གནས་ཚུལ་མཁོ་གཏོང་བ་རྨོག་རུ་བསྟན་པ།
བོད་མི་མང་སྤྱི་འཐུས་ལྷན་ཚོགས་ཀྱིས་བཀོད་ཁྱབ་གནང་བའི་རྒྱ་གར་བྱང་ཕྱོགས་མངའ་སྡེ་ཁག་ནང་ཞུ་གཏུགས་ལས་འགུལ་བ་རྣམས་ཕྱི་ཚེས་༡༣ ཉིན་གྷོ་ར་པོར་གྲོང་ཁྱེར་ནང་འབྱོར་ཏེ་དཔོན་རིགས་མཇལ་འཕྲད་དང་། གསར་འགོད་གསལ་བསྒྲགས། རྒྱལ་གཅེས་དཔའ་བོ་དཔའ་མོ་རྣམས་པར་གདུང་སེམས་མཉམ་བསྐྱེད་ཀྱི་ལས་འགུལ་བཅས་སྤེལ་འདུག
བྱང་ཕྱོགས་ཞུ་གཏུགས་ལས་འགུལ་བ་རྣམས་གྷོ་ར་པོར་གྲོང་ཁྱེར་དུ་འབྱོར་ཏེ་རྒྱ་གར་དབུས་གཞུང་གི་གྲོས་ཚོགས་འཐུས་མི་དང་། གུ་རོང་ན་ཐི་དགོན་པའི་བླ་ཆེན་ཡོ་གེ་ཨ་ཏེ་ཏེ་ན་ཏི་མཆོག་དང་། རྫོང་ཁག་དྲུག་གི་སྤྱི་ཁྱབ་རྫོང་དཔོན་དེར་ར་བན་དར་ནེ་ཏི་སོགས་དང་མཇལ་ཏེ་བོད་དོན་ཞུ་གཏུགས་གནང་ཡོད་པ་དང་། ཉིན་རྒྱབ་ཆུ་ཚོད་གསུམ་པའི་སྟེང་གསར་འགོད་པ་བཞི་བཅུ་ལྷག་ཅིག་འཛོམས་སར་བོད་དོན་སྐོར་གྱི་གསར་འགོད་གསལ་བསྒྲགས་གནང་སྟེ་དྲི་བ་དང་དྲི་ལན་གནང་ཡོད་འདུག
ཕྱི་དྲོ་ཆུ་ཚོད་ལྔ་བའི་སྟེང་ས་གནས་ཡོད་ཀྱི་སུལ་ཚོང་བ་བརྒྱ་ལྷག་དང་ལྷན་བོད་བསྟན་སྲིད་ཆེད་སྐུ་ལུས་མཆོད་འབུལ་གནང་བའི་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་བསྐྱེད་ཀྱི་སྣང་གསལ་མཆོད་འབུལ་དང་། མྱ་ངན་གུས་འདུད་ཀྱིས་དྲན་གསོ་སོགས་གནང་ཡོད་འདུག
དེ་རྗེས་ཚོགས་ཆུང་གི་ཚོགས་གཙོ་ཟླ་བ་ཚེ་རིང་སོགས་ཀྱིས་མི་མང་ལ་གསུང་བཤད་མདོར་བསྡུས་གནང་བ་དང་། མི་མང་གིས་རང་མོས་དགོངས་ཚུལ་ཕུལ་བ་སོགས་བསམ་ཚུལ་བགྲོ་གླེང་གནང་ཡོད་པ་རེད།