མཐོ་སྒང་གི་ངར་སྒྲ་གོ་ལ་ཧྲིལ་པོར་སྤེལ་མཁན་གཡང་སྐྱིད་མ།

གངས་ཆབ་དག་མ།

ཞི་བདེ་རྒྱ་མཚོའི་གྲུ་ཟུར་ནས་གསར་དུ་བཞད་པའི་དྭངས་གཙང་ལྷད་མེད་ཀྱི་ཁ་བའི་མེ་ཏོག་རྐང་གཅིག་༼གཡང་སྐྱིད་མ༽།
འཛམ་གླིང་ཡོངས་ཁྱབ་ཀྱི་འཕེལ་ཕྱོགས་ལས་ཆབ་དཔལ་རིག་གསུམ་གྱི་གཟི་འོད་དུས་སུ་མངོན། དགའ་སྐྱོ་ཆགས་སྡང་གི་ཚོར་འདུ་ཟབ་མོས་གླུ་གར་རོལ་རྩེད་ཀྱི་རྣམ་འགྱུར་གཏན་དུ་བསྐྲུན། དེ་བས་ན། ནང་དུ་དགའ་སྡུག་གི་ཚོར་བ་ཇི་ལྟར་ཟབ་ཀྱང་ཕྱི་ནས་འཛུམ་མདངས་རི་མོ་ཡལ་དཀའ་བའི་བོད་ཁ་བ་ཅན་པ་དག་ནི། གླུ་གར་གྱི་རྒྱ་མཚོ་དང་སྒྱུ་རྩལ་གྱི་དོ་ར་ཡིན་ལ། བོད་མི་རེའི་ཁ་ན་གླུ་རེ་ཞེས་ཤོད་སྲོལ་ཡོད་པ་བཞིན། རི་བོ་གངས་ཅན་གྱི་ཉེ་འདབས་ན་འཚོ་བཞིན་པའི་མི་རིགས་འདིའི་ཡབ་མེས་ཚོས་ཀྱང་། རང་མི་རིགས་ཀྱི་ཆོས་དང་རིག་གཞུང་གི་བག་ཆགས་ངེས་ཅན་ལྡན་ཞིང་། འགྲོ་བ་མིའི་རིགས་ཀྱི་རང་གཤིས་ལ་ལྷན་སྐྱེས་སུ་གྲུབ་པའི་དགའ་སྐྱོ་ཡིད་ཀྱི་འགྱུ་བག་གསལ་བར་མཚོན་ནུས་པའི་ཁྱད་པར་zཅན་གྱི་ལུས་ངག་གི་རྣམ་འགྱུར་རེ་རེ་ཡང་། འཛམ་གླིང་སྒྱུ་རྩལ་གྱི་བང་མཛོད་ཁྲོད་དུ་རིན་བྲལ་ནོར་བུའི་ཆུན་པོ་ཤ་སྟག་ཡིན་མོད།

