་བ་སོ་སོའི་དོན། །དང་པོ་བདེན་གྲུབ་ཆོས་ནི་རྡུལ་ཙམ་ཡང་། །མེད་པར་ཁས་ལེན་ནང་པའི་གྲུབ་མཐའ་སྨྲ། །གང་ཟག་དེ་ནི་དབུ་མ་པའི་མཚན་ཉིད། །གཉིས་པ་ཅིའི་ཕྱིར་དབུ་མ་པ་ཞེས་བྱ། །རྟག་ཆད་མཐའ་གཉིས་བྲལ་བའི་དབུས་ཁས་ལེན། །ཆོས་རྣམས་བདེན་གྲུབ་ངོ་བོ་མེད་པར་སྨྲ། །དེ་ཕྱིར་ངོ་བོ་ཉིད་མེད་སྨྲ་ཞེས་བྱ། །གསུམ་པར་རང་རྒྱུད་པ་དང་ཐལ་འགྱུར་བ། །བཞི་པར་རང་རྒྱུད་ཐལ་འགྱུར་ལུགས་བཤད་གཉིས། །དང་པོར་མཚན་ཉིད་སྒྲ་དབྱེ་འདོད་ཚུལ་བཞི། །རང་གི་མཚན་ཉིད་ཀྱིས་གྲུབ་ཐ་སྙད་དུ། །ཁས་ལེན་ངོ་བོ་ཉིད་སྨྲ་རང་རྒྱུད་མཚན། །ཚུལ་གསུམ་རང་ངོས་ནས་གྲུབ་རྟགས་ཡང་དག །ལ་བརྟེན་བདེན་དངོས་འགོག་པས་རང་རྒྱུད་པ། །དབྱེ་ན་རྣལ་འབྱོར་སྤྱོད་དང་མདོ་སྡེ་སྤྱོད། །ཕྱི་དོན་མི་འདོད་རང་རིག་ཁས་ལེན་པའི། །དབུ་མ་པ་དེ་རྣལ་འབྱོར་སྤྱོད་པ་དང་། །མཚན་གཞི་སློབ་དཔོན་ཞི་བ་འཚོ་ལྟ་བུ། །རང་རིག་མི་འདོད་ཕྱི་དོན་རང་མཚན་གྱིས། །གྲུབ་པར་ཁས་ལེན་དབུ་མ་མདོ་སྡེ་སྤྱོད། །མཚན་གཞི་སློབ་དཔོན་ལེགས་ལྡན་འབྱེད་ལྟ་བུ། །སྒྲ་བཤད་གཞི་ཡི་རྣམ་བཞག་སེམས་ཙམ་དང་། །མཐུན་པར་སྨྲ་བས་རྣལ་འབྱོར་སྤྱོད་རང་རྒྱུད། །མདོ་སྡེ་བ་ལྟར་ཕྲ་རབ་རྡུལ་བསགས་པའི། །ཕྱི་དོན་འདོད་པས་མདོ་སྡེ་སྤྱོད་རང་རྒྱུད། །
རྣལ་འབྱོར་སྤྱོད་པའི་དབུ་མ་རང་རྒྱུད་པར། །རྣམ་བདེན་རྣམ་རྫུན་དང་མཐུན་དབུ་མ་གཉིས། །དང་པོ་ཞི་མཚོ་ཀ་མ་ལ་ཤྰི་ལ། །འཕགས་པ་གྲོལ་སྡེ་ལ་སོགས་རྗེས་འབྲངས་དང་། །གཉིས་པ་སློབ་དཔོན་སེང་གེ་བཟང་པོ་དང་། །ཛེ་ཏྰ་རི་དང་ལྭ་བ་པ་ལྟ་བུ། །ཛེ་ཏྰ་རི་ནི་རྣམ་བརྫུན་དྲི་བཅས་དང་། །ལྭ་བ་པ་ནི་རྣམ་བརྫུན་དྲི་མེད་མཐུན། །
བཞི་པ་གྲུབ་མཐའི་འདོད་ཚུལ་བརྗོད་པ་ལ། །རྣལ་འབྱོར་སྤྱོད་པའི་དབུ་མ་རང་རྒྱུད་དང་། །མདོ་སྡེ་སྤྱོད་པའི་དབུ་མ་རང་རྒྱུད་གཉིས། །དང་པོར་གཞི་དང་ལམ་དང་འབྲས་བུ་གསུམ། །གཞི་ལ་དབྱེ་ན་ཡུལ་དང་ཡུལ་ཅན་གཉིས། །གཞི་གྲུབ་རང་གི་མཚན་ཉིད་ཀྱིས་གྲུབ་ཁྱབ། །ཆོས་ཀུན་བཏགས་དོན་བཙལ་ན་རྙེད་པར་འདོད། ། རང་བཞིན་རང་མཚན་རང་གི་སྡོད་ལུགས་ཀྱི། །ངོས་ནས་གྲུབ་དང་རང་ངོས་གྲུབ་དོན་གཅིག །ཤེས་བྱར་དབྱེ་ན་དོན་དམ་ཀུན་རྫོབ་གཉིས། །རང་ཉིད་མངོན་སུམ་རྟོགས་པའི་མངོན་སུམ་གྱི། །ཚད་མས་རང་ཉིད་གཉིས་སྣང་ནུབ་ཚུལ་གྱིས། །རྟོགས་བྱ་དོན་དམ་བདེན་པའི་མཚན་ཉིད་དང་། །བུམ་པ་བདེན་སྟོང་ལྟ་བུ་མཚན་གཞི་འོ། ། རང་ཉིད་མངོན་སུམ་རྟོགས་པའི་མངོན་སུམ་གྱི། །ཚད་མས་རང་ཉིད་གཉིས་སྣང་དང་བཅས་པར། །རྟོགས་བྱ་ཀུན་རྫོབ་བདེན་པའི་མཚན་ཉིད་དང་། །བུམ་པ་ལྟ་བུ་དེ་ཡི་མཚན་གཞི་འོ། །དོན་དམ་བདེན་པར་རྒྱས་པར་དབྱེ་བ་ན། །སྟོང་ཉིད་བཅུ་དྲུག་དང་ནི་བཞིར་ཡང་འདོད། །ཀུན་རྫོབ་བདེན་པར་ཡང་དག་ལོག་པ་གཉིས། །དང་པོ་ཆུ་དང་གཉིས་པ་སྨིག་རྒྱུའི་ཆུ། །ལུགས་འདིས་ཤེས་པར་ཡང་དག་ཀུན་རྫོབ་ཁྱབ། །
གཉིས་པ་ཡུལ་ཅན་འདོད་ཚུལ་བརྗོད་པ་ནི། །ཡིད་ཀྱི་རྣམ་ཤེས་གང་ཟག་མཚན་གཞི་དང་། །ཀུན་གཞི་དང་ནི་ཉོན་ཡིད་ཁས་མི་ལེན། །རྣམ་ཤེས་ཚོགས་དྲུག་རང་རྒྱུད་གཉིས་ཀ་མཐུན། །བློ་ལ་ཚད་མ་དང་ནི་ཚད་མིན་གཉིས། །ཚད་མ་ལ་ནི་མངོན་སུམ་རྗེས་དཔག་གཉིས། །མངོན་སུམ་དབང་ཡིད་རང་རིག་རྣལ་འབྱོར་བཞི། །ཕྱི་མ་གཉིས་ལ་མ་འཁྲུལ་ཤེས་པས་ཁྱབ། །ཕྱི་རོལ་དོན་དུ་གྲུབ་པ་མི་འདོད་པས། །སྔོན་དང་སྔོན་འཛིན་མངོན་སུམ་རྫས་གཅིག་འདོད། །
གཉིས་པ་ལམ་གྱི་རྣམ་བཞག་ལ་ནི་གསུམ། །༡དམིགས་པ་གང་ཟག་རྟག་གཅིག་རང་དབང་གིས། །སྟོང་པ་གང་ཟག་བདག་མེད་རགས་པ་དང་། །གང་ཟག་རང་རྐྱ་ཐུབ་པའི་རྫས་ཡོད་ཀྱིས། །སྟོང་པ་གང་ཟག་བདག་མེད་ཕྲ་མོར་འདོད། །གཟུགས་དང་གཟུགས་འཛིན་ཚད་མ་རྫས་གཞན་གྱིས། །སྟོང་པ་ཆོས་ཀྱི་བདག་མེད་རགས་པ་དང་། །ཆོས་ཀུན་བདེན་པར་གྲུབ་པས་སྟོང་པ་ནི། །ཆོས་ཀྱི་བདག་མེད་ཕྲ་མོར་བཞེད་པ་འོ། ། ༢ སྤང་བྱ་གང་ཟག་བདག་འཛིན་ཉོན་སྒྲིབ་དང་། །ཆོས་ཀྱི་བདག་འཛིན་ཤེས་བྱའི་སྒྲིབ་པར་འདོད། །ཤེས་སྒྲིབ་ལ་ཡང་གཟུང་འཛིན་རྫས་གཞན་དུ། །འཛིན་པ་ལྟ་བུ་ཤེས་སྒྲིབ་རགས་པ་དང་། །ཕུང་སོགས་ཆོས་ཀུན་བདེན་པར་གྲུབ་པ་རུ། །འཛིན་པ་ཤེས་སྒྲིབ་ཕྲ་མོར་འདོད་པ་འོ། ། ༣ རང་བཞིན་ལྔ་གསུམ་བཅོ་ལྔའི་ལམ་འདོད་ཅིང་། །ཁྱད་པར་རང་རྒྱལ་བར་ཆད་མེད་ལམ་དང་། །རྣམ་གྲོལ་ལམ་ལ་གཉིས་སྟོང་རྣམ་ཅན་བཞེད། །
