བྲག་རྗེ་སྐལ།
དཀོན་མཆོག་ཟེར་བ་ཀུན་གྱི་ཡ་ཁོག་ཏུ།།
ཧ་ཅང་དམར་དམར་བྱེད་པའི་ནོར་བུ་དེར།།
ཐལ་མོ་སྦྱར་རྐྱང་མིག་ཟུང་བཙུམ་རྐྱང་ལས།།
དོན་དངོས་འདི་མིན་ཅི་མིན་ཤེས་མཁན་དཀོན།།
དད་པ་ཟེར་བ་ཀུན་ཀྱི་ཡིད་ཁམས་སུ།།
མེད་མི་ཆོག་པའི་དགོས་གལ་ཆེན་པོ་དེ།།
ཁ་ནས་བརྗོད་རྐྱང་ངག་ནས་འདོན་རྐྱང་ལས།།
མེད་གྱོང་ཡོད་ཁེ་སུས་ཀྱང་ཐག་གཅོད་མེད།།
ཐར་པ་ཟེར་བ་ཀུན་གྱི་སེམས་ནང་གི །
འཐོབ་བྱ་གཅིག་པུ་ཉིད་དུ་འཛིན་ས་དེ།།
བླ་མས་བཤད་རྐྱང་སློབ་མས་དྲངས་རྐྱང་ལས།།
འདི་དང་འདི་ཞེས་མཛུབ་མོ་འཛུགས་རབས་མེད།།
བླ་མ་ཟེར་བ་ཀུན་གྱི་མགོ་ཐོག་ཏུ།།
གང་བྱེད་རང་དབང་ཡོད་པའི་སྐྱེས་བུ་དེ།།
རྟ་ཐོག་དྲངས་རྐྱང་རྟ་ཕོ་འབུལ་རྐྱང་ལས།།
འདི་ཕྱི་ལག་མཐིལ་ཡིན་མིན་སུ་ཡིས་རྟོགས།།
བྱིན་རླབས་ཟེར་བར་ཀུན་གྱིས་སྨོན་བཞིན་དུ།།
མགོ་སྒུར་ལག་པ་བཟེད་ནས་རྒྱུགས་ས་དེ།།
གོང་མས་གནང་རྐྱང་འོག་མས་བཞེས་རྐྱང་ལས།།
ཕན་འབྲས་ངན་འབྲས་ཅི་ཡོད་སུ་ཡིས་དཔྱད།།
རྒྱུ་འབྲས་ཟེར་བ་ཀུན་གྱི་ཞེ་ཕུགས་སུ།།
འདི་ནི་བརྩི་བྱ་ཉིད་ཅེས་རློམ་ས་དེ།།
ཡིད་ཆེས་གནང་རྐྱང་དད་པ་བྱེད་རྐྱང་ལས།།
མར་མར་ཕུགས་ཕུགས་སུ་ལ་འཆད་རྒྱུ་མེད།།
དགོན་པ་ཟེར་བ་ཀུན་གྱི་ཡོད་ཡོད་པོ།།
ལགས་ལགས་བསོ་བསོ་བྱས་ནས་ཕུལ་ས་དེ།།
ལག་པས་ལེན་རྐྱང་དངུལ་ཁུག་བརྒྱང་རྐྱང་ལས།།
ཕལ་མི་གཅིག་ལ་འཚོ་ཐབས་བསྟན་རབས་མེད།།
ཡུལ་ལྷ་ཟེར་ནས་དར་ཅོག་འཐེན་ས་དང་།།
ཡུལ་འདྲེ་ཟེར་ནས་གསུར་དྲི་བདུག་ས་སོགས།།
ཡིན་ཤག་ཡོད་ཤག་བྱས་ནས་བསྟེན་གསོལ་ལས།།
དོན་དུ་རས་རྩམ་འཕྲོ་བརླགས་མིན་ངེས་མེད།།