སྙན་བཟང་གཡུང་དྲུང་ཚེ་རིང་།
———–
གདོང་དམར་ཤ་ཟའི་རྒྱལ་ཁམས་ཉམས་པས་གངས་རིའི་གནམ་ས་གློ་བུར་ཉིད་དུ་ཁྲག་གིས་བསྒོས།།
ཆོལ་གསུམ་མི་ཡིས་ཤུགས་རིང་འབྱིན་བཞིན་ལོ་ཟླའི་བར་ཐག་སྡུག་རྩུབ་སྒྱུ་མའི་ཀློང་དུ་བསྲིངས།།
དུད་འགྲོ་རྟ་འཚེར་གཡང་དཀར་འབའ་ལྡིར་ནོར་གནག་ངུར་བས་འདབ་ཆགས་གནམ་ནས་ས་ལ་ལྷུང་།།
ཉེ་དུས་ལྗོངས་འདིའི་གདུང་བ་མ་བཟོད་དཔའ་བོ་དཔའ་མོ་མ་ཤི་སྤོབས་པས་སྲང་ལ་བརྒྱུགས།།
གཅེས་པའི་ལུས་སྲོག་དཔལ་འབར་ཟོལ་གྱིས་དྲག་ཏུ་སྦར་བཞིན་གཡུ་འབྲུག་གདོང་ལ་མེ་ཡིས་རྒོལ།།
གནམ་ས་གཡོ་བའི་ཀྭི་སྒྲ་རེ་རེར་ང་རོ་རྒོད་པས་ཡངས་པའི་གནམ་མཁའ་ཡམ་ཡོམ་བསྒུལ།།
ད་དུང་དམར་ནག་འབྲུག་གི་སྡེར་མོ་རྔམ་པས་གདེངས་བཞིན་གཡག་རྒོད་སྙིང་ལ་སྔངས་སྐྲག་སྐྱེད།།
ཕྱོགས་བཞིའི་ཁེངས་པ་རྭ་ཡིས་བསྙིལ་བའི་གཡག་རྒོད་ཚོགས་ཀྱིས་ད་ནི་ཞི་བདེ་ལྷ་ལ་བཅོལ།།
ཚུལ་འདི་འཇིག་རྟེན་མིག་གིས་མ་མཐོང་རྨི་ལམ་ཞིང་དུ་རབ་རིབ་སྒྱུ་མའི་ལྟད་མོར་གཡེང་།།
དེ་ལྟ་ནའང་ཁྱེད་དག་གཟུགས་བརྙན་གཞར་ཡང་ལོ་རྒྱུས་རིང་མོའི་ྐློང་ནས་ཡལ་མི་འགྱུར།།
ཤུགས་ཀྱིས་གྱེར་བའི་སྒྲ་ཆེན་གདུང་འབོད་ཕྱི་རབས་ཚ་རྒྱུད་གཉིས་ལས་སློང་བའི་གྲོགས་སུ་ངེས།།