གསུམ་པ་འབྲས་བུའི་རྣམ་བཞག་འཆད་པ་ལ། །རང་རྒྱལ་ཤེས་སྒྲིབ་རགས་པ་སྤང་བྱའི་གཙོར། །འདོད་ཕྱིར་ཞུགས་གནས་བརྒྱད་པོ་མི་རྩི་ཡང་། །ཉན་ཐོས་གང་ཟག་ཡ་བརྒྱད་ཡོད་པར་བཞེད། །ཉན་ཐོས་རིགས་ངེས་རྣམས་ཀྱི་བསྒོམ་བྱའི་གཙོ། །གང་ཟག་བདག་མེད་རྟོགས་པའི་ལྟ་བ་དང་། །མཐར་ནི་རྡོ་རྗེ་ལྟ་བུའི་ཏིང་འཛིན་གྱི། །སྒོམ་ལམ་ལ་བརྟེན་ཉོན་སྒྲིབ་མ་ལུས་པར། །སྤངས་དང་དུས་མཉམ་དགྲ་བཅོམ་འབྲས་བུ་འཐོབ། །རང་རྒྱལ་རིགས་ངེས་གཟུང་འཛིན་གཉིས་སྟོང་གི །ལྟ་བ་བསྒོམ་བྱའི་གཙོ་བོར་བྱས་པའི་མཐར་། །སྒོམ་ལམ་རྡོ་རྗེ་ལྟ་བུའི་ཏིང་འཛིན་གྱིས། །ཉོན་ཕྲ་ཤེས་རགས་མ་ལུས་སྤངས་པ་དང་། །མཉམ་དུ་རང་རྒྱལ་དགྲ་བཅོམ་འབྲས་བུ་ཐོབ། །ཐེག་དམན་མྱང་འདས་ལྷག་བཅས་ལྷག་མེད་གཉིས། །སྔ་མའི་ལས་ཉོན་གྱིས་འཕངས་སྡུག་བསྔལ་གྱི།
ལྷག་མར་བཅས་པ་ལྷག་བཅས་མྱང་འདས་དང་། །སྡུག་བསྔལ་ཕུང་བོར་བྲལ་བ་ལྷག་མེད་དོ། །ཉན་རང་དགྲ་བཅོམ་ཐེག་ཆེན་ལམ་འཇུག་སྟེ། །མཐར་ཐུག་ཐེག་པ་གཅིག་ཏུ་གྲུབ་པར་འདོད། །ལུགས་འདིར་ཉན་རང་སྤང་བྱ་རྟོགས་རིགས་གཉིས། །འདྲ་མིན་འཐོབ་བྱའི་འབྲས་བུར་མཆོག་དམན་ཡོད། །ཐེག་ཆེན་རིགས་ངེས་བྱང་ཆུབ་སེམས་བསྐྱེད་དེ། །ཚོགས་ལམ་ཆེན་པོར་ཆོས་རྒྱུན་ཏིང་འཛིན་ལ། །བརྟེན་ནས་མཆོག་གི་སྤྲུལ་སྐུར་གདམས་ངག་ཉན། །དེ་དོན་ཉམས་བླངས་སྟོང་པ་ཉིད་དམིགས་པའི། །སྒོམ་བྱུང་ཤེས་རབ་སྐྱེས་ཚེ་སྦྱོར་ལམ་ཐོབ། །དྲོད་ཀྱི་སྐབས་སུ་མཐོང་སྤང་ཀུན་ཉོན་མོངས། །གཟུང་རྟོག་མངོན་གྱུར་ཉམས་སྨོད་བྱེད་པ་དང་། །རྩེ་མོར་རྣམ་བྱང་གཟུང་རྟོག་མངོན་གྱུར་དང་། །བཟོད་པར་རྫས་འཛིན་རྟོག་པ་མངོན་གྱུར་པ། །ཆོས་མཆོག་བཏགས་འཛིན་རྟོག་པ་མངོན་གྱུར་པ། །ཉམས་སྨོད་འདི་དག་མཐོང་སྤང་ཡིན་པར་འདོད། །དྲོད་རྩེ་བཟོད་མཆོག་བཞི་ལ་རིམ་བཞིན་དུ། །སྣང་བ་ཐོབ་དང་མཆེད་པའི་ཏིང་འཛིན་དང་། །དེ་ཉིད་ཕྱོགས་གཅིག་ཞུགས་པའི་ཏིང་འཛིན་དང་། །བར་ཆད་མེད་པའི་ཏིང་འཛིན་ཞེས་ཟེར་རོ། །དེའི་མཇུག་མཐོང་ལམ་བར་ཆད་མེད་ལམ་གྱིས། །སྒྲིབ་གཉིས་ཀུན་བཏགས་ས་བོན་བཅས་སྤངས་ནས། །རྣམ་གྲོལ་ལམ་དང་འགོག་བདེན་མངོན་དུ་བྱེད། །སྒོམ་ལམ་སྐོར་དགུས་སྒོམ་སྤང་ཉོན་ཤེས་སྒྲིབ། །བཅུ་དྲུག་དང་ནི་བརྒྱ་དང་བརྒྱད་ཀྱི་གྲངས། །ས་བོན་དང་བཅས་རིམ་བཞིན་སྤོང་བར་གསུངས། །མཐར་ནི་རྒྱུན་མཐའི་བར་ཆད་མེད་ལམ་ལ། །བརྟེན་ནས་སྒྲིབ་གཉིས་ལྷན་སྐྱེས་ཅིག་ཆར་དུ། །སྤངས་ཏེ་སྐད་ཅིག་གཉིས་པར་འཚང་རྒྱ་