བྲག་དཀར་འཁྱམས་པོ།
༡༽རི་ཆུ་སྟོང་ཕྲག་བརྒལ་བའི།།
རྒྱང་རིང་ཡུལ་གྱི་མཛའ་གྲོགས།།
མ་མཇལ་ལོ་ཟླ་རིང་མོ།།
དྲན་གདུང་གླུ་ཞིག་བླངས་ཡོད།།
༢༽ས་མཐའི་བུ་ཆུང་ང་རང་།།
འཚོ་བ་བཟང་རྒྱུ་མེད་མོད།།
ལྟོགས་པ་མ་བགྲང་ཙམ་གྱིས།།
མི་ཚེ་འཕུལ་ནས་བསྡད་ཡོད།།
༣༽རྒྱུས་མེད་མི་ཡུལ་ལུང་པ།།
འདྲིས་མེད་གྲོགས་དང་འགྲོགས་ནས།།
ངེས་མེད་གཏམ་ཞིག་བཤད་དུས།།
འགོག་མེད་ཁྱེད་རང་དྲན་བྱུང་།།
༤༽ཁྱེད་རང་དྲན་པའི་ཉིན་མོ།།
ལོ་ཟླ་ལས་ཀྱང་རིང་པ།།
མི་དྲན་སེམས་ལ་བསམ་ཡང་།།
དྲན་སེམས་འགོག་ཐབས་མི་འདུག།
༥༽བདག་ལ་གཤོག་ཅིག་ཡོད་ན།།
ཁྱེད་རང་དྲུང་དུ་འཕུར་འདོད།།
དྲན་པའི་སྙིང་གཏམ་རིང་མོ།།
ལན་བརྒྱ་ཁྱེད་ལ་བརྗོད་འདོད།།
༦༽མདང་དགོང་རྨི་ལམ་ནང་དུ།།
ཁྱེད་རང་མཇལ་བས་སྐྱིད་བྱུང་།།
ད་ནངས་ཡར་ལ་ལངས་དུས།།
མཐོང་རྒྱུ་མེད་པས་སྐྱོ་བྱུང་།།
༧༽བྷེ་ཏ་པུ་རི་རྩེ་ནས།།
དྲོད་འཇམ་ཉི་མ་ཤར་དུས།།
དམར་ཆུང་འཛུམ་གྱིས་ཁེངས་པའི།།
ཞལ་རས་མཇལ་ན་བསམ་བྱུང་།།
༨༽ལྗོན་ཤིང་འདབ་ལོ་གསེབ་ནས།།
བྱེའུ་ཆུང་སྐད་སྙན་སྒྲོག་དུས།།
ནམ་ཡང་སུན་རྒྱུ་མེད་པའི།།
གསུངས་དབྱངས་ཐོས་ན་བསམ་བྱུང་།།
༩༽འཛིན་ཁང་གྲུ་བཞི་ནང་དུ།།
སློབ་ཁྲིད་ཉན་ཁུལ་བྱེད་ཀྱང་།།
ཡིད་ལ་ཁྱེད་རང་འཁོར་བས།།
སློབ་ཚན་འཛིན་ཐབས་མ་བྱུང་།།
༡༠༽ཉི་འོད་ས་གཞི་དྲོས་ཀྱང་།།
བདག་ལ་དྲོ་ཞིག་མི་འདུག།
འབྲས་དཀར་ལྡ་ལུ་ལེན་ཡང་།།
ཟས་ལ་ཡི་ག་མི་འདུག།
༡༡༽ཉི་མ་ནུབ་རི་རྒྱུ་ནས།།
འཕྲེང་ཞགས་ཤར་ལ་ཕོག་དུས།།
ཁེར་རྐྱང་བུ་ཆུང་ང་རང་།།
སྙིང་གཏམ་རླུང་ལ་བརྗོད་ཡོད།།
༡༢༽ས་གཞི་མུན་པས་བསྒྲིབས་སོང་།།
བྱ་བྱེའུ་ཚང་ལ་འཕུར་སོང་།།
ང་དང་ཟླ་བ་གཞོན་ནུ།།
གྲོགས་མེད་ཁེར་རྐྱང་ལུས་འདུག།
༡༣ཁྱེད་རང་དྲན་པས་ཡིན་ནམ།།
དུས་ཀྱི་འཁང་ར་གང་ཡིན།།
གྔང་རླུང་ཤུར་ཤུར་ལྡང་བྱུང་།།
བར་སྣང་ཐལ་རྡུལ་འཚུབས་བྱུང་།།
༡༤༽དགོང་མོ་མལ་ལ་ཉལ་ཁ།།
ཁྱེད་རང་མཇལ་བ་སྨོན་ཡོད།།
རྨི་ལམ་རབ་རིབ་ཁྲོད་ནས།།
ཁྱེད་རང་བཙལ་བར་ཆས་ཡིན།།
༢༠༡༣/ ༧/ ༢༢
ཤ་ཚགྲྭ་རྐྱང་ཞིག་ཡིན་པ་ཐག་ཆོད།
ངོ་མ་དེ་འདྲ་ཡིན་ན།།
ཡོད་ཚད་བློས་བཏང་བྱས་ཏེ།།
བུ་མོ་དེ་ཡི་ཕྱོགས་སུ།།
མྱུར་དུ་ཕེབས་རོགས་བྱོས་ལོ།།
བུ་མོ་ཕར་ལ་བསྐྱུར་ཞིང་།།
རང་ཉིད་ཚུར་ལ་འཁྱམ་སྟེ།།
དྲན་གླུ་སྐྱོ་གླུ་ལེན་བཞིན།།
ལོ་ཟླ་སྐྱེལ་ནས་མ་འདུག།
མི་ཁ་འཚོ་བར་སྐྲག་སྟེ།།
རང་ཉིད་བློས་བཏང་མ་ཐུབ།།
ཅིག་ཅིག་ཉིག་ཉིག་ཟེར་ཞོར།།
འདུག་པ་ཕོ་རྟགས་མ་རེད།།