བཀྲ་ཤིས་དོན་འགྲུབ།
མཁའ་མཐའ་རུ་བསྲིངས་པའི་ཞིང་ཐང་ཡུད་དང་ཡུད་ཀྱིས་བརྒལ་ནས
ཐར་ཐོར་དུ་སྐྱེས་པའི་བེེཏའི་སྡོང་པོ་དག་རྒྱབ་ནས་རྒྱབ་ཏུ་གཡུག་གིན
རི་ཐང་མང་པོའི་ཕ་རོལ་གྱི་བྲག་རྩེ་མཐོན་པོ་ནས་ཤུགས་དྲག་པོས་ཟགས་ཀྱིན་པའི
ཀ་བེ་རིའི་རྦབ་ཆུའི་ཟེགས་མ་ལ་བལྟས་ཡོང་དུས
ལོ་རྒྱུས་རིང་མོའི་གཞུང་ལམ་ཁྲོད་དུ
མངའ་སྡེ་གཉིས་ཀྱི་ཆུ་རྩོད་ཀྱི་འཐབ་འཁྲུག་དག
གློག་བརྙན་ལ་བལྟས་པ་བཞིན
རྦབ་ཆུའི་བཞུར་ཉམས་དང་བསྡོངས་ནས
མཚམས་རེར་དྲག་ཅིང་ལན་རེར་དལ་པོས
བདག་གི་ཡིད་ཡུལ་དུ
གསལ་ལྷང་ལྷང གསལ་ལྷང་ལྷང་བྱེད
རྦབ་ཆུའི་ཤག་སྒྲས རྦབ་ཆུའི་ཟིལ་ཤུགས་ཀྱིས
རྒྱ་ཐང་དུ་འཁྱམ་པའི་མི་རྐྱང་གི་སེམས་པ
རོལ་དབྱངས་ཤིག་གི་འཕར་འཇགས་དང་འདྲ་བར
དགའ་སྐྱོ་གང་རུང་གི་བར་གསེང་ནས
གངས་རི་གནམ་ལ་སྙེག་པའི་རྔམ་ཟིལ་གྱིས་ཁེངས་པའི
རྩྭ་ཐང་གིས་ས་གཞི་བཀབ་པའི་སེམས་ཀྱི་ཉི་ཟླ་དེར
ཆུང་བྱིས་དུས་ཀྱི་དྲན་གདུང་དེ་རུམ་དུ་ཁྲིད་སོང
སེམས་འགུལ་བྱེད་ཀྱི་རྫི་གླུ་དེ་ཉན་དུ་ཁྲིད་སོང
སྤུན་ན་ཟླ་ཡི་བརྩེ་བ་དེར་གླན་དུ་ཁྲིད་སོང
ཚོར་བས་བཟི་བཞིན་བཟི་བཞིན་དུ
དྲན་པས་གདུང་བཞིན་གདུང་བཞིན་དུ
སེམས་པ་སྨྲེང་བཞིན་སྨྲེང་བཞིན་དུ … …