ཕྱིར་བསྐྱོད་བརྒྱུད་རིམ།

སྐྱོ་བྲག་དགའ་དབང་།

ང་ཚོ་ཡུལ་གྱར་པ་ཡིན་པའི་རྐྱེན་རྩ་ལྟ་བུས་སོ་སོ་ལ་ཅི་ཡང་མེད་ནའང་གང་སར་འཁྱམ་དགོས་ཐུག་གིན་ཡོད་ལ། འཁྱམ་པ་ན་བརྒྱུད་རིམ་རོབ་ཙམ་ཤེས་ནའང་དཀའ་ངལ་མི་ཉུང་བ་སེལ་ཐུབ་པ་ལ་བརྟེན་ནས་རང་གིས་གང་ཤེས་ཤིག་ཤེས་ཡོན་དང་ཉམས་མྱོང་ཞན་པ་དག་ལ་ཞུ་འདོད་བྱུང།
ཐོག་མར་རང་ཉིད་ལ་ཡོད་དགོས་པ་ནི་ལམ་ཡིག་སེར་པོ་ཡིན་པ་གཞིར་བཅས། མགྲོན་ཤོག་ཐོབ་རྗེས། ཡུ་རོབ་ཀྱི་རྒྱལ་ཁབ་སོགས་ལ་ཕྱིར་ལོག་ཐོངས་མཆན་ནམ་ཡོང་མཆན་(Return visa)ཞུ་དགོས། ཞུ་སྟངས་ནི། སོ་སོའི་སྐྱབས་བཅོལ་ལག་དེབ་དང་། ལམ་ཡིག་སེར་པོ། དཔྱ་ཁྲལ་ལག་དེབ་ལྗང་ཁུ། མགྲོན་ཤོག་བཅས་ཀྱི་འདྲ་བཤུས་རེ་ཁུར་ནས་བདེ་དོན་དང་བདེ་སྲུང་ལས་ཁུངས་ནས་རྒྱབ་གཉེར་ཡིག་གེ་རེ་རིམ་པར་ཞུས་ཏེ། རྒྱ་གར་གཞུང་གི་འབྲེལ་ཡོད་ཕྱི་མི་དེབ་སྐྱེལ་ལས་ཁུངས་དང། དེ་ནས་སྐོར་སྲུང་ལས་ཁུངས། སླར་ཡང་འབྲེལ་ཡོད་ཕྱི་མི་དེབ་སྐྱེལ་ལས་ཁུངས་ལ་སོང་བས་གདོད་དུས་ཡུན་ཟླ་བ་གསུམ་ཅན་གྱི་ཡོང་མཆན་འཐོབ་ཅིང། ཡོང་མཆན་ཞུ་མི་དགོས་སའི་རྒྱལ་ཁབ་དག་ལ་ནི་བརྒྱུད་རིམ་འདི་མི་དགོས་སོ། །
ལམ་ཡིག་སེར་པོ་དང། མགྲོན་ཤོག །ཡོང་མཆན་དངོས་དག་ཁུར་ཏེ་གཞུང་ཚབ་སོ་སོ་ནས་ཐོངས་མཆན་ཞུས་པ་ཐོབ་པ་ན། སླར་ཡང་ཡོང་མཆན་གྱི་བརྒྱུད་རིམ་ཇི་བཞིན་ཕྱིར་ཐོན་གྱི་ཆོག་མཆན་ནམ་ཐོན་མཆན་ཞུ་གོས། འདི་ལ་ཐེ་བ་ཞིག་ཡོད་པ་ནི་ཐོངས་མཆན་འདྲ་བཤུས་ཤིག་དགོས་པ་དེ་ཡིན། དྷ་ས་ནས་སྐྱབས་བཅོལ་ལག་དེབ་ལས་ཁུངས་ཀྱིས་ཉར་གྱི་ཡོད་ལ། ས་གནས་ཁ་ཤས་ནས་མི་ལེན་པའང་ཡོད་འདུག །འདི་སྐོར་བདེ་སྲུང་ལས་ཁུངས་ཀྱིས་གསལ་བསྒྲགས་གནང་བ་ནི། རྒྱ་གར་ནས་ཕྱི་རྒྱལ་ཡུལ་གྲུ་གང་དུའང་གཏན་འཇགས་གནས་སྤོ་གནང་དགོས་རྣམས་ནས་འབྲེལ་ཡོད་ཕྱི་མི་དེབ་སྐྱེལ་ལས་ཁུངས་ (Foreigners Registration Office) ནས་ཕྱིར་ཐོན་གྱི་ཆོག་མཆན་ (Exit Permit) ཞུ་དགོས་ཐོག་དོ་བདག་སོ་སོའི་རྒྱ་གར་ནང་གནས་སྡོད་ཆོག་པའི་ལག་ཁྱེར་རྩིས་འབུལ་ཞུ་དགོས། དེ་བཞིན་ཕྱི་རྒྱལ་ཁག་ལ་གནས་སྐབས་བསྐྱོད་དགོས་རྣམ་པས་འབྲེལ་ཡོད་ཕྱི་མི་དེབ་སྐྱེལ་ལས་ཁུངས་ (Foreigners Registration Office) ནས་ཕྱིར་ཐོན་ཆོག་མཆན་ཞུས་རྗེས་རྒྱ་གར་ནང་གནས་སྡོད་ཆོག་པའི་ལག་ཁྱེར་ཐོག་ཐོན་མཆན་དང༌། དེ་ནས་འབྱོར་སྐབས་འབྱོར་མཆན་བཅས་ངེས་པར་དུ་ཞུ་དགོས། ཞེས་པ་འདི་རེད།