སྟེ། །རིགས་ངེས་འབྲས་བུ་མངོན་དུ་བྱེད་ཚུལ་ལོ། །ཐེག་ཆེན་མྱང་འདས་མི་གནས་མྱང་འདས་གཉིས། །དོན་གཅིག་སངས་རྒྱས་སྐུ་ལ་བཞིར་གྲངས་ངེས། །འཕགས་སེང་གཉིས་ཀྱང་སྐུ་ཡི་བསྟན་ཚུལ་ལ། །རྩོད་ཀྱི་གྲངས་ངེས་ལ་ནི་མི་རྩོད་དོ། །སངས་རྒྱས་བཀའ་ལ་དྲང་ངེས་གཉིས་འདོད་དེ། །ཀུན་རྫོབ་བདེན་པ་དངོས་བསྟན་བསྟན་བྱ་ཡི། །གཙོ་བོར་བྱས་སྟོན་དྲང་དོན་མདོ་སྡེ་དང་། །དོན་དམ་དངོས་བསྟན་ངེས་དོན་མདོ་རུ་འདོད། །དགོངས་འགྲེལ་འཁོར་ལོ་དང་པོ་དྲང་དོན་དང་། །བར་ཐ་གཉིས་ལ་དྲང་ངེས་གཉིས་གཉིས་ཡོད། །
 
༈ གཉིས་པ་མདོ་སྡེ་སྤྱོད་པའི་དབུ་མ་པའི། །ལུགས་ལ་གཞི་ལམ་འབྲས་བུའི་རྣམ་བཞག་གསུམ། །དང་པོ་ལུགས་འདིས་ཕྱི་དོན་འདོད་པ་དང་། །རང་རིག་ཁས་མི་ལེན་པ་ཙམ་མ་གཏོགས། །གཞི་ཡི་རྣམ་བཞག་ཕལ་ཆེར་སྔ་མར་མཚུངས། །གཉིས་པ་ལམ་གྱི་ཁྱད་པར་འཆད་པ་ལ། །ཉན་རང་རིགས་ངེས་ཆོས་བདག་རྟོགས་པ་མེད། །གཟུང་འཛིན་རྫས་གཞན་རྟོགས་པའི་ཡེ་ཤེས་མེད། །ཕྱི་རོལ་དོན་འཛིན་རྟོག་པ་ཤེས་སྒྲིབ་མིན། །གསུམ་པ་འབྲས་བུའི་རྣམ་བཞག་འཆད་པ་སྟེ། །ཉན་རང་གཉིས་པོ་སྤང་བྱའི་སྒྲིབ་པ་དང་། །རྟོགས་བྱའི་བདག་མེད་ཕྲ་རགས་ཁྱད་མེད་འདོད། །ཞུགས་གནས་བརྒྱད་ཀྱི་རྣམ་གཞག་གཉིས་ཀར་བྱེད། །ཐེག་ཆེན་རིགས་ངེས་སྒྲིབ་གཉིས་རིམ་ཅན་སྤོང་། །ས་བརྒྱད་ཐོབ་ཚེ་ཉོན་མོངས་སྒྲིབ་པ་དག །ཟད་པར་སྤངས་ཞེས་རྟོག་གེ་འབར་བར་བཤད། །ཐལ་འགྱུར་བ་བཞིན་ཉོན་སྒྲིབ་མ་ཟད་བར། །ཤེས་སྒྲིབ་སྤོང་བའི་མགོ་མི་རྩོམ་པ་མིན། །ཁྱད་པར་དེ་ཙམ་གཏོགས་གཞི་ལམ་འབྲས། །ཕལ་ཆེར་རྣལ་འབྱོར་སྤྱོད་པའི་དབུ་མར་མཐུན། །
གཉིས་པ་གྲུབ་མཐའི་གཙུག་རྒྱན་ཐལ་འགྱུར་བའི། །ལུགས་ལ་མཚན་ཉིད་སྒྲ་བཤད་འདོད་ཚུལ་གསུམ། །རང་གི་མཚན་ཉིད་ཀྱིས་གྲུབ་ཐ་སྙད་ཙམ། །མི་བཞེད་ངོ་བོ་ཉིད་སྨྲ་མཚན་ཉིད་དང་། །སངས་རྒྱས་བསྐྱངས་དང་ཟླ་གྲགས་ཞི་བ་ལྷ། །མཚན་གཞིར་འཇོག་གོ་གཉིས་པ་སྒྲ་བཤད་ནི། །ཐལ་འགྱུར་ཙམ་གྱིས་ཕྱིར་རྒོལ་རྒྱུད་ལ་ནི། །བསྒྲུབ་བྱ་རྟོགས་པའི་རྗེས་དཔག་སྐྱེ་བར་འདོད། །གསུམ་པ་འདོད་ཚུལ་གཞི་ལམ་འབྲས་གསུམ་ལས། །དང་པོ་གཞི་གྲུབ་རང་གི་མཚན་ཉིད་ཀྱིས། །མ་གྲུབ་པས་ཁྱབ་ཁས་ལེན་རྒྱུ་མཚན་ནི། །གཞི་གྲུབ་ཡིན་ན་རྟོག་པས་བཏགས་ཙམ་ཁྱབ། །ཙམ་སྒྲས་རང་གི་མཚན་ཉིད་ཀྱིས་གྲུབ་གཅོད། །གཞི་གྲུབ་ཡུལ་དང་ཤེས་བྱ་རྣམས་དོན་གཅིག །དབྱེ་ན་མངོན་ལྐོག་གཉིས་དང་བདེན་པ་གཉིས། །དང་པོ་རྟགས་ལ་མ་བརྟེན་མྱོང་སྟོབས་ཀྱིས། །རྟོགས་ནུས་ཆོས་དེ་མངོན་གྱུར་མཚན་ཉིད་དང་། །མངོན་སུམ་མངོན་གྱུར་དབང་པོའི་ཡུལ་དང་ནི། །ལྐོག་ཏུ་མ་གྱུར་ཆོས་བཞི་དོན་གཅིག་གོ །མཚན་གཞི་གཟུགས་སྒྲ་དྲི་རོ་རེག་བྱ་ལྔ། །རྒྱུ་མཚན་ཡང་ན་རྟགས་ལ་བརྟེན་ནས་ནི། །རྟོགས་དགོས་ཆོས་དེ་ལྐོག་གྱུར་མཚན་ཉིད་དང་། །ལྐོག་གྱུར་མངོན་སུམ་མིན་པའི་ཆོས་དང་ནི། །རྗེས་དཔག་གཞལ་བྱ་དག་ནི་དོན་གཅིག་གོ །མཚན་གཞི་སྒྲ་མི་རྟག་དང་སྒྲ་གང་ཟག །བདག་ཏུ་མེད་པ་ལྟ་བུར་འདོད་པ་འོ། །དེའི་ཕྱིར་ལུགས་འདིར་མངོན་ལྐོག་གཉིས་དང་ནི། །གཞལ་བྱའི་གནས་གསུམ་འགལ་བར་བཞེད་པའོ། །ཐ་སྙད་དཔྱོད་བྱེད་ཚད་མའི་རྙེད་དོན་གང་། །ཐ་སྙད་དཔྱོད་བྱེད་ཚད་མ་རང་ཉིད་ལ། །ཐ་སྙད་དཔྱོད་བྱེད་ཚད་མར་སོང་བ་དེ། །རང་ཉིད་ཀུན་རྫོབ་བདེན་པའི་མཚན་ཉིད་དོ། །མཚན་གཞི་བུམ་སོགས་རིགས་འགྲེས་ཤེས་པར་བྱ། །
དབྱེ་བར་ཡང་དག་ལོག་པའི་ཀུན་རྫོབ་གཉིས། །མི་འབྱེད་ཡང་དག་ཀུན་རྫོབ་མེད་པའི་ཕྱིར། །ཀུན་རྫོབ་ཡིན་ན་ཡང་དག་མ་ཡིན་དགོས། །དེ་ལ་ལོག་པས་ཁྱབ་པ་ཁས་ལེན་ནོ། །འོན་ཀྱང་འཇིག་རྟེན་རང་དགའི་ཤེས་ངོ་ལ། །ལྟོས་ཏེ་ཀུན་རྫོབ་ཡང་ལོག་གཉིས་སུ་འབྱེད། །གཟུགས་དེ་འཇིག་རྟེན་ཤེས་ངོར་ཡང་དག་དང་། །མེ་ལོང་ནང་གི་གཟུགས་བརྙན་ལོག་པ་ཡིན། །འཇིག་རྟེན་ཤེས་ངོར་ཡང་དག་ཡོད་པ་ཡིས། །མ་ཁྱབ་གཟུགས་ཀྱི་བདེན་གྲུབ་ཅི་བཞིན་ནོ། །མཐར་ཐུག་དཔྱོད་བྱེད་ཚད་མའི་རྙེད་དོན་གང་། །མཐར་ཐུག་དཔྱོད་བྱེད་ཚད་མ་རང་ཉིད་ལ། །མཐར་ཐུག་དཔྱོད་བྱེད་ཚད་མར་སོང་བ་དེ། །རང་ཉིད་དོན་དམ་བདེན་པའི་མཚན་ཉིད་དོ། །མཚན་གཞིར་བུམ་པ་རང་བཞིན་གྱིས་མེད་འཇོག། །དབྱེ་བ་སྔར་བཞིན་འདས་དང་མ་འོངས་དང་། །ཞིག་པ་དངོས་པོར་ཁས་ལེན་ཕྱི་དོན་འདོད། །གཟུང་འཛིན་ངོ་བོ་ཐ་དད་གྲུབ་པར་བཞེད། །
