___བེ་རི་འཇིགས་མེད་དབང་རྒྱལ།
བཤད་སྒྲུབ་ཀྱི་རླབས་སྟོང་དགུང་ལ་འཕྱོ་བའི་ཆོས་སྡེ་ཆེན་པོ་དེར། ཚོགས་གསོག་གི་མཆོད་འབུལ་དང་སྒྲིབ་སྦྱོང་གི་ཕྱག་སྐོར་གང་ནུས་ཞིག་བྱེད་ཞོར། ང་རང་USAནས་མཁའ་ལམ་བརྒྱུད་དེ་འོངས། ཆོས་སྡེ་དེར་ངའི་ངོ་ཤེས་ས་སུ་མེད་ལ་རྒྱུས་ལེན་ས་དེ་བས་མེད། ངས་ཁང་པ་ཆུང་ཆུང་ཞིག་གླས་ཏེ་དེར་བསྡད། དེ་ནས་དགོན་པ་དེར་མང་ཇ་དང་སྐུ་འགྱེད་ཀྱི་མཆོད་འབུལ་དང༌། ཕྱག་དང་སྐོར་བས་སྒྲིབ་སྦྱོང་གང་ནུས་བྱས། ཉིན་གཉིས་གསུམ་ཙམ་གྱི་ནང་ངོ་ཤེས་ས་སུ་ཡང་མེད་པའི་དགོན་པ་དེའི་ནང་གྲོགས་པོ་གསར་པ་ཆུ་ཁའི་བྱེ་མ་ལྟར་འཕེལ་བྱུང༌།
“ཁྱོད་ང་ཚོའི་གྲྭ་ཚང་གི་ཐོབ་ཁོངས་རེད།”
“ཁྱོད་ང་ཚོའི་ཁང་ཚན་གྱི་མི་ཁོངས་རེད།”
“ཁྱོད་དང་ང་གཉིས་མི་ཚན་གཅིག་རེད།”
“ང་གཉིས་ཕ་ཡུལ་གཅིག་པ་རེད།”
“ང་གཉིས་གྲོང་པ་གཅིག་པ་རེད།”
“ཁྱོད་ངའི་སྤུན་མཆེད་རེད།”
“… …”
“… …”
ངའི་སྒོ་འགྲམ་ནས་ཇ་དམ་དང༌། སྦི་སི་ཀོཊ་སོགས་ཀྱི་ལག་རྟགས་ཁུར་མཁན་ཚོ་མིག་རྒྱང་གིས་མི་མངོན་པར་རུ་བསྟར་བསྒྲིགས་འདུག
“བོད་མི་རིགས་ཀྱི་དགེ་འདུན་པ་འདི་ཚོ་དང་འདྲེས་གཤིབས་བདེ་བོ་འདི་འདྲ་རེད༌།”
ང་རང་མནན་ཐབས་མེད་པའི་སྤྲོ་སྣང་ཆེན་པོ་ཞིག་གིས་གདོང་ངོས་ནས་འཛུམ་མདངས་ཤིག་དབང་མེད་དུ་ཤོར།
“འཇིག་རྟེན་གྱི་སྐྱིད་སྡུག་ནི་དབྱར་གཞུང་གི་གནམ་གཤིས་ལྟར་ངེས་བརྟན་མེད་པར་འགྱུར་ལྡོག་གི་རང་བཞིན་ཅན་ཞིག་རེད”
ཅེས་སངས་རྒྱས་མན་ཆད་དང་གནའ་རབས་རྒནཔོ་ཚུན་ཆད་ཀྱི་གསུང་སྒྲོས་དེ་བདེནཔ་ལོས་ཡིན། ཐེངས་གཉིས་པ་སླར་ཡང་མཆོད་འབུལ་དང་ཕྱག་སྐོར་ཆེད་རྒྱ་གར་དུ་སླེབ་སྐབས། བསམ་ཡུལ་ལས་འདས་པ་ཞིག་ལ་ལྡི་ལི་ནས་ངའི་དངུལ་དང་དངོས་པོ་ཕལ་ཆེ་བ་བོར་བརླགས་ཤོར་སོང༌།
“ཨཱ་་༌། སྐྱོན་མེད། སྐྱེས་པ་ཕོ་ལ་སྐྱིད་སྡུག་སྣ་དགུ་ཡོང་རྒྱུ་ལོས་ཡོད། ཡིན་ནའང་དྲག གདན་སའི་ནང་ཡོད་པའི་ངོ་ཤེས་པ་དེ་ཚོ་ལ་བཅར་ན།”
ངས་དེ་ལྟར་བསམ་བཞིན་སླར་ཡང་ཆོས་སྡེ་ཆེན་པོ་དེར་འོངས། ཐོག་མར་མི་ངོ་ཤེས་པ་ཁ་ཤས་ཡོང་ནས་འཚམ་འདྲི་བྱས་བྱུང༌། ངའི་སྐྱིད་ཀྱི་གནས་ལུགས་བཤད་ཟིན་མཚམས་ཁོང་ཚོ་སྣ་སུན་བྱེད་བཞིན་རིམ་གྱིས་རིམ་གྱིས་ག་ལེ་ག་ལེར་ལངས་ནས་ཕྱི་ལ་ཕེབས་སོང༌།
དུས་དེ་ནས་བཟུང་ངའི་སྤྱིལ་བུ་ཆུང་ཆུང་དེའི་ནང་དབེན་ཐེང་ངེ༌། ཁུ་སུམ་མེར། འཚམ་འདྲི་བྱེད་མཁན་མི་འདུག་ལ་གྲྭ་ཚང་དང༌། ཁང་ཚན། མི་ཚན། ཕ་ཡུལ་གཅིག་པ། ཐ་ན་སྤུན་མཆེད་ཚུན་ཆད་ལོ་སྔ་མའི་ནང་ང་ཡིན་ཁོ་ཡིན་ཟེར་མཁན་ཡོངས་རྫོགས་འཇའ་ཡལ་བ་ལྟར་གྱུར། སྒོ་འགྲམ་དུ་ལག་རྟགས་ཁུར་མཁན་གྱི་རུ་བསྟར་སྒྲིག་པ་ཡང་དྲི་ཟའི་གྲོང་ཁྱེར་ལྟར་ཡལ།
ཨཱ་་་་་་ཅི
འཁྲུལ་སྣང་གི་རྨི་ལམ་མམ། སྒྱུ་ཐབས་ཀྱི་མིག་འཕྲུལ་ཅི་ཞིག་་་ ་་་
ཀྱེ་མ། འཇིག་རྟེན་འདི་ནི་ཅི་འདྲའི་གཏིང་མི་དཔོག་པའི་ལྐོག་འགྱུར་གྱི་ཁུག་ཀྱོག་དོག་པོ་ཞིག་རེད་ཨང༌།
༡༩༩༥/༥/༢༨/ མཚན་མོར་བྲིས། <<རྩམ་པ>>དུས་དེབ་གཉིས་པའི་ཐོག་བཀོད།