ཨ་འབྱོག་ནང་གི་བྲག་ཅ།

ཁྲོ་གཏུམ
གངས་ལ་ཁ་བ་མཐུག་པོ་བབས་པའི་རྗེས་ནས་ང་རང་སྐྱེས་འདུག
ཁ་བས་གདུག་རྩུབ་བཀོད་ཚུལ་ང་ལས་མི་ལོ་རབ་ཀྱིས་རྒན་པ་དག་གི་སྒྲུང་དུ་གྱུར
ལུག་ཁྱུ་སྦྲ་འདབས་སུ་འཁོར་བའི་དུས་ནི
ང་དང་ཨ་མྱེས་དག་གི་གནའ་སྒྲུང་ལ་ཉན་པའི་གོ་སྐབས་ཏེ
ངས་མྱང་མ་མྱོང་བའི་ཁོ་ཚོའི་མགོ་ཐོག་ལ་ལྷུང་བའི་ཉི་མ་དམར་པོ་དེ་ཡིན

གྲོག་རོང་གཡང་ གཟར་གྱི་ས་རྩུབ་ལ་འདུལ་སྦྱོང་བྱེད་པའི་བློ་སྤོབས
ང་སྐྱེས་དུས་འགྲོ་ཆོག་ཆོག་གི་རྐང་ལམ་འཁོད་འདུག་པའི་གངས་འདབས
དུས་ཚིགས་དང་འཚམ་པའི་འཚོ་བའི་མཁོ་དངོས་སོགས
ང་སྐྱེས་དུས་བེད་སྤྱད་ཆོག་ཆོག་གི་རིམ་གྲོ་སྣུམ་ཤན་མ་དག
ངའི་ཡ་ཆུང་ལ་བབས་པའི་ཤོག་ངོས་དཀར་པོའི་སྟེང་གི་ཡིག་ཆུང་ནག་པོ་རེད

ཚེ་རིང་བའི་ཁྱེད་ཅག་གི་དཀའ་སྡུག་ལ་ཕྱི་མིག་ཅིག་ཤོར
རུས་ དུང་གི་ངོས་སུ་སིམ་པའི་ལོ་ལེགས་ཀྱི་ཞིང་ཁ་ནས
ཨམ་ཕྲག་མ་བཀང་པའི་དུས་ཀྱིས་ངའི་མགོ་བོ་གཅོག་ལ་ཉེ་དུས
ཁྱེད་ཚོ་མ་གླེང་ན་ཅིས་མི་ཆོག་པ་ཞིག་ངའི་སེམས་སུ་མ་ཤར་ལ

ཁྱེད་ཚོ་སོང་ཤུལ་ནས
དུས་རབས་སྔར་ལས་རྒོད་པོར་གྱུར་ནས
ཡ་མཚར་བའི་ལྟད་མོ་ཉིན་རེ་བཞིན་མིག་མདུན་དུ་ཐོན་བྱུང
ཁྱེད་ཚོ་ལྟར་རལ་བོ་གྱོན་པའི་མི
ད་དུང་དམར་རྗེན་དུ་འབུད་ལ་ཉེ་བའི་མི
གང ་ལྟར་ཁྱེད་ཚོའི་འཚོ་བ་དེ་རིང་མཁོ་བ་ནི་རྣམ་པ་ཅན་ཞིག་ཏུ་གྱུར

ང་དེ་རིང་གི་དུས་རབས་ཉེར་གཅིག་ལ་ལག་སྙོབ་བྱེད་མཁན་ཞིག
འཕྲུལ་རིགས་ཀྱིས་ཨ་འབྱོག་གི་བར་སྟོང་ཡོད་ཚད་འཁངས་ཤིང
ཤེས་རིགས་ཀྱིས་མཛུབ་མོ་ཁོམ་ལོངས་མེད་དུས
རང་ཉིད་ཇི་ལྟར་ཐང་ཆད་པ་མ་ངེས་པའི་མལ་སར
ད་དུང་ཁ་པར་ལ་བརྒྱུས་པའི་བྲག་ཅ་ཡོད

སའི་གོ་ལའི་ཤར་ནུབ་ལ་ཨ་འབྱོག་དང་མིག་ཟུང་ཉུག་ ཉུག་བྱས་ལ
དབང་པོ་ལྔའི་སྣེ་མོ་དུས་རབས་ཀྱི་འཕོ་འགྱུར་ལ་ཕྱོགས་ནས
ནང་ཚག་ཡང་བྱེད་ཁོམ་མེད་པའི་ལོ་རབས་འདི
ངའི་དེ་རིང་གི་ཨ་འབྱོག་ནང་གི་བྲག་ཅ་ལྟ་བུའི་མི་ཚེ་རོལ་སྟངས་ཤིག

2013／7／29ཉིན་མ་བྱིན་བྱེད་བཞིན་བྲིས།