ཡུལ་ཅན་འདོད་ཚུལ་རང་ཉིད་གདགས་པའི་གཞི། །ཕུང་པོ་བཞི་འམ་ལྔ་ལ་བརྟེན་ནས་ནི། །བཏགས་པའི་ང་ཙམ་གང་ཟག་མཚན་གཞིར་འདོད། །གང་ཟག་ལ་ནི་ལྡན་མིན་འདུ་བྱེད་ཁྱབ། །བློ་ལ་ཚད་མ་དང་ནི་ཚད་མིན་གཉིས། །ཚད་མར་མངོན་རྗེས་མངོན་སུམ་དབང་ཡིད་དང་། །རྣལ་འབྱོར་མངོན་སུམ་རང་རིག་མི་འདོད་དོ། །སེམས་ཅན་རྒྱུད་བསྡུས་དབང་ཤེས་འཁྲུལ་ཤེས་ཁྱབ། །རྣལ་འབྱོར་མངོན་སུམ་འཁྲུལ་དང་མ་འཁྲུལ་གཉིས། །མཉམ་བཞག་ཟག་མེད་ངོ་བོར་གྱུར་པ་ཡི། །རྣལ་འབྱོར་མངོན་སུམ་དེ་ནི་མ་འཁྲུལ་པ། །ཚུར་མཐོང་རྒྱུད་ཀྱི་ཕྲ་བའི་མི་རྟག་པ། །མངོན་སུམ་རྟོགས་པའི་རྣལ་མངོན་འཁྲུལ་ཤེས་ཏེ། །སོ་སྐྱེས་རྒྱུད་ཀྱི་ཤེས་པ་ཡིན་ཕྱིར་རོ། །བཅད་ཤེས་ལ་ནི་མངོན་སུམ་ཚད་ཁྱབ་སྟེ། །སྒྲ་མི་རྟག་པར་རྟོགས་པའི་རྗེས་དཔག་གི །སྐད་ཅིག་གཉིས་པ་རྟོག་གྱུར་མངོན་ཚད་དང་། །གཟུགས་འཛིན་དབང་མངོན་སྐད་ཅིག་གཉིས་པ་དེ། །རྟོག་མེད་མངོན་སུམ་ཚད་མ་ཡིན་པའི་ཕྱིར། །རྗེས་དཔག་དབྱེ་ན་དངོས་སྟོབས་གྲགས་པ་དང་། །དཔེ་ཉེར་འཇལ་དང་ཡིད་ཆེས་རྗེས་དཔག་བཞི། །ཡུལ་དེར་འཁྲུལ་དང་རྟོགས་པ་མི་འགལ་ཏེ། །སྒྲ་མི་རྟག་རྟོགས་རྗེས་དཔག་དེར་འཁྲུལ་རྟོགས། །གཉིས་སྣང་ཅན་གྱི་ཤེས་པ་རང་ཉིད་ཀྱི། །སྣང་བར་མངོན་སུམ་ཚད་མ་ཡིན་པས་ཁྱབ། །སྒྲ་རྟག་འཛིན་རྟོག་རང་སྣང་མངོན་ཚད་དོ། །ཤེས་པར་རང་གི་གཞལ་བྱ་རྟོགས་ཁྱབ་སྟེ། །རི་བོང་རྭ་ཡི་དོན་སྤྱི་དེ་འཛིན་གྱི། །རྟོག་པའི་གཞལ་བྱ་སྒྲ་རྟག་དོན་སྤྱི་དེ། །སྒྲ་རྟག་འཛིན་རྟོག་གཞལ་བྱ་ཡིན་པའི་ཕྱིར། །
གཉིས་པ་ལམ་གྱི་རྣམ་བཞག་ལ་ནི་གསུམ། །དམིགས་པ་སྤང་བྱ་རང་བཞིན་དང་པོ་ནི། །གང་ཟག་རང་རྐྱ་ཐུབ་པའི་རྫས་ཡོད་ཀྱིས། །སྟོང་པ་གང་ཟག་བདག་མེད་རགས་པ་དང་། །གང་ཟག་བདེན་སྟོང་དེ་བདག་ཕྲ་མོར་འདོད། །བདག་མེད་ཕྲ་མོ་གཉིས་ནི་སྟོང་གཞི་ཡི། །སྒོ་ནས་འབྱེད་ཀྱི་དགག་བྱའི་སྒོ་ནས་མིན། །གང་ཟག་སྟེང་དུ་དགག་བྱ་བདེན་པར་གྲུབ། །བཀག་པ་གང་ཟག་བདག་མེད་ཕྲ་མོ་དང་། །ཕུང་སོགས་སྟེང་དུ་དགག་བྱ་བདེན་གྲུབ་བཀག །ཆོས་ཀྱི་བདག་མེད་ཕྲ་མོ་ཡིན་པའི་ཕྱིར། །གང་ཟག་ཆོས་ཀྱི་བདག་མེད་ཕྲ་མོ་གཉིས། །ཕྲ་རགས་མེད་ཅིང་གནས་ལུགས་མཐར་ཐུག་འདོད། །
སྤང་བྱ་བདག་འཛིན་ཕྲ་རགས་ས་བོན་བཅས། །དེ་བྱུང་དུག་གསུམ་ས་བོན་ཉོན་སྒྲིབ་འདོད། །ཆོས་ཀུན་བདེན་འཛིན་ཉོན་མོངས་སྒྲིབ་པར་བཞེད། །བདེན་འཛིན་བག་ཆགས་དེ་བྱུང་གཉིས་སྣང་གི །འཁྲུལ་ཆ་བདེན་གཉིས་ངོ་བོ་ཐ་དད་དུ། །འཛིན་པའི་དྲི་མ་རྣམས་ནི་ཤེས་སྒྲིབ་འདོད། །