དེ་ལྟར་ནའང། ཤར་ཕྱོགས་ཀྱི་ཉི་འོད་དམར་པོས་གངས་དཀར་རི་བོ་ཆབ་ལ་བསྒྱུར་ཞིང་། བསྐལ་བའི་རླུང་ནག་འཚུབ་མས་ཕ་མཁར་དམར་པོའི་དར་ལྕོག་བསྒྱེལ་ནས། ལས་དབང་གི་འབབ་རྒྱུན་རིང་མོ་ནས་རྨ་ཟླ་འབྲི་གསུམ་གྱི་སྨྲེང་སྐད་ཤོར་དུས་འདིར། འོད་སྟོང་འབར་བའི་ཐུན་མིན་རིག་གཞུང་གི་ཆ་ཤས་རེ་རེ་བཞིན། གཡུལ་སར་ལྷུང་བའི་ནོར་རྫས་བཞིན་བདག་མེད་ཡན་བོར་དང་། བདག་ཡོད་དབང་མེད་ཀྱི་ཚུལ་དུ་ཉམས་པ་ནས་རྒུད། རྒུད་པ་ནས་རྩ་མེད་ཀྱི་ཕྱོགས་སུ་བསྐྱོད་འགོ་ཚུགས་པའི་དུས་རབས་འདིར། སྐར་ཚོགས་རིམ་གྱིས་ཡལ་བའི་མཁའ་མཐའ་ནས། སླར་ཡང་བཀྲག་མདངས་འཚེར་བའི་སྐར་ཆེན་རེ་གསར་དུ་མངོན་པ་བཞིན། གངས་ཆབ་ཀྱིས་གསོས་ཤིང་རྩ་ཐང་གི་དཀྱིལ་ནས་ལང་ཚོའི་མེ་ཏོག་གསར་དུ་བཞད་པའི་ཤེས་འཇོན་ལྡན་པའི་བོད་ཕྲུག་གཞོན་ནུ་རེ་རེས། དུས་རབས་ཀྱི་གར་སྟབས་དང་འགྲོགས་ནས། རང་རིགས་ཀྱི་ཁྱད་ཆོས་ལྡན་པའི་རིག་གཞུང་གི་ལེགས་སྐྱེས་རེ་རེ། འཛམ་གླིང་ཤར་ནུབ་ཀྱི་མི་རིགས་ཁྲོད་དུ་དྭངས་གཙང་ལྷད་མེད་ཀྱི་ཁ་བའི་མེ་ཏོག་རེ་རེའི་ཚུལ་འབུལ་བཞིན་པའི་ཁྱོད་ཚོའི་རྣམ་འགྱུར་གྱིས་བཞག་པའི་བག་ཆགས་ནི། ནམ་ཡང་བརྗེད་ཐབས་བྲལ་ཞིང་དགའ་སྐྱོའི་ཚོར་བ་གཉིས་ཆར་དུས་གཅིག་འདྲེན་པའི་གདུང་ལྡན་ཡིད་ཀྱི་བདུད་རྩི་ཁོ་ན་ཡིན།
བརྗོད་དོན་ཅན་གྱི་ཁ་བའི་སྲས་མོ་ཚེ་རིང་གཡང་སྐྱིད་དམ་གཡང་སྐྱིད་མ་ཞེས་གྲགས་པའི་བོད་ཀྱི་གླུ་མ་འདི་ལ་མཚོན་ན། རིགས་བཟང་ལྷ་དཀར་ཆོས་ལྡན་གྱི་ཁྱིམ་ཚང་དུ་ལང་ཚོའི་མྱུ་གུ་སྨིན། གཞན་ཕན་བྱམས་དང་བརྩེ་བས་ཐུགས་རྒྱུད་འཇམ་ཞིང་དུལ། དམ་པ་ལྷ་ཆོས་ཀྱི་བག་ཆགས་ཟབ་ཅིང་བརྟན་པ་འདིས་ཆོས་ལྡན་བོད་པའི་བུ་མོའི་ངང་ཚུལ་གསལ་ལ། གཞུང་དྲང་ཁྲེལ་ལྡན་དང་བཞིན་བཟང་བློ་བརྟན་སོགས་ཡ་རབས་གཞོན་ནུ་མའི་རང་གཤིས་ལྷན་སྐྱེས་སུ་གྲུབ།

