ཚེ་རིང་དཔལ་ལྡན།
ཁམས་གསུམ་འཁོར་བའི་འཇིག་རྟེན་འདི་ན་བྱིས་རྣམས་རྨོངས་པའི་ཆགས་སྡང་གིས།།
ཕན་ཚུན་འཁོན་པའི་རྡུལ་མཚོན་ཕྲ་མོས་རྟེན་འབྱུང་ཆོས་ཉིད་འདོར་བའི་ཚེ།།
ལུགས་གཉིས་བཟུང་འབྲེལ་ཉིན་བྱེད་འོད་ཀྱིས་ཉོན་མོངས་མུན་པ་འཇོམས་བྱས་ཏེ།།
ཟབ་མོ་ཆོས་ཀྱི་གསུངས་དབྱངས་དྲུག་ཅུས་མཁའ་ཁྱབ་འགྲོ་རྣམས་འདྲེན་མཛད་པ།།
སྤྱན་རས་གཟིགས་དབང་ཆོས་ཀྱི་རྒྱལ་པོ་ཁམས་གསུམ་འགྲོ་བའི་དེད་དཔོན་མཆོག །
བླ་མེད་བྱང་ཆུབ་སེམས་བསྐྱེད་ཆེན་པོས་དོན་གཉིས་སྒྲུབ་ལ་ལེགས་དགོངས་ནས།།
འཇིག་རྟེན་འཛིན་མའི་ཁྱིམ་གཞིས་འདི་རུ་ཚད་མེད་བཞི་ཡི་འཛུམ་ཕྱུང་བས།།
ས་གསུམ་འཇིག་རྟེན་སྐྱེ་རྒུ་ཡོངས་ཀྱིས་དད་དམ་གཙང་མའི་ཕྱག་འཚལ་ཏེ།།
སྐྱབས་མགོན་གང་གི་མཛད་བཟང་བསྔགས་པའི་མཛེས་སྡུག་མེ་ཏོག་ཀུན་ནས་མཆོད།།
དེ་རིང་བཀྲ་ཤིས་སྐུ་ཡི་འཁྲུངས་སྐར་འཚམས་འདྲིའི་སྙན་འཇེབས་གླུ་དབྱངས་དང་།།
ཡིད་འོང་ཞབས་བྲོ་གར་གྱི་ཉམས་འགྱུར་དྲི་མེད་དར་གྱིས་ལེགས་དྲངས་ནས།།
འདི་ཕྱིའི་སྐྱབས་མཆོག་བསྐལ་བརྒྱར་བརྟན་པའི་གསོལ་བ་སྨོན་ལམ་རྩེ་གཅིག་ཏུ།།
སྙིང་ནས་འདེབས་སོ་གང་གི་མཛད་བཟང་མཉམ་མེད་རྒྱས་པའི་བཀྲ་ཤིས་ཤོག །
ཅེས་ཁམས་གསུམ་ཆོས་ཀྱི་རྒྱལ་པོ་འཛམ་གླིང་ཞི་བདེའི་དེད་དཔོན་ཆེན་པོ་༸གོང་ས་༸སྐྱབས་མགོན་རྒྱལ་དབང་ཐམས་ཅད་མཁྱེན་པ་བྱམས་བརྩེ་དང་སྙིང་རྗེའི་བདག་ཉིད་ཆེན་པོ་དགུང་ལོ་༧༨ ཕེབས་པའི་སྐུའི་འཁྲུངས་སྐར་ལ་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ་བ་དང་མགོན་པོ་གང་གི་བཞེད་དོན་ཇི་བཞིན་འགྲུབ་པར་གསོལ་བ་སྨོན་ལམ་སྙིང་དབུས་ནས་འདེབས་པར་ལགས།
འདི་དང་ཕྱི་མ་བར་དོ་ན།
ཁྱེད་ལས་སྐྱབས་མགོན་མ་ཡོད་པས།།
རང་ཉིད་རེ་ས་སྐྱབས་གནས་སུ།།
སྐུ་ཚེ་ཚེ་རིང་བཀྲ་ཤིས་སྨྱོན།
ཁྱེད་ཀྱི་དག་ཆ་རྣམས་ཕལ་ཆེ་བ་སྐྱོན་མེད་པ་ལྟ་བུར་སྣང་བས། ཁྱེད་ཀྱི་བཞེད་དོན་འགྲུབ་པར་སྨོན། བདག་གིས་དམིགས་བསལ། གངས་རིའི་མགོན་པོར་བསྟོད་པ་ཞིག་རྩོམ་མི་ཤེས་ཀྱང་། ཡི་གེའི་དག་ཆ་སོགས་ལ་དཔྱད་པ་བྱེད་ཐུབ་ན།
འགྲོ་བའི་མགོན་པོ་ཐུགས་མཉེས་པ་དང་། རང་དོན་ཀླད་པ་ལ་རྒས་ནད་མི་ཕོག་པ་ལ་ཕན་པར་ཟེར་བ་། དེ་ཡང་། ད་ལྟ་རང་ཨིན་ཡིག་ན་བཀླགས། བདག་གི་བསམ་པ་བཞིན་བཤད་ཡོད་པ་ཞིག་ཏུ་མཐོང་། དེས་ན། གཤམ་གསལ་མིང་ཚིག་གསུམ་པོ་ལ་དཔྱད་པ་བྱེད་ཆོག་པ་ཞུ།
བཟུང་འབྲེལ་ ཞེས་པ་དེ། བ་ཡིག་སྔོན་འཇུག་མེད་པ། ཟུང་འབྲེལ་ཞེས་དགོས་ཏེ། ཟུང་ནི་དངོས་པོ་གཉིས་མཉམ་དུ་ཡོད་པ་སྟེ། དེ་ལ་ཕྲུགས་ཀྱང་ཟེར། ཚད་མ་རིགས་རྒྱན་དུ། ཕྲུགས་ནི་ཟུང་ཡིན་ལ་ཞེས་པ་ཞིག་དྲན། བྱ་ཚིག འཛིན་ བཟུང་ གཟུང་ ཟུངས། ད་ལྟ་འདས་མ་འོངས་བསྐུལ་ཚིག་བཅས་སོ།
སྐྱེ་རྒུ། ཞེས་པ་ནི་དགུ་ཞེས་པ་མང་ཚིག་ལ་འཇུག དེ་ཡང་སྔོན་འཇུག་ད་ར་རུ་འབོད་པ་ལས་ནོར་བྲིས་ཤོར། གཞུང་དཔེ་དག་ན་ཡང་། དེ་ལྟར་བྲིས་པ་མང་དུ་མཐོང་།
མཉམ་མེད་རྒྱས་པའི་བཀྲ་ཤིས་ཤོག འདིར་ཁྱེད་ཀྱི་ཞེ་འདོད་ལ་རག་ལས། མཚུངས་པ་མེད་པའི་དོན་ཡིན་ན། ཤིན་ཏུ་སྐྱོན་མེད་ཡིན། འོན་ཀྱང་རྒུད་པའི་དོན་ཡིན་ན། ཉམས་མེད་ཅེས་དགོས་ཏེ། རྒྱས་པའི་ལྡོག་ཕྱོགས་ཉམས་པའམ་རྒུད་པ་ཡིན་པས་སོ།