ལམ་གྱི་རང་བཞིན་ཐེག་གསུམ་རེ་རེར་ཡང་། །ལྔ་གསུམ་བཅོ་ལྔའི་ལམ་གྱི་རྣམ་བཞག་དང་། །ཐེག་ཆེན་ལ་ནི་ས་བཅུའི་རྣམ་བཞག་ཀྱང་། མདོ་སྡེ་ས་བཅུ་པ་ལ་བརྟེན་ནས་བཤད། །ཐེག་གསུམ་ཤེས་རབ་རྟོགས་རིགས་མཚུངས་པ་སྟེ། །འཕགས་པས་ཆོས་བདག་མངོན་སུམ་རྟོགས་པས་ཁྱབ། །
གསུམ་པ་འབྲས་བུ་མངོན་དུ་བྱེད་ཚུལ་ནི། །ཐེག་དམན་རིགས་ངེས་བདག་མེད་ལྟ་བ་དེ། །རིགས་པ་མདོར་བསྡུས་ཙམ་གྱིས་བསྒོམས་པར་བརྟེན། །སྒོམ་ལམ་རྡོ་རྗེ་ལྟ་བུའི་ཏིང་འཛིན་གྱིས། །བདེན་འཛིན་ས་བོན་དང་བཅས་སྤངས་པ་དང་། །དུས་མཉམ་རང་གི་བྱང་ཆུབ་མངོན་དུ་བྱེད། །རྣལ་འབྱོར་སྤྱོད་པའི་དབུ་མ་རང་རྒྱུད་པ། །མན་ཆད་ལྷག་མེད་མྱང་འདས་འཐོབ་པ་ལ། །དེའི་སྔོན་ལྷག་བཅས་མྱང་འདས་ཐོབ་དགོས་བཞེད། །ལུགས་འདིར་ལྷག་བཅས་སྔོན་དུ་ལྷག་མེད་དགོས། །ཉན་རང་གཉིས་ལ་ཞུགས་གནས་རྣམ་བཞག་དང་། །ཞུགས་གནས་བརྒྱད་པོར་འཕགས་པས་ཁྱབ་པར་འདོད། །
ཐེག་པ་ཆེན་པོའི་ལམ་གྱི་བགྲོད་ཚུལ་ནི། །བྱང་སེམས་རིགས་ངེས་བདག་མེད་ལྟ་བ་དེ། །རིགས་པ་མང་པོས་བསྒོམས་ཏེ་སྤོང་བར་བྱེད།
།ཉོན་སྒྲིབ་མ་ཟད་ཤེས་སྒྲིབ་སྤོང་མི་རྩོམ། །ས་བརྒྱད་ཐོབ་ཚེ་ཉོན་སྒྲིབ་ཟད་པར་སྤོང་། །མཐར་ནི་རྒྱུན་མཐའི་བར་ཆད་མེད་ལམ་གྱིས། །ཤེས་སྒྲིབ་མ་ལུས་སྤངས་ཏེ་སྐུ་བཞི་འཐོབ། །མྱང་འདས་འགོག་བདེན་དོན་དམ་བདེན་པས་ཁྱབ། །དགོངས་འགྲེལ་ལས་བཤད་འཁོར་ལོ་ཐོག་མཐའ་གཉིས། །དྲང་དོན་ཡིན་ཏེ་སྟོང་ཉིད་དངོས་བསྟན་མིན། །དེ་ཡི་བར་བར་ངེས་དོན་མདོས་ཁྱབ་སྟེ། །ཤེས་རབ་སྙིང་པོ་ངེས་དོན་མདོ་ཡིན་ནོ། །ཐལ་འགྱུར་བ་ཡི་ཁྱད་ཆོས་གཙོ་བོ་ནི། །བརྟེན་ནས་བཏགས་པའི་གཏན་ཚིགས་ལ་བརྟེན་ནས། །ཆོས་ཀུན་རང་མཚན་གྲུབ་པ་ཁེགས་ན་ཡང་། །ཐ་སྙད་མིང་རྐྱང་བཏགས་ཡོད་ཙམ་ཞིག་ལ། །བཅིང་གྲོལ་རྒྱུ་འབྲས་གཞལ་བྱ་འཇལ་བྱེད་སོགས། །གཞན་ངོར་མིན་པར་རང་ལུགས་འཇོག་ཤེས་སོ། །དེང་སང་འགའ་ཞིག་ལྟ་བ་མཐོར་རློམས་ཏེ། །སྣང་ཕྱོགས་ཆོས་རྣམས་འཁྲུལ་སྣང་ཙམ་ཡིན་ཞེས། །གཏན་མེད་བཟུང་ནས་ཡིད་ངོར་ཅང་མེད་པ། །ཉམས་ལེན་མཆོག་འཛིན་ཐལ་འགྱུར་དྲི་མི་བྲོ། །དེས་ན་སྲིད་པའི་ཕུན་ཚོགས་མཐའ་དག་ནི། །མེ་འབར་སྦུབས་ལྟར་མཐོང་བའི་བློ་ལྡན་ཞིང་། །གྲོལ་བ་དོན་དུ་གཉེར་བའི་ཤེས་ལྡན་དག །ཆོས་ལྟར་བཅོས་པའི་ལྟ་ངན་མ་ལུས་པ། །སྤངས་ཏེ་གྲུབ་མཐའ་ཀུན་གྱི་ཡང་རྩེ་སྟེ། །དབུ་མ་ཐལ་འགྱུར་རིང་ལུགས་མཆོག་ཏུ་ཟུངས། །
 
