གསང་གྲོལ་གྱིས།
ཉེ་ཆར་ཨེ་ཇེབ་གཙོས་ཨ་རབ་རྒྱལ་ཁབ་ཁག་ཏུ་བྱུང་བའི་མེ་ཏོག་མོ་ལིའི་ཧ་གསར་བརྗེ་ཡི་ཤུགས་རྐྱེན་དང་དྲི་ངད་དེ་རྒྱ་ནག་ནང་ཁྱབ་བཞིན་ཡོད་འདུག་ལ། རྒྱ་ཡིག་གསར་ལམ་ཁག་ཏུ་བརྗོད་པ་ལྟར་ན། རྒྱ་མི་ཚོའི་དྲ་རྒྱ་དང་ལག་ཁྱེར་ཁ་པར་གྱི་འཕྲིན་ཐུང་བརྒྱུད་དེ་གྲོང་ཁྱེར་ཁག་༡༣ནང་དུས་གཅིག་ཏུ་འདུ་འཛོམས་བྱས་ཏེ་རང་དབང་དང་མང་གཙོའི་དགོས་འདུན་ཆེད་སྐད་འབོད་ཀྱི་ལས་འགུལ་སྤེལ་རྒྱུའི་བརྡ་ཁྱབ་བཏང་ཡོད་འདུག དེ་རིང་ཕྱི་ཟླ་༢ཚེས་༢༠གཟའ་ཉི་མའི་ཆུ་ཚོད་༢ པ་ཡས་མས་སུ་རྒྱ་ནག་གྲོང་ཁྱེར་པེ་ཅིན་གྱི་བང་ཧྥུ་ཅང་སྲམ་ལམ་དུ་ཡོད་པའི་McDonald’s
ཟ་ཁང་མདུན་དུ་མི་གྲངས་༣༠༠ལྷག་འདུ་འཛོམས་ཀྱིས་སྐད་འབོད་ལས་འགུལ་སྤེལ་ཡོད་འདུག་ལ་ཉེན་རྟོག་པའི་མི་མང་པོ་འཇུ་བཟུང་བྱས་ཏེ་ཁྲིད་ཡོད་འདུག གཞན་གྲོང་ཁྱེར་ཧྲང་ཧེ་ཡི་མི་དམངས་ཐང་ཆེན་ནས་འདུ་འཛོམས་སྐབས་མི་གསུམ་འཇུ་བཟུང་བྱས་ཏེ་ཁྲིད་ཡོད་འདུག ཉེ་ཆར་རང་༸གོང་ས་མཆོག་དང་གླེང་མོལ་གནང་མཁན་རྒྱ་ནག་གི་ཁྲིམས་རྩོད་པ་གྲགས་ཅན་ཅང་ཐེན་ཡོན་དང་ཐིན་པོ་ལགས་གཉིས་ཉེན་རྟོགས་པའི་ཁྲིད་དེ་ད་ཆ་གར་ཡོད་ཤེས་ཀྱི་མི་འདུག་ལ། སྤྱི་མང་ཐོབ་ཐང་རྩོད་ལེན་མཁན་མི་གྲངས་བརྒྱ་ལྷག་རྒྱ་ནག་གཞུང་གིས་བཀག་ཉར་བྱས་ཡོད་འདུག
ཁུངས་ལྡན་གནས་ཚུལ་ཁག་ལ་གཤམ་ནས་གཟིགས།
http://online.wsj.com/article/SB10001424052748703498804576156203874160350.html?mod=WSJ_hp_MIDDLETopStories
http://www.boxun.com/
