ནམ་མཁའ།
ལུས་རྟེན་གཅིག་ལ་ཐབས་ཤེས་གོམས་པའི་མཐུས།།
བདེན་གཉིས་མངོན་སུམ་རྟོགས་པའི་འབྲས་བུ་ལ།།
སྐུ་གསུམ་ཐོབ་པའི་ཐུགས་ཀྱི་དབྱིངས་རིམ་ལས།།
བདེན་བཞིའི་ཆོས་ཆར་ཕབས་པའི་ཞིང་ས་རུ།།
ལམ་ལྔའི་ལོ་ཏོག་སྨིན་ལ་འབད་ཚོགས་ཀྱིས།།
ཕྱིན་དྲུག་ཉམས་ལེན་འབྲུ་དྲུག་སྙེ་མ་བཞིན།།
རྒྱལ་སྲིད་སྣ་བདུན་བསྐོར་བའི་ཁྲི་སྟེང་གི །
བརྒྱད་བཅུའི་མཚན་དཔེ་རི་མོ་འཁོར་ལོ་ཅན།།
སྐྱེ་དགུ་རྣམས་ཀྱིས་ཁྱེད་ལ་ཅིས་མི་བཀུར།།
ས་བཅུའི་གོ་རིམ་བསྟན་པའི་གསུང་གི་བཅུད།།
བཅུད་ཀྱི་མཆོག་ཏུ་གྱུར་ཞེས་དེང་གི་ཆར།།
དཔྱོད་ལྡན་སྐྱེ་བོ་ཚོགས་ཀྱིས་ཡང་ཡང་བསྟོད།།
ཆོས་འཁོར་དུས་ཆེན།
བྱང་ཆུབ་ཤིང་དྲུང་སངས་རྒྱས་ནས། །
ཝ་ཎར་ལྔ་སྡེ་བཟང་པོ་ལ། །
བདེན་བཞིའི་ཆོས་འཁོར་བསྐོར་མཛད་པ། །
དྲང་སྲོང་ཆེན་པོར་མགོས་ཕྱག་འཚལ། །
དྲུག་པ་ཚེས་བཞི།
ཆོས་འཁོར་དུས་ཆེན་རྩ་ཆེན་འདི། །
བོད་དུ་དྲུག་པ་ཚེས་བཞིར་གྲགས། །
ཉིན་དེར་བདེན་བཞི་ཤེས་ཐབས་དང་། །
ཆོ་ག་སྣ་ཚོགས་དེའི་ཉིན་འཚོགས། །
ཐུབ་རྣམས་སྡིག་པ་ཆུ་ཡིས་མི་བཀྲུ་ལ་།
འགྲོ་བའི་སྡུག་བསྔལ་ཕྱག་གིས་མི་སེལ་ཞིང་།
ཉིད་ཀྱི་རྟོགས་པ་གཞན་ལ་སྤོ་མི་ནུས།
ཆོས་ཉིད་བདེན་པ་བསྟན་པས་གྲོལ་བར་འགྱུར།
ངས་ནི་ཁྱེད་ལ་ཐར་པའི་ལམ་བསྟན་གྱི།
ཐར་པ་རང་ལ་རག་ལས་ཤེས་པར་བགྱི།
མདོ་ལས་སོ།།
ཚིག་རྩལ་ཤིན་ཏུ་བཟང་ངོ།
བོད་རྒྱའི་བདེན་པ་བཞི་ནི།
བོད་པར་རང་དབང་མེད་པ་སྡུག་བསྔལ་བདེན་པ་རེད། །
རྒྱ་གཞུང་ངན་སེམས་འཆང་བ་ཀུན་འབྱུང་བདེན་པ་རེད།
གཉིས་སྨན་དབུས་ལམ་ལག་བསྟར་ལམ་གྱི་བདེན་པ་རེད། །
བོད་རྒྱའི་དཀའ་རྙོག་སེལ་བ་འགོག་པའི་བདེན་པ་རེད། །
བོད་མི་གཞི་བྱེས་གཉིས་སུ་དགྱེས་པ་སྡུག་བསྔལ་བདེན་པ།
བོད་མི་ནང་ཁུལ་དཀྲུགས་པ་རྒྱུ་ཀུན་འབྱུང་བདེན་པ།
བོད་མི་ནང་ཁུལ་ཆིག་སྒྲིལ་འགོག་པའི་བདེན་པ།།
བོད་རྒྱ་གྲོས་མོལ་ལམ་གྱི་བདེན་པ།