གནས་ཚུལ་མཁོ་གཏོང་བ་སངས་རྒྱམ།
ཁ་སང་སྤྱི་ཚེས་༡༧་ཉིན་གྱི་དགོང་དྲོར་ཀ་ལོན་སྦུག་ཏུ་ས་གནས་བུད་མེད་དང་གཞོན་ནུ་གཉིས་ཀྱིས་གོ་སྒྲིག་གི་འོག་ཏུ་སེར་སྐྱ་མི་དམངས་བརྒྱ་ལྷག་གིས་རྒྱལ་གཅེས་དཔའ་བོ་རྟ་མགྲིན་ཐར་ལགས་ཀྱི་ཆེད་དུ་མར་མེ་ཁྲོམ་སྐོར་གནང་ཡོད། ཕྱི་ཚེས་༡༥་ཉིན་ལ་མདོ་སྨད་གཅན་ཚ་རྫོང་དུ་རང་ལོ་༦༤་ཡིན་པའི་བོད་རིགས་འབྲོག་པ་རྟ་མགྲིན་ཐར་ལགས་ཀྱིས་རྒྱ་ནག་གི་དྲག་གནོན་ལ་ངོ་རྒོལ་དང་རྒྱལ་དབང་རིན་པོ་ཆེ་རང་ཡུལ་དུ་ཕེབས་ཐུབ་པ་དང་བོད་རྒྱལ་ཁབ་ཀྱི་རང་ས་ཟིན་པའི་ཆེད་དུ་རང་ལུས་མེ་མཆོད་དུ་ཕུལ་ནས་འདས་གྲོངས་སུ་ཕྱིན་ཡོད་པ་རེད། དེར་བརྟེན། རྒྱ་གར་རྡ་རམ་ས་ལ་གཙོ་བོར་གྱུར་བའི་ས་གནས་ཁག་ཏུ་ཁོང་གི་ཆོད་སེམས་ལ་རྒྱབ་སྐྱོར་དང་རང་ལུས་མེ་མཆོད་དུ་ཕུལ་བར་གདུང་སེམས་མཉམ་སྐྱེད། ཁོང་གི་བཟའ་ཟླ་ཆོས་མོ་ཐར་དང་། བུ་རྟ་མགྲིན་སྐྱབས་དང་བུད་ཕྲེང་རྡོ་རྗེ་གཉིས། བུ་མོ་རྡོ་རྗེ་འཚོ་བཅས་ལ་སེམས་གསོ་བཅས་བྱེད་པའི་ཆེད་དུ་མར་མེ་ཁྲོམ་སྐོར་དང་དགོན་པ་ཁག་ཏུ་མཆོད་འབུལ་སྨོན་ལམ་འཚོགས་བཞིན་པ་ལ་བརྟེན་ནས། རྒྱ་གར་བྱང་ཤར་ས་ཁུལ་གྱི་ཀ་རྡོར་སྒང་གསུམ་དུའང་ལས་འགུལ་དེ་སྤེལ་བཞིན་པའི་གྲས་སུ། ཁ་སང་དགོང་དྲོར་ཀ་ལོན་སྦུག་ཏུའང་ས་གནས་བུད་མེད་དང་གཞོན་ནུ་གཉིས་ཀྱིས་གོ་སྒྲིག་གི་འོག་ཏུ་མི་གྲངས་བརྒྱ་ལྷག་གིས་མར་མེ་ཁྲོམ་སྐོར་གནང་ཡོད། མར་མེ་ཁྲོམ་སྐོར་ཀྱི་ལས་འགུལ་དེ་ནི་ཀ་སྦུག་གཡུ་ལོ་བཀོད་པའི་རྒན་གསོ་ཁང་དུ་སེར་སྐྱ་མང་ཚོགས་མཉམ་མཛོམས་གནང་ནས་ཚད་མེད་ཡོན་ཏན་མ་དང་བདེན་ཚིག་སྨོན་ལམ་དབྱངས་རྟ་དང་བཅས་འུར་འདོན་དང་སྦྲགས། མྱ་ངན་གྱི་ངག་བཅད་སྐར་མ་གཅིག་གི་རིང་མཛད་ཅིང་བྱང་ཆུབ་སེམས་མཆོག་མ་ཞལ་འདོན་དང་འབྲེལ་ནས་འགོ་འཛུགས་གནང་སྟེ་ཀ་སྦུག་གྲོང་ཁྱེར་གྱི་སྲང་ལམ་ཁག་ཏུ་གོམ་བགྲོད་ཀྱིས་མར་མེ་ཁྲོམ་སྐོར་གནང་ཡོད། ད་ཐེངས་ཀྱི་མར་མེ་ཁྲོམ་སྐོར་ཀྱི་ལས་འགུལ་འདིའི་ནང་དུ་ཀ་སྦུག་ཐར་བ་ཆོས་གླིང་དགོན་པ་དང་སྲད་རྒྱུད་དགོན་པ་དང་ཟེ་དཀར་དགོན་པ་བཅས་ཀྱི་དགེ་འདུན་པ་དང་སེམས་ཤུགས་ལྡན་པའི་མང་ཚོགས་དོན་གཉེར་བ་རྣམས་མཉམ་ཞུགས་གནང་ནས་རྒྱལ་གཅེས་དཔའ་བོ་རྟ་མགྲིན་ཐར་ལགས་དང་ཁོང་གི་ནང་མི་ཡོངས་ལ་གདུང་སེམས་མཉམ་སྐྱེད་དང་རྗེས་དྲན་མྱ་ངན་ཞུས་ཏེ་མར་མེ་ཁྲོམ་སྐོར་དེ་མཇུག་སྡུད་གནང་ཡོད། རྟ་མགྲིན་ཐར་ལགས་སྐུ་འདས་གྲོངས་སུ་མ་ཕྱིན་པའི་སྔོན་དུ་ཁོང་གིས་རང་གི་སྐུ་པར་ཞིག་དང་ཞལ་ཆེམས་ཀྱི་ཡི་གེ་ཞིག་ཉིན་དེའི་ཞོགས་པར་རང་གི་ཉལ་ཁྲིའི་སྟེང་དུ་བཞག་ནས་རང་ཉིད་ཀྱི་སྐེད་པ་ལ་རྡོ་སྣུམ་དང་འབྲེལ་ནས་སྲིང་བལ་མང་བོ་དཀྲིས་པ་དང་གྲོད་ཁོག་ནང་དུ་རྡོ་སྣམ་མང་བོ་འཐུང་རྗེས་གཅན་ཚ་རྫོང་དྲག་ཆས་ཉེན་རྟོག་ལས་ཁུངས་ཀྱི་སྒོ་འགྲམ་དུ་རང་ལུས་ལ་མེ་སྦར་ནས་རང་སྲོག་བློས་བཏང་སྟེ་རྒྱ་ནག་གིས་བོད་དབང་བསྒྱུར་ལ་ངོ་རྒོལ་གནང་ཡོད། ཁོང་གིས་ཞལ་ཆེམས་ཀྱི་ཡི་གེ་ནི་འདི་ལྟར་དུ། ༼བླ་མ་ཡི་དམ་དཀོན་མཆོག་གསུམ་ལ་སྐྱབས་སུ་མཆིའོ། འཛམ་གླིང་ཞི་བདེ་ཡོང་བའི་རེ་བ་དང་། རྒྱལ་དབང་རིན་པོ་ཆེ་རང་ཡུལ་དུ་ཕེབས་པའི་རེ་འདུན། བོད་རྒྱལ་ཁབ་རང་ས་ཟིན་པའི་དོན་དུ་ངས་རང་ལུས་མེ་མཆོད་དུ་འབུལ་རྒྱུ་ཡིན།༽ཞེས་བཀོད་ཡོད།