ཐེ་བོ་ཤེས་རྒྱ་མཚོ།
༧གོང་ས་མཆོག་དགུང་ལོ་༧༨ ལ་ཕེབས་པའི་སྐུའི་འཁྲུངས་སྐར་ལ་བསུ་བ་ཞུ།
མི་ཡི་ཉི་མ་ཁྱོད་སེམས་ལ་ཤར་བས།།
སྡུག་བསྔལ་ལོ་ཟླ་དག་སྐྱིད་ཀྱིས་བསྐྱལ་ཡོད།།
རྒྱབ་རི་བཀན་མོ་ཁྱོད་བརྟན་སེ་ལངས་པས།།
ང་ཡང་ས་མཐའ་ན་འབྲོང་བཞིན་འགྱིང་ཡོད།།
རྒྱ་ནག་དམར་པོ་དང་དཔུང་དུ་བསྡེབས་ནས།།
རྐུན་ཇག་སྤྱང་ཀི་ཞེས་སྡང་ཞིང་སྡིགས་པའི།།
དོལ་ཚོགས་འདྲེ་ཚོགས་ཀྱི་ཐེའུ་རང་འགོང་པོས།།
ཁྱོད་ཐུགས་དཀྲུགས་པ་ལ་སེམས་པ་སྐྱོ་སོང་།།
སྐྱོ་མེད་ངལ་མེད་ཀྱི་དཔུང་གཉེན་ཁྱོད་འདྲ།།
མགོན་མེད་སྐྱབས་མེད་ཀྱི་ཁ་བ་ཅན་ལ།།
དུས་སྐབས་ཏག་ཏག་ལ་གཟུར་མེད་ཕེབས་པས།།
རོ་མདོག་ཐལ་མདོག་གི་ངོ་གདོང་འཛུམ་སོང་།།
སེམས་ཀྱི་ཉི་མ་ཁྱོད་ཤར་ཚོད་འགྲིགས་སོང་།།
སྨག་རུམ་མུན་པ་ལ་ཞེད་ནས་བསྡད་ཡོད།།
བྱམས་བརྩེ་ཟླ་བ་ཁྱོད་བསིལ་བ་ཡག་བྱུང་།།
ཚ་བས་གདུང་བ་འདི་བཟོད་པར་དཀའ་འོ།།
མིག་ཟུང་མཐའ་ཁ་ལ་མཆི་མས་བརླན་པ།།
དད་གདུང་རང་གཟུགས་སུ་འཕོས་ཚུལ་ཞིག་སྟེ།།
ལག་ཟུང་སྙིང་ག་ལ་ངང་གིས་ཟུམ་པ།།
ལོ་ཟླའི་བཀའ་དྲིན་དག་དྲན་ཚུལ་ཡིན་སོང་།།
དབུ་ཡི་སྐྲ་ལོ་དེ་དཀར་ཚུལ་མཐོང་ན།།
སེམས་པའི་གཏིང་རུམ་ལ་གློག་ཅིག་འཁྱུག་གི།
འཛུམ་པའི་ཞལ་རས་ལ་རྒས་མདོག་བབ་པ།།
ང་ཡི་སྙིང་ཁོང་ལ་གྲི་གཙགས་བྱས་འདྲ།།
ཁྱོད་ལ་འཛམ་གླིང་གིས་གུས་ཤིང་བཀུར་བས།།
ང་ཡི་དགའ་སྤྲོ་འདི་གང་ལ་འཇོག་གམ།།
ཁྱོད་ལ་རང་རིགས་ཀྱིས་བརྙས་ཤིང་སྨད་པས།།
ང་ལ་ཡིད་ཆད་འདི་སངས་དུས་མི་འདུག།
མ་ཤེས་མ་མཐོང་གི་གདགས་སྲིབ་བར་ནས།།
མ་གོ་མ་རིག་གི་ཉིན་མཚན་བར་ནས།།
ཁྱོད་ཀྱི་དགོངས་པ་དང་འགལ་བ་བྱུང་ན།།
དད་དམ་གཙང་མ་ཡིས་སྙིང་ནས་བཤགས་སོང་།།
བཀུར་འོས་དྲ་བདག་མཆོག
Khabdha@gmail.com ཐོག་དྲ་ཐོག་གི་རྩོམ་པ་པོ་སྐོར་ཅིག་གིས་ཆེད་དུ་སྤེལ་བའི་༼འཁྲུངས་སྐར་བསུ་བའི་རྩོམ་ཡིག་ཕྱོགས་བསྡུས་ཤིག་༽བསྐུར་ཡོད། འགོད་གནང་ཡོད་པ་ཞུ།