བསྟན་འཛིན་འོད་ཟེར།
ལས་དབང་སྨོན་ལམ་བཟང་པོའི་མཚམས་སྦྱོར་ལ་བསྟེན་ནས།།
དལ་བའི་རྟེན་བཟང་འཛིན་པའི་ས་ཆེན་འདིར་སྐྱེས་དེ།།
དྲིན་ཆེན་ཕ་མས་བྱམས་བརྩེའི་ཕྱག་ཡངས་ཀྱིས་བསྐྱངས་ཀྱང་།།
སྔོན་བསགས་ཐོད་པའི་ཤིང་ལོའི་རི་མོ་དེ་གར་འཁོར།།
སྐྱིད་ལ་སྡུག་གི་མི་ཚེ་མ་སྨིན་པའི་བུ་ཆུང་།།
གོས་དང་ལྷམ་གྱི་སྣེ་མཐིལ་རྩྭ་ཤིང་ལ་གཟད་དེ།།
རི་བྲག་སྤང་ལྗོངས་གོམ་པའི་བུ་ལོན་གྱིས་འཇལ་ནས།།
དཀར་ནག་ཕྱུགས་ཀྱི་འཚོ་སྐྱོང་ཆུང་དུས་ཀྱི་མི་ཚེ།།
དར་བའི་ལང་ཚོ་བདེ་སྡུག་རེས་མོས་ཀྱི་འཁོར་ལོ།།
དབྱངས་གསལ་སོ་བཞི་ནས་བཟུང་ཆེ་ཆུང་གི་རིག་གནས།།
ཀུན་ལ་བག་ཆགས་བཟང་པོའི་རེ་སྨོན་ཞིག་འཆང་ཡང་།།
དེ་རིང་ཤེས་ཤེས་སང་ཉིན་བརྗེད་བརྗེད་ལས་མ་འདས།།
བཟློག་མེད་སྔོན་བསགས་བཙན་པོས་ཁ་ལོ་དེ་བསྒྱུར་ནས།།
ཕ་ས་ཁ་བའི་ཡུལ་ལྗོངས་མདོ་སྨད་ཀྱི་ཐིག་ལེ།།
རེ་ཞིག་ཕྱི་ཕྱག་འཚལ་བ་བསྐོས་ཐང་གི་རི་མོ།།
ཨ་སྔོན་གནམ་གྱི་རྒྱལ་མོས་བཀའ་ཆད་དེ་མ་ཐེག །
སྔོན་མཐོང་ལག་ཟིན་མེད་པའི་མི་ཡུལ་གྱི་འཚོ་བ།།
རེ་དང་འདུན་པའི་མ་ཡིན་ལྟས་དབང་གི་འཁོར་ལོ།།
སྐད་དང་མི་རིགས་མི་གཅིག་ས་མཐའ་རུ་འདྲུད་པའི།།
ཞགས་པའི་ཨ་ལོང་ཀོར་མོ་གཉའ་བ་རུ་ཐེབས་སོང་།།
དང་མའི་ལྟེ་ཁྲག་འཕོས་སའི་རྫ་རྒྱལ་དེ་ཕྱུག་མོ།།
ཆུང་ཆུང་ལུ་གུ་འཚོ་སའི་རི་ལུང་དང་ཆུ་གཙང་།།
ཡང་ཆུང་མེ་ཏོག་འཐུ་སའི་གཡུ་སྔོན་གྱི་སྤང་ཐང་།།
ཡ་ཆུང་གངས་དཀར་དབུས་ན་བརྗེད་མེད་གྱི་ཡིག་ཆུང་།།
རྒྱང་རིང་གནས་ཀྱི་བཀལ་བའི་ཤ་རུས་ཀྱི་ཉེ་འབྲེལ།།
ས་མཐའི་སྤྲང་བོའི་ལས་ལ་ཁྲོ་བ་ཞིག་མ་གནང་།།
འབྱུང་འདུས་ལུས་པོ་ཁ་ཐག་ཇེ་རིང་དུ་སོང་ཡང་།།
དུང་དུང་སེམས་པ་དམར་པོའི་འབྲེལ་ཐག་དེ་ཇེ་ཉེ།།
མ་བྲིས་སེམས་ཀྱི་ཡིག་ཆུང་སྙིང་འབུས་སུ་བཅངས་ནས།།
མ་ཡུམ་གངས་ལྗོངས་ཁ་བའི་ཕ་ས་དེ་དྲོན་མོ།།
མ་འོངས་བདེ་སྐྱིད་ཉི་མའི་འོད་སྣང་ཞིག་འཆར་དུས།།
མ་བོས་ས་མཐའི་བུ་ཆུང་རང་ཡུལ་དུ་ལོག་འོངས།།