ཀླུ་སྨྱོན།
ཆུ་ཚོད་བདུན་པ་མ་ཟིན་ཙམ་ཞིག་ལ་མལ་ལས་ལངས་ཏེ་ཁ་སང་བཞིན་མགྲོན་ཁང་གི་ཁ་གཏད་དུ་ཡོད་པའི་འཚིག་ཇ་ཚོང་ཁང་ལས་མེ་ཏོག་གི་ཇ་ཞིག་དང་སྣུམ་བག་ཅིག་ཉོས་རྗེས་བཟའ་བཏུང་བྱེད་ཞོར་གསུང་ཆོས་ས་གནས་སུ་བསྐྱོད། དེ་གར་འབྱོར་རྗེས་གསར་འགྱུར་སྙན་སྒྲོན་པ་གཡུ་ཞུན་དང་ཐུག་སྟེ་དུས་ཆད་བཞིན་གསུང་ཆོས་ཚོམས་ཆེན་གྱི་དྲུག་ཐོག་ཏུ་སོང་ནས་ཨེ་རླུང་ཨམ་སྐད་ལས་རིམ་གྱི་དུས་འཁོར་དབང་ཆེན་དང་དེའི་སྔོན་འགྲོའི་གསུང་ཆོས་སྐོར་གྱི་དྲི་བར་ལན་བཏབ་རྗེས་དབུས་སྐད་ལེ་ཚན་གྱི་འགན་འཛིན་གཞོན་པ་ཀརྨ་ལགས་ཀྱི་རེ་འདུན་བཞིན་ཁོ་ཚོའི་དྲི་བར་ཡང་ལན་བཏབ། དེ་ནས་སྦྱིན་བདག་གིས་མདང་དགོང་གློག་འཕྲིན་ནང་ལན་བཞག་སྟེ་རེ་བ་བཏོན་པ་བཞིན་ཁ་སང་གི་ཨ་རིའི་གདོད་མའི་འགྲེམ་སྟོན་ཁང་དེའི་ནང་དུ་སོང་སྟེ་ཧུ་ཝ་ཡུ་ནས་ཡིན་པའི་བུད་མེད་ཅིག་དང་ཨ་ལ་སི་ཀ་ནས་ཡིན་པའི་སྐྱེས་པ་ཞིག་དང་འགྲོགས་ཏེ་འགྲེམ་སྟོན་ཁང་དུ་ཡོད་པའི་གདོད་མའི་མི་རིགས་ཚོའི་འཚོ་བའི་ཁྲོད་ཀྱི་ཡོ་བྱད་སྣ་ཚོགས་ཀྱི་ཅ་དངོས་དག་ལ་ལྟ་སྐོར་དང་། 
དེ་རྗེས་ཉིན་གུང་གི་ཟ་མ་ཟོས་ནས་གླ་འཁོར་ཞིག་ལ་བསྡད་དེ་གསུང་ཆོས་ར་བར་བསྐྱོད། ཆུ་ཚོད་དང་པོ་ཙམ་ནས་གོང་ས་མཆོག་གིས་དབྱིན་སྐད་དང་བོད་སྐད་སྟེང་སྒོམ་རིམ་བར་བ་མུ་མཐུད་དང་རྒྱལ་སྲས་ལག་ལེན་སོ་བདུན་མའི་བཀའ་ཁྲིད་བསྐྱངས། ཁོང་གི་བཀའ་ཆོས་ཀྱི་ནང་དུ་ཆོས་དད་པའི་སྡེ་ཚན་དང་ཆོས་ལ་ངོ་རྒོལ་བྱེད་པའི་སྡེ་ཚན་གཉིས། དེ་བཞིན་སེམས་ཀྱི་ཞི་བདེ་འཚོལ་བའི་སྡེ་ཚན་ཞིག་དང་དངུལ་ལོར་ལ་སྐྱབས་བཅོལ་བའི་སྡེ་ཚན། དཔལ་སྤྲུལ་རིན་པོ་ཆེའི་སྒྲུང་། རྟེན་འབྲེལ་ཡན་ལག་བཅུ་གཉིས་ཀྱི་སྡེ་ཚན་སོགས་གསུངས། ང་ཚོའི་མི་ཚེ་འཕྲོ་བརླག་ཏུ་གཏོང་མཁན་གཙོ་བོ་དེ་ནི་མི་གཙང་བ་གཙང་བར་འཛིན་པ་དང་། བདག་མེད་པ་ལ་བདག་ཏུ་འཛིན་པ་སོགས་ཕྱིན་ཅི་ལོག་གི་བློ་བཞི་ཡིན་པར་གསུངས་པ་དེ་བློ་ལ་འཕྲོད་པོ་ཞེ་དྲགས་བྱུང་། གསུང་ཆོས་གྲོལ་རྗེས་དུས་ཆད་བཟོས་པ་བཞིན་ཕ་ཡུལ་ནས་ཕེབས་པའི་ཨ་ལགས་ཤིག་དང་ཨ་ལགས་གཞན་ཞིག་གི་སྲས། སན་ཧྥ་རན་སེ་སི་ཀོ་ནས་བསླེབས་པའི་ཚུལ་ཁྲིམས་བཅས་དང་ལྷན་དུ་རྒྱ་མིའི་ཟ་ཁང་ཞིག་ཏུ་སོང་ནས་གྲོ་ཐུག་དང་མོག་མོག་བརྔོས་མ་ཞིག་ཟོས། དེ་ནས་དུས་ཆད་བཞིན་ཐེ་བོའི་གསར་བུ་དང་འཕྲད་དེ་འཁྱག་སྤྲི་ཟ་ཁང་དུ་སོང་ནས་སློབ་ཆེན་སློབ་མར་རོགས་སྐྱོར་ཐེབས་རྩའི་སྐོར་ནས་བསམ་ཚུལ་བརྗེ་རེས་བྱས། དེ་ནས་ཡང་དུས་ཆད་བཞིན་ཨེ་རླུང་རྩོམ་རིག་ལེ་ཚན་གྱི་རྩོམ་སྒྲིག་པ་ཀེ་ཐོ་དང་གསར་འགྱུར་སྙན་སྒྲོན་པ་བོན་རྒྱལ་དང་མཉམ་དུ་ཝུ་ཆང་འཐུང་ས་ཞིག་ནས་གླེང་མོ་ལ་རོལ་ཞིང་། ཁོང་གཉིས་ཀྱི་ཝུ་ཆང་མཆོད་ཤུགས་ལ་ཧ་ལས་པ་དང་། ཁོ་གཉིས་ཀྱིས་ཉིན་འགའི་རྗེས་དུས་དབང་དང་རྩོམ་རིག་སྐོར་བཅར་འདྲི་བྱེད་རྒྱུ་ཟེར་བའི་རེ་བར་ཁས་ལེན་བྱས། དེ་ནས་ཡང་དུས་ཆད་བཞིན་ས་དགོན་མཁན་པོ་བྱམས་པ་དང་འགྲོགས་ནས་རང་ཉིད་སྡོད་སའི་མགྲོན་ཁང་དུ་ལོག་ནས་གཟུགས་པོ་བཀྲུས་རྗེས་ཤོད་དུ་བབས་ནས་དེ་རིང་གི་ཉིན་ཐོ་འདི་བྲིས།