༢༠༡༣ལོ་འདིར་རྒྱ་ནག་གྲོང་ཁྱེར་ཧྲང་ཧེ་རུ་གོ་སྒྲིག་བྱས་པའི་འཛམ་གླིང་གང་ས་ནས་སྐྱེ་བོ་དུང་ཕྱུར་མང་པོས་དགའ་མོས་ཞུ་ཡུལ། རྒྱ་ནག་གི་ཆེས་དགའ་ཤོས་ (Chines Idol) ཞེས་འབོད་པའི་སྒྱུ་རྩལ་གྱི་དོ་ར་འདི་རུ་བུ་མོ་གཡང་སྐྱིད་མ་མཉམ་ཞུགས་གནང་། རྒྱ་ནག་རྒྱལ་ཡོངས་ནས་གྲགས་ཅན་གླུ་བ་གླུ་མ་བརྒྱ་ཕྲག་བརྒལ་བ་ཚོ་དང་མཉམ་དུ། ཉིན་གྲངས་བརྒྱའི་ཡུན་ལ་འགྲན་བསྡུར་ཐེངས་མང་ལས་རིམ་གྱི་ཁྲོད་ནས་རྒྱལ་ཁ་མཐོ་ཤོས་ཁོ་ན་ཐོབ་བརྟེན། རྒྱ་ཆེན་ལྟད་མོ་བས་ཁོ་མོར་༼ལྷ་མོ༽ཞེས་པའི་མཚན་སྙན་མེ་ཏོག་དཀར་པོའི་ཕྲེང་བ་ལྷན་དུ་ཕུལ།
ཁོ་མོས་བཏང་བའི་གླུ་དབྱངས་ནི། ཆོས་ལྡན་ཁ་བ་གངས་ཅན་པའི་ཐུན་མིན་གྱི་རིག་གཞུང་བསམ་པ་ལྷུན་འགྲུབ། མ་ཎི་པད་དབྱངས། དབྱངས་ཅན་མ་སོགས་ཆོས་དབྱངས་འདྲ་མིན་སོགས་ཡིན། ཁོ་མོའི་སྙན་འཇེབས་ཀྱི་གླུ་སྐད་དང་། མཛེས་སྡུག་ལྡན་པའི་བཞིན་རས། ཞི་ཞིང་དུལ་བའི་གཤིས་རྒྱུད། དྭངས་གཙང་ལྷད་མེད་ཀྱི་རྣམ་འགྱུར་བཅས་ཀྱིས་འཛམ་གླིང་ཕྱོགས་མཐར་འཁོད་པའི་རྒྱ་ཆེ་གཟིགས་མོ་བ་ཡོངས་ཀྱི་ཡིད་ཀྱི་དབང་པོ་གཅིག་ཆར་དུ་འཕྲོགས། ཁོང་ཚོས་མགྲིན་གཅིག་ཏུ། ཁོ་མོས་བཏང་བའི་གླུ་དབྱངས་ལ་བརྗོད་མི་ཤེས་པའི་ཡིད་བདེ་སྦྱིན་པའི་ཁྱད་ནུས་དམིགས་བསལ་ཞིག་འདུག་ཅེས་སྨྲས། དོན་དངོས་ཐོག་ཕྱོགས་མཐར་འཁོད་པའི་གཟིགས་མོ་བ་ཡོངས་དང་། འཛམ་གླིང་ཕྱོགས་མཐར་ནས་ཆེད་ཕེབས་གནང་བའི་གྲགས་ཅན་གླུ་ཡི་སྒྱུ་རྩལ་ཕུལ་བྱུང་བ་རྣམས་ཀྱི་སེམས་གཏིང་ནས། ཐེངས་འདིའི་གླུ་གར་འགྲན་བསྡུར་ཁྲོད་ནས་སྲས་མོ་གཡང་སྐྱིད་མ། ཨང་དང་པོའི་ཕུལ་བྱུང་གླུ་མ་གཅིག་པུ་དེ་ཡིན་པ་ངོས་འཛིན་བྱས་ཡོད་པ་ཙམ་དུ་མ་ཟད་ཆེས་མཐའ་འཇུག་གི་འགྲན་རྩོད་སྐབས་སུ་ཡང་འོས་འདེམས་ཀྱི་ལམ་ནས་བརྒྱ་ཆ་མཐོ་ཤོས་ཨང་དང་པོ་མོ་ལ་ཕུལ་ཟིན་པ་སྐྱེ་བོ་བྱེ་བ་མང་པོའི་མིག་གཉིས་ཀྱིས་མངོན་སུམ་དུ་མཐོང་།

