ཨ་འབྲུག་དཀོན་མཆོག
ང་གློ་བུར་གྱི་ཆད་ཞོད་ཆེན་པོ་དེ་ལ་ཡོལ་ཆེད་ཟ་ཁང་ཞིག་དུ་འཛུལ་དུས་ངའི་ངོ་ཤེས་རྙིང་བ་ཞིག་བསྡད་འདུག་ཅིང༌། ཁོང་ནི་བོད་མི་ལྷག་བསམ་ཅན་གྱི་དཔེ་བཟང་གི་མི་སྣ་ཞིག་ཡིན་ལ། ཁོ་རང་དེང་སྐབས་བོད་མི་མང་སྤྱི་འཐུས་ལས་ཐོགས་པ་ཞིག་ཡིན། དུས་ཡུན་ཆུ་ཚོད་ཕྱེད་ཀ་ཙམ་གྱི་རིང་ངེད་གཉིས་ཁ་བརྡ་བྱས་པའི་བརྒྱུད་རིམ་ནང་ཁོང་གིས་ཉེ་ཆར་བོད་དོན་རྒྱབ་སྐྱོར་གྱི་ཚོགས་འདུ་ཞིག་གི་སར་བཅར་བའི་སྐོར་བཤད་བྱུང༌། དེ་ལས་ཀྱང་ཁོང་གིས་བཤད་པ་ལྟར་ན་ཚོགས་ཐོག་དེར་གནད་འགག་གི་སྐད་ཆ་གཉིས་བཤད་འདུག དེ་ཡང་བོད་ཀྱི་སྤྱི་འཐུས་ཤིག་གིས་བཙན་བྱོལ་བོད་གཞུང་གི་མཛད་གཙོ་དག་ལ་འཆར་གཞི་མེད་པ་དང༌། ཁོང་ཚོའི་བོད་རང་བཙན་རྒྱ་ནག་ལ་ཕར་སྤྲད་པ་ལས་བོད་ལ་ཚུར་གང་ཡང་རེག་མེད་ཚུལ་བཤད་འདུག་པ་དང༌། འཇར་མན་པ་བོད་དོན་རྒྱབ་སྐྱོར་བ་ཞིག་གིས་ངས་བལྟས་ན་༸གོང་ས་སྐྱབས་མགོན་ཏཱ་ལའི་བླ་མའི་དབུ་ཁྲིད་དེ་བོད་མི་ཚོ་ལ་མཚོན་ན་ནུས་མེད་ཅིག་རེད། དེང་སང་སྤྱི་མཐུན་གྱི་སྐད་ཆ་ཞིག་ཏུ་སྤྱིར་བཏང་མང་གཙོ་གལ་ཆེ་རུང་དམག་འཐབ་ཀྱི་དུས་སུ་སྟོབས་ཤུགས་ཆིག་བསྒྲིལ་ཡིན་དགོས་ཞེས་བཤད་སྲོལ་ཡོད་ཀྱང༌། ཁྱེད་རང་ཚོ་དམག་འཐབ་ཀྱི་སྐབས་སུ་ཡང་ཆིག་བསྒྲིལ་རེད་མི་འདུག་ཅེས་བཤད་ཡོད་འདུག དེ་ནི་མཐོང་སྣང་མི་འདྲ་བ་གཉིས་ཀྱི་སྣེ་མོ་ནས་ཕྱོགས་བསྡོམས་བྱས་པའི་ང་ཚོའི་གནས་སྟངས་ཤིག་རེད། ཡིན་ནའང་དོན་དངོས་ཀྱི་ཐོག་ནས་བཤད་ན་ད་ལྟའི་༸གོང་ས་མཆོག་གིས་དབུ་ཁྲིད་པའི་བོད་གཞུང་ལ་དེང་ཐོག་ནས་རང་བཙན་ཅན་གྱི་བོད་བདག་སྐྱོང་བྱེད་རྒྱུ་རེག་མེད་པས་ཁོང་དང་ཁོང་གི་གཞུང་ལ་བོད་རང་བཙན་སྤྲད་པ་དང་ཤོར་བ་གཉིས་ཀྱི་མིང་བརྡ་འདི་འཇུག་ཐབས་མེད། ང་ཚོ་ལ་ཐབས་ཤེས་དང་སྟོབས