གནམ་གྲུའི་འགྲོ་འཛིན་ཉོ་བ་ན་འདྲི་རྟོག་དགོས་པ་ནི་གནམ་གྲུར་ཅ་ལག་ཇི་ཙམ་གཏོང་ཆོག་པ་དང་། ལག་པར་ཅ་ལག་ཇི་ཙམ་ཁུར་ཆོག་པ་དག་ཡིན། ཚད་ལས་བརྒལ་ན་ཁོ་ཚོས་རེ་རེ་བཞིན་རྒྱ་མར་བཀྱག་གི་ཡོད་པས་ཤེས་ཡོན་དང་ཉམས་མྱོང་ཞན་པ་དག་ལ་དཀའ་ངལ་འཕྲད་སྲིད།
གནམ་གྲུ་འཕུར་དུས་ཀྱི་ཆེས་ཡར་སྔོན་ནས་རྒྱལ་སྤྱིའི་གནམ་ཐང་དུ་འབྱོར་བར་བྱས་ཏེ། སྒོ་སྲུང་ཉེན་རྟོག་པ་ལ་ལམ་ཡིག་དང་། གནམ་གྲུའི་འགྲོ་འཛིན་བསྟན་པ་ན། གདོང་པ་དང་ལམ་ཡིག་འགྲོ་འཛིན་དག་ལ་བལྟ་ཙམ་གྱིས་ནང་དུ་གཏོང་། རང་གི་གནམ་གྲུའི་ལས་བྱེད་ཡོད་སར་སོང་སྟེ། ལམ་ཡིག་འགྲོ་འཛིན་ཐོན་མཆན་དག་བསྟན་པ་ན། གདོང་པ་དང་ལམ་ཡིག་ཐོངས་མཆན་དག་ལ་ཞིབ་བཤེར་གྱིས་གནམ་གྲུར་འཇུག་བྱང་(boarding pass)སྤྲོད་ཅིང། ཅ་ལག་རྒྱ་མ་ལ་བཀྱགས་ནས་གནམ་གྲུར་གཏོང་བའི་ཅ་ལག་དག་ཕར་ལེན་ཞིང་། ལག་པར་ཁུར་བའི་ཅ་ལག་ཤོག་བྱང་འབྱར་མ་དང་འགེངས་ཤོག་ཅིག་ཚུར་ལེན་དགོས། འགེངས་ཤོག་བཀང་སྟེ་ལམ་ཡིག་ཞིབ་བཤེར་བའི་སར་འགྲོ་བ་ན། གདོང་པ་དང་ལམ་ཡིག་ཐོངས་མཆན་ཐོན་མཆན་དག་ལ་ཧ་ལས་པའི་ཞིབ་བཤེར་བྱས་ཏེ་འགེངས་ཤོག་ཕར་ཉར་ནས་ལམ་ཡིག་ལ་ཐེལ་ཙེ་ཞིག་བརྒྱབས་ཏེ་གཏོང་། ཐོན་མཆན་ཕལ་མོ་ཆེ་ལེན་འགྲོ་ལ་འགའ་ཤས་མ་བླངས་པའང་ཡོད་འདུག །འགག་དོག་ཤོས་ནི་འདི་རེད། འདི་ལས་ཐར་བ་ན་ལུས་བཤེར་ཉེན་རྟོག་པ་ཡོད་སར་སོང་སྟེ། གློག་ཀླད་དང་ཁ་པར་ཕྱི་ལ་བླངས་པའི་ལག་ཁྱེར་ཅ་ལག་དག་གློག་སྒམ་ན་བཏང། ལུས་བཤེས་ཚར་རྗེས་གནམ་གྲུར་འཇུག་བྱང་དང་ཅ་ལག་ཤོག་བྱང་དག་ལ་ཐེལ་ཙེ་རེ་བརྒྱབས་པ་ན་རྒྱུས་མེད་རྣམས་ནི་འཕྲང་ལམ་ནས་ཐར་བའི་དགའ་སྐྱོས་དབུགས་རིང་ཤོར་བ་མང་ངོ། །
