ཡེ་ཤེས་སྒྲོལ་མ།
མདངས་མེད་ཀུ་རེའི་རྩེད་མཚར་ཞིག་གིས་ཁྱེད་ཀྱི་ཚིག་རིས་ང་ལ་ཕོག།
བརྩེ་བའི་རྨི་ལམ་སྒྱུ་མའི་ཞིང་དུ་ང་ཡི་རྒྱུ་བ་ནང་དུ་བཀུགས།།
མི་ཚོགས་འདུ་འཛོམས་འཚུབ་ཆའི་གྲོང་བརྡལ་ཆུང་ཆུང་ཞིག་གི་སྲང་ལམ་ནས།།
ཉི་ཚེ་ཙམ་གྱི་གླེང་མོལ་བྱེད་སྐབས་འཛུམ་མདངས་བཅོས་མའི་མིག་ཟུར་གཡོ།།
དགའ་བའི་དངོས་པོ་བསླུ་བའི་གཡོག་ཐུམ་སེར་པོའི་སྒམ་ཆུང་ནང་དུ་བཅུག།
འཛོམས་པའི་ཚིག་གསུམ་ཕྱི་རུ་མི་མངོན་ནང་དུ་མི་འདོད་དམ་ལ་བཏགས།།
ནམ་ཡང་ལྐོག་གྱུར་བྱེད་པོའི་དབྱངས་རིས་ཁ་བཏགས་དཀར་པོས་གཡོགས་ཤིང་བཏུམ།།
སྙིང་ནས་རྒྱུ་བའི་ཁྲག་གི་ངོ་བོ་རྣག་དང་ཆུ་སེར་མ་ཡིན་ནམ།།
དགའ་སྐྱོ་འདྲེས་མའི་སྙིང་གི་འཕར་ལྡིང་ལྷོག་ལྷོག་འཕྱུར་བའི་ཆུ་ཚན་བཞིན།།
དུངས་པའི་ཐ་སྙད་སྙན་པོར་སྤྱད་ནས་གཡོ་དང་ངན་ཇུས་གོས་སུ་བཀླུབས།།
འཕྲུལ་སྣང་འོད་གོར་ཞིག་གིས་སེམས་པའི་ཡིད་དབང་རིམ་གྱིས་སྤྲོ་བར་བྱས།།
དུངས་པའི་རྣམ་པས་ཐོག་ཁང་དམར་པོ་རྔམ་གནག་རྒྱ་མཚོའི་ཀློང་ཏུ་བརྩེགས།།
༡༢།༠༤།༢༠༡༣