གཡུ་རྩེ།
གནམ་ས་གཉིས་ཀ་བརྟན་བརླིང་གིས་ཀྲོང་ངེར་བྱས་པས། བར་སྣང་ན་རང་དབང་གིས་བགྱི་བའི་སྤྲིན་པ་ལེབ་མོ་ཡིན་ཡང་འགྲེང་སྟེ་སྡོད་དགོས་ལ། རླུང་གིས་ལྷབ་ལྷབ་སྒུལ་བའི་སྡོང་ལོ་དེ་ཡང་གཡོ་མེད་འགུལ་མེད་དུ་བརྗིད་དེ་སྡོད་དགོས།
མཐོ་བ་གནམ་དང་དམའ་བ་ས་ལ་འབབ་པ་ལྟ་བུའི་གདངས་དབྱངས་ཀྱི་བར་བར་ནས། ང་རྒྱལ་དང་སྤོབས་པ་ཡི་མགོ་འཕང་དགུང་དུ་འདེགས་པའི་འགྱིང་ཉམས་མཇལ་ལ། རྣམ་ཤེས་ཀྱི་འགུལ་ཉམས་འཁྲོལ་བའི་རྟ་དབྱངས་ཀྱིས་རུས་རྐང་སྲ་མོའང་སྒུལ་ཡོང་པས། ཞོགས་པའི་དྭངས་གཙང་གི་ཉི་ཟེར་གྱིས་རྐང་པའི་བར་ན་ས་གཞི་ལ་དག་ཁྲུས་བྱེད་པའི་རང་བྱུང་གི་ཆོས་ཉིད་ཀྱང་ཚོར་དཀའ།
ཞོགས་པ་སྙིང་ལ་ཕོག་དགོས་པའི་གསུང་དབྱངས་ཀྱི་ང་རོ། རྔ་ཆེན་གྱི་རྡིག་སྒྲ་ཡིས་བརྗིད་པར་བྱས་པ་མ་ཡིན་ལ། འཕྲེད་གླིང་གི་བུ་ག་རེ་རེ་ནས་བཙུར་ཏེ་ཕྱུང་བའང་མ་ཡིན་པར། བྲང་ཁོག་གི་ནམ་ཟླ་ལྡིག་ལྡིག་ཡིན་པའི་ད་ཚོད། རང་གི་ཤག་གསེང་གི་ཁྲག་དང་། རུས་གསེང་གི་རྐང་། སེམས་ཀྱི་མངའ་ཐང་སྐྱོམ་པའི་རླབས་རིས་མིག་གིས་མཐོང་བ་དེ་དང་། བྲག་ཅ་རྣ་ཡིས་གོ་བ་དེ་རུ་ངེས་སོ།།
སྐབས་འགར་མཐོ་ཞིང་དམའ་བའི་འདེགས་འཇོག་གི་གོམ་པ་རེ་རེ་བཞིན་ཡར་ལ་འཛེགས་དུས་། སྡུག་གི་ལ་མོ་ཞིག་རྒལ་དང་མཚུངས་ལ། བར་བར་དྲག་ཅིང་ཞན་པའི་འགྱུར་ཁུགས་ཀྱི་ཁུག་པ་རེ་རེར་མར་ལ་འབབ་དུས། སྐྱིད་ཀྱི་རྟ་ཕོ་ཞིག་ཞོན་དང་ཡང་འདྲ་བས། ཡབ་མེས་ཀྱི་ནམ་མཁའ་བློ་ལ་འཆར་བའི་གདངས་དབྱངས་འཕྲོ་མཐུད་དེས། ལོ་རྒྱུས་ཀྱི་ངག་འཁྲོལ་གྱིན་པ་ལྟར་ཡིད་ལ་ཚ་གྲང་སྣོལ་མར་སྡེབ་ཅིང་། ཀུན་པོའི་མགྲིན་ངག་ན་ཤུགས་ཀྱིས་འབབ་པའི་རྨ་འབྲུ་རྫ་གསུམ་གྱི་རླབས་སྒྲ་ལྟ་བུ་དེ། མུན་པ་ནག་ནག་ཅིག་གི་སྡུག་གི་ངུ་ངག་གམ། སྣང་བ་དཀར་དཀར་ཞིག་གི་སྐྱིད་པའི་དགོད་སྒྲ་རུ་གོའོ།
རང་གི་འགྱིང་ཉམས་འཁྲོལ་གྱིན་པའི་རྟ་དབྱངས་ལེན་གྱིན་ལེན་གྱིན། རང་གི་མགོ་ཐོག་གི་གནམ་དང་རྐང་འོག་གི་ས་ལ་ཉན་གྱིན་ཉན་གྱིན། འགུལ་མི་ཆོག་པའི་ལུས་པོ་འགུལ་ཉམས་ཤར་ཏེ། ལུས་ཀྱི་བ་སྤུ་རེ་རེ་བཞིན་ངང་གིས་འགུལ་ཡོང་ཞིང་། སེམས་ཀྱི་སྣང་བ་ཉི་མ་དང་ཟླ་བ་བཞིན་ཤར་ཞིང་ནུབ་འགྲོ།
རྒྱལ་གླུ་གཏོང་བའི་དབྱངས། ནམ་ཡང་མི་འགུལ་བའམ་ཅིས་ཀྱང་འགུལ་མི་ཆོག་པ་ཞིག་མ་ཡིན་ཏེ། ས་འགུལ་གནམ་འགུལ་གྱིས་འདས་མ་ད་གསུམ་བྲང་ལ་བྱོ་བའི་དབྱངས་རྟ་ཁོ་ན་དེ་ཡིན་གདའ།།