དུས་ལ་བབ་པ་ན་གནམ་གྲུར་འཛུལ། གནམ་གྲུའི་གསང་སྤྱོད་དུ་འགྲོ་བ་ལ་དཀའ་ངལ་ཅི་ཡང་མེད་པས་གང་དགོས་ན་བསྐྱོད་ཆོག །གནམ་གྲུའི་ནང་ནས་འགེངས་ཤོག་ཅིག་སྤྲོད་པ་བཀང་སྟེ་ལམ་ཡིག་ལྷན་འགྲོ་སའི་གནམ་ཐང་གི་སྒོ་ཁྲལ་ལས་བྱེད་ལ་བསྟན་པ་ན། ཡང་གདོང་པ་དང་ལམ་ཡིག་ཐོངས་མཆན་དག་ལ་ཧ་ལས་པའི་ཞིབ་བཤེར་དང་པར་རྒྱག་པ་སོགས་བྱས་ཏེ་འགེངས་ཤོག་ཕར་ཉར་ཞིང་ཐོངས་མཆན་ལ་ཐེལ་ཙེ་ཞིག་བརྒྱབས་ནས་བཏང་བ་ན་ཐར་བ་རེད།
ཐོངས་མཆན་གྱི་དྲི་བའི་སྐབས་ཡིན་ནའང་འདྲ། གནམ་ཐང་གི་ཞིབ་བཤེར་སྐབས་ཡིན་ནའང་འདྲ། ནམ་རང་ཉིད་ལ་ཞིབ་བཤེར་བྱ་བ་ན། ང་ལ་རོགས་པས། མ་འཚབ། མ་སྐྲག །ཕྱི་བབ་ཆགས་པ། ནང་རྣམ་རིག་གྲུང་པ། སྨྲ་བ་ཉུང་། དྲི་བ་ཉོན་ནས་ལན་ཐོབ། ཅེས་གསུང་མྱོང་ཡོད་པ་ནི་དོན་གྱི་གནད་འགག་འཁྲོལ་བའི་གདམས་པ་ཞིག་རེད་འདུག །ཁོ་ཚོས་སྐད་ཆ་ག་རེ་དྲིས་ནའང་འདྲ། ལས་ཀ་ག་རེ་བྱས་ནའང་འདྲ། མིག་གིས་གདོང་པ་ལ་བལྟ་མཚམས་ཁྱོན་ནས་འཇོག་གི་མ་རེད། རྣམ་འགྱུར་མ་ཤོར་ན་དྲིས་ལན་ཅུང་ནོར་ནའང་ཅི་ཡང་མི་སྐྱོན།
འགེངས་ཤོག་ལ་འབྲི་བྱ་ནི། ཁྱིམ་མིང། ལམ་ཡིག་ཨང་གྲངས། རང་གི་དངོས་མིང་། སྐྱེས་ཚེས། རྒྱལ་ཁབ། རྟེན་ཕོ་མོ། གནམ་གྲུའི་ཨང་གྲངས། ཐོངས་མཆན་ཨང་གྲངས། འཚོ་ཐབས། ཐོངས་མཆན་གང་ཡིན། རང་གི་སྡོད་གནས་ཁ་བྱང། འགྲོ་སའི་ཁ་བྱང་། གང་ཕྱིར་འགྲོ་བ་སོགས་རེད། འགྲོ་སའི་ཁ་བྱང་ལས་གཞན་པ་རང་གི་ལམ་ཡིག་ལ་ཡོད་པ་དཔེ་བཤུ་བྱ་བ་ཙམ་ཡིན།
གལ་ཏེ་ཕྱི་རྒྱལ་ཁག་ལ་གནས་སྐབས་བསྐྱོད་མཁན་ཡིན་ན། ཚུར་ཡོང་ཁར་རྒྱ་གར་དུ་ཡོང་ཆོག་པའི་ཐོངས་མཆན་རྒྱ་གར་གཞུང་ཚབ་ནས་ཞུ་བ་ན། ས་གནས་ཁ་ཤས་ནས་སྒོར་མོ་དགོས་པ་ཡོད་ལ། ཁ་ཤས་ནས་དོན་གཅོད་ཀྱི་རྒྱབ་གཉེར་དགོས་པ་ཡོད་ནའང། སྔ་ནས་ད་བར་རྒྱ་གར་ནི་བོད་ལ་བཀའ་དྲིན་ཆེ་བ་ཞིག་ཡིན་པའི་རྟེན་འབྲེལ་ལྟ་བུས་ལས་སླ་བོར་འཐོབ་ཀྱི་ཡོད་པས་སེམས་ཁྲལ་དགོས་པ་ཞིག་མིན། ས་གནས་ཁ་ཤས་ཀྱི་གཞུང་ཚབ་ནས་ཐོངས་མཆན་དངོས་སྤྲོད་ཀྱི་ཡོད་ལ། ཁ་ཤས་ནས་ཤོག་ཛར་ཞིག་གི་སྟེང་དུ་སྤྲོད་ཀྱི་ཡོད། གང་ལྟར་རྒྱ་གར་དུ་འཛུལ་ཆོག་པ་ལ་གཅིག་པ་ཡིན་པར་འདུག །
འདིར་བྲིས་པ་དག་ནི་དིང་སྐབས་ཀྱི་གནས་ཚུལ་གང་ཤེས་ཙམ་ཡིན་ཅིང་མ་འོངས་པ་ན་འགྱུར་བ་ཐེབ་པ་དང་བསྟུན་ནས་འགྲོ་བསྐྱོད་ཤེས་དགོས་པ་ཡིན་ནོ། །