་ཤུགས་གང་ཡང་མེད་བཞིན་དུ་སེམས་ཤུགས་གཅིག་བུའི་སྐད་ཆ་བཤད་མཁན་དང་ཚོར་སྣང་གི་ཤུགས་ཀྱིས་རྣམ་དཔྱོད་ཉམས་ཞན་དུ་སོང་བའི་མི་སྣ་མང་པོ་ཞིག་གིས་༸གོང་ས་མཆོག་གི་དགོངས་པ་བཞེས་ཕྱོགས་དེ་ཡང་བོད་མིའི་ཁེ་ཕན་དང་མི་མཐུན་པ་ཞིག་ཡིན་ཚུལ་བཤད་ཀྱི་ཡོད་པ་རེད། འོན་ཀྱང་འཇར་མན་པ་དེས་བཤད་པའི་སྐད་ཆ་ནི་དངོས་བདེན་ཞིག་ཏེ། ང་ཚོ་དམག་འཐབ་ཀྱི་སྐབས་སུའང་སྟོབས་ཤུགས་གཅིག་གྱུར་མེད་པ་དང༌། གནད་འགག་གི་དུས་སུ་ཡང་འཐབ་ཕྱོགས་གཅིག་གྱུར་བྱེད་ཐུབ་ཀྱི་མེད་པས་ང་ཚོ་ནི་སྤྱི་དོན་དང་རང་ལུགས་གཉིས་ལས་རང་ལུགས་གཙོ་བོར་འཛིན་མཁན་ཞིག་དང༌། ཚོར་སྣང་དང་རྣམ་དཔྱོད་གཉིས་ལས་ཚོར་སྣང་གཙོ་བོར་འཛིན་མཁན་ཞིག གྲུབ་འབྲས་དང་ལས་དོན་གཉིས་ལས་ལས་དོན་གཙོ་བོར་འཛིན་མཁན་ཞིག དམིགས་ཡུལ་དང་ཐབས་ལམ་གཉིས་ལས་ཐབས་ལམ་གཙོ་བོར་འཛིན་མཁན་ཞིག་ཏུ་གྱུར་བས་སྤྱི་དོན་དང་རྣམ་དཔྱོད་གྲུབ་འབྲས་དང་དམིགས་དོན་བཅས་ལ་གཙོ་བོར་དམིགས་པའི་༸གོང་ས་མཆོག་གི་དགོངས་པ་དང་དེའི་དྲངས་པའི་ལམ་སྟོན་གྱི་འོག་ཏུ་འགྲོ་ཐུབ་ཀྱི་མེད། ང་ཚོའི་སྤྱི་ཚོགས་ལ་བརྡར་ཤ་གཅོད་རྒྱུའི་གནད་དོན་མང་པོ་ཞིག་འདུག་ཏེ། སྤྱི་དོན་དང་རང་ལུགས་གཉིས་ལས་གང་ཞིག་གཙོ་བོར་འཛིན་དགོས་པ་དང༌། ཚོར་སྣང་དང་རྣམ་དཔྱོད་གཉིས་ལས་གང་ཞིག་གཙོ་བོར་འཛིན་དགོས་པ། གྲུབ་འབྲས་དང་ལས་དོན་གཉིས་ལས་གང་ཞིག་གཙོ་བོར་འཛིན་པ།དམིགས་ཡུལ་དང་ཐབས་ལམ་གཉིས་ལས་གང་ཞིག་གཙོ་བོར་འཛིན་དགོས་པ་བཅས་ཀྱི་ཐད་ལ་གསལ་ཁ་དོད་པོ་དང༌།སེམས་ཐག་ཆོད་པོའི་གླེང་སློང་བྱེད་འོས་ལ། འདི་ལྟར་བྱས་ན་མ་མཐའ་བོད་ཀྱི་གནད་དོན་ཞེས་པ་དེ་གནད་དོན་གཅིག་གི་སྟེང་དུ་གཏན་འཁེལ་ཐུབ་ཅིང༌། དེ་འཐབ་རྩོད་བྱེད་པའི་དབུ་ཁྲིད་དང་ཐབས་ལམ་ཡང་གཅིག་གྱུར་གྱི་ལམ་བུ་ཞིག་ཏུ་ཕྱོགས་ཏེ་དམག་འཐབ་ཀྱི་དུས་སྐབས་སུ་མཉམ་འབྲེལ་བྱེད་ཐུབ་ངེས་རེད།ངས་འདི་ལྟར་བཤད་པ་ནི་ང་ཚོའི་སྤྱི་ཚོགས་སུ་ལྟ་བ་སྣ་གཅིག་གིས་ཆིག་ཆོད་བྱེད་འོས་པར་བཤད་པ་མ་ཡིན་རུང༌།བསམ་ཚུལ་གྱིས་ལྟ་གྲུབ་ཀྱི་ཚབ་བྱེད་མི་རུང་བ་དང་།མཐུན་ཐབས་མེད་པའི་ཐ་ཐོར་གྱི་བསམ་ཚུལ་མང་པོའི་འགལ་རྩོད་ཞུགས་ཏེ་དོན་དམ་པའི་ལྟ་གྲུབ་ཅིག་ཆགས་པའི་འགོག་རྐྱེན་རང་ཉིད་ཀྱིས་བཟོ་བཞིན་ཡོད་མེད་ལ་དཔྱོད་འཇུག་ངེས་པར་བྱེད་དགོས་ལ།དཔྱད་དོན་ངེས་པར་དུ་བསྒྲགས་ཐུབ་དགོས།མ་གཞི་ང་ཚོའི་ཆེས་མཐའ་མཇུག་གི་ཚེ་སྲོག་གི་ཆེད་དུ་ང་ཚོས་ཐབས་ཤེས་དང་ཐག་གཅོད་གང་ཞིག་བྱེད་དགོས་ཀྱང་བྱེད་དགོས་པ་མ་རེད་དམ།
དཀོན་མཆོག་ལགས། བོད་ལ་རེ་བ་ཞེ་པོ་ཞིག་ཡོད་རེད་ལབ་མཁན་ཡང་ཁྱོད་རང་རེད། དམག་འཐབ་ཀྱི་སྐབས་ལ་ཆིག་སྒྲིལ་མེད་པ་རེད་ཟེར་ནས་སྐྱོན་བརྗོད་བྱེད་མཁན་ཡང་ཁྱོད་ཉིད་རེད། མ་གཞི་མི་ཁྱོད་ལྟ་བུ་མཁས་དྲགས་པས་ཡིན་ནམ་བླུན་དྲགས་པས་ཡིན། སྐད་ཆ་གོ་རྒྱུ་མེད་པ་ཞིག་ཤོད་བཞིན་འདུག ཀུ་རེ་ཡིན། རྩོམ་ཡིག་མུ་མཐུད་དུ་འགོད་རོགས། དོ་སྣང་ཆེན་པོས་༸ཐྲྤཀློག་བཞིན་ཡོད།
འདི་བདེན་པ་རེད། ངས་ངས་སྐད་ཆ་ལ་ཕྱོགས་བསྡོམས་བྱས་ཤིག་བྱས་པ་དང་གོ་རྒྱུ་མེད་པ་ཞིག་ཤོད་བཞིན་འདུག་ཅེས་བཤད་པས་ཁྱེད་རང་གི་སྐད་ཆ་ལ་ཡང་གོ་རྒྱུ་བདེ་མོ་ཞིག་ཡོད་པ་མ་རེད་དམ། ཧ་ཅང་གུ་རེ་ཡིན། སྐད་ཆ་བརྒད་ཞོར་ལ་བཤད་ན་་སྣང་བ་སྐྱིད་གི་རེད། ངས་ལྟ་རེ་བ་དང་སྐྱོ་སྣང་ཟུང་གི་ལྟ་སྟངས་ཞིག་འཛིན་དགོས་དོན་དེ་ང་མཁས་དྲགས་པས་ག་ཡིན་མོད། ང་བླུན་དྲགས་པས་ཡིན་པའང་ངོས་ལེན་བྱེད་མི་ཐུབ། མ་གཞི་སྐད་ཆ་འདི་དག་རེ་བ་ཆེ་བས་བཤད་ཡིན་ལ་སྐྱོན་ཆ་ཆེ་བས་བཤད་པའང་ཡིན།
གྲོགས་པོ། ཁྱོད་སུ་ཡིན་ནམ།