དེ་ལྟར་ནའང་༢༠༡༣ ཟླ ༠༨ ཚེས ༢༥ ཉིན་མོ་འདིར་བརྗོད་མི་ནུས་པའི་གསང་བའི་རྒྱབ་ལྗོངས་ཀྱི་གནོན་ཤུགས་དང་། སྟོབས་འབྱོར་གྱིས་དྲང་བདེན་ཕམ་པར་གཏོང་བའི་སྐྱོ་གར་གྱི་ལེའུ་དམར་པོའི་ཟློས་གར་ཁྲོད། སྐབས་འདིའི་དཔྱད་འདེམས་པ་ (Judge) བཞི་ཡི་དབང་ཤུགས་ཁོ་ནས་རྩེད་འགྲན་བྱ་དགའ་ཨང་གཉིས་པ་དེ་ཁོ་མོ་དང་། ཨང་དང་པོ་དེ་རྒྱ་རིགས་ཕོ་གཞོན་ལིའུ་ཤང་ཤང་ལ་སྤྲད་འདུག
སྐབས་འདིའི་གསང་བའི་གཏམ་རྒྱུད་སྐྱུགས་བྲོ་ཞིག་ལ། མཐའ་མའི་འགྲན་བསྡུར་མ་བྱས་པའི་ཉིན་འགའི་སྔོན་ནས་ཨང་དང་པོའི་བྱ་དགའ་དེ་རྒྱ་རིགས་ལིའུ་ཤང་ཤང་ལ་ཐོབ་རྒྱུ་ཡིན་པ་ཉེ་འཁོར་མི་མང་ཚོས་ཤེས་རྟོགས་བྱུང་འདུག མ་ཟད་ཁོ་པ་ནི་སྒྱུ་རྩལ་འགྲན་སྟེགས་འདིར་ཞུགས་རིང་ཐེངས་འགའ་ཕམ་མྱོང་མཁན་ཞིག་ཀྱང་རེད།

སྲས་མོ་དབྱངས་སྐྱིད་མ། གང་ལྟར་གཟུ་བོར་བཞུགས་པའི་རྒྱ་ཆེན་གཟིགས་མོ་བའི་ཚོགས་དང་ལྷན་དུ། ང་ཚོས་ཁྱེད་ལ་ཕུལ་བྱུང་གངས་ལྗོངས་གླུ་མའི་མཚན་སྙན་དེ་སེམས་གཏིང་ནས་འབུལ། མི་རིགས་ཀྱི་ཁྱད་ཆོས་འབུར་དུ་ཐོན་པའི་ལུས་ངག་གི་རྣམ་འགྱུར་དང་ཆ་ལུགས། ཆོས་ཀྱི་བྱིན་རླབས་འཐུལ་བའི་བསྟོད་དབྱངས་དང་ཤིས་ཚིག དྭངས་གཙང་རང་གཤིས་དང་མ་བཅོས་སྤྱོད་བཟང་བཅས་ཀྱིས་རང་རིགས་ལ་ཕུལ་བའི་བྱ་གཞག་འདི་ནི་ང་ཚོའི་ལོ་རྒྱུས་ཀྱི་རྡོ་རིང་ལ་གཏན་དུ་འགོད། ད་དུང་ཁྱེད་ཀྱིས་བློ་སྤོབས་དང་མཁྱེན་དཔྱོད་ཡངས་མོས། “གྲངས་ཉུང་མི་རིགས་ཀྱི་རིག་གནས་དེ་འཛམ་གླིང་སྤྱིའི་རིག་གནས་རེད།” དང་། “ངས་གླུ་ལེན་པ་ནི་གཞན་ལ་ཕན་འདག་ཕྱིར་ཡིན་” ཞེས་དྲིས་ལན་འདེབས་གནང་བའི་སྡོམ་ཚིག་འདི། ཁྱེད་ཀྱིས་རང་རིགས་ལ་བཅངས་བའི་ལྷག་བསམ་དང་། ཁྱེད་ཀྱི་ཐུགས་གཤིས་སུ་ཀུན་སྙོམས་འགན་ཁུར་གྱི་གཟུགས་བརྙན་ཆེས་གསོན་ཉམས་དོད་ཤོས་དེ་ཡིན་པས་སུས་ཀྱང་གསུབ་ཐབས་བྲལ་བར་དུས་ནམ་ཡང་གནས་པར་ངེས།། །།

༢༠༡༣ ༨ ༢༨ ཉིན་ཀླུ་རྒྱལ་སྟག་རྩེ་འམ་གངས་ཆབ་དག་མ་ནས།