༈ སྟོན་མཆོག་དྲང་སྲོང་མགྲིན་སྔོན་རལ་ཀློང་ལས། །ལེགས་འོངས་ཞི་བསིལ་གྲུབ་གཞུང་ལྷ་ཡི་ཆབ། །འཕགས་བོད་མཁས་བརྒྱའི་དབྱིག་འཛིན་ལེགས་བརྒྱུད་དེ། །འདི་ན་སྡུག་ཀུན་ཚ་གདུང་གཤེད་དུ་འབབ། །གྲུབ་མཐའི་ཕ་རོལ་སོན་པའི་མཁས་མང་ལས། །གྲུབ་མཐའི་རྣམ་བཞག་སྦྱངས་པའི་དྲིན་གཟོ་ཕྱིར། །གྲུབ་མཐའི་ཁྱད་པར་མ་འདྲེས་གསལ་སྟོན་པའི། །གྲུབ་མཐའི་སྡོམ་ཚིག་རང་མཉམ་སྐྱེས་སུ་བསྟབས། །འདི་སྣང་ཕྲག་དོག་ཚེར་མའི་མལ་སྟན་སྟེང་། །འདི་ལ་ངན་སྨྲོས་འགྲེ་ལྡོག་བྱེད་པ་དག །འདི་ཉིད་ཀློག་པའི་ཡུལ་དུ་གྱུར་པའི་མོད། །འདི་ཡིས་བློ་ཡིག་ནམ་མཁའི་མཐར་ཕྱེ་ཤོག །ཟླ་མེད་བཤེས་གཉེན་དག་གི་ཐུགས་དགོངས་རྫོགས། །མུ་མེད་སྲིད་མཚོར་བྱིངས་པའི་འགྲོ་ཀུན་སྒྲོལ། །ཐོགས་མེད་ཡེ་ཤེས་མེ་འོད་སྙིང་ལ་སྦར། །ཕྱོགས་མེད་རྒྱལ་ཁམས་ལྡོམ་པོའི་དམིགས་ཡུལ་ཡིན། །
ཞེས་གྲུབ་མཐའ་རིན་པོ་ཆེའི་ཕྲེང་བའི་སྡོམ་ཚིག་ཤེས་རབ་སྒོ་འབྱེད་གསེར་གྱི་ལྡེ་མིག་ཅེས་བྱ་བ་འདི་ཡང་། འཕགས་བོད་ཀྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་པའི་མཁས་གྲུབ་ཀྱི་སྐྱེས་བུ་དུ་མའི་ཞབས་དྲུང་ནས། རང་གཞན་གྱི་གྲུབ་མཐའི་གཞུང་ལ་སྦྱངས་པ་ལོ་མང་བྱས་ཤིང་། རིས་སུ་མ་ཆད་པའི་གྲུབ་མཐའི་གཞུང་ལུགས་ལ་སྤྲོ་བ་ཅན་སྔགས་བཙུན་ཀླུ་སྨྱོན་ཁྲག་འཐུང་གླིང་པ་ཞེས་འབོད་པ་དེས། ཆུ་སྦྲུལ་བོད་ཟླ་ལྔ་པའི་ཚེས་ཉེར་བརྒྱད། སྤྱི་ལོ་༢༠༡༣ ལོའི་ཟླ་༧ ཚེས་༤ ཨ་རིའི་རྒྱལ་སྟོན་དུས་ཆེན་ཉིན། སའི་སྟེང་ན་གྲགས་པ་འབར་བའི་སྟོབས་ལྡན་ཨ་རི་སྡེ་མང་གཅིག་སྒྲིལ་རྒྱལ་ཁབ་ཀྱི་ནུབ་ཕྱོགས་སེ་ཡ་ཁྲལ་ཞེས་པའི་གྲོང་ཁྱེར། དུས་བཞིར་མེ་ཏོག་བཞད་པའི་ཡུལ་ལྗོངས་དྲི་ཟའི་འཇིག་རྟེན་ས་ལ་འཕོས་པ་ལྟ་བུའི་ཞིང་ཁམས་དེར་བཞུགས་པའི་ཨོ་རྒྱན་ཧེ་རུ་ཀའི་ཕོ་བྲང་གི་རང་ཤག་ཨེ་ཝཾ་བསྣོལ་བའི་གུར་ཁང་དུ་མཇུག་གྲུབ་པར་བྱས་པའི་དགེ་བས། འགྲོ་ཀུན་གྲུབ་མཐའ་རྒྱ་མཚོའི་ཕ་རོལ་ཏུ་སོན་ཏེ་སྐུ་བཞི་ཡེ་ཤེས་ལྔ་ལྡན་གྱི་གོ་འཕང་མཆོག་ལ་ཚེ་འདིར་སོན་པར་གྱུར་ཅིག ། ། །