རྫ་ཆུའི་ཟླ་བ།
ས་ཐག་རིང་རྒྱ་གར་ལྷོ་ཕྱོགས།།
ཤིང་ཙན་ཏན་དྲི་བསུང་འཐུལ་ཞིང་།།
བྱ་རྨ་བྱ་གླང་ཆེན་རྒྱུ་ས།།
སྟོང་འགྲོ་བའི་སེམས་ཀྱི་ཞིང་ཁམས།།
ནགས་ཐང་ཆེན་ཁ་རྒྱ་ཆེ་ཞིང་།།
ཞིང་འཇའ་ཚོན་དཔལ་བེའུ་རི་མོ།།
སྤང་སྔོ་ལྗང་གཡུ་གཞུང་ལྟེ་བར།།
ཆབ་དྭངས་བསིལ་རང་བྱུང་མཆོད་ཡོན།།
གནམ་མཐོན་མཐིང་རིན་ཆེན་མན་ཌལ།།
སྤྲིན་གསར་བ་དངུལ་དཀར་ཁྲ་ཚོམ།།
ཆར་བདུད་རྩིའི་ཟིལ་བ་ཆགས་པའི།།
ས་རླན་བཤེར་ལུས་ཁམས་གསོས་སྨན།།
གནས་ཡོད་རྒུ་སྨན་ཤིང་སྣ་ཚོགས།།
རིགས་འདྲ་མིན་མེ་ཏོག་གླིང་ཀ །
རླུང་བསེར་བུ་པདྨའི་དྲི་བསུང་།།
ས་ནོར་འཛིན་རིན་ཆེན་ཕྱེ་མ།།
དབྱར་རྩྭ་ལྗང་འཇམ་མཉེན་ནེའུ་གསིང་།།
མཐའ་མེད་པའི་ཁོ་ར་འཁོར་ཡུག །
མཚོ་འཚེའུའི་རླབས་འཕྲེང་ངོགས་སུ།།
བྱ་ངང་ངུར་འཕུར་ལྡིང་རྩེན་པ།།
གཟུགས་རིན་ཆེན་སྒ་ཆས་སྤྲས་པའི།།
རྩལ་ཤུགས་ལྡན་ཅང་ཤེས་རྒོད་པོས།།
རྩིབས་སྟོང་གི་འཁྲུལ་འཁོར་འདྲེན་པའི།།
ཡུལ་རེ་འགའ་སུམ་རྩེན་ལྷ་ཡུལ།།
རྩྭ་ཀུ་ཤུའི་བསིལ་ཁང་ནང་ལ།།
ཚུལ་སྤྱོད་ལྡན་བྲམ་ཟེའི་མི་རིགས།།
ལུས་ཤ་མདོག་ཙན་ཏན་ཁྲི་ཤིང་།།
དར་དཀར་བོའི་གོས་ལྭ་མཛེས་པ།།
ལུས་མཚར་སྡུག་རྒྱ་གར་བུ་མོ།།
སོ་འཛུམ་དཀར་སྒེགས་པའི་ཉམས་ཅན།།
དར་སྲབ་མོའི་སེང་རས་འོག་ནས།།
བྲང་འོ་འཛིན་དུང་དཀར་དབྱིབས་འདྲ།།
ཆུ་ལ་ལ་པདྨའི་རྫིང་བུ།།
རྙོག་མེད་པའི་བདུད་རྩིའི་མཚོ་མོར།།
བྱ་ངང་བ་ཁྱོ་ཤུག་འཚོ་ཞིང་།།
བ་མ་ཧེའི་རྩེད་དགའི་ཁྲུས་གཞུང་།།
མུ་མེད་པའི་ནགས་ཀླུང་སྟུག་པོ།།
སྟག་སེང་གེའི་གཟི་བརྗིད་ངོམ་ཞིང་།།
སྦྲུལ་གདུག་པའི་འཚང་ཁ་འཁྲུགས་པའི།།
ལམ་རེ་འགའ་གཤིན་རྗེའི་འཕྲང་རེད།།
གྲངས་མེད་པའི་མེ་འཁོར་ལྕགས་ལམ།།
སེམས་ནང་ལ་བསམ་ཐུབ་དཀའ་ཞིང་།།
མཐའ་ཡས་པའི་ལྷོ་ཕྱོགས་ས་ཆེན།།
དཔེ་བཞགས་ན་ཨ་སྔོན་གནམ་རེད།།
༢༠༡༣ ༧ ༢༣